ཕྱི་ལོ་ ༢༠༡༦ ཟླ་ ༢ ཚེས་ ༢༣ རེས་གཟའ་མིག་དམར།
༄༅། །བོད་ཟླ་དང་པོ་ཚེས་བཅོ་ལྔའི་ཉིན་གཉན་ཡོད་དུ་མཉམ་མེད་ཤཱ་ཀྱའི་རྒྱལ་པོས་མུ་སྟེགས་ཀྱི་སྟོན་པ་དྲུག་འཁོར་དང་བཅས་པ་ཆོ་འཕྲུལ་གྱི་སྒོ་ནས་ཕམ་པར་མཛད་པའི་དུས་ཆེན་ཁྱད་པར་ཅན་སྲུང་བརྩི་ཞུ་སླད་ཕྱི་ལོ་ ༢༠༡༥ ཟླ་ ༢ ཚེས་ ༢༢ ཉིན་རྡ་ས་ཐེག་ཆེན་ཆོས་གླིང་གཙུག་ལག་ཁང་དུ་གཞུང་འབྲེལ་གྱིས་གྱིས་ཆོ་འཕྲུལ་དུས་ཆེན་གྱི་ཉིན་མོ་སྲུང་བརྩི་ཞུས་ཡོད།
དེ་ཡང་གོང་ཚེས་ཉིན་གྱི་སྔ་དྲོར་གཙུག་ལག་ཁང་གི་རྟེན་མཆོག་སྤྱན་སྔའི་དྲུང་དུ་དཀར་རྒྱན་ལས་གྲུབ་པའི་མཆོད་སྤྲིན་ཚར་དུ་དངར་བ་སྒྲིག་གཤོམ་དང་སྦྲགས། དགེ་བཙུན་རྣམ་པའི་ཞོགས་ཚོགས་དང་གསོ་སྦྱོང་གྲུབ་མཚམས་རྒྱུད་སྟོད་མཁན་པོ་བྱ་དོ་རིན་པོ་ཆེ་མཆོག་གིས་དབུས་པའི་བོད་མིའི་སྒྲིག་འཛུགས་ཀྱི་མཛད་གཙོ་རྣམ་པ་དང་། སྲི་ཞུའི་ལས་བྱེད། རྡ་ས་ཁུལ་གྱི་གྲྭ་བཙུན་སྔགས་གསུམ། གཉུག་མར་གནས་པ་དང་གློ་བུར་དུ་ལྷགས་པའི་སེར་སྐྱ་མི་མང་སྟོང་ཕྲག་གཅིག་ཙམ་གྱིས་གསུང་ཆོས་ར་བར་འདུ་འཛོམས་ཀྱིས་མཆོད་མཇལ་དང་སྦྲགས། བྱ་དོ་རིན་པོ་ཆེ་མཆོག་གིས་ཆོ་འཕྲུལ་དུས་ཆེན་སྐོར་སྔོན་འགྲོའི་གསུང་ཆོས་གནང་དོན། དེ་རིང་ཐབས་མཁས་ལ་ཐུགས་རྗེ་ཆེན་པོ་དང་ལྡན་པ་སངས་རྒྱས་ཤཱཀྱ་ཐུབ་པས་མཉན་ཡོད་ལ་ཆོ་འཕྲུལ་ཆེན་པོ་མཛད་པའི་ཚེས་བཅོ་ལྔའི་ཆོ་འཕྲུལ་དུས་ཆེན་ཁྱད་པར་ཅན་འདི་ང་རང་ཚོས་སྲུང་བརྩི་ཞུ་རྒྱུའི་གོ་སྐབས་ཐོབ་པ་འདི་སྐལ་བ་བཟང་པོ་ཡིན།
