༢༠༡༦ ཟླ་ ༥ ཚེས་ ༡༣  རེས་གཟའ་པ་སངས།

༄༅། །ཕྱི་ལོ་ ༢༠༡༦ ཟླ་ ༥ ཕྱི་ཚེས་ ༡༢ ཉིན་གྱི་སྔ་དྲོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཉི་ཧོང་གི་གྲོང་ཁྱེར་ཨོ་ས་ཀར་རྟེན་གཞི་བྱས་པའི་རྒྱལ་སྤྱིའི་ཚོགས་ཁང་ཆེན་མོའི་ནང་ཉི་ཧོང་དང་། ཐེ་ཝན། སོག་པོ། སིན་གྷ་པུར། ཀོ་རི་ཡ་སོགས་ཀྱི་དད་ལྡན་ཆོས་ཞུ་བ་ ༢༧༠༠ ཙམ་ལ་རྒྱལ་སྲས་ཆེན་པོ་ཞི་བ་ལྷས་མཛད་པའི་སྤྱོད་འཇུག་ཆེན་མོའི་བཀའ་ཆོས་ཉིན་གསུམ་པ་དབུ་འཛུགས་མ་མཛད་གོང་ལམ་རིམ་གྱི་འགྲོ་སྟངས་སྐོར་བཀའ་སློབ་སྩལ་དོན། དེ་རིང་ལམ་རིམ་གྱི་འགྲོ་སྟངས་སྐོར་ཏོག་ཙམ་བཤད་དགོས་དྲན་བྱུང་། ཁ་སང་བཤད་པ་བཞིན་དུས་རབས་བདུན་པ་དང་བརྒྱད་པ། ལྷག་པར་དུས་རབས་བརྒྱད་པ་ནས་བཟུང་མཁན་ཆེན་ཞི་བ་འཚོ། ནཱ་ལེནྡྲའི་མཁས་པའི་གཙུག་རྒྱན་ཆགས་ཡོད། ཁོང་གིས་ནཱ་ལེནྡྲའི་ཆོས་བརྒྱུད་དྲི་མ་མེད་པ་ཞིག་ཚུགས་པ་རེད། དེ་ནས་མི་རབས་ཁ་ཤས་ཕྱིན་པའི་རྗེས་སུ་ཆོས་རྒྱལ་མངའ་བདག་ཁྲི་རལ་པ་ཅན་གྱི་སྐབས་དེ་དག་ནས་བོད་སིལ་བུར་ཆགས། བསྟན་པ་ཉམས་ཆག་གང་ཙམ་ཕྱིན་པ་རེད།

དེ་ནས་མངའ་རིས་ཁུལ་དུ་མངའ་རིས་མཐོ་ལྡིང་ནས་ཆོས་རྒྱལ་གྱི་གདུང་རྒྱུད་གཅིག་བྱུང་བ་རེད། ཁོང་གི་ཡབ་མེས་ཚོའི་སྐབས་ནས་རྒྱ་གར་ནས་ཚུར་མཁན་ཆེན་ཞི་བ་འཚོ། སློབ་དཔོན་པདྨ་སམ་བྷ་བ་གདན་འདྲེན་གནང་ནས་དེ་ཚོའི་ཐོག་ནས་བསྟན་པ་ཚུགས་པ་འདི་ཉམས་ཆག་ཕྱིན་པ་ཞིག་ཡིན་སྟབས་ཁོང་གིས་རྒྱ་གར་ནས་སློབ་དཔོན་ཞིག་གདན་ཞུ་གནང་དགོས་ཀྱི་འདུག་དགོངས་ནས་དེ་དུས་ནཱ་ལེནྡྲའི་ཉམས་ཆག་འགྲོ་རྒྱུའི་མཚམས་ལྟ་བུ་ཞིག་ཡིན་པ་རེད། བྲི་ཀ་མ་ལ་ཤི་ལ་ཞེས་པ་དེ་དར་རྒྱས་ཆེན་པོ་ཆགས་པའི་སྐབས་ཤིག་ཡོད་པ་འདྲ། གཞི་རྐང་ཇོ་བོ་རྗེ་ནཱ་ལེནྡྲར་འཁྱུག་ཙམ་ཕེབས་ཡོད་པ་འདྲ།  