༢༠༡༦ ཟླ་ ༥ ཚེས་ ༧ རེས་གཟའ་སྤེན་པ།
༄༅། །ཕྱི་ལོ་ ༢༠༡༦ ཟླ་ ༥ ཚེས་ ༦ ཉིན་བོད་མིའི་སྒྲིག་འཛུགས་ནང་སྲིད་བཀའ་བློན་རྒྱ་རི་སྒྲོལ་མ་མཆོག་ཕྱི་ཟླ་ ༤ ཚེས་ ༢༧ ནས་ཕྱི་ཚེས་ ༥ བར་རྒྱ་གར་བྱང་ཕྱོགས་ཇ་མུ་ཀ་ཤི་མིར་མངའ་སྡེའི་སྤྱི་ཁྱབ་བློན་ཆེན་མཆོག་གིས་གཙོས་བློན་ཆེན་གཞན་ཁག་གཅིག་དང་། དེ་བཞིན་ལ་དྭགས་རང་སྐྱོང་རི་ལྗོངས་ཡར་རྒྱས་ལྷན་ཚོགས་ཀྱི་གནད་ཡོད་མི་སྣ་ཁག་གཅིག་བཅས་མཇལ་འཕྲད་དང་བཀའ་བསྡུར་གནང་བ་སོགས་གཞུང་འབྲེལ་ཕྱོགས་བསྐྱོད་ལེགས་པར་གྲུབ་འདུག
དེ་ཡང་བཀའ་བློན་མཆོག་གིས་ཉིན་གྲངས་གསུམ་རིང་ཇ་མུ་ཀ་ཤི་མིར་མངའ་སྡེའི་བློན་ཆེན་མཆོག་གིས་གཙོས་གནད་ཡོད་མི་སྣ་ཁག་མཇལ་འཕྲད་གྲུབ་རྗེས། ལ་དྭགས་སླེ་རུ་ཆེད་ཕེབས་ཀྱིས་ཁུལ་དེའི་མཉམ་འབྲེལ་བློན་ཆེན་སྐུ་ཞབས་ཚེ་དབང་རྡོ་རྗེ་མཆོག་དང་། ལ་དྭགས་རང་སྐྱོང་རི་ལྗོངས་ཡར་རྒྱས་ལྷན་ཚོགས་ཀྱི་སྐུ་ཞབས་བསོད་ནམས་རྡོ་རྗེ་མཆོག རྫོང་དཔོན་སྐུ་ཞབས་ Prasanna Ramaswamy མཆོག སྐོར་སྲུང་དཔོན་པོ་སྐུ་ཞབས་རྒྱལ་པོ་ལགས་བཅས་མཇལ་འཕྲད་ཀྱིས་ལ་དྭགས་བྱང་ཐང་ས་ཁག་རྣམས་མུ་མཐུད་སྲ་བརྟན་རྒྱུན་གནས་ཐུབ་རྒྱུའི་འཆར་གཞི་ཁག་ལག་བསྟར་ཐུབ་རྒྱུར་ཚང་མས་མཉམ་རོགས་དགོས་པའི་རེ་སྐུལ་ཞུས་པ་མ་ཟད།
ལ་དྭགས་ལྷོ་བྱང་གཉིས་ཀྱི་ནང་རྒྱ་གར་དབུས་གཞུང་ནས་གཏན་འབེབས་གནང་བའི་བཙན་བྱོལ་བོད་མིར་མཐུན་རྐྱེན་སྦྱོར་སྤྲོད་བྱེད་ཕྱོགས་ཀྱི་སྲིད་བྱུས་ཕྱི་ལོ་ ༢༠༡༤ ཞེས་པ་དེ་ཕྱག་བསྟར་གནང་ཐབས་དང་། མངའ་སྡེའི་ནང་གནས་སྡོད་བཙན་བྱོལ་བོད་མི་རྣམས་ལ་མཐུན་འགྱུར་རོགས་རམ་རྒྱ་གང་ཆེ་གནང་སྐྱོང་ཡོང་བའི་འབོད་སྐུལ་ཡང་ཞུས་ཡོད་འདུག དེ་བཞིན་ལ་དྭགས་ལྷོ་བྱང་གཉིས་ཀྱི་ས་གནས་འགོ་འཛིན་གཙོས་འགོ་པ་དང་བརྒྱ་དཔོན་རྣམས་ལ་ནང་སྲིད་བཀའ་བློན་མཆོག་ནས་བཙན་བྱོལ་བོད་མིར་མཐུན་རྐྱེན་སྦྱོར་སྤྲོད་བྱེད་ཕྱོགས་ཀྱི་སྲིད་བྱུས་ ༢༠༡༤ སྐོར་ངོ་སྤྲོད་གནང་བ་དང་སྦྲགས། ད་ཡོད་ལྷོ་བྱང་གཉིས་ཀྱི་ནང་དཀའ་ངལ་ཇི་འཕྲད་སོགས་ཀྱི་སྐོར་གོ་བསྡུར་ལྷུག་པོ་གནང་འདུག་པ་མ་ཟད།
