༢༠༡༦ ཟླ་ ༢ ཚེས་ ༦ རེས་གཟའ་སྤེན་པ།
༄༅། །བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེང་གེ་མཆོག་གིས་འཆར་ལ་ཉེ་བའི་བོད་ཀྱི་ལོ་གསར་ལ་གཞིས་བྱེས་བོད་མི་ཡོངས་ལ་འཚམས་འདྲི་གནང་བའི་ནང་འཁོད་དོན། བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དབུས་པའི་བོད་ཀྱི་ཆོས་བརྒྱུད་ཆེན་པོ་བཞི་དང་གཡུང་དྲུང་བོན་དང་བཅས་པའི་བླ་ཆེན་དབུ་ཁྲིད་རྣམ་པ། གཞིས་བྱེས་གཉིས་སུ་གནས་པའི་བོད་རིགས་སྤུན་ཟླ་རྣམ་པ། རྒྱ་གར་གཞུང་དམངས་གཉིས་དང་། འཛམ་གླིང་ཁྱོན་དུ་གནས་པའི་བོད་ཀྱི་གྲོགས་པོ་ཡོངས་བཅས་ལ་བོད་རྒྱལ་ལོ་ ༢༡༤༣ རབ་གནས་མེ་སྤྲེལ་ལོའི་གནམ་ལོ་གསར་ཚེས་ལ་བཀའ་ཤག་དང་། སྲིད་སྐྱོང་སྒེར་ངོས་ནས་འཚམས་འདྲིའི་བཀྲ་ཤིས་བདེ་ལེགས་ཞུ་རྒྱུ་ཡིན། ལོ་གསར་ནི་བོད་ཀྱི་སྲོལ་རྒྱུན་གྱི་དུས་ཆེན་ཧ་ཅང་གལ་ཆེན་པོ་ཞིག་རེད། ཚང་མས་སྲུང་བརྩི་ཞུ་བ་ཙམ་དུ་མ་ཟད། བོད་མིའི་ཡ་རབས་བཟང་སྤྱོད་མཚོན་པའི་རྩ་ཆེ་བའི་ཆོས་དང་རིག་གཞུང་། གོམས་སྲོལ་བཟང་པོ་དེ་དག་རྩ་བརླག་ཏུ་མ་འགྲོ་བའི་ཆེད་དུ་གང་ཐུབ་མི་རབས་རྒན་པ་ཚོས་གཞོན་སྐྱེས་ཚོར་ངོ་སྤྲོད་གནང་རྒྱུ་ཧ་ཅང་གལ་ཆེན་པོ་རེད།
བོད་ནང་གི་གནས་སྟངས་ནི། གདུག་རྩུབ་མནར་གཅོད་འོག་ཡོད་པ་མ་ཟད། བཟང་ཕྱོགས་ཀྱི་འགྱུར་བ་མེད་པའི་ཁར་ཉིན་ཤས་གོང་བོད་རིགས་འདུས་སྡོད་ས་ཁུལ་ཁ་ཤས་ལ་༸རྒྱལ་བ་རིན་པོ་ཆེའི་སྐུ་དཔར་ཙམ་ཡང་སྒྲིག་གཤོམ་མི་ཆོག་པའི་ཐལ་ཆ་ཆེ་བའི་བཀའ་ཁྱབ་འདི་རིགས་ནི། ང་ཚོ་བཙན་བྱོལ་དུ་ཡོད་པའི་བོད་མི་ཡོངས་ནས་ཐུགས་སྣང་གནང་དགོས་རྒྱུ་ཤིན་ཏུ་གལ་ཆེན་པོ་རེད། སྔ་ལོ་བོད་མིའི་སྒྲིག་འཛུགས་གཞུང་དམངས་གཉིས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་བརྒྱད་ཅུར་ཕེབས་པའི་བཀའ་དྲིན་རྗེས་དྲན་སྲུང་བརྩི་དང་འབྲེལ། བརྟན་བཞུགས