༢༠༡༦ ཟླ་ ༥ ཚེས་ ༩ རེས་གཟའ་ཟླ་བ།
༄༅། །འདི་གར་ཤེས་རིག་ལས་ཁུངས་ནས་བཏང་གནས་ནང་འཁོད་དོན། ཤེས་རིག་ལས་ཁུངས་ཀྱི་གོ་སྒྲིག་འོག་ས་རཱ་བོད་ཀྱི་མཐོ་རིམ་སློབ་གཉེར་ཁང་དུ་འགྲོ་བཞིན་པའི་གཞི་རིམ་འོག་མའི་དགེ་རྒན་འོས་སྦྱོང་བ་རྣམས་ལ་ཕྱི་ལོ་ ༢༠༡༦ ཟླ་ ༥ ཚེས་ ༧ ནས་ ༡༡ བར་ཉིན་ལྔའི་རིང་བྱིས་པའི་ཀློག་རྩལ་གོང་མཐོར་གཏོང་ཐབས་ཀྱི་ཟབ་སྦྱོང་ཞིག་གོ་སྒྲིག་ཞུས་ཡོད། དེ་ཡང་ཤེས་རིག་ཚོགས་ཆེན་དང་བོད་རིགས་དགེ་རྒན་ཚོགས་འདུ་སོགས་ཀྱི་གྲོས་ཆོད་ཁག་གི་ནང་། བཙན་བྱོལ་བོད་མིའི་སློབ་གྲྭ་ཁག་གི་དགེ་རྒན་རྣམས་ལ་ཟབ་སྦྱོང་དང་སྦྱོང་བརྡར་ཇི་འདྲ་ཞིག་གོ་སྒྲིག་ཞུ་རུང་། སློབ་ཁྲིད་གནང་མཁན་བོད་རིགས་ཁྱད་ལས་པའམ་ཉམས་མྱོང་ཅན་གྱི་དགེ་རྒན་ལས་ཐོག་གམ་དགེ་ཟུར་སོགས་གདན་ཞུ་ཐུབ་ན་དགེ་མཚན་ཆེ་ལུགས་ཀྱི་དགོངས་འཆར་ལན་མང་བྱུང་བ་ལྟར། ཐེངས་འདིའི་གཞི་རིམ་འོག་མའི་དགེ་འོས་པ་རྣམས་ལ་བྱིས་པའི་ཀློག་རྩལ་གོང་མཐོར་གཏོང་ཐབས་དང་འབྲེལ་བའི་ཟབ་སྦྱོང་སློབ་ཁྲིད་གནང་མཁན་ནི། སྦེལ་ཀོབ་སཾ་བྷོ་ཊ་ཀཻ་ལཤ་པུ་རའི་ཨིན་དགེ་བསོད་ནམས་གངས་བཟང་ལགས་ཡིན་པ་དང་། ཁོང་མོ་ཐེངས་དང་པོར་ཤེས་རིག་ལས་ཁུངས་ཀྱིས་གོ་སྒྲིག་ཞུས་པའི་བྱིས་པའི་ཀློག་རྩལ་གྱི་ཟབ་སྦྱོང་ནང་མཉམ་ཞུགས་གནང་མཁན་གྱི་ངོ་བོར་ཚོགས་ཞུགས་གནང་བ་དང་།
དེ་ནས་ཁོང་མོའི་ཤེས་རྒྱ་དང་དོ་དབྱིངས་བཅས་ལ་བརྟེན་ནས་འབྱུང་འགྱུར་བོད་རིགས་དགེ་རྒན་རྣམས་ལ་བྱིས་པའི་ཀློག་རྩལ་གོང་མཐོར་གཏོང་ཐབས་ཀྱི་ཟབ་སྦྱོང་སློབ་ཁྲིད་གནང་མཁན་ཞིག་ཡོང་བར་དམིགས་ཡུལ་བཟུང་སྟེ། དེ་རྗེས་སུ་བྱིས་པའི་ཀློག་རྩལ་གྱི་