སྐལ་བ་བཟང་པོ་ཡིན་པའི་རྒྱུ་མཚན་ནི། འཇིག་རྟེན་གྱི་ཁམས་འདིར་སྟོན་པ་མི་འདྲ་བ་མང་པོ་འབྱོན་པའི་ནང་ནས་ཟབ་མོ་རྟེན་འབྱུང་གི་དེ་ཁོ་ན་ཉིད་དང་བདག་ལས་གཞན་གཅེས་པའི་ཐབས་ཤེས་ཟུང་འབྲེལ་གྱི་ལམ་ཆ་ཚང་ལ་མ་ནོར་བ་དང་། དཔྱད་གསུམ་རྣམ་པར་དག་པ་གཏན་ལ་དབབ་རྒྱུ་ཡོད་པ། རིག་པས་ལམ་ནས་བགྲང་རྒྱུ་ཡོད་པར་
སྟོན་པའི་སྟོན་པ་གཞན་དང་མ་འདྲ་བ་ཞིག་གིས་སྐུ་གསུང་ཐུགས་གསུམ་བཅས་ཆོ་འཕྲུལ་རྣམ་པ་གསུམ་གྱི་སྒོ་ནས་འགྲོ་བའི་དོན་རྒྱ་ཆེ་བ་ཞིག་མཛད་པའི་དུས་ཆེན་འདིར་ང་རང་ཚོས་སྲུང་བརྩི་ཞུ་རྒྱུ་ཡོད་པ་འདི་གཞན་དང་མ་འདྲ་བའི་སྐལ་བ་བཟང་པོ་ཡིན། སྐབས་སུ་འབབ་པ་བོད་གངས་ཅན་ལྗོངས་སུ་དུས་རབས་བདུན་པ་ནས་བཟུང་ནང་པ་སངས་རྒྱས་པའི་ཆོས་ཚུལ་དར་བ་མཛད། དེ་ལ་ཡང་སྔར་གྱི་ཆོས་རྒྱལ་བཀའ་དྲིན་ཅན་ཚོས་རྒྱ་གར་ནས་ཐད་ཀར་བོད་དུ་ནང་པ་སངས་རྒྱས་པའི་བསྟན་པ་དར་གནང་མཛད་པ་དང་། དུས་ད་ལྟ་ཡིན་ནའང་བོད་གངས་ཅན་ལྗོངས་ཀྱི་ཁྱད་ནོར་ཕུན་སུམ་ཚོགས་པ་སངས་རྒྱས་ཀྱི་བསྟན་པ་འདི་འདྲ་ཞིག་ཡོད་པ་འདི་ང་རང་ཚོ་དགའ་སྤོབས་སྐྱེ་འོས་པའི་སྐལ་བ་བཟང་པོ་ཞིག་ཡིན།
དེ་བཞིན་ཕྱིས་སུ་དུས་རབས་བཅོ་ལྔ་ཡས་མས་ཤིག་ནས་འཇམ་མགོན་བླ་མ་ཙོང་ཁ་པ་ཆེན་པོས་དཔྱད་གསུམ་རྣམ་པར་དག་པའི་སྒོ་ནས་མདོ་སྔགས་ཟུང་འབྲེལ་གྱི་བསྟན་པ་གསེར་སྦྱང་གཙོ་མ་ལྟ་བུ་ཡོད་པ་འདི་གཏན་ལ་ཕབ་པ་མ་ཟད། བསྟན་པ་དེ་ཉིད་དར་ཞིང་རྒྱས་པར་མཛད་ཐོག་ཐུབ་པ་སངས་རྒྱས་བཅོམ་ལྡན་འདས་ལ་ཆོ་འཕྲུལ་དུས་ཆེན་ཉིན་མོ་འདི་སྲུང་བརྩི་ཞུ་སླད་ཆོ་འཕྲུལ་སྨོན་ལམ་ཆེན་མོ་ཞེས་པ་འདི་སྔ་མོ་དུས་རབས་བཅོ་ལྔ་ནས་ད་བར་སྲུང་བརྩི་ཞུས་དང་ཞུ་མུས་ཡིན་པ་འདི་ང་རང་ཚོ་དངོས་གནས་སྐལ་བ་བཟང་པོ་ཡིན། ཞེས་སོགས་ཀྱི་སྔོན་འགྲོའི་ཆོས་འབྲེལ་བཀའ་སློབ་དང་སྦྲགས་སྐྱེས་རབས་ཀྱི་གསུང་ཆོས་གནང་བ་བཅས། །
