ཕྱི་ལོ་ ༢༠༡༦ ཟླ་ ༢ ཚེས་ ༥ རེས་གཟའ་པ་སངས།
༄༅། །ཕྱི་ལོ་ ༢༠༡༦ ཟླ་ ༢ ཚེས་ ༥ ཉིན་བོད་མིའི་སྒྲིག་འཛུགས་ཀྱི་ཕྱི་དྲིལ་ལྷག་པ་ཚེ་རིང་དྲན་རྟེན་ཚོགས་ཁང་དུ་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ནས་གཉན་ནད་རེག་དུག་སྔོན་འགོག་བྱ་ཐབས་ཀྱི་བོད་སྐད་ནང་ཡོད་པའི་འགུལ་གཟུགས་གློག་བརྙན་བཟོ་སྐྲུན་གནང་བ་དེ་འགྲེམས་སྤེལ་དབུ་འབྱེད་ཀྱི་གསར་འགོད་གསལ་བསྒྲགས་ཤིག་སྤེལ་སོང་།
དེ་ཡང་གོང་ཚེས་ཉིན་གྱི་སྔ་དྲོའི་ཆུ་ཚོད་ ༡༡།༣༠ ཐོག་བོད་མིའི་སྒྲིག་འཛུགས་འཕྲོད་བསྟེན་བཀའ་བློན་ཚེ་རིང་དབང་ཕྱུག་མཆོག་གིས་གཙོས་འཕྲོད་བསྟེན་ལས་ཁུངས་ཀྱི་དྲུང་ལས་ཉི་མ་རྒྱལ་མཚན་ལགས་དང་། དྭངས་ཞབས་པ་བསྟན་འཛིན་ཟླ་མཛེས་ལགས། དེ་བཞིན་འབྲེལ་ཡོད་ལས་བྱེད། ཕྱི་ནང་གི་གསར་འགོད་པ་བཅས་ཁྱོན་མི་གྲྭངས་ ༤༠ ཙམ་མཉམ་འཛོམས་ཀྱིས་ཐོག་མར་དྲུང་ལས་ཉི་མ་རྒྱལ་མཚན་ལགས་ཀྱིས་ཐེངས་དེའི་གསར་འགོད་ལས་རིམ་བསྐོང་ཚོགས་གནང་དོན་ཅི་ཡིན་སྐོར་ངོ་སྤྲོད་གནང་གྲུབ་མཚམས་བཀའ་བློན་མཆོག་གིས་གཉན་ནད་རེག་དུག་སྔོན་འགོག་བྱ་ཐབས་ཀྱི་བོད་སྐད་ནང་ཡོད་པའི་འགུལ་གཟུགས་གློག་བརྙན་བཟོ་སྐྲུན་གནང་བའི་ལས་གཞི་དེའི་སྔ་ཕྱིའི་འབྱུང་རིམ་དང་ངོ་སྤྲོད་གནང་དོན། དེ་རིང་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱིས་ངོས་ནས་ལོ་གསར་གྱི་དུས་ཚོད་དང་སྟབས་བསྟུན་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་དང་གཉན་ནད་རེག་དུག་སྔོན་འགོག་ཐོག་ལས་དོན་རྒྱུན་རིང་གནང་མཁན་Teach AIDS ཞེས་པའི་ཚོགས་པ་དང་མཉམ་རུབ་ཐོག་གཉན་ནད་རེག་དུག་གི་སྔོན་འགོག་ཆེད་གོ་རྟོགས་བསྐྲུན་ཕྱིར་བོད་ཀྱི་སྐད་ཡིག་ཐོག་ནས་འགུལ་གཟུགས་གློག་བརྙན་ཞིག་བཟོས་པ་དེ་དེ་རིང་དབུ་འབྱེད་ཀྱི་གསར་འགོད་ལས་རིམ་ཞིག་ཆགས་ཡོད།
