༢༠༡༦ ཟླ་ ༤ ཚེས་ ༡༨ རེས་གཟའ་ཟླ་བ།
༄༅། །ཕྱི་ལོ་ ༢༠༡༦ ཟླ་བ་ ༤ ཚེས ༡༦ ཉིན་གྱི་སྔ་དྲོར་སྐུ་བཅར་རྣམ་པར་རྒྱལ་བ་ཕན་བདེ་ལེགས་བཤད་གླིང་གྲྭ་ཚང་གི་དཔེ་མཛོད་ཁང་དུ་ཤར་རྩེ་མཁན་རིན་པོ་ཆེ་བྱང་ཆུབ་ཆོས་ལྡན་མཆོག་གིས། ཕྱི་ཚེས་ ༡༥ ཉིན་དགའ་ལྡན་ཁྲི་པ་མཆོག་དང་བྱང་རྩེ་ཆོས་རྗེས་གཙོས་རྒྱལ་སྤྱིའི་དགེ་ལྡན་ལྷན་ཚོགས་ཀྱི་འཐུས་མི་རྣམ་པས་༸གོང་ས་མཆོག་གི་གཟིམ་ཆུང་དུ་མཇལ་བཅར་ཞུས་ཡོད། སྐབས་དེར་མགོན་པོ་གང་ཉིད་མཆོག་གིས་བསྟན་འགྲོའི་ཕན་བདེའི་སླད་དགུང་གྲངས་ ༡༡༣ བར་སྐུ་ཚེ་མི་འཇིག་རྡོ་རྗེའི་ཁམས་སུ་བཞུགས་རྒྱུའི་སྐལ་བཟང་གི་ཞལ་བཞེས་བཟང་པོ་ཐོབ་ཡོད་པའི་སྐོར་གསར་འགོད་གསལ་བསྒྲགས་ཤིག་སྤེལ་ཡོད།
དེ་ཡང་མཁན་རིན་པོ་ཆེ་མཆོག་གིས་གསར་འགོད་གསལ་བསྒྲགས་སྤེལ་དོན། ཁས་སང་ང་ཚོ་རི་བོ་དགེ་ལྡན་པའི་བསྟན་བདག་བླ་ཆེན་སྐྱབས་རྗེ་དགའ་ལྡན་ཁྲི་པ་མཆོག་དང་། ཤར་བྱང་གི་ཆོས་རྗེ་རྣམ་གཉིས་ཀྱིས་གཙོས་རྒྱལ་སྤྱིའི་དགེ་ལྡན་ལྷན་ཚོགས་ཀྱི་འཐུས་མི་རྣམས་༸གོང་ས་མཆོག་གི་གཟིམ་ཆུང་དུ་མཇལ་བཅར་ཞུས་སྐབས། ༸གོང་ས་མཆོག་གིས་ང་ཚོར་བཀའ་སློབ་འདི་ལྟར་སྩལ་སོང་། དེ་རིང་ང་ཚོ་དམ་གཙང་ཤ་སྟག་ཅིག་འདིར་འཛོམས་ནས་ངོས་ལ་རེ་འདུན་གནང་བ་རེད། ཡིན་དང་ཡིན། ཁྱེད་ཚོ་ཚང་མ་བློ་བདེ་པོའི་ཐོག་ནས་བཞུགས་ཨང་། ཞེས་བཀའ་སློབ་སྩལ་བ་མ་ཟད། སྔ་མོ་ནས་༸གོང་ས་མཆོག་གི་གཟིམ་ལམ་ནང་དུའང་དགུང་གྲངས་ ༡༡༣ བར་སྐུ་འཚོ་བཞུགས་མཛད་རྒྱུའི་རྟེན་འབྲེལ་ཡང་ནས་ཡང་དུ་ཡོང་བཞིན་ཡོད་པ་མ་ཟད། འབྱུང་འགྱུར་ལོ་བཅུ་གྲངས་བར་མཛད་འཕྲིན་མུ་མཐུད་བསྐྱང་རྒྱུའི་ཐུགས་རེ་མཛད་བཞིན་ཡོད་པ་དང་། དུས་ཚོད་དེའི་རིང་ལ་ཆོས་ལུགས་ཆོས་བརྒྱུད་དང་བཅས་པའི་དབུ་ཁྲིད་ཚོ་ཡིན་ནའང་རེད། བོད་མིའི་སྤྱི་ཚོགས་ནང་གི་དབུ་ཁྲིད་ཚོ་ཡིན་ནའང་རེད། ཚང་མས་འབད་བརྩོན་ཤུགས་ཆེ་གནང་ནས་ང་ཚོས་སྐབས་བབ་ལས་དོན་ཚགས་ཚུད་པོ་དང་། ལམ་ལྷོང་ཡོང་བ་ཞིག་བྱེད་དགོས་པ་ཧ་ཅང་གལ་ཆེན་པོ་རེད། ཅེས་སོགས་ཀྱི་བཀའ་སློབ་སྩལ་ཡོད་སྐོར་གསལ་བསྒྲགས་སྤེལ་ཡོད་འདུག
