༢༠༡༦ ཟླ་ ༥ ཚེས་ ༢༦ རེས་གཟའ་ཕུར་བུ།
༄༅། །ཕྱི་ལོ་ ༢༠༡༦ ཟླ་ ༥ ཚེས་ ༢༦ ཉིན་དབུས་སྣེ་ལེན་འབྲེལ་མཐུད་ཁང་དུ་བོད་མིའི་སྒྲིག་འཛུགས་ཤེས་རིག་ལས་ཁུངས་ཀྱི་མདུན་ལམ་སློབ་སྟོན་ཚན་པས་གོ་སྒྲིག་འོག་ཕྱི་ཟླ་ ༥ ཚེས་ ༢༦ ནས་ཚེས་ ༣༡ བར་བཅས་ཉིན་གྲངས་དྲུག་རིང་བོད་མིའི་ན་གཞོན་རྣམས་ལ་འགོ་ཁྲིད་ཟབ་སྦྱོང་གི་དབུ་འབྱེད་མཛད་སྒོ་ཚོགས་ཡོད།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༩།༣༠ ཐོག་ཤེས་རིག་དྲུང་ཆེ་འབུམ་རམས་པ་ངག་དབང་རབ་རྒྱས་ལགས་ཀྱིས་གཙོས་ཤེས་རིག་མདུན་ལམ་སློབ་སྟོན་ཚན་པའི་འགན་འཛིན་ཟུང་དྲུང་སྒྲོལ་དཀར་དབང་མོ་ལགས་དང་། རྒྱ་གར་མངའ་སྡེ་ཧེ་དར་བྷ་ཏི་རུ་རྟེེན་གཞི་བྱས་པའི་གུ་རུ་ཤེས་རིག་སྒེར་ཚོགས་ Ru Education Pvt.Ltd ཞེས་པའི་ཚོགས་པ་ནས་མགྲོན་འབོད་ཞུས་པའི་ཟབ་ཁྲིད་པ་སྐུ་ཞབས་ར་མེཤ་པར་ཏཱ་ནི Ramesh Partani ལགས་ཀྱིས་གཙོས་པའི་ལྕམ་སྐུ་མར་གྷ་རི་ཌ Margarita ལྕམ་སྐུ་ཨེ་སི་མཱ་ཧཱ་ལཀཤི་མི་ S.Mahalakshmi ལགས། ཤེས་རིགས་མདུན་ལམ་སློབ་སྟོན་ཚན་པའི་འབྲེལ་ཡོད་ལས་བྱེད། དེ་བཞིན་ཐེངས་འདིའི་ཟབ་སྦྱོང་ནང་བཅར་བའི་རྒྱ་གར་མངའ་སྡེ་ཁག་ ༡༣ ནས་བོད་རིགས་སློབ་ཕྲུག་དང་བོད་པའི་མཐོ་སློབ་ཁག་གཅིག་བཅས་ཁྱོན་སློབ་ཕྲུག་གྲངས་ ༥༢ འདུ་འཛོམས་བྱུང་ཡོད། དེ་ཡང་ཐོག་མར་སྐུ་མགྲོན་གཙོ་བོ་ཤེས་རིག་དྲུང་ཆེས་སྣང་གསལ་ཞལ་ཕྱེ་གནང་གྲུབ་མཚམས། ཟབ་སྦྱོང་བ་སློབ་ཕྲུག་ཚོས་རང་ཉིད་ངོ་སྤྲོད་གནང་། དེ་རྗེས་ཤེས་རིག་མདུན་ལམ་སློབ་སྟོན་ཚན་པས་འགན་འཛིན་ནས་ཐེངས་འདིའི་ཟབ་སྦྱོོང་གི་
དམིགས་ཡུལ་དང་། ཟབ་སྦྱོང་ནང་ཚོགས་ཞུགས་གནང་མཁན་ཇི་ཡོད། ཉིན་དྲུག་གི་ཟབ་སྦྱོང་རིང་གསུང་བཤད་ལས་རིམ་བཀོད་སྒྲིག་ཇི་ལྟར་གནང་བ་སོགས་ཀྱི་སྐོར་ངོ་སྤྲོད་གནང་རྗེས་ཤེས་རིག་དྲུང་ཆེས་གསུང་བཤད་གནང་དོན།
ང་ཚོ་ཤེས་རིག་ལས་ཁུངས་ཀྱིས་འགོ་ཁྲིད་ནས་ཟབ་སྦྱོང་གོ་སྒྲིག་གནང་བ་བཞིན་རྣམ་པ་ཚོས་ཐུགས་ཁུར་ཆེན་པོས་མཉམ་ཞུགས་གནང་བར་བསྔགས་བརྗོད་དང་ཐུགས་རྗེ་ཆེ་ཞུ་རྒྱུ་ཡིན། རྣམ་པ་ཚོས་ཉིན་དྲུག་རིང་གི་འགོ་ཁྲིད་ཟབ་སྦྱོང་ནང་མཉམ་ཞུགས་གནང་བ་དང་ཕྱོགས་མཚུངས་དོ་སྣང་གནང་དགོས་པ་ཧ་ཅང་གལ་ཆེན་པོ་རེད།
