༢༠༡༦ ཟླ་ ༥ ཚེས་ ༢ རེས་གཟའ་ཟླ་བ།
༄༅། །འདི་གར་ཤེས་རིག་ལས་ཁུངས་ནས་བཏང་གནས་ནང་འཁོད་དོན། ཤེས་རིག་ལས་ཁུངས་ཀྱི་གོ་སྒྲིག་འོག་ས་རཱ་བོད་ཀྱི་མཐོ་རིམ་སློབ་གཉེར་ཁང་དུ་འགྲོ་བཞིན་པའི་གཞི་རིམ་འོག་མའི་དགེ་རྒན་འོས་སྦྱོང་བ་རྣམས་ལ་ཕྱི་ཟླ་ ༥ ཚེས་ ༢ ནས་ ༥ བར་ཉིན་གྲངས་བཞིའི་རིང་རྩོད་རྙོག་འདུམ་སྒྲིག་གི་ཟབ་སྦྱོང་ཞིག་འགོ་བཙུགས་གནང་ཡོད་པ་དང་། ཟབ་སྦྱོང་སློབ་ཁྲིད་གནང་མཁན་དྷ་ས་བོད་ཀྱི་རྩོད་རྙོག་འདུམ་སྒྲིག་ལྟེ་གནས་ཁང་གི་འགན་འཛིན་ཀརྨ་ལེགས་བཤད་ལགས་དང་། ཉམས་ཞིབ་པ་བསོད་ནམས་དབང་ཕྱུག་ལགས་རྣམ་གཉིས་གདན་ཞུས་ཀྱིས་ཐོག་མར་སློབ་ཁྲིད་གནང་མཁན་དང་འོས་སྦྱོང་བ་རྣམས་རིམ་བཞིན་སོ་སོའི་ངོ་སྤྲོད་དང་སྦྲགས། ལྟེ་གནས་ཁང་དེ་ཉིད་གསར་བཙུགས་གནང་བའི་དགོས་དམིགས་དང་ད་བར་ལོ་ངོ་བཅོ་ལྔ་ལྷག་རིང་ཟབ་སྦྱོང་དང་སྦྱོང་བརྡར་ཇི་ཙམ་གོ་སྒྲིག་ཞུས་པ་དང་། དེས་རང་རེ་བོད་ཀྱི་སྤྱི་ཚོགས་ནང་ཕན་ནུས་དང་འབྲེལ་བའི་སྐོར་ངོ་སྤྲོད་གནང་བ་དང་སྟབས་བསྟུན། རྩོད་རྙོག་གི་ངོ་བོ་དང་རྩོད་རྙོག་འབྱུང་གཞི་བཅས་ཀྱི་སྐོར་རྒྱབ་ལྗོངས་གནས་ལུགས་ཡིག་ཐོག་འགྲེལ་བཤད་ཟབ་ཅིང་རྒྱས་པ་གནང་ཡོད་པ་མ་ཟད། འོས་སྦྱོང་བ་ནང་ཁུལ་བྱེད་སྒོའི་ལམ་ནས་རྩོད་རྙོག་འབྱུང་སྟངས་དང་དེར་གདོང་ལེན་བྱེད་ཕྱོགས་ཀྱི་འཁྲབ་ཚན་ཐུང་ངུ་བརྒྱུད་ངོ་སྤྲོད་གནང་ཡོད་པ་མ་ཟད། དགེ་འོས་པ་རྣམས་ནས་ཀྱང་ཟབ་སྦྱོང་དེའི་ནང་དོ་དབྱིངས་ཆེན་པོའི་ཐོག་ནས་མཉམ་ཞུགས་གང་ལེགས་གནང་བཞིན་ཡོད་པ་བཅས།།
