ཕྱི་ལོ་ ༢༠༡༦ ཟླ་ ༡ ཚེས་ ༢༢ རེས་གཟའ་ཕུར་བུ།
ཛ་དྲག།
༄༅། མཚུངས་མེད་དབུས་ལས་ཁུངས་ཁག་གི་དྲུང་ཆེ་དང་འགན་འཛིན་རྣམ་པ། སྐུ་ཚབ་དོན་གཅོད་རྣམ་པ། ས་གནས་འགོ་འཛིན་རྣམ་པ་བཅས་ཀྱི་སྙན་ལམ་དུ།
ཆེད་ཞུ། དཔལ་ལྡན་བཀའ་ཤག་གི་ཛ་དྲག་བཀོད་ཁྱབ་ཨང་། བཀའ། ༡༩༧༩ (༣) ༢༠༡༥༌༌༌༡༦ ཕྱི་ལོ་༢༠༡༦ ཟླ་ ༡ ཚེས་ ༢༠ འཁོད་ཕེབས་ནང་གསལ། དཔལ་ལྡན་བཀའ་ཤག་ནས་ཕྱི་ལོ་ ༢༠༡༦ ཟླ་ ༡ ཚེས་ ༢༠ ཉིན་གྱི་སྔ་དྲོར་གནས་ཆུང་ཆོས་རྒྱལ་ཆེན་པོ་མཆོག་སྐུ་གསོལ་སྤྱན་འདྲེན་ཞུས་པའི་ལུང་ཞུ་གཙོ་བོར། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཨ་རིར་སྐུ་གཟུགས་བརྟག་དཔྱད་དང་འཕྲོད་བཞེས་སྨན་བཅོས་སླད་ཕེབས་ཐོན་གནང་ཟིན་ཡོད་པར། རང་ཅག་བོད་མི་ཡོངས་ཀྱི་ངོས་ནས་དེའི་ཆེད་རྐྱེན་སེལ་རིམ་གྲོ་དང་སྐབས་འབྲེལ་སྤྱི་མཐུན་གྱི་བསོད་ནམས་གསོག་པའི་ཐབས་སྒོ་གང་དང་གང་ལ་འབད་འབུངས་ཞུས་ན་བཟང་སྐོར་ཞུས་པའི་བཀའ་ལུང་ཕྱིར་ཕེབས་ཀྱི་ཞབས་རིམ་ཁོངས། མཆོག་དམན་ཀུན་ནས་༸རྒྱལ་བའི་མཚན་སྔགས་འགྲོ་གང་ཆེ་དང། སྨན་བླའི་མདོ་ཆོག་དང་འབྲེལ་སྨན་གཟུངས་གང་མང་གྲངས་གསོག་གནང་དགོས་འདུག་པར། སོ་སོའི་ཁྱབ་ཁོངས་དང་བཅས་པར་མ་གོ་མ་ཐོས་མེད་པར་གསལ་བསྒྲགས་ནན་འདྲོངས་ཀྱིས་ཕྱི་ལོ་ ༢༠༡༦ ཟླ་ ༣ ཚེས་ ༢༠ ནང་ཚུད་སྨིན་སྒྲུབ་ཐོག་གྲུབ་ཐོ་ཁ་གསལ་ངེས་གནང་ཡོང་བ་དེ་དོན་དགོངས་འཇགས་ཞུ། ཆོས་རིག་ལས་ཁུངས་ནས་ཕྱི་ལོ་ ༢༠༡༦ ཟླ་ ༡ ཚེས་ ༢༡ ལ་ཕུལ།།
