༢༠༡༦ ཟླ་ ༤ ཚེས་ ༤ རེས་གཟའ་ཟླ་བ།
༄༅། །འདི་གར་ཚོགས་དྲུང་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༡༦ ཟླ་ ༣ ཚེས་ ༡༨ ཉིན་རྒྱ་གར་ཧི་མ་ཅལ་མངའ་ཁོངས་བཀྲ་ཤིས་ལྗོངས་སུ་ཁམས་སྒར་ཚེས་བཅུའི་སྒྲུབ་མཆོད་ཆེན་མོ་ལོ་སུམ་བརྒྱ་འཁོར་བའི་རྗེས་དྲན་མཛད་སྒོར་སྐུ་མགྲོན་གཙོ་བོ་བོད་མི་མང་སྤྱི་འཐུས་ཚོགས་གཙོ་གཞོན་པ་མཁན་པོ་བསོད་ནམས་བསྟན་འཕེལ་མཆོག་དབུ་བཞུགས་ཐོག བཀའ་བརྒྱུད་སྤྱི་འཐུས་བསྟན་པ་ཡར་འཕེལ། ས་སྐྱའི་སྤྱི་འཐུས་ག་ཟི་ཚེ་རིང་པོ། དགེ་ལུགས་སྤྱི་འཐུས་དགེ་བཤེས་ཨ་ཀྲུག་ཚེ་བརྟན། བོན་པོའི་སྤྱི་འཐུས་དགེ་བཤེས་སྨོན་ལམ་མཐར་ཕྱིན་བཅས་ཕེབས་གནང་ཡོད་པ་དང་། མཛད་སྒོའི་ཐོག་མར་༧རྒྱལ་བ་མདོ་ཁམས་པ་ཆེན་པོ་མཆོག་ནས་ཚེས་བཅུའི་ངོ་སྤྲོད་སྐོར་བཀའ་སློབ་གནང་དོན། བཀྲ་ཤིས་ལྗོངས་སུ་བྱེས་ཀྱི་གདན་ས་ཁམས་པ་སྒར་དཔལ་ཕུན་ཚོགས་ཆོས་འཁོར་གླིང་དུ་ཁམས་སྒར་སྤྲེལ་ལོའི་ཚེས་བཅུའི་སྒྲུབ་མཆོད་ཆེན་མོ་ལོ་སུམ་བརྒྱ་འཁོར་བའི་རྗེས་དྲན་མཛད་སྒོར། ཆིབས་སྒྱུར་བཀའ་དྲིན་བསྐྱངས་པའི་སྐུ་མགྲོན་གཙོ་བོ་བོད་མི་མང་སྤྱི་འཐུས་ཚོགས་གཙོ་གཞོན་པ་མཆོག་དང་། དམིགས་བསལ་སྐུ་མགྲོན་དཔལ་ལྡན་རང་གཞུང་ཆོས་རིག་བཀའ་བློན་མཆོག སྐྱབས་རྗེ་བླ་སྤྲུལ་རྣམ་པ་དང་། ཆོས་བརྒྱུད་ཁག་གི་སྤྱི་འཐུས་རྒྱུན་ལས་རྣམ་པ། དཔལ་ལྡན་ནང་སྲིད་དྲུང་ཆེ་མཆོག་གིས་གཙོས་གཞུང་ཞབས་སྲིད་ཞུ་བ་རྣམ་པ། ས་གནས་ཁག་གི་དགོན་སྡེ་དང་།གཞིས་འགོ སློབ་གྲྭ་ཁག་གི་འགན་འཛིན་དང་སྐུ་ཚབ་རྣམ་པ། ཧི་མ་ཅལ་གྱི་མངའ་སྡེ་གཞུང་དང་ས་གནས་ཁག་གི་དཔོན་རིགས་རྣམ་པ། ཕྱོགས་མཐའ་ཁག་ནས་ཕེབས་པའི་སྐུ་མགྲོན་རྣམ་པ་དང་མི་དམངས་ཡོངས་ལ་འཚམས་འདྲི་བཀྲ་ཤིས་བདེ་ལེགས་ཞུ།
