༢༠༡༦ ཟླ་ ༣ ཚེས་ ༢༦ རེས་གཟའ་སྤེན་པ།

༄༅། །ཕྱི་ལོ་ ༢༠༡༦ ཟླ་ ༣ ཚེས་ ༢༧ ཉིན་གྱི་སྔ་དྲོ་ཕྱི་དྲིལ་ལྷག་པ་ཚེ་རིང་དྲན་རྟེན་ཚོགས་ཁང་ནང་དྲིལ་བསྒྲགས་དྲུང་ཆེ་བཀྲ་ཤིས་ཕུན་ཚོགས་ལགས་ཀྱིས་ཧི་མཱ་ཅལ་མངའ་སྡེའི་ཀངྒ་ར་རྫོང་ཁོངས་ནག་རོ་ཊ་བྷག་ཝན་ Nagrota Bagwan གྲོང་སྡེ་ནང་རྟེན་གཞི་བྱས་པའི་རྒྱ་གར་གཞུང་གི་མཐོ་སློབ་ཀྱི་སྲིད་དོན་ཚན་རིག་ཚན་པའི་ Department of Political Science,Govt.College ཉེ་བའི་གཙུག་ལག་རབ་འབྱམས་པའི་ལོ་རིམ་གསུམ་པའི་སློབ་མ་གྲངས་ ༥༦ ཙམ་དང་སློབ་སྟོན་དགེ་རྒན་གཉིས་བཅས་མཉམ་འཛོམས་ཐོག་བོད་མིའི་སྒྲིག་འཛུགས་ཀྱི་སྒྲོམ་གཞི་སོགས་ཀྱི་སྐོར་སློབ་ཕྲུག་ཚོར་ངོ་སྤྲོད་གནང་ཡོད།

སྐབས་དེར་ཐོག་མར་དྲུང་ཆེ་བཀྲ་ཤིས་ཕུན་ཚོགས་ལགས་ཀྱིས་བོད་མི་རྣམས་བཙན་བྱོལ་དུ་གྱར་དགོས་དོན་ནི་བོད་ནང་རྒྱ་ནག་དམར་པོའི་སྲིད་གཞུང་གིས་ཕྱི་ལོ་ ༡༩༥༩ ལོར་བཙན་འཛུལ་བྱས་པར་བརྟེན་༸གོང་ས་༸སྐྱབས་མགོན་ཆེན་པོ་མཆོག་གིས་དབུས་བོད་མི་ཁྲི་ཕྲག་བརྒལ་བ་རྒྱ་གར་དུ་བྲོས་བྱོལ་ལ་ཆིབས་སྒྱུར་བསྐྱངས་ཡོད་པ་དང་།

དེང་སྐབས་རྒྱ་གར་ནང་དུ་བོད་མི་བཙན་བྱོལ་བ་རྣམས་ཀྱིས་གནའ་དེང་ཟུང་འབྲེལ་ཐོག་ནས་མང་གཙོའི་ལམ་སྲོལ་ལོངས་སུ་སྤྱོད་བཞིན་པ་མ་ཟད། བོད་ཀྱི་ཆོས་དང་རིག་གཞུང་། སྐད་ཡིག ཡུལ་སྲོལ་གོམས་གཤིས་སོགས་རྒྱུན་འཛིན་གནང་བཞིན་པའི་སྐོར་འགྲེལ་བརྗོད་གནང་ཡོད། གཞན་ཡང་དྲུང་ཆེས་བཙན་བྱོལ་བོད་མིའི་མང་གཙོའི་འཕེལ་རིམ་སྐོར་དང་། བོད་མིའི་སྒྲིག་འཛུགས་ཀྱི་མང་གཙོའི་ཀ་བ་གསུམ་གྱིས་ངོ་བོ་དང་ལས་འགན། ལས་དོན་གནང་ཕྱོགས་སྐོར་ངོ་སྤྲོད་གནང་བ་མ་ཟད། བོད་མིའི་སྒྲིག་འཛུགས་ཀྱི་ལྷན་ཁང་ཁག་རེ་རེ་བཞིན་ངོ་སྤྲོད་དང་འབྲེལ་ལས་དོན་བྱེད་ཕྱོགས་དང་། དེ་བཞིན་རང་དབང་ཅན་གྱི་སྡེ་ཚན་གསུམ་གྱི་ངོ་སྤྲོད་དང་ལས་འགན་གང་ཡིན་པ་སོགས་གོ་བདེའི་ངང་འགྲེལ་བརྗོད་གནང་སྟེ་ལས་རིམ་མཇུག་སྒྲིལ། །