གཙོ་བོ་བྲི་ཀ་མ་ཤི་ལར་བཞུགས་ནས་དེའི་ཚེ་དེའི་དུས་ཀྱི་རྩོད་མེད་ཡོངས་གྲགས་ཀྱི་མཁས་པ་ཞིག་ཆགས་ཡོད། བོད་རང་ལ་དེའི་ཚེ་དེའི་དུས་ལོ་ཆེན་རིན་ཆེན་བཟང་པོ་ཞེས་མངའ་རིས་ཕྱོགས་ནས་ཡིན་ཞིང་། ཧ་ཅང་གི་མཁས་པ་ཆེན་པོ་རེད་འདུག ཇོ་བོ་རྗེ་མངའ་རིས་མཐོ་ལྡིང་ལ་ཕེབས་ནས་མངའ་རིས་ཆོས་རྒྱལ་གྱིས་བོད་སྤྱི་ལ་ཕན་པའི་ཆོས་ཤིག་གསུང་རོགས་གནང་ཞེས་ཞུས་ནས་བྱང་ཆུབ་ལམ་སྒྲོན་མཛད་པ་རེད། ལམ་སྒྲོན་གྱི་དབུ་དེར་སློབ་མ་བཟང་པོ་བྱང་ཆུབ་འོད་ཀྱིས་བསྐུལ་བགྱི་བས་ཞེས་གསུངས་ནས་ལྷ་བླ་མ་ཡེ་ཤེས་འོད་ཇོ་བོ་རྗེ་གདན་འདྲེན་ཞུ་ཆེད་མཐར་སྐུ་སྲོག་ཤོར་བ་རེད་དེ་ཁོང་གི་གཅུང་པོ་བུང་ཆུབ་འོད་ཀྱིས་མཇུག་བསྐྱངས་གནང་ནས་ཇོ་བོ་རྗེ་ཡིས་ལམ་སྒྲོན་མཛད།

ལམ་སྒྲོན་གྱི་འཁྲིད་སྟངས་དེ་འབྲོམ་སྟོན་པས། ངོ་མཚར་བཀའ་ནི་སྡེ་སྣོད་གསུམ་པོ་སྟེ། །དམ་པ་སྐྱེས་བུ་གསུམ་གྱི་མཛད་པ་ཡིས། །བཀའ་གདམས་རིན་ཆེན་གསེར་གྱི་འཕྲེང་བ་འདི། །འགྲོ་བ་གང་གིས་འབྲངས་ཀྱང་དོན་ཡོད་འགྱུར། །ཞེས་གསུངས་ཡོད། རྒྱལ་བའི་བཀའ་དང་བསྟན་བཅོས་དེ་དག་གི་བརྗོད་བྱ་བསླབ་པ་གསུམ། བརྗོད་བྱའི་ཆ་ནས་སྡེ་སྣོད་གསུམ། དེ་ལྟ་བུའི་སྡེ་སྣོད་གསུམ་གྱི་དོན་བསྟན་ཐོག་གཅིག་ལ་གང་ཟག་གཅིག་གིས་སྔ་ཕྱི་རིམ་པས་ཉམས་ལེན་བྱེད་རྒྱུ་ཡོད་པ། དཔེར་ན་མངོན་རྟོགས་རྒྱན་ལྟ་བུར་ཆ་བཞག་ན། བསྟན་ཐོག་གཅིག་ལ་ཉམས་ལེན་བྱེད་སྟངས་ཐད་ཀར་གོ་རིམ་བསྒྲིགས་ནས་གསུང་ཡོད་མ་རེད། ལམ་རིམ་གྱི་རྣམ་མཁྱེན་བསྒྲུབ་པའི་ལམ་རིམ་པ་བཞིན་དུ་ཉམས་ལེན་བྱེད་ཆོག་པ་ཞིག་ཡིན་སྟབས། ལམ་རིམ་ཞེས་མཚན་དེ་དེ་འདྲ་བྱས་ནས་བྱུང་བ་རེད། ཇོ་བོ་རྗེས་ལམ་སྒྲོན་མཛད། དེ་མིན་གྱི་ཇོ་བོ་རྗེ་ཡི་གསུང་ཉུང་ངུ་དེ་འདྲ་ཡོད་པ་རེད། ཡོངས་གྲགས་ཁྱབ་བརྡལ་ཆེ་བ་དེ་ལམ་སྒྲོན་ཞེས་པ་དེ་བྱུང་བ་རེད། ཇོ་བོ་རྗེས་ལམ་སྒྲོན་མཛད་ནས་སྐྱེ་བོ་གསུམ་གྱི་ཚེ་འདིའི་སྣང་ཞེན་ལྡོག་རྒྱུ། ཚེ་འདིའི་སྣང་ཞེན་ལྡོག་ནས་ཕྱི་མ་བདེ་འགྲོའི་ལུས་རྟེན་ཐོབ་རྒྱུའི་སྐོར་དེ་སྐྱེས་བུ་ཆུང་ངུའི་སྐོར་དང་། རྣམ་དཔྱོད་ཆེ་ཆུང་དང་ལྷག་བསམ་རྒྱ་ཆེ་ཆུང་གི་ཆ་ནས་སྐྱེས་བུ་ཆུང་ངུ། སྐྱེས་བུ་འབྲིང་། སྐྱེས་བུ་ཆེན་པོ། ཞེས་གསུངས་པ་རེད། དེ་འདྲའི་མངོན་མཐོ་བསྒྲུབ་པའི་ཐབས་ལ་བརྩམས་ནས་ཆོ་ག་ཉམས་སུ་ལེན་རྒྱུ་དེ་ལ་སྐྱེས་བུ་ཆུང་ངུ་ཞེས་དང་། དེ་ནས་སྲིད་པ་མཐའ་དག་སྡུག་བསྔལ་དུ་ལྟས་ནས་ཐར་པ་དོན་དུ་གཉེར་བའི་བསམ་པའི་ཐོག་ནས་གཙོ་བོ་བསླབ་པ་གསུམ་དོན་དུ་གཉེར་བ་ལ་སྐྱེས་བུ་འབྲིང་གི་ཆོ་ག་ཞེས་དང་།

དེ་ནས་བྱམས་པ་དང་སྙིང་རྗེ་རྩ་བར་གྱུར་བའི་བྱང་ཆུབ་ཀྱི་སེམས་ཉམས་སུ་བླངས་ནས་ཕྱིན་དྲུག་གི་ཉམས་ལེན་ཐོག་ནས་རྣམ་མཁྱེན་བསྒྲུབ་པའི་ཆོ་ག་ལ་སྐྱེས་བུ་ཆེན་པོའི་ཆོ་ག་ཞེས་ཁུངས་འདི་ཕལ་ཆེར་སློབ་དཔོན་ཐོགས་མེད་ཀྱིས་སྐྱེས་བུ་གསུམ་གྱི་སྐོར་དེ་ལྟར་གསུངས་ཡོད། གང་ལྟར་སྐྱེས་བུ་རབ་འབྲིང་མཐའ་གསུམ་གྱི་ཐ་སྙད་ཅིག་ཡོད་པ་ཞིག་གི་ཐོག་ནས་མཛད་འདུག མགོན་པོ་ཀླུ་སྒྲུབ་ཀྱི་རིན་ཆེན་འཕྲེང་བ་ལྟ་བུའི་ནང་ལ་སངས་རྒྱས་ཀྱི་ཆོས་དེ་མདོར་བསྡུས་ན་མངོན་མཐོ་བསྒྲུབ་པའི་ཐབས་དང་། ངེས་ལེགས་བསྒྲུབ་པའི་ཐབས་བཅས་གཉིས་སུ་སྡེ་མཚན་ཕྱེ་ཡོད།  མངོན་མཐོ་དང་ངེས་ལེགས་བསྒྲུབ་པ་གཉིས་ཀྱི་ནང་ནས་ངེས་ལེགས་བསྒྲུབ་རྒྱུ་དེར་ཐར་པ་དང་ཐམས་ཅད་མཁྱེན་པའི་གོ་འཕང་བསྒྲུབ་རྒྱུ་གཉིས་སུ་ཕྱེ་ནས་སྐྱེས་བུ་གསུམ་ཞེས་གསུངས་ཡོད། ཇོ་བོ་རྗེས་བོད་ལ་ལམ་སྒྲོན་མཛད་རྗེས་སྔ་འགྱུར་རྙིང་མའི་ཀུན་མཁྱེན་ཀློང་ཆེན་རབ་འབྱམས་པ་མཁས་པ་ཆེན་པོ་རེད། མཁས་གྲུབ་གཉིས་ལྡན་ཁོང་གིས་བསམ་གཏན་ངལ་གསོ། སྒྱུ་མ་ངལ་གསོ། སེམས་ཉིད་ངལ་གསོ་ཞེས། སེམས་ཉིད་ངལ་གསོའི་ནང་ལ་ཁྲིད་སྟངས་དེ་ལམ་རིམ་ནང་ལྟར་བྱས་ནས་ཁྲིད་ཡོད། དེ་ནས་བཀའ་བརྒྱུད་ཆ་བཞག་ན། མཉམ་མེད་དྭགས་པོ་ལྷ་རྗེས་ཐར་རྒྱན་མཛད་ནས་དབུ་འཛུགས་སྟངས་ནི་རིགས་ནས་མར་དབུ་འཛུགས་ཡོད། གང་ལྟར་ལམ་རིམ་ནང་བཞིན་སྐྱེས་བུ་གསུམ་གྱི་ལམ་རིམ་བློ་སྦྱང་སྟངས་གསུངས་ཡོད། ཅེས་སོགས་ཀྱི་སྔོན་འགྲོའི་བཀའ་སློབ་སྩལ་གྲུབ་མཚམས་བཀའ་ཆོས་མུ་མཐུད་སྩལ་ཡོད།

ཉིན་རྒྱབ་ཀྱི་ཆོས་འབྲེལ་མཇུག་མ་བསྒྲིལ་གོང་༸གོང་ས་མཆོག་གིས་བཀའ་སློབ་སྩལ་དོན། སྤྱོད་འཇུག་གི་ལིའུ་ཆ་ཚང་ཕྱིན་མེད། གཙོ་བོ་ང་རང་ཚོས་བསམ་བློ་གཏང་རྒྱུ་རེད། ངོས་ཀྱིས་སྤྱོད་འཇུག་གི་དོན་དག་རོབ་བསྡུས་ཞུས་པ་རེད། ཁྱེད་རང་ཚོས་སྤྱོད་འཇུག་གི་དཔེ་ཆ་དེ་འབྲལ་སྤང་བཞིན་རྒྱུན་དུ་ཉར་ཏེ་སྐབས་རེ་བཀླག་ཙམ་བྱས་ནས་ངོས་ཀྱིས་འགྲེལ་བཤད་བརྒྱབ་པ་དེས་ལྡི་མིག་ལྟ་བུར་ཕྲན་བུ་ཕན་ཐོགས་ཡོང་སྲིད་པ་རེད།

