༢༠༡༦ ཟླ་ ༡ ཚེས་ ༢ རེས་གཟའ་སྤེན་པ།
༄༅། །ཕྱི་ལོ་ ༢༠༡༥ ཟླ་ ༡༢ ཚེས་ ༣༡ ཉིན་གྱི་སྔ་དྲོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཆོས་གྲྭ་བཀྲ་ཤིས་ལྷུན་པོར་སྩོལ་བཞིན་པའི་ཆོས་འབྲེལ་ཉིན་བཅུ་གཉིས་པའི་ཐོག་ཕྱི་ནང་གི་དད་ལྡན་ཆོས་ཞུ་བ་སེར་སྐྱ་མང་ཚོགས་ཁྲི་གསུམ་བརྒལ་བར་བཀའ་གདམས་ཐིག་ལེ་བཅུ་དྲུག་གི་དབང་སྩལ་གྲུབ་བསྟུན་བཀའ་སློབ་སྩལ་དོན། ལོ་ཁ་ཤས་ཤིག་ནས་འགོ་འཛུགས་ཀྱིས་ལམ་རིམ་ཁྲིད་ཆེན་བརྒྱད་ཀྱི་ཐོག་ལ་ཁྲིད་རྒྱུན་ཡོད་པ་དེ་དག་ཚང་མ་གཅིག་ཏུ་ལྡེབ་ནས་ཁྲིད་བཏོན་པ་རེད། ཕལ་ཆེར་ངོས་ཀྱི་མི་ཚེ་གཅིག་ལ་ཚར་གཅིག་མ་གཏོགས་ཡོང་རྒྱུ་མེད་པ་དེ་ཚར་བ་རེད། སྐབས་འདིར་འགལ་རྐྱེན་སོགས་མེད་པ་ཧ་ཅང་ཡག་པོ་བྱུང་སོང་། གཙོ་བོ་དད་པ་དང་དམ་ཚིག་གཡོ་བ་མེད་པ། དེ་བཞིན་ལས་དང་སྨོན་ལམ་གྱི་འབྲེལ་བ་ཡོད་པར་བརྟེན་བགེགས་མེད་ལྷུན་འགྲུབ་བྱུང་སོང་།
དེར་བརྟེན་དཀར་ཕྱོགས་སྐྱོང་བའི་སྲུང་མ་ཚོར་ཐུགས་རྗེ་ཆེ་ཞུ་རྒྱུ་ཡིན། དེ་བཞིན་གཟུགས་ཅན་མིས་དངོས་དང་བརྒྱུད་པའི་ཐོག་ནས་སེམས་ཤུགས་སྐྱེས་ནས་ལྷགས་པའི་བསམ་པའི་ཀུན་ནས་བླངས་ཏེ་མཐུན་འགྱུར་གནང་མཁན་ཚང་མར་ཐུགས་རྗེ་ཆེ་ཞུ་རྒྱུ་ཡིན། དགེ་བ་རྫོགས་བྱང་ལ་བསྔོ་རྒྱུ་གལ་ཆེན་པོ་རེད། འདི་གར་ལས་ཀ་བྱེད་མཁན་བཀྲ་ཤིས་ལྷུན་པོའི་གདན་ས་དང་དེ་སྔ་སེར་སྨད། དགའ་ལྡན་བཅས་ནས་ལོ་ཡུན་འདིའི་རིང་འབྲེལ་བ་ཐོགས་བསྡད་པ་མང་པོ་ཡོད་པ་ཚང་མར་ཐུགས་རྗེ་ཆེ་ཞུ་རྒྱུ་ཡིན། ལམ་རིམ་ཁྲིད་ཆེན་ཐོག་མར་འགོ་བཙུགས་སྐབས་ཀྱི་མི་གང་ཙམ་ཞིག་འདས་ཟིན་པ་རེད། དཔེར་ན། རྒན་དབང་ཆེན་ལྟ་བུ་གཤེགས་ཟིན་པ་དང་། ང་ཚོ་དེ་ལྟར་བྱས་ནས་འགྲོ་རྒྱུ་རེད། གང་ལྟར་གསོན་པའི་རིང་གང་ཐུབ་ཆོས་ཉམས་ལེན་བྱེད་རྒྱུ་གལ་ཆེན་པོ་རེད། ཆོས་ཉམས་ལེན་བྱེད་ཟེར་རྒྱུ་དེ་དབང་རྟུལ་དད་པའི་རྗེས་འབྲང་ཞེས་ང་ཚོའི་གཞུང་ཆེན་པོ་ཚང་མར་ཡོངས་གྲགས་རེད། དབང་རྟུལ་དད་པའི་རྗེས་འབྲང་དང་། དབང་རྣོན་ཆོས་ཀྱི་རྗེས་འབྲང་གཉིས་ཡོད་པར་བརྟེན། ང་ཚོ་སྐྱེས་པ་ཉིད་ནས་དབང་པོ་རྟུལ་པོ་བྱས་ནས་མ་འཆི་བར་དབང་པོ་རྟུལ་པོ་བྱས་ཏེ་བསྡད་ཀྱི་མ་རེད། འགོ་སྟོད་དབང་པོ་རྟུལ་པོ་ཡིན་ནའང་སློབ་སྦྱོང་བྱས་ན་དབང་པོ་རྣོན་པོར་ཆགས་འགྲོ་གི་རེད། དབང་རྣོན་ཆོས་ཀྱི་རྗེས་འབྲང་པའི་སློབ་སྟངས་བྱས་ན་དུས་རབས་ཉེར་གཅིག་དང་། ཉེར་གཉིས། ཉེར་གསུམ་ལའང་མུ་མཐུད་ནས་བསྡད་ཀྱི་རེད།
དབང་རྟུལ་དད་པའི་རྗེས་འབྲང་གི་འགྲོ་སྟངས་བཞིན་ཕྱིན་ན་ག་ཚོད་བསྡད་ཀྱི་ཡོད་མེད་བཤད་ཁག་པོ་རེད། དེར་བརྟེན་བསྟན་པ་སྤྱི་ལ་བསམ་བློ་གཏང་ནའང་གཞུང་ཆེན་སློབ་གཉེར་བྱེད་རྒྱུ་དེ་ཧ་ཅང་གལ་ཆེན་པོ་རེད། གང་ཟག་རང་ཉིད་ཀྱིས་ཉམས་ལེན་བྱེད་རྒྱུ་ཡིན་ནའང་དབང་རྣོན་ཆོས་ཀྱི་རྗེས་འབྲང་པ་བྱས་ན་དད་པ་ཡིན་ནའང་ཤེས་རབ་ཀྱིས་གྲོགས་དང་བཅས་པ་ཡིན་དུས་བརྟན་པོ་དང་། སྙིང་རྗེ་ཡིན་ནའང་ཤེས་རབ་ཀྱིས་གྲོགས་དང་བཅས་པ་ཡིན་དུས་ཧ་ཅང་སྤུས་དག་པོ་དང་བརྟན་པོ་ཡོང་རྒྱུ་རེད། སངས་རྒྱས་ཀྱི་ཆོས་ཀྱི་ཁྱད་ཆོས་གཙོ་བོ་འདོན་ས་དེ་ཤེས་རབ་ཀྱི་ཕྱོགས་ནས་རེད། དེར་བརྟེན་དགེ་འདུན་པས་གཙོས་སྐྱ་བོ་མི་མང་ཕོ་མོ་དབྱེར་མེད་ཚང་མས་དཔེ་ཆ་བལྟ་རྒྱུ་ཧ་ཅང་གལ་ཆེན་པོ་རེད། དེ་བཞིན་ཡུལ་གྲུ་འདྲ་མིན་ནས་འབྱོར་བ་ཁྱེད་རང་ཚོ་ཡང་སོ་སོའི་སྐད་ཡིག་ནང་དེ་སྔ་ལོ་བརྒྱ་ཕྲག་སྟོང་ཕྲག་གི་སྔོན་ནས་ཡོད་པ་དེ་དག་སློབ་སྦྱོང་བྱེད་དགོས། དཔེར་ན། རྒྱ་ཡིག་ཆ་བཞག་ན་སངས་རྒྱས་ཀྱི་ཆོས་དེ་བོད་ལ་མ་དར་གོང་ནས་རྒྱ་ནག་ཏུ་དར་བ་རེད། དེ་དཔལ་ནཱ་ལེནྡྲ་ནས་བྱུང་བ་ཞིག་ཡིན། ཀླུ་སྒྲུབ་ཀྱི་རྩ་བ་ཤེས་རབ་ཀྱིས་མཚོན་དེ་ཚོ་གྲས་སྔ་མོ་ནས་རྒྱ་ཡིག་ཐོག་ཡོད་པ་དེ་དག་གལ་སྲིད་དགོས་གལ་བྱུང་ན་སྐད་གསར་བརྗེ་ལྟ་བུ་བཟོ་ཆོག་རྒྱུ་རེད། རྩ་བའི་གཞུང་རྒྱ་ཡིག་ནང་སྔ་མོ་ནས་ཡོད་པར་བརྟེན་དེ་ཚོ་ངེས་པར་དུ་སློབ་སྦྱོང་བྱེད་རྒྱུ་ཧ་ཅང་གལ་ཆེན་པོ་རེད།
ང་ཚོ་བོད་པ་ཚོའང་དེ་དེ་བཞིན་རེད། གང་ལྟར་བོད་ཡིག་ལ་བརྟེན་མཁན་ང་ཚོ་ཚང་མས་བོད་ཡིག་ནང་རྒྱ་ཆེ་གཏིང་ཟབ་གཅིག་ཡོད་པར་བརྟེན་ང་ཚོས་དཀའ་ལས་བརྒྱབ་ནས་སྒྱུར་མི་དགོས་པ་དེ་ལྟ་བུ་སྤུས་དག་པོ་ཟ་ཆོག་འཐུང་ཆོག་ཡོད་པ་དེ་འདི་ལྟར་འཇོག་ན། སྔོན་གྱི་རྒྱལ་བློན་ལོ་པཎ་རྣམས་ལ་དྲིན་མ་དྲན་པ་ལྟ་བུ་ཆགས་ཀྱི་རེད། ཁོང་ཚོས་མི་རབས་ནས་མི་རབས་དཀའ་ལས་བརྒྱབ་ནས་བསྒྱུར་བ་རེད། དེར་བརྟེན་དཔེ་ཆ་བལྟ་རྒྱུ་ཧ་ཅང་གལ་ཆེན་པོ་རེད། ཆོས་ཉམས་ལེན་བྱེད་དགོས་རེད་ཅེས་པ་དེ་རླུང་ལྟར་གྲགས་ཡོད། ཆོས་སློབ་སྦྱོང་བྱེད་དགོས་རེད་ཅེས་བརྗོད་སྐབས་དགོན་པ་གྲྭ་ཚང་དཔེ་ཆ་ལྟ་མཁན་ཚོས་མ་གཏོགས་ཆོས་ལ་སློབ་སྦྱོང་བྱེད་མི་དགོས་པ་ལྟ་བུའི་བསམ་ཚུལ་དེ་རྗེས་ལུས་ཀྱི་ལྟ་སྟངས་རེད། ཁྱེད་རང་ཚོ་ངེས་པར་དུ་ནང་ཆོས་ལ་སློབ་སྦྱོང་བྱེད་དགོས་རེད། དེ་ག་རང་ཡིན་གཞན་ཞུ་རྒྱུ་གང་ཡང་མེད། ཅེས་བཀའ་སློབ་སྩལ་ཡོད། ཕྱོགས་མཚུངས་མགོན་པོ་གང་ཉིད་མཆོག་གིས་འདི་ལོའི་རྡོ་རྗེ་གདན་དུ་དུས་འཁོར་དབང་ཆེན་གནང་འཆར་ཡོད་ཀྱང་གང་ཉིད་མཆོག་སྨན་བཅོས་ཆེད་དུས་འཁོར་དབང་ཆེན་བསྩལ་རྒྱུ་དེ་ཕར་འགྱངས་མཛད་དགོས་བྱུང་སྐོར་དང་། ཕྱི་ལོ་ ༢༠༡༧ ཟླ་ ༡ པོའི་ནང་དུས་འཁོར་དབང་ཆེན་བསྩལ་རྒྱུ་ཡིན་པའི་བཀའ་བཞེས་བཟང་པོ་སྨིན་སྩལ་ཐོབ་པ་དང་སྦྲགས། ཕྱི་ལོ་གསར་ཚེས་ལ་འཚམས་འདྲི་མཛད་ཡོད་པ་བཅས།།
