༢༠༡༦ ཟླ་ ༢ ཚེས་ ༡༥ རེས་གཟའ་ཟླ་བ།
༄༅། །ཕྱི་ལོ་ ༢༠༡༦ ཟླ་ ༢ ཚེས་ ༡༡ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཨ་རིའི་མི་ནི་སོ་ཊ་ Minnesota མངའ་སྡེའི་རུ་ཆེ་སི་ཊར་གྲོང་ཁྱེར་ནང་གྲོང་ཁྱེར་ཨེ་ན་ཧེམ་ Anaheim དང་ལུ་ཝི་སི་ཝིལ་ལེ། Louisville དེ་བཞིན་རུ་ཆི་སི་ཊར་ Rochester གྲོང་ཁྱེར་བཅས་ཀྱི་སྤྱི་ཁྱབ་པ་རྣམས་དང་ལྷན་གྲོང་ཁྱེར་སོ་སོའི་ནང་རིས་མེད་ལ་བརྟེན་པའི་བཟང་སྤྱོད་གོང་མཐོར་གཏོང་ཐབས་སྐོར་བཀའ་བསྡུར་ལྷུག་པོ་མཛད་འདུག དེ་ཡང་གྲོང་ཁྱེར་ཨེ་ན་ཧེམ་ལྟ་བུར་མཚོན་ན་གྲོང་ཁྱེར་གྱི་མིང་ལ་བརྩེ་ལྡན་གྲོང་ཁྱེར། ཞེས་མིང་བཏགས་ཡོད་པ་མ་ཟད། གྲོང་ཁྱེར་ལུ་ཝི་སི་ཝིལ་ལེར་མཚོན་ན། བྱམས་བརྩེའི་གྲོང་ཁྱེར། ཞེས་མིང་བཏགས་ཡོད། སྐབས་དེར་༸གོང་ས་མཆོག་གིས་བཀའ་སློབ་སྩལ་དོན། དེང་སྐབས་ང་ཚོས་འཛམ་གླིང་ནང་སྐྱབས་བཅོལ་གཙོས་པའི་དཀའ་ངལ་ཧ་ཅང་མང་པོ་ཞིག་ཡོད་པ་མཐོང་ཐུབ། དཀའ་ངལ་དེ་དག་ཡོང་དགོས་དོན་གང་ཡིན་པ་དང་། གང་ཞིག་མ་འགྲིག་པར་བརྟེན་ནས་བྱུང་བ་རེད། ངོས་ཀྱིས་བསམ་པར་ང་ཚོས་གཞན་གྱི་བདེ་སྡུག་ལ་བསམ་ཤེས་དང་གཞན་ལ་གུས་བརྩི་བྱ་རྒྱུའི་བསམ་བློ་མ་འདང་པར་བརྟེན་ནས་བྱུང་བ་ཞིག་རེད། མདོར་ན་བྱམས་བརྩེ་དང་གཞན་ཕན་གྱི་བསམ་བློ་མ་འདང་པ་དང་། ང་ཞེས་རང་གཅེས་འཛིན་གྱི་བསམ་བློ་ཤུགས་ཆེ་དྲགས་པ་ལ་བརྟེན་ནས་དཀའ་ངལ་དེ་དག་བྱུང་བ་ཞིག་རེད། ཅེས་སོགས་ཀྱི་བཀའ་སློབ་སྩལ་བ་དང་སྦྲགས། ཐེངས་འདིར་གྲོང་སྡེའི་སྤྱི་ཁྱབ་པ་རྣམ་པས་འབྲེལ་ཡོད་སོ་སོའི་གྲོང་ཁྱེར་ལ་བྱམས་བརྩེ་དང་འབྲེལ་བའི་མིང་བཏགས་ནས་བྱམས་བརྩེ་དང་གཞན་ཕན་གྱི་བསམ་བློ་གོང་འཕེལ་གཏོང་ཐབས་བྱེད་བཞིན་པ་དེར་བསྔགས་བརྗོད་མཛད་པ་དང་ལྷན། ད་ཆ་འཆར་གཞི་ལྡན་པའི་ཐོག་ནས་བཟང་སྤྱོད་ཀྱི་རིན་ཐང་དེ་དག་ཆོས་ཁས་ལེན་མིན་ལ་མ་ལྟོས་པར་འགྲོ་བ་མི་རིགས་ཐེར་འབུམ་བདུན་ལ་ཁྱབ་པ་ཞིག་ཡོང་ཆེད་འབད་བརྩོན་བྱ་རྒྱུའི་དུས་ལ་དབབ་ཡོད་སྐོར་བཀའ་སྩལ་དོན། ཕྲུ་གུ་ཚང་མ་ཆུང་དུས་མའི་བྱམས་བརྩེའི་འོག་ནས་འཚར་ལོངས་བྱུང་ཡོད། མས་རང་གི་ཕྲུ་གུར་བྱམས་བརྩེའི་འདུ་ཤེས་འཛིན་སྟངས་དེ་རང་བཞིན་ལྷན་སྐྱེས་ཀྱི་ལུས་པོའི་སྟེང་ནས་ཡོང་བཞིན་ཡོད་པ་ལས་ཆོས་ལུགས་ལ་བརྟེན་ནས་ཡོང་བ་ཞིག་རྩ་བ་ནས་མིན། ང་ཚོས་དེ་ལྟ་བུའི་ཆོས་ལུགས་ལ་མ་བརྟེན་པའི་བྱམས་བརྩེའི་འདུ་ཤེས་གོང་མཐོར་གཏོང་ཐབས་བྱེད་དགོས། བཟང་སྤྱོད་དེ་རིགས་ལ་ངོས་ཀྱིས་རིས་མེད་ཀྱི་བཟང་སྤྱོད། ཅེས་བརྗོད་བཞིན་ཡོད། རྒྱ་གར་གནའ་རབས་ཀྱི་རིག་གཞུང་ལ་མཚོན་ན་རིས་མེད་བརྗོད་སྐབས་ཆོས་ཁས་མི་ལེན་མཁན་ཚོ་ལའང་གུས་ཞབས་ཞུ་དགོས་པ་ཡིན། ཞེས་དང་།
