༢༠༡༦ ཟླ་ ༥ ཚེས་ ༢༠ རེས་གཟའ་པ་སངས།

༄༅། །ཕྱི་ལོ་ ༢༠༡༦ ཟླ་ ༥ ཚེས་ ༡༩ ཉིན་ཡུན་རིང་ནས་བོད་དོན་ཐོག་རྒྱབ་སྐྱོར་གནང་མཁན་ཡུ་རོབ་གྲོས་ཚོགས་ཀྱི་འཐུས་མི་ཟུར་པ་དང་ཨི་ཊ་ལི་རེ་ཌི་ཀལ་ཆབ་སྲིད་ཚོགས་པའི་ Transnational Radical Party འཐུས་མི་ཞབས་མར་ཀོ་པ་ནེལ་ལ་ Mr. Marco Pannella མཆོག་འདས་གྲོངས་སུ་གྱུར་བའི་ཡིད་སྐྱོའི་གནས་ཚུལ་ཐོན་པར།  བོད་མི་མང་སྤྱི་འཐུས་ཚོགས་གཞོན་མཁན་པོ་བསོད་ནམས་བསྟན་འཕེལ་མཆོག་གིས་ཨི་ཊ་ལི་རེ་ཌི་ཀལ་ཆབ་སྲིད་ཚོགས་པའི་དབུ་ཁྲིད་སྐུ་ཞབས་མེ་ཐེའུ་ཨན་གྷོ་ལི་ Matteo Angioli མཆོག་གི་མཚན་ཐོག་ནས་ཐུགས་གསོའི་གནས་འཕྲིན་ཞིག་ཕུལ་བའི་ནང་འཁོད་དོན།   ངས་བོད་མི་ཡོངས་དང་བོད་མི་མང་སྤྱི་འཐུས་ལྷན་ཚོགས་ཀྱི་ཚབ་ཞུས་ཏེ་ཡུན་རིང་ནས་བོད་དོན་ཐོག་རྒྱབ་སྐྱོར་གནང་མཁན་སྐུ་ཞབས་མར་ཀོ་པ་ནེལ་ལ་མཆོག་འདས་གྲོངས་སུ་གྱུར་བར་ཧ་ཅང་བློ་ཕམ་ཆེན་པོས་མྱ་ངན་གུས་འདུད་ཞུ་རྒྱུ་ཡིན།

དམ་པ་ཁོང་ནི་༸གོང་ས་༸སྐྱབས་མགོན་ཆེན་པོ་མཆོག་དང་ལན་མང་མཇལ་འཕྲད་མཛད་མྱོང་ཡོད་པ་མ་ཟད། ཕྱི་ལོ་ ༢༠༡༥ ལོར་བཞུགས་སྒར་དུ་༸གོང་ས་མཆོག་གི་སྐུའི་གྱ་སྟོན་སྲུང་བརྩིའི་མཛད་སྒོར་ཡང་ལྷན་ཞུགས་གནང་ཡོད།   དམ་ཁོང་གིས་ཨི་ཊ་ལིའི་ནང་རེ་ཌི་ཀལ་ཆབ་སྲིད་ཚོགས་པ་གསར་འཛུགས་གནང་མཁན་འགོ་ཁྲིད་འཇོན་ཐང་ཅན་ཞིག་ཡིན་པ་མཟད། ཁོང་ནི་སྐུ་ཚེ་ཧྲིལ་པོའི་རིང་དྲང་བདེན་ཆེད་འཐབ་རྩོད་གནང་མཁན་ཁྱད་དུ་འཕགས་པའི་སྐྱེ་བོ་ཞིག་ཆགས་ཡོད།  དམ་པ་ཁོང་གིས་བོད་དོན་ཐོག་དུས་རྟག་ཏུ་ཁ་ཞེ་གཉིས་མེད་ཀྱིས་ཐུགས་ཁུར་བླངས་ཏེ་རྒྱབ་སྐྱོར་གནང་བར་ང་ཚོས་དུས་རྟག་ཏུ་བཀའ་དྲིན་སྙིང་བཅངས་ཀྱིས་དྲན་གསོ་ཡང་ཞུ་རྒྱུ་ཡིན།   ང་ཚོས་སྐུ་ཉིད་མཆོག་དང་སྐུ་ཉིད་མཆོག་གི་དབུ་ཁྲིད་པའི་ཆབ་སྲིད་ཚོགས་པར་སེམས་གསོ་དང་གདུང་སེམས་མཉམ་སྐྱེ་ཞུ་རྒྱུ་མ་ཟད། འདས་པོ་ཁོང་གི་ཚེ་རབས་ཕྲེང་བ་ནས་བསགས་པའི་སྡིག་ལྟུང་རྣམས་སྦྱངས་ཤིང་རྣམ་མཁྱེན་རྒྱལ་བའི་སྒོ་འཕང་མྱུར་དུ་ཐོབ་པའི་གསོལ་འདེབས་སྨོན་ལམ་ཞུ་བཞིན་ཡོད། ཅེས་འཁོད་ཡོད་པ་བཅས།།