༢༠༡༦ ཟླ་ ༥ ཚེས་ ༡༡ རེས་གཟའ་ལྷག་པ།
༄༅། །ཕྱི་ལོ་ ༢༠༡༦ ཟླ་ ༥ ཚེས་ ༨ ཉིན་བོད་མིའི་སྒྲིག་འཛུགས་ཀྱི་ནང་སྲིད་བཀའ་བློན་རྒྱ་རི་སྒྲོལ་མ་མཆོག་རྒྱ་གར་མདྱ་པར་དེ་ཤིའི་གྲོང་ཁྱེར་ཨུ་ཇེན་ Ujjain དུ་འཚོགས་བཞིན་པའི་ཧིན་དུའི་ཆོས་ཕྱོགས་ཀྱི་འདུ་འཛོམས་ཆེན་མོ་ཀུམྦྷ་མེ་ལ་Simhastha Kumbh ཞེས་པར་མཉམ་ཞུགས་གནང་འདུག་པ་དང་། བཀའ་བློན་མཆོག་ལ་རྒྱལ་ཡོངས་བདེ་འཇགས་གོ་རྟོགས་གླེང་སྟེགས་ Forum for Awareness of National Security ཞེས་པས་མགྲོན་འབོད་ཞུས་འདུག
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༧ ཐོག་གོམ་བགྲོད་ཀྱི་ལས་འགུལ་ཞིག་སྤེལ་བ་དང་། སྐབས་དེར་བུད་མེད་བརྒྱ་ཕྲག་མང་པོས་མཉམ་ཞུགས་གནང་ཡོད། དེ་རྗེས་རྒྱ་གར་ནང་བདེ་འཇགས་དང་སྟོབས་འབྱོར་མངའ་ཐང་རྒྱས་པ་ཡོང་བ་དང་། ལྷག་པར་འཛམ་གླིང་ཞི་བདེ་དང་འདྲ་མཉམ་ཡོང་སླད་ཧིན་དུའི་སྦྱིན་སྲེག་གི་ཆོ་ག་རྒྱས་པ་ཞིག་ཕུལ་ནས་ལྷན་ཚོགས་ཤིག་ཚོགས་ཡོད། ལྷན་ཚོགས་ཐོག་སྐུ་ཞབས་ཨིན་དེ་རི་ཤི་ཀུ་མཱར་ Indresh ལགས་ཀྱིས་གཙོས་རྒྱལ་ཁབ་འདྲ་མིན་ནས་དཔོན་རིགས་དང་། ལས་བྱེད་པ། སྐུ་ཚབ་གལ་ཆེ་ཁག་གཅིག་ཀྱང་མཉམ་ཞུགས་གནང་འདུག སྐབས་དེར་ནང་སྲིད་བཀའ་བློན་མཆོག་གིས་བོད་མི་ཡོངས་ཀྱི་ཚབ་ཞུས་ཏེ་འཚམས་འདྲི་ཞུས་པ་དང་ཆབས་ཅིག དེ་རིང་ནི་ལོ་རྒྱུས་ལྡན་པའི་ཉིན་མོ་ཞིག་ཡིན་པ་དང་།
དེ་རིང་སྔ་དྲོ་ ཧིན་དུའི་རིག་བྱེད་སྲོལ་རྒྱུན་གྱི་ཆོ་གའི་སྒོ་ནས་སྦྱིན་སྲེག་ཆེན་མོ་འདི་ལྟ་བུ་ཞིག་གོ་སྒྲིག་གནང་ཐུབ་པ་དེ་གཙོ་བོ་སྐུ་ཞབས་ཨིན་དྲེཤི་ལགས་ཀྱི་དབུ་ཁྲིད་ལམ་སྟོན་ལ་བརྟེན་ནས་ཡིན། ཁོ་མོ་རང་ཉིད་ནང་པའི་རྗེས་འབྲང་པ་ཞིག་ཡིན་པའི་ཆ་ནས་ཟླ་བ་འདི་བོད་ཟླ་བཞི་པའི་ས་ག་ཟླ་བ་འཁེལ་ཡོད་སྟབས། སྦྱིན་སྲེག་གི་ཆོ་ག་འདི་ལྟ་བུ་གོ་སྒྲིག་གནང་བར་རྟེན་འབྲེལ་ཞིག་ལ་ངོས་འཛིན་ཞུ་བཞིན་ཡོད། བོད་ཟླ་བཞི་པའམ་ས་ག་ཟླ་བའི་དུས་ཆེན་ནི། བོད་མི་དང་ཧི་མཱ་ལ་ཡི་མི་རིགས་གཙོ་བོར་གྱུར་བའི་ནང་པ་ཐེག་པ་ཆེན་པོའི་རྗེས་འབྲང་པ་ཚོས་སྟོན་པ་བཅོམ་ལྡན་འདས་སྐུ་བལྟམས་པ་དང་། སངས་རྒྱས་པ། མྱ་ངན་ལས་འདས་པ་བཅས་དུས་ཆེན་གསུམ་འཛོམས་འཁེལ་བར་ངོས་འཛིན་ཞུ་བཞིན་ཡོད། ཕྱོགས་མཚུངས་དེ་རིང་རྒྱལ་སྤྱིའི་ཨ་མའི་དུས་ཆེན་ཡང་འཁེལ་ཡོད་སྟབས་ཉིན་མོ་འདི་ཆེས་ཁྱད་པར་ཅན་ཞིག་ཆགས་ཡོད། ཅེས་སོགས་ཀྱི་གསུང་བཤད་གནང་ཡོད་པ་མ་ཟད། བཀའ་བློན་མཆོག་གིས་བོད་སྐོར་ངོ་སྤྲོད་གནང་སྐབས། སྟོད་མངའ་རིའི་ཁུལ་དུ་གངས་རིན་པོ་ཆེ་ནི་རྒྱ་གར་ཧིན་དུའི་ཆོས་པ་ཚོས་ལྷ་དབང་ཕྱུག་ཆེན་མོའི་བཞུགས་གནས་སུ་ངོས་འཛིན་ཞུ་བཞིན་ཡོད་པ་མ་ཟད། རྒྱ་གར་ནས་བོད་དུ་ནང་ཆོས་དར་ནས་འཕགས་བོད་གཉིས་དབར་བླ་སློབ་ཀྱི་འབྲེལ་བ་ཙམ་མ་ཟད། ས་བབ་ཀྱི་ཐོག་ནས་ཀྱང་འབྲེལ་བ་ཆེན་པོ་ཡོད་སྐོར་གསུངས།
དེ་བཞིན་བཀའ་བློན་མཆོག་གིས་ཆིག་སྒྲིལ་དང་རྒྱལ་ཞེན། བོད་ཀྱི་རང་དབང་བཅས་ཆ་རྐྱེན་གསུམ་གྱི་ཐོག་ནས་རྒྱ་གར་ནང་ཞི་བདེ་བརྟན་ལྷིང་སྐྲུན་ཐུབ་རྒྱུ་ཡིན་སྐོར་ཞིབ་རྒྱས་གསུང་དོན། ཆིག་སྒྲིག་ནི་དེ་རིང་འདིར་སྐུ་ཞབས་ཨིན་དེ་རི་ཤི་ཀུ་མཱར་ལགས་ཀྱི་དབུ་ཁྲིད་ལམ་སྟོན་འོག་སྦྱིན་སྲེག་སྐབས་འདིར་ཧིན་དུ་དང་ནང་པ། སིག དེ་བཞིན་སུ་ཕི་བཅས་ཆོས་ལུགས་དང་སྤྱི་ཚོགས་ཀྱི་གནས་སྟངས་འདྲ་མིན་ནས་མི་སྣ་མང་པོ་ལྷན་འཛོམས་ཐུབ་པ་བྱུང་བ་དེས་ཆིག་སྒྲིལ་མཚོན་ཐུབ། རྒྱལ་ཞེན་ནི་རྒྱ་གར་མི་སེར་ཡིན་ནོ་ཅོག་གིས་རང་ཉིད་རྒྱ་གར་གྱི་ཡུལ་མི་ཞིག་ཡིན་བསམ་པའི་རྒྱལ་ཞེན་དགོས་པ་དང་། རྒྱལ་ཁབ་ཇི་འདྲ་ཡིན་རུང་། ཡུལ་དེའི་སྐྱེས་པ་དང་བུད་མེད་སོགས་ཀྱི་བློས་གཏོང་དང་སྙིང་སྟོབས་ལར་ཞེན་ལ་བརྟེན་འཛུགས་སྐྲུན་ཡར་རྒྱས་འགྲོ་བཞིན་ཡོད། རྒྱ་གར་བ་ཚོས་རང་གི་རྒྱལ་ཁབ་ལ་མ་ཡུམ་ཆེན་མོའི་འདུ་ཤེས་འཛིན་སྲོལ་ཡོད། དེར་བརྟེན་རྒྱ་གར་ཡུལ་མི་རྣམས་རྒྱ་གར་གྱི་ཕྲུ་གུ་ཡིན་སྟབས་ཕྲུ་གུས་རང་གི་མ་ལ་ཞབས་ཞུ་སྒྲུབ་དགོས།
གསུམ་པ་ནི། རྒྱ་གར་གྱི་བདེ་འཇགས་རེད། བོད་ལ་རང་དབང་བྱུང་ན་རྒྱ་གར་ནང་བདེ་འཇགས་ཡོང་། ཞེས་གསུངས་པ་དང་སྦྲགས་མཐའ་དོན་བཀའ་བློན་མཆོག་གིས་འབྱུང་འགྱུར་རྒྱ་གར་ནང་སྟོབས་འབྱོར་མངའ་ཐང་རྒྱས་པ་དང་འཛམ་གླིང་ཞི་བདེ་ལྡན་པ་ཞིག་བསྐྲུན་ཆེད་ཚང་མས་ཕྱར་གྲུ་མཉམ་འདེགས་གནང་རོགས་ཞེས་འབོད་སྐུལ་ཞུས་འདུག་པ་བཅས།།