དེ་ཡང་རྣམ་འདྲེན་བཞི་པ་སྟོན་པ་མཉམ་མེད་ཤཱཀྱའི་རྒྱལ་པོས་མི་མཇེད་འཇིག་རྟེན་གྱི་ཞིང་འདིར་མཛད་པ་བཅུ་གཉིས་སོགས་རྣམ་པར་ཐར་པ་ངོ་མཚར་བ་དུ་མ་ཞིག་བསྟན་ཅིང་ཁྱད་པར་དུ་མཛད་པ་ཀུན་གྱི་ནང་ནས་མཆོག་ཏུ་གྱུར་པ་བདེན་བཞི་གཙོ་བོར་གྱུར་པའི་ཆོས་ཀྱི་འཁོར་ལོ་དུ་མ་ཞིག་བསྐོར་གནང་བ། དེ་ཡང་གདུལ་བྱ་སེམས་ཅན་རྣམས་ཀྱི་ཁམས་དབང་མོས་པ་དང་འཚམ་པའི་སྒོ་ནས་གསུངས་ཤིང་། སེམས་ཅན་མཐའ་ཡས་པ་ཐར་པ་དང་ཐམས་ཅད་མཁྱེན་པའི་ལམ་ལ་འགོད་པར་མཛད། སྤྱིར་རྒྱལ་བ་རྣམས་ཀྱི་ཕྲིན་ལས་ཀྱི་རོལ་པ་ནི་ཇི་སྲིད་འཁོར་བ་མ་སྟོང་བར་དུ་རྒྱུན་མི་ཆད་པར་སྣང་བ་ནི་ཆོས་ཉིད་ཡིན་ལ། བདག་ཅག་གི་སྟོན་པས་ཀྱང་། ཀུན་དགའ་བོ་ལ། མ་འོངས་པར་ང་ལས་ལྷག་པའི་སྐྱེས་བུ་རིགས་སྔགས་འཆང་སློབ་དཔོན་ཆེན་པོ་པདྨ་འབྱུང་གནས་ཞེས་བྱ་བ་ཨོ་རྒྱན་ཡུལ་གྱི་ནུབ་བྱང་དུ་དྲི་མེད་མདང་ལྡན་ཞེས་པའི་མཚོ་དཀྱིལ་དུ་སངས་རྒྱས་འོད་དཔག་མེད་ཀྱི་སྤྲུལ་པ་ཡི་གེ་ཧྲི་ཞིག་འཕྲོས་ནས་དེ་ལས་མེ་ཏོག་པདྨའི་གེ་སར་གྱི་སྟེང་དུ་རྫུས་སྐྱེས་སུ་འབྱུང་ཞིང་། དེས་གསང་སྔགས་ཀྱི་བསྟན་པ་རྒྱ་ཆེར་སྤེལ་བ་འགྱུར་ཏོ་ཞེས་སྟོན་པ་ཉིད་ཀྱི་ལུང་གིས་ཟིན་པ་ཡིན་ལ། དེ་ཡང་ཆོས་རྒྱལ་ཚང་པ་ལྷ་ཡི་མེ་ཏོག་གམ་ཁྲི་སྲོང་སྡེའུ་བཙན་གྱི་དུས་སུ་བོད་གངས་ཅན་ཡུལ་དུ་སངས་རྒྱས་ཀྱི་བསྟན་པ་རྒྱ་ཆེར་སྤེལ་བའི་སླད་དུ་རྒྱ་གར་འཕགས་པའི་ཡུལ་ནས་དཔལ་ནཱ་ལནྜའི་མཁན་ཆེན་ཞི་བ་འཚོ་གདན་དྲངས་ཏེ། བོད་དུ་གཞི་ཐམས་ཅད་ཡོད་པར་སྨྲ་བའི་ལུགས་ཀྱི་འདུལ་བའི་སྡོམ་རྒྱུན་སྤེལ་གནང་བ་དང་ཐེག་པ་ཆེ་ཆུང་སྔགས་དང་བཅས་པའི་བཀའ་བསྟན་མང་པོ་ལེགས་སྦྱར་གྱི་སྐད་ནས་བོད་སྐད་དུ་བསྒྱུར་གནང་མཛད་པ་སོགས་བཀྲིན་བསམ་ལས་འདས། འོན་ཀྱང་བོད་ཀྱི་ཡུལ་དེ་སྔར་བདུད་ཡུལ་ཁ་རག་མགོ་དགུ་ཞེས་གྲགས་ཤིང་དེར་ཡོད་ལྷ་ཀླུ་གཞི་བདག་སོགས་ནག་ཕྱོགས་བདུད་རིགས་མང་པོ་ཡོད་པར་བརྟེན། ཁྲི་སྲོང་ལྡེའུ་བཙན་གྱིས་དཔལ་བསམས་ཡས་མི་འགྱུར་ལྷུན་གྱིས་གྲུབ་པའི་གཙུག་ལག་ཁང་ཉིན་མོར་མིས་བཞེངས་པ་མཚན་མོར་ལྷ་འདྲེས་བཤིགས་ཏེ་བསྟན་པ་འཛུགས་མ་བཅུག་པས།ཆོས་རྒྱལ་ཆེན་པོ་ཡིད་མུག་ནས་བཞུགས་དགོས་པ་བྱུང་བ་ལ་མཁན་ཆེན་ཞི་བ་ཚོས་རྒྱལ་པོ་མཆོག་ལ་གསོལ་བ། ཀྱེ་རྒྱལ་པོ་ཆེན་པོ་མཆོག་ཐུགས་མུག་མི་དགོས། རྒྱ་གར་ན་ས་གསུམ་ན་འགྲན་ཟླ་དང་བྲལ་བའི་རིགས་སྔགས་འཆང་སློབ་དཔོན་ཆེན་པོ་པདྨ་འབྱུང་གནས་ཞེས་བྱ་བ་ཡོད།
དེ་གདན་དྲངས་ཐུབ་ན་བར་ཆད་ཐམས་ཅད་སེལ་བར་འགྱུར་ཞེས་གསོལ་ཞིང་། སློབ་དཔོན་ཆེན་པོས་ཀྱང་དེ་དགོངས་ནས། འབྲུག་པ་རོ་སྟག་ཚང་སོགས་ནས་བརྒྱུད་དེ་རིམ་པར་བོད་ཡུལ་དུ་བྱོན། དེ་ནས་སློབ་དཔོན་ཆེན་པོའི་ཐུགས་རྗེ་དང་མཐུ་སྟོབས་ནུས་པས་ལྷ་སྲིན་དྲེགས་པ་རྣམས་དམ་ལ་བཏགས། དེ་ནས་བཟུང་གངས་ལྗོངས་སུ་སངས་རྒྱས་ཀྱི་བསྟན་པ་ཉི་མ་ཤར་བ་བཞིན་མཛད་པ་སོགས་ཀྱིས་སློབ་དཔོན་ཐུགས་རྗེ་ཅན་ཞེས་རྩོད་མེད་ཡོངས་སུ་གྲགས་པ་ཞིག་བྱུང་། སློབ་དཔོན་ཐུགས་རྗེ་ཅན་དེ་ཉིད་སྐུ་གསུམ་གཅིག་འདུས་རྒྱལ་ཀུན་སྤྱི་གཟུགས་ཆེན་པོར་སྒྲུབ་པའི་ཐབས་ཚུལ་ཟབ་མོ་གཏེར་མ་དག་སྣང་གི་རྒྱུན་སོགས་མང་དུ་བྱོན་པ་ལྟར། གངས་ལྗོངས་སུ་སྤྲོས་བཅས་ཚེས་བཅུའི་སྒྲུབ་མཆོད་ཕྱག་སྲོལ་ཚད་ལྡན་ཁུངས་ཐུབ་མང་དུ་བཞུགས་ནའང་། འདི་ནི་བསྐལ་བཟང་དང་པོ་སངས་རྒྱས་འཁོར་བ་འཇིག་ཏུ་སངས་རྒྱས་ཀྱང་། མ་འགག་ཐུགས་རྗེའི་སྒྱུར་འཕྲུལ་ཁྱབ་བདག་རུ་གདལ་བ་ལས། སྐྱེས་བུ་གྲངས་མེད་པ་འཕགས་བོད་ཀྱི་ལྗོངས་སུ་རིམ་དང་ཅིག་ཆར་དུ་ཇི་སྙེད་ཅིག་བྱོན་པ་ལ་༸དཔལ་རྒྱལ་བ་མདོ་ཁམས་པ་སྐུ་ཕྲེང་གསུམ་པ་འགྲོ་འདུལ་ངག་དབང་ཀུན་དགའ་བསྟན་འཛིན་ཞེས་མཚན་སྙན་གྱི་གདུགས་དཀར་སྲིད་གསུམ་བླ་ན་མངོན་པར་མཐོ་བ་སློབ་དཔོན་ཆེན་པོས་རྟག་ཏུ་བྱིན་གྱིས་བརླབས་ཤིང་རྗེས་སུ་བཟུང་བས་ཉིད་དང་རྣམ་དབྱེར་མེད་པའི་གྲུབ་མཆོག་དམ་པར་སོན་པ་དེ་ཉིད་དགུང་ལོ་སོ་གཉིས་ཐོག