༢༠༡༦ ཟླ་ ༣ ཚེས་ ༣༡ རེས་གཟའ་ཕུར་བུ།
༄༅། །ཕྱི་ལོ་ ༢༠༡༦ ཟླ་ ༣ ཚེས་ ༣༠ རེས་གཟའ་ལྷག་པའི་ཉིན་གྱི་ཉིན་གུང་སྐབས་བཅོ་ལྔ་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བཅུ་གཅིག་པའི་ལས་ཉིན་དགུ་པའི་ཚོགས་དུས་སྐབས་རྒྱ་གར་གྱི་འབྲེལ་མཐུད་པ་ (Liaison officer) སྐུ་ཞབས་གུ་རུ་ཤཱ་རན་སིངྒ་ Gurusharan Singh མཆོག་གིས་གཙོས་རྒྱལ་སྤྱིའི་འགྲོ་བ་མིའི་ཐོབ་ཐང་འཐབ་རྩོད་པ་སྐུ་ཞབས་མེ་ཀལ་སི་ཝན་ཝལ་པཱ་རག Michel C Van Walt Praag ལགས་དང་། ཁོང་གི་སྐུ་ཟླ་ཇོ་ཧཱ་ན་ཁེ་དི་རི་བོལ་ཌི་ཇེས་ Johanna Catharina Boltjes མཆོག དེ་བཞིན་བོད་དོན་རྒྱབ་སྐྱོར་བ་མི་སྣ་ཁག་གཅིག་བཅས་ཟུར་ཉན་དུ་བཅར་སྐབས་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས་གྲོས་ཚོགས་ནང་ངོ་སྤྲོད་གནང་བར་ཚང་མས་སྐུ་བཞེངས་ཏེ་དགའ་བསུ་ཞུས་ཡོད།
སྐུ་ཞབས་མེ་ཀལ་སི་ཝན་ཝལ་པཱ་རག་ལགས་ནི་དེ་སྔ་དགའ་ལྡན་ཕོ་བྲང་ནང་གི་ཕྱི་འབྲེལ་ལས་དོན་ཐོག་སློབ་སྟོན་པའི་འགན་ཁུར་ཞུ་མྱོང་ཡོད་འདུག ཁོང་དང་ཁོང་གི་སྐུ་ཟླ་ཇོ་ཧཱ་ན་ཁེ་དི་རི་ན་རྣམ་གཉིས་ཕྱི་ཟླ་གསུམ་པའི་ཚེས་ ༢༧ ནས་ཕྱི་ཟླ་ ༤ ཚེས་ ༢ བར་རྡ་སར་གཞུང་འབྲེལ་ཕྱོགས་ཕེབས་གནང་བ་ཞིག་ཡིན་འདུག
ཕྱོགས་མཚུངས་ཉིན་སྔ་མ་སྟེ་གྲོས་ཚོགས་ལས་ཉིན་བརྒྱད་པའི་ཚོགས་ཐེངས་སྐབས་འཇར་མན་དུ་རྟེན་གཞི་བྱས་པའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་ཝུལྤ་སྒེང་གེ་རེ་ཌར་ Wolfgang Grader མཆོག་དང་ཁོང་གི་ལས་རོགས་ལྕམ་སྐུ་ཨི་རི་ཀ་ཨིལ་ནར་ Erika Ellner ལགས་དང་། གློག་བརྙན་བཟོ་སྐྲུན་པ་སྐུ་ཞབས་ཁིར་རི་སི་ཊེན་བྷེ་ཡར་ Christian Beyer ལགས་བཅས་ཀྱང་གྲོས་ཚོགས་སུ་ཟུར་ཉན་དུ་ཆེད་ཕེབས་གནང་ཡོད་འདུག །