ནང་སྲིད་བཀའ་བློན་མཆོག་གིས་ལ་དྭགས་རང་སྐྱོང་རི་ལྗོངས་ཡར་རྒྱས་ལྷན་ཚོགས་ཀྱི་གཙོ་འཛིན་མཆོག་ལ་རེ་སྐུལ་ཞུས་པ་བཞིན། ཕྱི་ལོ་ ༢༠༡༦ ཟླ་ ༥ ཚེས་ ༥ ཉིན་གཙོ་འཛིན་མཆོག་ནས་ལ་དྭགས་རང་སྐྱོང་རི་ལྗོངས་ཡར་རྒྱས་ལྷན་ཚོགས་ཀྱི་ལས་ཁུངས་སུ་བོད་མིའི་སྒྲིག་འཛུགས་ནང་སྲིད་བཀའ་བློན་མཆོག་དབུ་བཞུགས་ཐོག་ལ་དྭགས་སླེ་རྫོང་འཛིན་སྐྱོང་སྡེ་ཚན་ཁག་གི་ཆེས་མཐོའི་མི་སྣ་ཁག་ལྷན་འཛོམས་ཀྱིས་ཚོགས་འདུ་ཞིག་བསྐོང་ཚོགས་གནང་འདུག
སྐབས་དེར་ཚོགས་འདུའི་ནང་ལ་དྭགས་རང་སྐྱོང་རི་ལྗོངས་ཡར་རྒྱས་ལྷན་ཚོགས་ཀྱི་གཙོ་འཛིན་གྱིས་གཙོས་རྫོང་དཔོན་དང་། དེ་བཞིན་ལྷན་ཁང་ཆེ་ཁག་གི་འགན་འཛིན་བཅས་མཉམ་ཞུགས་ཐོག་ལ་དྭགས་ལྷོ་བྱང་གཉིས་ཀྱི་བོད་མི་སྐྱབས་བཅོལ་བ་རྣམས་དང་ལྷག་པར་བྱང་ཐང་ཁུལ་གྱི་བོད་མི་སྐྱབས་བཅོལ་བ་རྣམས་རྒྱུན་གནས་སྲ་བརྟན་ཐུབ་ཐབས་དཔལ་འབྱོར་དང་སྤྱི་ཚོགས་བཅས་ཀྱི་མཐུན་རྐྱེན་བསྐྲུན་དགོས་སྐོར། དེ་བཞིན་མཐུན་རྐྱེན་སྦྱོར་སྤྲོད་བྱེད་ཕྱོགས་ཀྱི་སྲིད་བྱུས་ ༢༠༡༤ ལག་བསྟར་གནང་རྒྱུའི་སྐོར་བགྲོ་གླེང་གནང་ཡོད་འདུག ཚོགས་འདུའི་ཐོག་སྐུ་ཞབས་བསོད་ནམས་རྡོ་རྗེ་མཆོག་གིས་རྫོང་ལྷན་ཁང་ཁག་གི་འགོ་ཁྲིད་རྣམ་པས་དེ་སྔོན་བོད་མི་སྐྱབས་བཅོལ་བ་རྣམས་ལ་རོགས་རམ་མཐུན་འགྱུར་གནང་བ་བཞིན། འབྱུང་འགྱུར་ཡང་བོད་མི་རྣམས་ལ་རོགས་སྐྱོར་མཐུན་རྐྱེན་ཆ་ཚང་ཞིག་སྦྱོར་དགོས་པའི་གསུང་བཤད་ཀྱང་གནང་།
ཚོགས་འདུའི་མཇུག་ཏུ་ལ་དྭགས་བསོད་ནམས་གླིང་བོད་མིའི་གཞིས་ཆགས་ཀྱི་གཞིས་མི་རྣམས་ཀྱིས་བཀའ་བློན་མཆོག་ནས་སྐུ་ངལ་ལ་མ་འཛེམས་པར་ཐུགས་ཁུར་ཆེ་བཞེས་ཀྱིས་བོད་མིའི་འདུ་སྡོད་གཞིས་ཆགས་ཁག་སྲ་བརྟན་ཡོང་སླད་རྒྱ་གར་དབུས་གཞུང་ལ་རེ་སྐུལ་གྱིས་ད་སྐབས་རྒྱ་གར་དབུས་གཞུང་ནས་བོད་མི་རྣམས་ཀྱི་ཆེད་མཐུན་རྐྱེན་སྦྱོར་སྤྲོད་བྱེད་ཕྱོགས་ཀྱི་སྲིད་བྱུས་ ༢༠༡༤ དེ་འདྲ་ཞིག་ལག་བསྟར་ཐུབ་པ་བྱུང་བ་དེར་ཐུགས་རྗེ་ཆེ་ཞུས་འདུག ཐེངས་འདིར་ནང་སྲིད་བཀའ་བློན་མཆོག་དང་ལྷན་ནང་སྲིད་དྲུང་ལས་དངོས་གྲུབ་འོད་ཟེར་ལགས་དང་། ལ་དྭགས་བསོད་ནམས་གླིང་བོད་མིའི་གཞིས་ཆགས་ཀྱི་ས་གནས་འགོ་འཛིན་ཚེ་བརྟན་དབང་ཕྱུག་ལགས། ལ་དྭགས་བྱང་ཐང་འབྲེལ་མཐུད་པ་དོན་གྲུབ་རྒྱལ་པོ་ལག་བཅས་ལྷན་བཅར་ཞུས་ཡོད་པ་བཅས། །