འཁོར་འདུས་པ་རྣམས་ཕྱོགས་མེད་དུ་འགྲོ་དོན་སྐྱོང་བར་བཏང་ནས། སློབ་དཔོན་ཆེན་པོ་ཟླ་བརྒྱད་བཞུགས་པའི་གནས་མཆོག་ཟླ་རྒྱལ་གོ་ཆེན་ཕུག་ཏུ་གཉུག་མ་ལྷན་སྐྱེས་རྒྱུན་གྱི་རྣལ་འབྱོར་སྐྱོང་བཞིན་བཞུགས་པའི་སྐབས། ཆུ་འབྲུག་སྤྲེལ་ཟླའི་ཚེས་བཅུའི་མཐོ་རངས་ཁར་དྲི་མེད་མཚོ་སྐྱེས་རྡོ་རྗེར་མཁའ་འགྲོ་གཉིས་དང་། རྣམ་རོལ་སྤྲུལ་པའི་མཚན་བརྒྱད་སོགས། འཁོར་རིག་འཛིན་དཔའ་བོ་མཁའ་འགྲོ།
དྲེགས་པ་ལྷ་སྲིན་སྡེ་བརྒྱད་ཀྱི་འཁོར་ཚོགས་དང་བཅས་པ། ད་ལྟའི་ཚེས་བཅུའི་འཆམ་བཀོད་སྟངས་སྟབས་ཇི་ལྟ་བ་ཡེ་ཤེས་ལྔ་ལྡན་གྱི་འཇའ་སྤྲིན་ཟེར་འོད་རྣམ་པར་འཁྲུག་པའི་ཀློང་དུ་གསལ་བར་བྱོན་ནས་གུ་རུ་རིན་པོ་ཆེ་ཉིད་ཞལ་གྱི་ཚིམས་ཕྲེང་རྣམ་བར་བཞད་པའི་རྡོ་རྗེའི་གསུང་གིས། བློ་གསལ་དད་ལྡན་བུ་ཡི་དབངཿ དལ་ཅིག་མ་ཡེངས་ཚིག་ལ་ཉོནཿ ཞེས་གསན་པར་བསྐུལ་ནས་བསྟན་པ་སྤྱི་དང་བྱེ་བྲག་རྒྱ་ཧོར་སོགས་གི་གནས་དུས་བདེ་སྡུག་གི་འགྱུར་ལྡོག་སོགས་ཀྱི་མ་འོངས་ལུང་བསྟན་ཞིབ་རྒྱས་དང་། མེ་སྤྲེལ་མེ་བྱ་གཉིས་སུ་དུས་ཀྱི་འཁྲུག་པ་དང་།མཐའ་ཡི་དམག་དཔུང་རྩུབ་སྦྱོར་གྱིས། འཛམ་གླིང་སྡུག་ལ་སྤྱོད་པར་འགྱུར་ཚུལ་དེ་དག་ཟློག་བྱེད་དུ། དུས་ཀྱི་རྒྱལ་པོའི་མཆོད་པར་བརྩོནཿ ཁྱད་པར་ཅན་གྱི་ལོ་ཚེས་ལཿ འདི་ལྟར་ཡ་མཚན་བཀོད་པའི་འཕྲུལཿ དངོས་སུ་སྣང་བའི་ཟློས་གར་སྟོནཿ ཕྱོགས་མེད་ཡངས་པའི་རྒྱལ་ཁམས་ཀྱིཿ མོས་པའི་འགྲོ་བ་རྣམ་མང་ངོརཿ མིག་ལ་ལྷ་ཡི་དཔལ་ཡོན་བསྐྱེདཿ སེམས་ལ་དད་པའི་ས་བོན་ཐོབཿ ཅེས་སོགས་བསྩལ་ཅིང་། དེ་དག་ཕུན་སུམ་ཚོགས་པར་འགྲིགས་ན་ཡུལ་བཅུད་ཉམས་པ་སོར་ཆུད་ཚུལ་དང་།ནད་འཁྲུག་མུ་གེ་མཐའ་དམག་ཟློག་པ། ཆོས་མཐུན་བསམ་པ་ལྷུན་གྱིས་འགྲུབ་པ། ལུས་ངག་ཟང་ཟིང་གི་འབྲེལ་ཐོག་ལྟོས་བཅས་ཕྱོགས་འདིར་མོས་པ་ཀུན་དག་པའི་ཞིང་དུ་སྐྱེ་བར་འགྱུར་ཚུལ་དང་། ཁྱད་པར་ཚེས་བཅུ་འདི་ཉིད་མཐོང་ཐོས་དད་པའི་འགྲོ་བ་རྣམ་མང་མཆོག་གི་སར་འགྲོ་བར་ངེས་པ་སོགས་རྡོ་རྗེའི་གསུང་གིས་རྗེས་སུ་གདམས་པར་བརྟེན། སྔ་སོར་འབུམ་ལྔའི་བསྟན་རིམ་ཆེན་པོ་དང་། རྗེས་ཐོག་ཏུ་སྤྲོས་བཅས་ཚེས་བཅུའི་སྒྲུབ་མཆོད་ཆེ་འབྲིང་གི་ཡོ་བྱད་བསམ་གྱིས་མི་ཁྱབ་པ་སྤྲུལ་པའི་བཟོ་བོ་མང་པོས་ངོ་མཚར་བའི་རོལ་རྩེད་ཀྱིས་བསྐྲུན་ནས་མེ་སྤྲེལ་ལོ་དགུང་ལོ་སོ་བདུན་བཞེས་ནས་སྐུ་ཚེ་དེའི་རིང་།མདོ་ཁམས་སྟོད་སྨད་བར་གསུམ་དུ་སྒྲུབ་ཆེན་གསུམ་དང་སྒྲུབ་མཆོད་བདུན་ཅུ་སྐོར་བཙུགས་ནས་མཐའ་ཡི་དམག་དཔུང་བཟློག་ཅིང་། ནད་མུག་མཚོན་འཁྲུག་གི་རྒུད་པ་བཅིལ་བ་དང་།རྒྱལ་བའི་བསྟན་ཞབས་སླར་ཡང་མི་ཉམས་གོང་འཕེལ་དུ་གསོ་བའི་བཀའ་དྲིན་གཞལ་དུ་མེད་པ་མཛད། དམ་པ་དེ་ཉིད་ཀྱི་གདན་ས་གཙོ་བོ་མདོ་ཁམས་ཁམས་པ་སྒར་དཔལ་ཕུན་ཚོགས་ཆོས་འཁོར་གླིང་དུ་སྤྲུལ་པའི་ཕྲེང་བ་ན་རིམ་གྱིས་བསྐྱངས་ཤིང་།
དེ་ནས་བཟུང་རིག་གནས་གསར་རྗེ་ཆེན་མོའི་དུས་སུ་གངས་ལྗོངས་བསྟན་པ་ཡོངས་རྫོགས་བརླགས་པའི་གནས་སྐབས་ས་ཕག་ལོའི་བར་ལོ་ལྟར་ཆག་མེད་འཛུགས་བསྐྲུན་གྱིས་ཚེས་བཅུའི་སྒྲུབ་མཆོད་ཉིས་བརྒྱ་དགུ་བཅུ་དང་། སྒྲུབ་ཆེན་གྲངས་བཅོ་བརྒྱད་ཙམ་བཙུགས་ཤིང་། ཕྱི་ལོ་ ༡༩༥༨ ལོར་རྒྱལ་བ་མདོ་ཁམས་པ་སྐུ་ཕྲེང་བརྒྱད་པ་བསྐལ་བཟང་དོན་བརྒྱུད་ཉི་མ་མཆོག །འཕགས་ཡུལ་བཙན་བྱོལ་དུ་ཕེབས་དགོས་བྱུང་མཚམས་སུ། ཀ་ལི་སྤུངས་དང་། ཧི་མ་ཅལ་མངའ་ཁོངས་བྷུ་ནི་རི། སྒྲ་ལ་ཧོལ། ཕྱི་ལོ་༡༩༦༨ ལོར་བཀྲ་ཤིས་ལྗོངས་སུ་བྱེས་ཀྱི་གདན་ས་ཁམས་པ་སྒར་ཕྱག་བཏབ་ནས་བཟུང་། དཔལ་འབྱོར་སོགས་ཀྱི་གནས་སྟངས་ཤིན་ཏུ་ཉག་ཕྲ་བོ་ཡོད་མིན་ལ་མ་ལྟོས་པར་དཔལ་རྒྱལ་བ་མདོ་ཁམས་བརྒྱད་པ་སྐལ་བཟང་དོན་བརྒྱུད་ཉི་མ་མཆོག་ནས་སྒྲུབ་མཆོད་ཆེ་འབྲིང་ཅི་རིགས་རྒྱུན་མ་ཆད་པ། རིག་འཛིན་བརྒྱུད་པའི་ཕྱག་སྲོལ་མ་འཕྱུགས། བྱིན་རླབས་ཀྱི་ཚན་ཁ་མ་ཉམས། དངོས་སྒྲུབ་ཀྱི་དྲོད་རྟགས་མ་ཡལ་བ་འཚོགས་ནས། ད་ལན་རབ་གནས་མེ་སྤྲེལ་ལོ། ཕྱི་ལོ་༢༠༡༦ ལ་བགྲང་བྱ་ཧྲིལ་པོ་སུམ་བརྒྱ་འཁོར་གྱི་ཡོད། འདི་ལྟར་གནང་བའི་དགོས་པའང། གུ་རུ་རིན་པོ་ཆེ་ཉིད་ཀྱིས་ལུང་བསྟན་པ་ལྟར་བསྟན་དང་འགྲོ་བའི་དོན་ཁོ་ནར་དུས་ཀྱི་སྤྱི་རིམ་ཡིན་པས་སྙིགས་དུས་འདིར་ནད་མུག་འཁྲུག་རྩོད་དང་ལྷག་པར་ས་ཡོམ་སོགས་འབྱུང་བཞིའི་གནོད་འཚེ་ཇེ་མང་དུ་འགྲོ་དང་འགྲོ་བཞིན་པ་ནི་ཀུན་གྱི་མཁྱེན་གསལ་ལགས་པས་འཛམ་གླིང་ནང་གི་ཉེས་འཚེ་མཐའ་དག་ཞི་བའི་ཆེད་དུ་དམིགས་པ་ཞིག་ཡིན་པ་ལགས་སོ། །
མཐའ་དོན་བདག་ཅག་བོད་འབངས་སྤྱི་བོ་གནམ་བསྟན་ཡོངས་ཀྱི་སྐྱབས་གནས་འཛམ་གླིང་ཞི་བདེའི་དེད་དཔོན་ལྷ་མིའི་རྣམ་འདྲེན་སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་གཙོ་བོར་གྱུར་པའི་ཆོས་བརྒྱུད་རིས་མེད་ཀྱི་བསྟན་བདག་བླ་ཆེན་རྣམས་སྐུ་ཚེ་བསྐལ་བརྒྱར་བརྟན་ཅིང་། ཐུགས་ཀྱི་བཞེད་དོན་མཐའ་དག་འབད་མེད་ལྷུན་གྱིས་འགྲུབ་པ་དང་། བོད་དོན་བདེན་མཐའ་མྱུར་དུ་གསལ་བའི་སྨོན་འདུན་ཞུ་རྒྱུ་དང་། གཞན་ཡང་འགྲོ་བ་སྤྱི་དང་ཁྱད་པར་ཚེས་བཅུའི་སྒྲུབ་ཆེན་འདིར་འབྲེལ་ཐོག་ཀུན་གནས་སྐབས་ཀྱི་རྐྱེན་ངན་བར་ཆད་ཐམས་ཅད་ཞི་ཞིང་། བསམ་དོན་ལྷུན་གྱིས་འགྲུབ་པ་དང་། དཔལ་རི་པདྨ་འོད་ཀྱི་ཞིང་དུ་བདག་སོགས་ཚོམ་བུ་གཅིག་ཏུ་འཚང་རྒྱ་བའི་སྨོན་འདུན་ཤུགས་དྲག་ཞུ་རྒྱུ་བཅས་སོ། དེ་རྗེས་སྐུ་མགྲོན་གཙོ་བོ་བོད་མང་སྤྱི་འཐུས་ཚོགས་གཙོ་གཞོན་པ་མཁན་པོ་བསོད་ནམས་བསྟན་འཕེལ་མཆོག་ནས་དུས་དྲན་དང་འབྲེལ་བའི་བཀའ་སློབ་གནང་གྲུབ་རྗེས་ཚེས་བཅུའི་གར་འཆམ་དངོས་སུ་གཟིགས་འབུལ་གྱིས་ཉིན་གང་མཛད་རིམ་བསྐྱངས་པ་བཅས་ཀྱི་གནས་ཚུལ་སྙིང་བསྡུས་སུ།།