སྤྱིར་འགོ་ཁྲིད་ཅེས་ཐ་སྙད་དེ་ཐོས་མ་ཉིད་ནས་ཚོགས་པ་ཆེན་པོ་ཞིག་གི་འགོ་ཁྲིད་མཁན་ཞིག་རེད་བསམས་པའི་ཚོར་སྣང་ཡོང་བཞིན་ཡོད། སྤྱིར་འགོ་ཁྲིད་ཅེས་རྗོད་སྐབས་སོ་སོ་ཉིན་རེ་ཉིན་རེའི་མི་ཚེའི་ནང་སྣེ་ཁྲིད་ནས་བྱ་བ་བྱས་པ་དེར་འགོ་ཁྲིད་ཅེས་བརྗོད་ཆོག་པ་ཡིན། མི་མང་པོ་ཞིག་གིས་འགོ་ཁྲིད་ལ་ཡོན་ཏན་ག་རེ་དགོས་རེད་ཅེས་རྗོད་སྐབས་མི་ཚང་མས་ཡིད་ཆེས་བློ་གཏད་ཐུབ་ས་ཞིག་དང་། ཚང་མས་ཆ་འཇོག་བྱེད་ཡུལ་ཞིག་བྱ་རྒྱུའི་ཐོག་ལ་དགོངས་པ་བཞེས་རྒྱུ་དེ་གལ་ཆེན་པོ་རེད། ང་རང་ཚོ་ནང་པ་ཞིག་ཡིན་པའི་ཆ་ནས་ཡིད་ཆེས་ཡོང་བར་ལས་རྒྱུ་འབྲས་བརྩི་དགོས་པ་རེད། དེར་བརྟེན་འགོ་ཁྲིད་ཡོན་ཏན་གཙོ་བོ་གཅིག་དེ་དྲང་ཚུགས་དང་ལྡན་པ་ཞིག་བྱེད་དགོས་པ་རེད། དེ་བཞིན་དུས་དང་རྣམ་པ་ཀུན་དུ་༸གོང་ས་མཆོག་གིས་ང་རང་ཚོར་ཡ་རབས་བཟང་སྤྱོད་བྱེད་དགོས་རེད། ཅེས་བཀའ་སློབ་ཕེབས་པ་བཞིན་ཡ་རབས་སྤྱོད་བཟང་བྱེད་རྒྱུ་དེ་གལ་ཆེན་པོ་རེད། ཡ་རབས་སྤྱོད་བཟང་བྱས་ནས་སོ་སོའི་མི་ཚེ་སྐྱིད་པོ་ཡོང་ངེས་རེད།
དེར་བརྟེན་ཚང་མ་མཐོ་སློབ་ནང་སློབ་སྦྱོང་བྱས་ནས་ཤེས་ཡོན་ཡོད་མཁན་ཞིག་ཡིན་སྟབས། ཚང་མས་བཟང་སྤྱོད་ལྡན་པའི་མི་ཞིག་ཡོང་བ་དང་། དེ་ལྟར་ཡོང་བར་སྨོན་ལམ་རྒྱག་རྒྱུ་དེ་ནང་པ་ཞིག་ཡིན་པའི་ཆ་ནས་གལ་ཆེན་པོ་རེད། ཅེས་སོགས་ཀྱི་གསུང་བཤད་གནང་སྟེ་ལས་རིམ་མཇུག་སྒྲིལ། སྤྱིར་ཐེངས་འདིའི་ཟབ་སྦྱོང་གི་ལས་རིམ་ནང་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེངྒེ་མཆོག་གིས་ད་ལྟའི་བོད་ཀྱི་ཆབ་སྲིད་གནས་སྟངས་སྐོར་དང་། སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས་བོད་མིའི་མང་གཙོའི་འཕེལ་རིམ། སྤྱི་འཐུས་པདྨ་འབྱུང་གནས་ལགས་ཀྱིས་བཙན་བྱོལ་བོད་མིའི་བཅའ་ཁྲིམས་དང་གྲོས་ཚོགས་ཀྱི་འགྲོ་ལུགས། བོད་ཀྱི་དཔེ་མཛོད་ཁང་གི་ངེས་སྟོན་པ་དགེ་བཤེས་ལྷག་རྡོར་ལགས་ཀྱིས་བོད་མིའི་ངོ་བོ་དང་བོད་ཀྱི་སྐད་ཡིག་གི་རིན་ཐང་སྐོར་དང་། བཟང་སྤྱོད་སྐོར། དེ་བཞིན་དགའ་ལྡན་ཕོ་བྲང་གི་ཡང་སྟེང་རིན་པོ་ཆེ་མཆོག་གིས་དོལ་རྒྱལ་སྐོར། ལས་བྱེད་འདེམས་ལྷན་དང་དབུས་འོས་བསྡུའི་འགན་འཛིན་ཤོ་ཟུར་བསོད་ནམས་ཆོས་འཕེལ་མཆོག་གིས་བོད་མིའི་སྒྲིག་འཛུགས་ཀྱི་སྲི་ཞུ་བ་གསར་བསྐོ་གནང་ཕྱོགས་སྐོར། ཕྱི་འབྲེལ་དྲུང་ཆེ་དྭགས་པོ་བསོད་ནམས་ནོར་བུ་ལགས་ཀྱིས་དབུ་མའི་ལམ་གྱི་སྐོར་སོགས་བརྗོད་གཞི་སྣ་མང་ཐོག་འབྲེལ་ཡོད་མི་སྣས་གསུང་བཤད་གནང་རྒྱུ་ཡིན་འདུག་པ་བཅས། །
