༢༠༡༦ ཟླ་ ༤ ཚེས་ ༦ རེས་གཟའ་ལྷག་པ།
༄༅། །རྒྱ་གར་གཞུང་གི་འཕྲོད་བསྟེན་དང་ཁྱིམ་ཚང་བདེ་དོན་ལྷན་ཁང་དང་དབུས་བོད་མིའི་སྒྲིག་འཛུགས་ཀྱི་འཕྲོད་བསྟེན་ལས་ཁུངས་གཉིས་དབར་ལོ་གཉིས་དང་ཕྱེད་ཀའི་རིང་གོ་ལའི་ཐེབས་རྩ་ Global Fund ཞེས་གཉན་ནད་རེག་དུག་དང་གློ་ནད་ཊི་སྦི། འདར་ཚད་སོགས་ལ་གདོང་ལེན་ཆེད་བཙུགས་པའི་རྒྱལ་སྤྱིའི་ཐེབས་རྩ་ཁང་དང་མཉམ་རུབ་ཐོག བཙན་བྱོལ་བོད་མིའི་སྤྱི་ཚོགས་ཁྲོད་ཊི་སྦི་ནད་གཞི་སྔོན་འགོག་གི་ལས་གཞི་སྤེལ་རྒྱུའི་གན་རྒྱའི་ཡི་གེར་མཚན་རྟགས་བཀོད་འདུག དེ་ཡང་གན་རྒྱའི་འབྲུ་དོན་གཙོ་བོ་ནི། བོད་མིའི་སྤྱི་ཚོགས་ནང་གློ་ནད་ཊི་སྦིའི་ནད་གཞི་སྔོན་འགོག་དང་སྨན་བཅོས་ཀྱི་ལས་འཆར་དེ་བཞིན་ཕྱི་ལོ་ ༢༠༡༥ ཟླ་ ༡༠ ཚེས་ ༡ ནས་ཕྱི་ལོ་ ༢༠༡༧ ཟླ་ ༡༢ བར་སྤེལ་རྒྱུ་དང་།
མང་ཚོགས་ལ་ཊི་སྦིའམ་གློ་ནད་སྐོར་གོ་རྟོགས་སྤེལ་རྒྱུ། བོད་མི་འདུ་སྡོད་གཞིས་ཆགས་ཁག་དང་། སློབ་གཉེར་བསྟི་གནས་ཁང་བཅས་ལ་ཊི་སྦི་ནད་གཞི་ཡོད་མེད་སྐོར་རྟོག་ཞིབ་གནང་རྒྱུ་དང་འབྲེལ་ནད་གཞི་དེ་རིགས་ཁྱབ་བརྡལ་མི་འགྲོ་ཆེད་སྨན་བཅོས་སྔོན་འགོག་གནང་རྒྱུ་དང་། གློ་ནད་འགོས་ཟིན་པ་རྣམས་ལ་སྨན་བཅོས་འཐུས་ཤོར་མ་སོང་བར་དུས་ཐོག་བཅོས་ཐབས་དཔེར་ན། སྨན་དུས་ཐོག་བཟའ་དགོས་པའི་དྲན་སྐུལ་གཏོང་རྒྱུ་སོགས་ཀྱི་ལས་གཞི་ལག་བསྟར་གནང་རྒྱུ། ཊི་སྦིའི་སྨན་བཅོས་ཀྱི་མཐུན་རྐྱེན་དང་སྨན་ཞབས་ཚད་ལྡན་ས་གནས་ཁག་ཏུ་གཏོང་རྒྱུ།
དེ་མཚུངས་རྒྱ་གར་ནང་ཡོད་པའི་བོད་མིའི་གཞིས་ཆགས་ཆེ་ཁག་ ༡༥ ནང་གློ་ནད་དམ་ཊི་སྦིའི་ནད་གཞི་ཡོད་མཁན་ཚོར་སྨན་བཅོས་དུས་ཐོག་གནང་ཐུབ་མཁན་གྱི་སྨན་པ་དང་སྨན་ཞབས་མ་སོགས་ཀྱིས་སློབ་གྲྭ་དང་གདན་ས་གྲྭ་ཚང་ཁག གཞིས་ཆགས་སོགས་ནང་ཊི་སྦིའི་ནད་གཞི་སྔོན་འགོག་ཆེད་ཐབས་ལམ་ཇི་འདྲ་ལག་བསྟར་དགོས་པའི་མཛུབ་ཁྲིད་ལམ་སྟོན་གནང་རྒྱུ། གློ་ནད་ཡོད་པའི་དོགས་གཞི་ཡོད་རིགས་རྣམས་ལ་ལུད་པ་བརྟག་དཔྱད་བྱ་རྒྱུ་དང་། དོགས་གཞི་ཡོད་མཁན་ཙམ་མ་ཟད། ཉེ་འཁོར་གཉེན་ཉེ་ནང་མི་སྤུན་མཆེད་ཚོ་ལའང་ནད་གཞི་སྔོན་འགོག་ལག་བསྟར་ཇི་ལྟར་དགོས་པའི་ལམ་སྟོན་གནང་རྒྱུ། ནད་པ་ཉམ་ཐག་ཚོར་རིན་མེད་ཐོག་སྨན་སྦྱིན་དང་སྨན་བཅོས་མཐུན་རྐྱེན་གནང་རྒྱུའི་འཆར་གཞི་སོགས་ཡོད་འདུག་པ་བཅས། །