གལ་ཆེ་ཤོས་ཁྱེད་རང་ཚོས་རྒྱུན་དུ་དཔེ་ཆ་དེ་ཉར་ནས་ཡང་ཡང་བལྟ་དགོས།  བལྟས་པ་དེ་ཡང་ལོ་རྒྱུས་ཀྱི་དེབ་བཀླགས་པ་ལྟ་བུ་མིན་པར་དོན་དག་ལ་བསམ་བློ་བཏང་དགོས། དེ་ནས་ཟླ་བ་དང་ལོ་བྱས་ནས་རིམ་པས་གོ་བ་ཟབ་ཏུ་འགྲོ་བ་དང་། ཇི་ཙམ་གྱི་གོ་བ་ཟབ་ཏུ་ཕྱིན་པ་དེས་ཚོད་ཀྱིས་སེམས་ལ་ངེས་པ་ཐོབ་རྒྱུ་དེ་ཡང་ཤུགས་ཆེ་རུ་འགྲོ་རྒྱུ་རེད།  ཇི་ཙམ་གྱིས་ངེས་པ་ཤུགས་ཆེ་རུ་ཕྱིན་པའི་ཚོད་ཀྱིས་སེམས་ལ་འགྱུར་བ་ཐེབས་རྒྱུ་ཞིག་ཏན་ཏན་ཡོང་རྒྱུ་རེད། སེམས་ལ་འགྱུར་བ་ཞེས་པ་དེ་སེམས་ལ་ཕུང་བྱེད་ཀྱི་རྣམ་རྟོག་དེ་དག་ཤུགས་ཆུང་དུ་ཕྱིན་ནས་རང་གཞན་ཀུན་ལ་ཕན་པའི་རང་བཞིན་གྱི་རྟོག་པ་དེ་བྱང་ཆུབ་ཀྱི་སེམས་བསྒོམས་ནས་གཅེས་འཛིན་གཉིས་ཀྱི་སྐྱོན་དང་ཡོན་ཏན་གྱི་ཐོག་བསམ་བློ་གཏང་རྒྱུ་མུ་མཐུད་ནས་ཤུགས་ཆེ་རུ་འགྲོ་བ་ཡོང་གི་རེད།

འདི་སེམས་ལ་ཞོག སང་ཉིན་ཞོགས་པར་སེམས་བསྐྱེད་འདོན་དགོས་བསམ་པ་དྲན་སོང་། ནམ་རྒྱུན་སེམས་བསྐྱེད་ཀྱི་སྔོན་ལ་སོ་ཐར་གྱི་སྡོམ་པ་གང་ཡང་རུང་བ་ཞིག་ཡོད་ན་བྱང་སེམས་ཀྱི་སྡོམ་པ་ཞུ་རྒྱུ་དེ་ཡག་པ་དང་རླབས་ཆེ་བ་ཡོང་གི་རེད། ནམ་རྒྱུན་སྔོན་ལ་དགེ་བསྙེན་བསྒྲུབ་རྒྱུ་མདོར་བསྡུས་ཤིག་བྱེད་ཀྱི་ཡོད། དགེ་བསྙེན་བསྒྲུབས་རྗེས་སེམས་བསྐྱེད་གསུང་རྒྱུ་དང་། དེ་རྗེས་གང་བློ་མའི་བསྟོད་སྒྲུབ་འདི་ལྟར་བྱེད་རྒྱུ་ཡིན།  སང་ཉིན་ཞོགས་པ་སྔ་ཐོག་ཤེས་རབ་སྙིང་པོ་འདོན་རྒྱུ་ཡིན། ལུང་པ་འདིའི་བདག་པོ་དེ་ཉི་ཧོང་བ་ཡིན་དུས་དང་པོ་ཉི་ཧོང་གི་སྐད་ཐོག་ནས་ཤེས་རབ་སྙིང་པོ་འདོན་རྒྱུ་དང་། དེ་ནས་ཆོས་ཞུ་བ་མང་བ་དེ་རྒྱ་རིགས་ཡིན་དུས་རྒྱ་སྐད་ཐོག་ཤེས་རབ་སྙིང་པོ་འདོན་རྒྱུ། དེ་ནས་ང་ཚོ་བོད་པ་དང་ཝེ་ཐ་ནམ། ཀོ་རི་ཡ། རུ་སོག་ཁྱེད་རང་ཚོས་སོ་སོའི་སྐད་ཀྱི་ཐོག་འདོན་ན་མ་འགྲིག་པ་མེད། ཅེས་བཀའ་སློབ་སྩལ་ཏེ་ཉིན་གསུམ་པའི་ཆོས་འབྲེལ་ལེགས་པར་གྲུབ།།