༢༠༡༦ ཟླ་ ༣ ཚེས་ ༡༤ རེས་གཟའ་ཟླ་བ།
༄༅། །མཚུངས་མེད་ས་གནས་འོས་བསྡུའི་འགན་འཛིན་དང་། འགན་འཛིན་ལས་རོགས། ཚོགས་མི། ཟུར་དཔང་རྣམ་པ་ལྷན་རྒྱས་ལ།
ཆེད་ཞུ། འདི་ནས་འོས་བསྡུའི་སྒྲིག་ལམ་སྤྱི་དང་བྱེ་བྲག་ལམ་སྟོན་སྔོན་ཞུས་ཁག་ལ་འགལ་འཛོལ་མི་འབྱུང་བའི་འགན་འཁུར་སྔར་ལྷག་ཧུར་ལེན་ཡོང་བའི་འབོད་སྐུལ་ནན་པོ་ཞུ་རྒྱུ་ཡིན། ལྷག་པར་འདི་ལོ་དམིགས་བསལ་སྲིད་སྤྱི་གཉིས་ཀྱི་འོས་གཞིར་ཡོད་མཁན་དང་མང་ཚོགས་ནང་མང་གཙོའི་ཁེ་དབང་ལོངས་སུ་སྤྱད་དེ་འགྲན་རྩོད་ཀྱི་འཁྲུག་ཆ་ཧ་ཅང་དོད་པོ་བྱུང་དང་འབྱུང་བཞིན་པ་ནི། དམར་ཤོག་ལྟ་བུ་དབང་ཆ་གཅིག་སྡུད་ལམ་ལུགས་ཅན་མ་ཡིན་པའི་མང་གཙོ་ལུང་པའི་ནང་སྤྱིར་བཏང་ཞིག་ཡིན་ནའང་། མང་གཙོའི་ཁེ་དབང་དེ་བཞིན་དྲང་བདེན་དང་འདྲ་མཉམ། གུས་བརྩི་བཅས་ཀྱི་སྒོ་ནས་ལོངས་སུ་སྤྱོད་རྒྱུ་གལ་ཆེ་བར་བརྟེན་སླར་ཡང་རྟིང་བསྐུལ་ཞུ་རྒྱུར།
ཀ༽ འདི་ནས་ཕྱི་ལོ་ ༢༠༡༦ ཟླ་ ༣ ཚེས་ ༩ འཁོད་ལམ་སྟོན་སྔོན་སོང་གི་དང་པོའི་ནང་གསལ་ལྟར་སྒྲིག་གསལ་འོས་དངོས་གཞིའི་གོང་གི་ཕྱི་ཚེས་ ༡༨ ནས་ས་གནས་གང་དུ་ཡང་འོས་གཞིའི་སྐྱེ་བོ་དང་རྒྱབ་བསྐྱོར་བ་སུ་ཐད་ནས་འོས་བསྡུའི་དྲིལ་བསྒྲགས་དང་འབྲེལ་བའི་གཏམ་བཤད་དང་། བགྲོ་གླེང་། ཡིག་ཆ་འགྲེམ་སྦྱར་བྱེད་མི་ཆོག་པས་དེ་རིགས་མི་འབྱུང་བའི་འགན་འཁུར་ལམ་སྟོན་ཐུབ་པ་དགོས་རྒྱུ།
ཁ༽ འོས་བསྡུ་ཆེན་མོའི་ཉིན་མང་ཚོགས་ནང་བསམ་ཚུལ་མཐུན་མིན་གྱིས་སྐད་ཆ་མཐོ་དམན། རྣམ་འགྱུར་འདྲ་མིན་ཡོང་སྲིད་པ་དང་། གཞན་ཡང་རེ་ཟུང་ནས་བསམ་བཞིན་དུ་འོས་བསྡུའི་ལས་རིམ་ལ་བར་ཆད་ཀྱི་རྐྱེན་སློང་བྱེད་པ་སོགས་ཡོང་སྲིད་པར་བརྟེན་སྔོན་ཚུད་ནས་ས་གནས་ཉེན་རྟོག་པར་འབྲེལ་གཏུགས་གནང་རྒྱུ་དང་། ལྷག་པར་འོས་བསྡུའི་ཚོགས་མི་རྣམས་ནས་གནད་དོན་དེ་རིགས་ལ་བཟོད་སྲན་དང་དོགས་ཟོན་ཆེན་པོའི་སྒོ་ནས་བལྟ་རྟོག་ནན་མོ་གནང་དགོས།
ག༽ འོས་སྒམ་ཚད་ལྡན་སྒོ་ལྕགས་ཅན་དགོས་པ་མ་ཟད་བལྟ་རྟོག་བདག་ཉར་གང་གཟབ་བྱ་དགོས་རྒྱུ་བཅས་ཀྱི་རྟིང་སྐུལ་དུ།
དབུས་འོས་བསྡུ་ལས་ཁང་ནས་ཕྱི་ལོ་ ༢༠༡༦ ཟླ་ ༣ ཚེས་ ༡༤ ལ།།
