ཕྱི་ལོ་ ༢༠༡༦ ཟླ་ ༣ ཚེས་ ༥ རེས་གཟའ་སྤེན་པ།
༄༅། །ཕྱི་ལོ་ ༢༠༡༦ ཟླ་ ༣ ཚེས་ ༤ ཉིན་གྱི་སྔ་དྲོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཨ་རིའི་མེ་ཡོ་སྨན་ཁང་དུ་སྐུའི་འཕྲོད་བཞེས་ལེགས་གྲུབ་ཀྱིས་ཨ་རིའི་མེ་ཌི་སོན་གྲོང་ཁྱེར་དུ་ཆིབས་ཞལ་བསྒྱུར་འདུག
དེ་ཡང་མགོན་པོ་གང་ཉིད་མཆོག་མེ་ཡོ་སྨན་ཁང་ནས་ཆིབས་ཞལ་སྒྱུར་སྐབས་བཀའ་སློབ་སྩལ་དོན། ཁྱེད་རང་ཚོ་བློ་བདེ་པོ་གྱིས། ད་ལན་སྨན་བཅོས་ཧ་ཅང་ལས་སླ་པོ་བྱུང་། ཟླ་བ་གཅིག་ལྷག་ཙམ་རིང་ངོས་རང་ངལ་གསོ་ལྟ་བུ་རེད་འདུག ཧ་ཅང་སྐྱིད་པོ་བྱུང་། ཁྱེད་རང་ཚོ་ཚང་མས་ལྷག་བསམ་དང་། དད་པ་གཡོ་བ་མེད་པར་ཐུགས་རྗེ་ཆེ། བོད་མི་ས་ཡ་དྲུག་གི་དད་པ་དང་དམ་ཚིག་གཡོ་བ་མེད་པ་དེ་དག་གིས་རྒྱ་ནག་གཞུང་གིས་བོད་ལ་དབང་བསྒྱུར་བྱས་ནས་ལོ་དྲུག་ཅུ་ཙམ་འགྲོ་བཞིན་ཡོད་ཀྱང་། ངོས་ནས་དུས་རྒྱུན་དུ་བརྗོད་མུས་ལྟར། རྒྱ་མིས་བོད་བཟས་ཀྱང་ཕོ་བས་འཇུ་མ་ཐུབ་པར་ལུས་ཡོད་ཅེས་སྔར་ནས་བརྗོད་པ་ལྟར། ད་ལྟའང་གནས་སྟངས་དེ་མུར་ལུས་ཡོད། བོད་མི་རིགས་ཀྱི་མི་རབས་རྒན་པ་རྣམས་རྫོགས་བཞིན་ཡོད། འོན་ཀྱང་མཇུག་མཐུད་ནས་ཡོང་མཁན་མི་རབས་གཞོན་པ་རྣམས་ཀྱིས་བོད་མི་རིགས་ཀྱི་ལ་རྒྱ་དང་ཞེན་ཁོག་འཁྱེར་བཞིན་ཡོད།
སྔ་ལོ་ཕྱི་ཟླ་ ༡༡ ནང་ལྡི་ལིར་ཚན་རིག་ཚོགས་འདུའི་སྐབས་སུ་བོད་པའི་སློབ་ཕྲུག་གང་འཚམ་ཞིག་འདུག་ཅིང་། སྐབས་དེར་སྐད་ཆ་ཞིག་བྱུང་བར་བོད་ཀྱི་བདེན་མཐའ་དེ་ཉིད་ཤུགས་ཇེ་ཆེར་འགྲོ་ངེས་ཡིན། གང་ལགས་ཤེ་ན། བོད་ཀྱི་ཆོས་དང་རིག་གཞུང་གི་ཐོག་ལ་དེང་སྐབས་འཛམ་གླིང་འདིའི་ཐོག་ནས་དོ་སྣང་བྱེད་མཁན་ཇེ་མང་ནས་ཇེ་མང་དུ་འགྲོ་བཞིན་ཡོད། ང་ཚོས་དེ་སྔ་ཕན་ཆད་འཛམ་གླིང་ཐོག་འབྲེལ་བ་བྱེད་མ་ཐུབ་པ་དང་། སྐད་ཡིག་གི་ཆ་ནས་མ་འདང་བའི་དཀའ་ངལ་འཕྲད་ཡོད། དེང་སྐབས་འཛམ་གླིང་འདིའི་ཐོག་སངས་རྒྱས་པའི་ཆོས་ལ་དོ་སྣང་བྱེད་བཞིན་ཡོད་པ་དང་། སངས་རྒྱས་པའི་ཆོས་ཀྱི་ནང་དུ་བོད་མིས་སློབ་སྦྱོང་དང་ཉམས་ལེན་བྱ་རྒྱུའི་ཆོས་འདི་ལས་ལྷག་པ་ཞིག་འཛམ་གླིང་འདིའི་ཐོག་མེད་ལ་ཧ་ཅང་གསལ་པོ་ཡིན། དེ་དག་གི་འགྲེལ་བཤད་བྱེད་པ་ལའང་བོད་པའི་སྐད་ཡིག་ལས་ལྷག་པ་གཅིག་ཀྱང་མེད། དེ་དག་ནི་ང་ཚོ་བོད་མི་རིགས་ཀྱི་སྙིང་སྟོབས་མཚོན་པ་དང་། བོད་མི་རིགས་ཀྱི་རྣམ་དཔྱོད་ཇི་ལྟ་བུ་ཞིག་ཡོད་པ་མཚོན་ཐུབ་པ་ཞིག་ཡིན།
སྤྱིར་བཏང་ཚན་རིག་པ་རྣམས་རྣམ་དཔྱོད་བཀྲ་ཤོས་སུ་ངོས་འཛིན་བྱེད་བཞིན་ཡོད། དེང་སྐབས་ཚན་རིག་པ་རྣམས་ཀྱིས་ཀྱང་ནང་ཆོས་ལ་དོ་སྣང་གསར་པ་ཞིག་བྱེད་བཞིན་ཡོད། འཛམ་གླིང་འདིའི་ཐོག་ནས་དོ་སྣང་ཇི་ཙམ་ཡོད་པ་དེ་སྲིད་དུ་བོད་མི་རིགས་ལ་ཆེ་མཐོང་སླེབས་ངེས་ཡིན་ལ། ལྷག་པར་རྒྱ་ནག་ནང་དུ་ཆ་མཚོན་ན། ད་ལྟ་རྒྱ་ནག་གུང་ཁྲན་ཏང་གཅིག་སྡུད་རིང་ལུགས་འོག་མནན་ནས་བསྡད་པ་ལས། རྒྱ་རིགས་ས་ཡ་བཞི་བརྒྱ་ལྷག་ཙམ་གྱིས་ནང་ཆོས་བྱེད་བཞིན་ཡོད་པར་མ་ཟད། དེ་བཞིན་ནང་པ་མང་པོ་ཞིག་གིས་བོད་ཀྱི་ནང་པ་སངས་རྒྱས་པའི་ཆོས་ལ་དོ་སྣང་བྱེད་བཞིན་ཡོད། དེར་བརྟེན་ང་ཚོས་ལྷོད་ཡངས་སུ་གཏན་ནས་གཏོང་རྒྱུ་མེད་ལ། ང་ཚོས་ངེས་པར་དུ་གཟབ་གཟབ་བྱེད་དགོས་པ་ཞིག་ཡིན། ཞེས་བཀའ་སློབ་སྩལ།།