ཐོག་མར་བོད་ཀྱི་སྐད་ཡིག་ལམ་ནས་འགུལ་གཟུགས་ཀྱི་གློག་བརྙན་ཐུང་ངུ་འདིའི་སྐོར་ངོ་སྤྲོད་ཞུས་པ་ཡིན་ན། གཉན་ནད་རེག་དུག་འདི་ང་རང་ཚོ་བོད་པའི་སྤྱི་ཚོགས་དང་འཛམ་གླིང་སྤྱིའི་ནང་དཀའ་ངལ་ཆེན་པོ་ཞིག་ཆགས་ཡོད། བོད་པའི་སྤྱི་ཚོགས་ནང་གཉན་ནད་རེག་དུག་ཡོད་པའི་གནས་སྟངས་དེ་འདྲ་ཆགས་ཡོད། དེ་བཞིན་བོད་ནང་ལའང་གཉན་ནད་རེག་དུག་འདི་དཀའ་ངལ་ཆེན་པོ་ཞིག་ཆགས་ཡོད། ད་ལྟའི་ཆར་གཉན་ནད་རེག་དུག་གི་ན་ཚ་འདི་བཅོས་ཐབས་མེད་པའི་གནས་སྟངས་ཤིག་ཆགས་ཡོད། ན་ཚ་དེ་མ་ཡོང་བ་དང་ཉུང་དུ་གཏོང་ཐབས་ལ་བཅོས་ཐབས་གཅིག་ཡོད་པ་ནི་ན་ཚ་དེ་མ་ཡོང་བར་བྱེད་པའི་སྔོན་འགོག་བྱ་རྒྱུ་དེ་ཡིན།
དེར་བརྟེན་ན་ཚ་འདིར་སྔོན་འགོག་བྱ་ཐུབ་ངེས་ཡིན་སྟབས། གཉན་ནད་རེག་དུག་གི་ནད་གཞི་དེ་སྔོན་འགོག་དང་གོ་རྟོགས་ཆེད་དུ་ Teach AIDS ཚོགས་པས་འཛམ་གླིང་
འདིའི་ནང་གི་རྒྱལ་ཁབ་བརྒྱད་ཅུའི་སྐད་རིགས་མི་འདྲ་བ་ ༢༦ གི་ཐོག་ནས་འགུལ་གཟུགས་ཀྱི་གློག་བརྙན་དེ་བཟོས་བསྐྲུན་གནང་ཡོད། བོད་མི་སྒྲིག་འཛུགས་འཕྲོད་བསྟེན་ལས་ཁུངས་ནས་ཚོགས་པ་དེར་ལོ་ཤས་སྔོན་ནས་འབོད་སྐུལ་ཞུས་པའི་ཐོག་ཟླ་ཤས་གོང་འགུལ་གཟུགས་གློག་བརྙན་བོད་སྐད་ཐོག་བཟོ་སྐྲུན་བྱ་ཆེད་ལས་འགོ་བཙུགས་པའི་གྲུབ་འབྲས་ལ་བརྟེན་ནས་ད་ལན་སྐད་རིགས་ ༢༧ པ་དེ་བོད་སྐད་ཐོག་ནས་བཟོ་སྐྲུན་གནང་ཐུབ་པ་བྱུང་ཡོད།
ནད་གཞི་སྔོན་འགོག་ཆེད་བོད་སྐད་ཐོག་ནས་གློག་བརྙན་འདི་བཟོ་སྐྲུན་གནང་བའི་དགོས་པ་རྒྱུ་མཚན་གཙོ་བོ་ནི། ནད་གཞི་དེར་སྔོན་འགོག་ལས་གཞི་རྒྱ་ཆེ་བ་དང་ཤུགས་ཆེ་བ་འགྲོ་བར་དམིགས་པ་ཞིག་ཆགས་ཡོད། དེ་བཞིན་གློག་བརྙན་འདི་འཛམ་གླིང་ས་ཕྱོགས་ཀུན་དུ་ཡོད་པའི་བོད་རིགས་ཚང་མར་ཁྱབ་ཐུབ་པའི་རེ་བ་བྱས་ནས་བཟོ་སྐྲུན་བྱས་པ་ཞིག་ཀྱང་ཆགས་ཡོད།
Teach AIDS འགུལ་གཟུགས་གློག་བརྙན་འདིའི་བྱུང་རིམ་སྐོར་ཞུ་རྒྱུར། ལོ་ཤས་སྔོན་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་དང་། Teach AIDS གཉིས་གོ་བསྡུར་བྱས་པའི་ཐོག་ནས་འགུལ་གཟུགས་འདི་ལྟ་བུ་ཞིག་བཟོ་སྐྲུན་བྱས་པར་དཔལ་འབྱོར་དང་མི་ལག་བཅས་མཐུན་རྐྱེན་མང་པོ་ཞིག་དགོས་པར་བརྟེན་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ནས་ཆ་ཚང་བ་ཞིག་ཡོང་ཐུབ་ཐབས་དཀའ་བར་བརྟེན། འགུལ་གཟུགས་འདི་ལྟ་བུ་ཞིག་བཟོས་བར་ང་ཚོའི་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ནས་སྐད་སྒྱུར་དང་། ཙག་ཙིག་གི་འགྲོ་སོང་ཙམ་ལས་འགྲོ་སོང་ཕལ་ཆེ་བ་ཚོགས་པ་དེ་གས་མཐུན་རྐྱེན་རོགས་སྐྱོར་གནང་བའི་ཐོག་ནས་གྲུབ་པ་ཞིག་དང་། ལས་དོན་དེ་དེ་རིང་འགོ་འབྱེད་བྱེད་རྒྱུ་བཅས་ཡིན།
འགོ་འབྱེད་མ་བྱེད་གོང་ཉེ་སྔོན་དཔལ་སྡན་སྲིད་སྐྱོང་བློ་བཟང་སེངྒེ་མཆོག་གིས་ལས་དོན་འདི་དང་འབྲེལ་བའི་ཐུགས་བསམ་ཆེ་བཞེས་ཀྱིས་རེ་བའི་བརྡ་ལན་ཞེས་གསུང་བཤད་གནང་བར་ང་ཚོས་དཔལ་ལྡན་སྲིད་སྐྱོང་མཆོག་ལ་ཐུགས་རྗེ་ཆེ་ཞུ་རྒྱུ་ཡིན། ལྷག་པར་དེ་རིང་འགུལ་གཟུགས་གློག་བརྙན་འདི་བོད་སྐད་ཐོག་འཐོན་ཐུབ་པར་ Teach AIDS ཚོགས་པའི་སྤྱི་ཁྱབ་འགན་འཛིན་པི་ཡ་སོ་ཀར་ལགས་ཀྱིས་གཙོས་པའི་ལས་བྱེད་ཚང་མས་སྐུ་ལས་སྐྱོན་པར་ཐུགས་རྗེ་ཆེ་ཞེས་ཞུ་རྒྱུ་ཡིན།