ཟབ་སྦྱོང་བརྒྱད་ལྷག་ལ་བཅར་ཏེ་ཌོག་ཊར་ལཏིཀཱ་གུཔྟཱ་ལགས་ཀྱི་སྐད་སྒྱུར་གྱི་ཕྱག་རོགས་ཞུས་ཏེ་ཉམས་མྱོང་གང་ལེགས་ཡོད་པ་མ་ཟད། ད་ཆ་ཁོང་མོ་རང་ངོས་ནས་གོང་གསལ་ཟབ་སྦྱོང་སློབ་ཁྲིད་ཐུབ་པའི་གདེང་སྤོབས་གང་ཙམ་ཞིག་ཐོབ་ཡོད་པ་བེད་སྤྱོད་ཐུབ་ཐབས་སུ་ཕྱི་ཟླ་ ༥ ཚེས་ ༧ ཉིན་གྱི་སྔ་དྲོ་ཆུ་ཚོད་ ༩།༣༠ ཐོག་ས་རཱ་མཐོ་སློབ་ཏུ་ཟབ་སྦྱོང་འགོ་འཛུགས་གནང་། ཟབ་སྦྱོང་འགོ་འཛུགས་ཀྱི་ལས་རིམ་འཚོགས་སྐབས་ཤེས་རིག་སྲོལ་རྒྱུན་ཚན་པའི་འགན་འཛིན་ཚེ་རིང་བསམ་གྲུབ་ལགས་ཀྱིས་ཟབ་སྦྱོང་གི་དགོས་དམིགས་དང་། ཟབ་སྦྱོང་འདི་བརྒྱུད་དོན་དངོས་ཐོག་དགེ་རྒན་རྣམ་པའི་སྔར་གྱི་སློབ་ཁྲིད་ཐབས་བྱུས་ལ་ཁ་ཕྱོགས་གསར་པ་ཞིག་བསྟན་རྒྱུར་རྔོ་ཐོགས་པ་ཞིག་བྱུང་ཡོད་པ་མ་ཟད། ལས་གཞི་འདིའི་འོག་ཤེས་རིག་ལས་ཁུངས་ནས་བྱིས་སྒྲུང་ ༨༠ ལྷག་གསར་དུ་བརྩམས་པའམ་ཕབ་སྒྱུར་ཞུས་ཏེ་པར་སྐྲུན་ཞུ་ཆོག་ཡིན་སྐོར་དང་། དེ་བཞིན་བཀའ་ཤག་སྐབས་བཅུ་བཞི་པའི་དགོངས་དོན་ལྟར་ཤེས་རིག་ལས་ཁུངས་ནས་ཤེས་ཡོན་ཡར་རྒྱས་ཀྱི་ལས་འཆར་སྣ་མང་གོ་སྒྲིག་ཞུས་དང་ཞུ་མུས་ཡིན་པ་མ་ཟད། ད་ལྟའི་དགེ་རྒན་འོས་སྦྱོང་བ་རྣམས་ནི་རིང་མིན་དགེ་རྒན་གྱི་ལས་སྒོར་ཞུགས་ངེས་སོང་། སོ་སོའི་སློབ་ཁྲིད་ཀྱི་ཐབས་བྱུས་ལ་བརྟེན་ནས་སློབ་ཕྲུག་རྣམས་ལ་ཤེས་ཡོན་མཁོ་སྤྲོད་ཚད་ལྡན་ཞིག་ཡོང་ཐབས་ཐོག་ལ་སེམས་ཤུགས་བསྐྱེད་དགོས་པ་བཅས་ཀྱི་སྐོར་གསུངས། དེ་རྗེས་ཟབ་ཁྲིད་པས་རང་ཉིད་ཀྱི་སློབ་སྦྱོང་གི་བརྒྱུད་རིམ་དང་ལས་ཀའི་ཉམས་མྱོང་སོགས་ངོ་སྤྲོད་མདོར་བསྡུས་དང་སྦྲགས་ཟབ་སྦྱོང་གི་ལས་རིམ་དངོས་སུ་འགོ་འཛུགས་ཞུས་ཡོད།།
