༢༠༡༦ ཟླ་ ༣ ཚེས་ ༨ རེས་གཟའ་མིག་དམར།
༄༅། །ཕྱི་ལོ་ ༢༠༡༦ ཟླ་ ༢ ཚེས་ ༣ ནས་ ༥ བར་ཕྱི་དྲིལ་འགྲེམས་སྟོན་ཚན་པ་དང་བོད་ཀྱི་གྲོགས་པོ་ཚོགས་པས་གོ་སྒྲིག་འོག་རྒྱ་གར་ལྷོ་ཕྱོགས་ཀེ་ར་ལའི་གྲོང་ཁྱེར་ཨ་ལབ་པུ་ཛར་ཕ་ཡུལ་ཕྱོགས་སུ་རྒྱང་བལྟ་བྱས་པ། ཞེས་པའི་བརྗོད་གཞིའི་ཐོག་པར་རིགས་འགྲེམས་སྟོན་གནང་འདུག
དེ་ཡང་མཛད་སྒོའི་ཐོག་མར་ཉེ་ལམ་མ་སུ་རི་བོད་ཁྱིམ་གྱི་སློབ་མ་རྡོ་རྗེ་ཚེ་རིང་ལགས་ཀྱིས་བོད་དོན་ཆེད་རང་ལུས་མེར་སྲེག་བཏང་བར་ཁོང་ཉིད་ལ་གདུང་སེམས་མཉམ་སྐྱེ་མཚོན་ཆེད་སྐར་མ་གཅིག་རིང་ངག་བཅད་མྱ་ངན་གུས་འདུད་ཞུས། དེ་རྗེས་བོད་དོན་ཐོག་རྒྱབ་སྐྱོར་གནང་མཁན་མི་གྲངས་ལྔས་མར་མེ་ཞལ་ཕྱེ་གནང་སྟེ་འགྲེམས་སྟོན་དབུ་འབྱེད་གནང་འདུག
ཐེངས་འདིའི་འགྲེམས་སྟོན་ནང་རྒྱ་ནག་གཞུང་གིས་བོད་དབང་སྒྱུར་མ་བྱས་གོང་གི་གནས་བབས་དང་། རྒྱ་ནག་གིས་བོད་བཙན་བཟུང་བྱས་པའི་རྗེས་འབྲས་ཅི་བྱུང་། ད་ལྟའི་བོད་ནང་གི་ཛ་དྲག་གནས་སྟངས་དང་བཙན་བྱོལ་བོད་མིའི་གནས་བབས། དེ་བཞིན་དེ་སྔ་བོད་རྒྱ་ནག་གི་བཙན་བཟུང་མ་བྱས་གོང་བོད་ཀྱི་རྒྱལ་དར་དང་། ཤོག་དངུལ། ས་ཁྲ། ལམ་ཡིག་སོགས་འགྲེམས་སྟོན་གནང་འདུག དེ་ཡང་པར་རིགས་འགྲེམས་སྟོན་ལ་མི་སྣ་ཧ་ཅང་མང་པོས་དོ་སྣང་གནང་འདུག་པ་མ་ཟད། དོགས་འདྲི་སོགས་གནང་འདུག ལྷག་པར་པར་རིགས་འགྲེམས་སྟོན་སྐོར་གྱི་གནས་ཚུལ་རྣམས་གསར་འགྱུར་བརྒྱུད་ལམ་འདྲ་མིན་ནང་ཐོན་སྟབས་དྲིལ་བསྒྲགས་ཤུགས་ཆེ་བྱུང་འདུག་པ་བཅས། །