ཕྱོགས་མཚུངས་སྐབས་དེར་མགོན་པོ་གང་ཉིད་མཆོག་གིས་བཟང་སྤྱོད་ཀྱི་རིན་ཐང་དེ་དག་དེང་དུས་ཤེས་ཡོན་ལམ་ལུགས་ནང་སློབ་ཚན་ཟུར་དུ་འཇོག་དགོས་པའི་ལམ་སྟོན་མཛད་པ་མ་ཟད། ཨེ་མོ་རི་གཙུག་ལག་སློབ་གྲྭས་མཐུན་འགྱུར་རོགས་རམ་འོག་བཟང་སྤྱོད་གོང་མཐོར་གཏོང་རྒྱུའི་སློབ་ཚན་གྱི་རག་ཟིན་ཞིག་གཏན་འབེབས་ཟིན་ཡོད་པ་དང་། རག་ཟིན་དེ་དག་ཚན་རིག་པས་ང་ཚོའི་མྱོང་ཚོར་ལ་བརྟག་དཔྱད་བྱས་ནས་རྙེད་དོན་གང་ཡིན་པ་དེར་གཞི་བཅོལ་ནས་གཏན་འབེབས་གནང་བ་ཞིག་ཡིན་པ་དང་། འདི་ལོའི་ལོ་མཇུག་ནང་ཨ་རི་དང་རྒྱ་གར་ནང་རག་ཟིན་དེ་དག་ཐོག་བགྲོ་གླེང་ལྷུག་པོ་མཛད་རྒྱུ་ཡིན་སྐོར་བཀའ་སློབ་སྩལ་དོན། ངོས་རང་ཇི་སྲིད་འཚོ་བའི་རིང་འགྲོ་བ་མི་རིགས་ཐེར་འབུམ་བདུན་ཡོད་པ་རྣམས་འགྲོ་བ་མི་གཅིག་གྱུར་གྱི་འདུ་ཤེས་གོང་མཐོར་གཏོང་ཐབས་ཆེད་འབད་བརྩོན་མུ་མཐུད་ཞུ་རྒྱུ་ཡིན། ངོས་རང་མི་སུ་འདྲ་ཞིག་དང་འཕྲད་སྐབས་ང་ཚོ་ཚང་མ་འགྲོ་བ་མི་གཅིག་མཚུངས་ཡིན་བསམ་པ་དྲན་གྱི་འདུག དེ་འདྲའི་འདུ་ཤེས་འཛིན་སྐབས་མི་གཞན་དང་རང་བཞིན་གྱིས་སེམས་ཐག་ཉེ་པོ་ཆགས་ཀྱི་འདུག དེ་ལས་ལྡོག་སྟེ་ང་ཚོའི་དབར་རིམ་པ་གཉིས་པའི་ཐོག་ནས་མི་འདྲ་བའི་ཁྱད་པར་ཕྲན་བུ་ཡོད་པ་དེ་དག་གཙོ་བོར་འཛིན་ནས་ཕྱིན་པ་ཡིན་ན་རང་ཉིད་གྲོགས་མེད་ཁེར་རྐྱང་ཆགས་རྒྱུ་རེད། ཨ་རི་ལྟ་བུར་མཚོན་ན་བཟང་སྤྱོད་གོང་མཐོར་གཏོང་རྒྱུའི་ཐོག་ཆ་ཤས་ཧ་ཅང་གལ་ཆེན་པོ་ལེན་ཐུབ་རྒྱུ་རེད། ཨ་རི་ནི་འཛམ་གླིང་ནང་དཔལ་འབྱོར་གྱི་སྟོབས་ཤུགས་ཆེ་ཤོས་ཤིག་ཡིན། དེ་ནི་བསྔགས་འོས་པ་ཞིག་རེད། ད་ཆ་ནང་གི་རིན་ཐང་གོང་མཐོར་གཏོང་རྒྱུའི་ཐད་བསམ་བློ་ཤུགས་ཆེ་ཙམ་གཏོང་རྒྱུའི་དུས་ལ་དབབ་ཡོད། གལ་ཏེ་ཨ་རིའི་གཞུང་གིས་བྱམས་བརྩེའི་གྲོང་ཁྱེར་འདི་རིགས་མང་དུ་བཏང་ནས་སློབ་ཚན་ནང་འཇོག་ཐུབ་པ་ཡིན་ན་ཏན་ཏན་ཤུགས་རྐྱེན་ཆེན་པོ་ཐེབས་རྒྱུ་རེད། ཕྱི་དངོས་པོའི་མཐུན་རྐྱེན་གཅིག་པོས་མི་ཚེ་བདེ་སྐྱིད་ལྡན་པ་ཞིག་སྐྲུན་མི་ཐུབ་པ་མི་མང་པོ་ཞིག་ལ་ངེས་པ་རྙེད་བཞིན་ཡོད། ཅེས་སོགས་ཀྱི་བཀའ་སློབ་སྩལ། །