ཐེངས་འདིར་རྒྱལ་སྤྱིའི་དགེ་ལྡན་ལྷན་ཚོགས་ཀྱི་འཐུས་མི་རྣམ་པས་ལྷན་ཚོགས་སྐབས་གྲོས་ཆོད་དོན་ཚན་གསུམ་བཞག་ནས་གཟིམ་ཆུང་དུ་མཇལ་ཁ་ཞུས་ཡོད་པ་དང་།
གྲོས་ཆོད་དོན་ཚན་གསུམ་ནི།
༡༽༸གོང་ས་མཆོག་གི་ལྷ་དགོངས་འཁྲུག་པ་དང། ཐུགས་འཚབ་བྱུང་བ། ཐུགས་ཕམ་བྱུང་བ་དེ་དག་སེལ་བའི་ཐབས་ཤེས་ལ་ང་ཚོ་རི་བོ་དགེ་ལྡན་པའི་ཕྱོགས་ནས་སྒོ་གསུམ་ཐོག་ནས་ནུས་པ་ཡོད་ཚད་བཏོན་ནས་བཀའ་སྲུང་ཅི་སྒྲུབ་ཞུ་རྒྱུ་ཡིན།
༢༽ང་ཚོའི་བོད་པའི་སྤྱི་ཚོགས་ནང་ལ་ཆོལ་ཁ་གསུམ་དང་ཆོས་བརྒྱུད་ལྔ་ཡོངས་སུ་རྫོགས་པ་རྡོག་རྩ་ཆིག་སྒྲིལ་དགོས་པ་ཤིན་ཏུ་གལ་ཆེན་མཐོང་བ་དང་། བར་ལམ་ལས་རིམ་སྣ་ཚོགས་ཀྱི་རྐྱེན་ལ་བརྟེན་ནས་དེར་ཉམས་རྒུད་བྱུང་ཡོད་པའི་དོགས་ཟོན་ཡོང་གི་འདུག་པས། ༸གོང་ས་མཆོག་ཀྱང་དེ་ལ་ཐུགས་འཚབ་མཛད་བཞིན་ཡོད་པ་བསམ་བཞིན་ཡོད། དེར་བརྟེན་ང་ཚོ་རི་བོ་དགེ་ལྡན་པའི་ཆོས་བརྒྱུད་སྤྱི་ཡོངས་ནས་ཆོས་བརྒྱུད་གཞན་གྱི་དབུ་ཁྲིད་ཚོར་བོད་མི་ཚང་མ་ལ་མཐུན་སྒྲིལ་རྡོག་རྩ་ཆིག་སྒྲིལ་གནང་རྒྱུ་གལ་ཆེན་ཡིན་སྐོར་གྱི་བཀའ་སློབ་ལམ་སྟོན་ཡང་ནས་ཡང་དུ་སྩལ་རྒྱུའི་གསོལ་འདེབས་ཞུ་རྒྱུ།
༣༽བཀའ་སྤྱི་གཉིས་ནས་བོད་གཞིས་བྱེས་གཉིས་ཀྱི་བོད་མི་ཡོངས་རྫོགས་མཐུན་ལམ་རྡོག་རྩ་ཆིག་སྒྲིལ་གོང་བུའི་སྟོབས་ཤུགས་ལ་དོ་ཕོག་ཅུང་ཟད་ཙམ་ཡང་མི་འབྱུང་ཆེད་འབད་པ་ལྷོད་མེད་གནང་སྐྱོང་ཡོང་བ་དང། ལྷག་པར་དུའང་ད་ལམ་བཀའ་ཁྲི་ཟུར་པ་རྣམ་པ་དང། སྤྱི་འཐུས་ཚོགས་ཟུར་རྣམ་པ། བཀའ་ཟུར་རྣམ་པ་བཅས་ཟླ་ ༤ ཚེས་ ༡༡ ཉིན་བཀའ་སྤྱི་ལྷན་རྒྱས་སར་ཆེད་བཅར་གྱིས་ཛ་དྲག་གི་གནད་དོན་རེ་སྐུལ་དོན་ཚན་ལྔ་སྙན་སེང་ཞུས་པ་རྣམས་གང་མགྱོགས་ཕྱག་ལེན་གནང་རྒྱུ་ཤིན་ཏུ་གལ་ཆེ་བར་མཐོང་ནས། བཀའ་སྤྱི་ལྷན་རྒྱས་ནས་དོན་ཚན་དེ་དག་ཅིས་ཀྱང་ཕྱག་ལེན་དུ་འཁེལ་བ་གནང་སྐྱོང་ཡོང་བའི་རེ་སྐུལ་ཞུ་བཞིན་ཡོད།
བཅས་གྲོས་ཆོད་དོན་ཚན་གསུམ་བཞག་ཡོད་པ་དང། གྲོས་ཆོད་གསུམ་པ་འཁོད་པའི་སྙན་ཞུ་ཞིག་བཀའ་སྤྱི་གཉིས་ལའང་ཕུལ་འདུག་པ་བཅས།།