དེ་བཞིན་བདེ་ལེགས་སྨན་ཁང་གི་སྨན་པ་སྐུའི་བླ་སྨན་ཚེ་བརྟན་ལགས་ལྟ་བུར་མཚོན་ན། སྤྱིར་ཕྱག་ལས་རྒྱ་ཆེན་པོ་ཡོད་ནའང་གློག་བརྙན་འདིའི་ནང་བོད་སྐད་སྒྲ་འཇུག་སོགས་ཀྱི་དུས་ཚོད་མང་པོ་ཞིག་བཏང་བར་ཐུགས་རྗེ་ཆེ་ཞུ་རྒྱུ་ཡིན། བོད་ཀྱི་གཞས་པ་ཕུར་བུ་བཀྲ་ཤིས་རྣམ་རྒྱལ་ལགས་ཀྱིས་རིན་མེད་ཐོག་ནས་སྒྲ་འཇུག་གནང་བའི་མཐུན་འགྱུར་དང་། དེ་བཞིན་བོད་ཀྱི་ཟློས་གར་ཚོགས་པའི་འགན་འཛིན་དཔེ་ཟུར་དབང་འདུས་ཚེ་རིང་ལགས་ཀྱིས་གཙོས་པའི་མཐུན་འགྱུར་གནང་མཁན་ཚང་མར་ཐུགས་རྗེ་ཆེ་ཞུ་རྒྱུ་ཡིན།
ཐེངས་འདིའི་འགུལ་གཟུགས་ཀྱི་གློག་བརྙན་འདི་བཞིན་དབྱིན་ཡིག་ནས་བོད་སྐད་ཐོག་བསྒྱུར་དགོས་པར་བརྟེན་ཉམས་ཞིབ་རབ་དང་རིམ་པའི་ཐོག་ནས་ལས་དོན་མང་པོ་ཞིག་བྱ་དགོས་སྟབས། དྭངས་བླངས་རོགས་སྟེགས་གནང་མཁན་ཁྲོད་དགེ་སློབ་ཁག་གཅིག་དང་། ཅེ་ནའི་མཐོ་སློབ་ཀྱི་སློབ་ཕྲུག། དེ་བཞིན་འཕྲོད་བསྟེན་ལས་ཁུངས་ཀྱི་དྲུང་ལས་ཉི་མ་རྒྱལ་མཚན་ལགས། བོད་མི་དྭངས་ཞབས་པ་བསྟན་འཛིན་ཟླ་མཛེས་ལགས། ཌོག་ཊར་བློ་བཟང་ཚེ་རིང་དང་ལས་བྱེད་ཚང་མར་ཐུགས་རྗེ་ཆེ་ཞུ་རྒྱུ་དང་། བོད་སྐད་ཐོག་ནས་ནད་གཞི་སྔོན་འགོག་བྱེད་ཐབས་ཀྱི་འགུལ་གཟུགས་གློག་བརྙན་འདི་བཞིན་ལོ་རྒྱུས་ནང་ཐོག་མ་ལྟ་བུ་ཆགས་ཡོད་པ་མ་ཟད། འཕྲོད་བསྟེན་ལས་ཁུངས་ཀྱི་གསར་གཏོད་ཀྱི་ལས་གཞི་གལ་ཆེན་པོ་ཞིག་ཀྱང་ཆགས་ཡོད།
གློག་བརྙན་འདིའི་གོ་རྟོགས་བརྒྱུད་ནས་བོད་པའི་སྤྱི་ཚོགས་ནང་སྔོན་འགོག་ཤུགས་ཆེ་རུ་འགྲོ་བའི་ཐོག་ནས་གཉན་ནད་རེག་དུག་ན་ཚ་འདི་མ་ཡོང་བ་དང་ཉུང་དུ་འགྲོ་རྒྱུའི་ང་ཚོས་རེ་བ་ཤུགས་ཆེན་པོ་བྱེད་བཞིན་ཡོད། དེ་རིང་ང་ཚོས་འགུལ་གཟུགས་གློག་བརྙན་འདི་དྲ་རྒྱའི་ཐོག་བཞག་ཡོད་པ་དང་། རིང་མིན་བོད་མིའི་གཞིས་ཆགས་ཁག་གི་སློབ་གྲྭ་དང་། སྨན་ཁང་བཅས་ཀྱི་ནང་ད་ཡོད་འོད་སྡེར་ཁྲི་གཅིག་ཙམ་ཡོད་པ་དེ་དག་བགོ་འགྲེམས་བྱ་རྒྱུའི་རིམ་པ་སྒྲིག་བཞིན་ཡོད། ཅེས་གསུང་བཤད་གནང་གྲུབ་མཚམས་འགུལ་གཟུགས་གློག་བརྙན་བསྟན་ཡོད་པ་བཅས།།