་བསྟར་འབུལ་ཞུ་སྐབས་མགོན་པོ་གང་ཉིད་མཆོག་གིས་སྔོན་གྱི་ཞལ་བཞེས་ལྟར། དགུང་གྲངས་བརྒྱ་ལྷག་འཚོ་བཞེས་ཀྱིས་བཀའ་བཞེས་བཟང་པོ་ཐོབ་པ་ནི་ང་ཚོ་ཧ་ཅང་གི་སྐལ་པ་བཟང་པོ་ཡིན། ད་དུང་ཡིན་ནའང་ཚང་མས་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་རྗེའི་བཀའ་དྲིན་དུས་རྟག་ཏུ་དྲན་པའི་ཐོག་བཀའ་སློབ་ལམ་སྟོན་ཁག་ལ་ཚུལ་བཞིན་ཉམས་ལེན་ཞུ་རྒྱུ་དགོས་པ་ནི་དོན་གྱི་སྙིང་པོ་ཡིན། ༸གོང་ས་མཆོག་ཨ་རིའི་སྨན་ཁང་ནང་སྨན་བཅོས་མཛད་བཞིན་ཡོད་པ་ཚང་མས་མཁྱེན་གསལ་རེད། བཀའ་ཤག་ནས་ཀྱང་དོ་ཁུར་ཧ་ཅང་ཆེན་པོ་ཞུ་བཞིན་ཡོད་ལ། ཉིན་རེའི་གནས་ཚུལ་འབྱོར་གྱི་འདུག ད་ལྟའི་ཆར་སྨན་བཅོས་ཧ་ཅང་ལེགས་པོ་འགྲོ་གི་འདུག དེ་བཞིན་སྨན་པ་ཚོ་ཡིན་ནའང་༸གོང་ས་མཆོག་སྤྱི་ཡོངས་ཀྱི་སྐུ་གཟུགས་ཧ་ཅང་ཡག་པོ་འདུག་ཅེས་གསུང་གི་འདུག ཚང་མས་ཐུགས་ཁྲལ་གནང་དགོས་མི་འདུག་ཅེས་ཞུ་རྒྱུ་ཡིན། ང་ཚོས་གནང་ཐུབ་པ་ནི། དུས་རྟག་ཏུ་སྐུའི་ཞབས་རིམ་སྒྲུབ་རྒྱུ་དང་། རྡོག་རྩ་གཅིག་སྒྲིལ་དང་དམ་ཚིག་གཙང་མ་ཡོད་དགོས་རྒྱུ་ཤིན་ཏུ་ནས་གལ་ཆེན་པོ་རེད།
སྤྱི་ཡོངས་ནས་ང་ཚོས་སྤྱི་མཐུན་གྱི་བསོད་ནམས་ཁྱོག་པ་ཡིན་ན། ༸གོང་ས་མཆོག་སྐུ་ཚེ་རིང་པོར་བརྟན་པར་ཐུགས་ཁྲལ་གནང་དགོས་མ་རེད། ཅེས་ཞུ་རྒྱུ་ཡིན། མཐའ་དོན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་སྐུ་ཁམས་མྱུར་དུ་དྭངས་གསལ་ཐོག་སྐུ་ཚེ་ཞབས་པད་སྐལ་བརྒྱར་བརྟན་ཅིང་ཐུགས་བཞེད་མཐའ་དག་ལྷུན་གྱི་འགྲུབ་པ། འཛམ་གླིང་སྐྱེ་འགྲོ་ཡོངས་ལ་ཞི་བདེ་བྱུང་བ། གཞིས་བྱེས་མཉམ་འཛོམས་ཀྱི་སྐལ་བཟང་གི་ཉི་མ་མྱུར་དུ་ཤར་བ། ཚང་མས་འཇིག་རྟེན་ཁྲ་ཁྲ་ཟིང་ཟིང་ལ་དབུ་མ་འཁོར་བར་གནམ་དཀར་དགེ་བའི་ལས་ལ་སྐུལ་མ་ཞུ་རྒྱུའི་སྨོན་འདུན་དང་བཅས། སླར་ཡང་ལོ་གསར་པ་ལ་བཀྲ་ཤིས་བདེ་ལེགས་ཞུ་རྒྱུ་ཡིན། །
