༢༠༡༦ ཟླ་ ༥ ཚེས་ ༢༡ རེས་གཟའ་སྤེན་པ།
༄༅། །བོད་ཟླ་ ༤ ས་ག་ཟླ་བའི་ཚེས་ ༡༥ དང་ཕྱི་ལོ ༢༠༡༦ ཟླ་ ༥ ཚེས་ ༢༡ ཉིན་གྱི་སྔ་དྲོ་ཆུ་ཚོད་ ༨ ཐོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཐོག་མར་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་ཆིབས་སྒྱུར་བསྐྱངས་ནས་རྟེན་གཙོ་རྣམས་ལ་གནས་གཟིགས་མཛད་རྗེས། ཐེ་ལེན་ཌའི་ནང་པའི་གནས་བརྟན་སྡེ་པའི་དགེ་འདུན་པ་ཁག་གཅིག རྡ་ས་ནས་ལ་དྭགས་རྒྱལ་ས་སླེ་བར་ཞི་བའི་གོམ་བགྲོད་ཀྱི་ལས་འགུལ་དབུ་འཛུགས་མཛད་ཆེད་༸གོང་ས་མཆོག་གིས་སྣང་གསལ་ཞལ་ཕྱེ་མཛད། དེ་རྗེས་༸གོང་ས་མཆོག་བཞུགས་ཁྲིར་༸ཞབས་སོར་འཁོད་བསྟུན། དགེ་འདུན་པ་རྣམས་ལ་༸གོང་ས་མཆོག་གིས་ཐུགས་དགྱེས་ཚོར་ཆེན་པོས་གཙུག་ལག་ཁང་གི་རྟེན་གཙོ་རེ་རེའི་སྐོར་ཕྱག་མཛུབ་མཛད་ནས་འགྲེལ་བཤད་མཛད་བསྟུན། ༸གོང་ས་མཆོག་དབུ་བཞུགས་ཐོག་སྨོན་ལམ་གསུང་འདོན་མཛད།
དེ་ནས་༸གོང་ས་མཆོག་གིས་དུས་འཁོར་ལྷ་ཁང་དུ་ཆིབས་སྒྱུར་བསྐྱངས་ནས་དཔལ་གསང་བ་འདུས་པའི་སྒྲུབ་མཆོད་ཀྱི་ཚོགས་མགོན་མཛད། སྐབས་དེར་གཉུག་མར་གནས་པ་དང་གློ་བུར་དུ་ལྷགས་པའི་རིས་མེད་ཆོས་སྡེ་ཁག་གི་གྲྭ་བཙུན་སྔགས་གསུམ་དང་། དད་ལྡན་མང་ཚོགས་དང་སློབ་ཕྲུག ཕྱི་རྒྱལ་བ་བཅས་ཁྱོན་མི་གྲངས་སྟོང་ཕྲག་བརྒལ་བ་འདུ་འཛོམས་ཀྱིས་མཆོད་མཇལ་ཞུས་པ་སོགས་དགེ་བའི་བྱ་བར་བརྩོན།
དེ་ཡང་འདི་གའི་གསར་འགོད་པས་ཐེ་ལེན་ཌིའི་དགེ་འདུན་པ་རྣམས་ལ་གོམ་བགྲོད་སྐོར་འདྲི་སྐབས་གོམ་བགྲོད་ཀྱི་ལས་འགུལ་སྤེལ་དགོས་པའི་རྒྱུ་མཚན་ནི། འཛམ་གླིང་ནང་འཚེ་མེད་ཞི་བའི་ཉམས་ལེན་གོང་སྤེལ་གཏོང་ཐབས་དང་།
གོམ་བགྲོད་ལས་འགུལ་དེ་ལམ་ལྷོངས་དོན་འཁྱོལ་ཡོང་སླད་ཆེད་མངགས་རྡ་སར་༸གོང་ས་མཆོག་གི་༸ཞལ་མཇལ་གསུང་ཐོས་ཀྱི་སྐལ་བཟང་གི་གོ་སྐབས་ཤིག་ཐོབ་ན་བསམས་པ་ལྟར་བྱུང་བར་བརྟེན་ཧ་ཅང་དགའ་ཚོར་བྱུང་ཡོད་སྐོར་ལན་འདེབས་གནང་ཡོད། སྤྱིར་རྡ་ས་ནས་ལ་དྭགས་ཀྱི་རྒྱལ་ས་སླེ་བར་གོམ་བགྲོད་ཉིན་གྲངས་ ༣༠ ནས་ ༤༥ བར་འགོར་རྒྱུ་ཡིན་འདུག་པ་དང་། གོམ་བགྲོད་ནང་མཉམ་ཞུགས་གནང་མཁན་དགེ་འདུན་པ་ཞལ་གྲངས་ ༤༠ ཡོད་འདུག སྤྱིར་ཕྱི་ཚེས་ ༢༠ ཉིན་མགོན་པོ་གང་ཉིད་མཆོག་ནས་ཀྱང་གནས་བརྟན་སྡེ་པའི་དགེ་སློང་དག་དང་ལྷན་ཅིག་ཏུ་དགུང་ཚིགས་གསོལ་སྟོན་ལ་རོལ་བར་མཛད་ཡོད་འདུག་པ་བཅས།།
