༢༠༡༦ ཟླ་ ༡ ཚེས་ ༧ རེས་གཟའ་ཕུར་བུ།
༄༅། །མཚུངས་མེད་གདུགས་རྩ་ཚང་བསྟན་འཛིན་འོད་ཟེར་ཅན་ཁྱོན་མི་གྲངས་ ༢༠༧ ཡོད་ཞུ་བ་ཐུན་མོང་ལ།
ཆེད་དོན། དེ་ནས་ ༢༠༡༥ ཟླ་ ༡༡ ཚེས་ ༡༦ འཁོད་བའི་ཞུ་གཏུགས་སྙན་ཞུ་གནས་ཚུལ་ ༧ དང་། དོགས་འདྲི་ ༡༨ ཅན་དྲ་ལམ་བརྒྱུད་ཕུལ་འབྱོར་བྱུང་དོན་བཞིན། འདི་ནས་ ༢༠༡༥ ཟླ་ ༡༡ ཚེས་ ༢༥ ཉིན་འཁོད་པའི་ལན་འདེབས་ནང་བཙན་བྱོལ་བོད་མིའི་བཅའ་ཁྲིམས་དང། འོས་སྒྲིག་གི་དོན་ཚན་ཁག་གི་ནང་གསལ་དབུས་འོས་བསྡུ་ལས་ཁང་གི་སྤྱི་ཁྱབ་འགན་འཛིན་དང་། འགན་འཛིན་ལས་འཕར་གཉིས་བཅས་གསུམ་ལ་འོས་བསྡུ་ཆེན་མོའི་ལས་རིམ་གྱི་ལས་དོན་ཁག་སྒྲུབ་རྒྱུར་འགན་དབང་བསྐུར་བ་གཞིར་བཟུང་ཁྲིམས་སྒྲིག་གདན་ལ་བྱས་ཏེ་ཕྱོགས་ལྷུང་སྤང་པའི་ཐོག་ནས་ལས་དོན་ཐག་གཅོད་བྱས་ལུགས་བྱེད་སྟངས་ཞིབ་འགྲེལ་དོན་ཚན་གསུམ་དུ་བསྒྲིལ་ཏེ་གསལ་བཤད་ཞུས་ཡོད་པས། ད་རེས་སླར་ཡང་ཕྱི་ལོ ༢༠༡༥ ཟླ་ ༡༢ ཚེས་ ༢༡ འཁོད་པའི་བཀའ་འདྲི་གནང་དགོས་དོན་དང་དེ་ལ་ལན་འདེབས་བྱ་འོས་མ་མཐོང་ཡང་། དངོས་བདེན་སྒྲིག་གཞིའི་གོ་དོན་མ་རྙེད་པ་ཞིག་ཡིན་ན་གསལ་བཟོ་དགོས་པ་གལ་ཆེན་དོན་ཆེན་དུ་བརྩིས་ཏེ་གསལ་བཤད་བྱ་རྒྱུ་ཡིན་ན་ཁྱེད་རྣམ་པའི་མ་རྟོག་ལོག་རྟོག་གསལ་པོ་ཆགས་པའི་རེ་བ་ཡོད།
དོན་ཚན་དང་པོའི་ཐད། བཅའ་ཁྲིམས་ལེའུ་ ༨ པ་དོན་ཚན་ ༩༣(༣) པ་འདིས་དབུས་འོས་བསྡུའི་འགན་འཛིན་རྣམ་པར་འོས་བསྡུའི་ལས་དོན་མཐའ་དག་མང་མོས་སམ་སྤྱི་མོས་ཀྱི་ཐག་གཅོད་བྱེད་པའི་འགན་དབང་ཡོད་པ་ཞིག་སྟོན་གྱི་ཡོད། འགན་དབང་དེའི་འོག་ནས་འོས་བསྡུའི་སྒྲིག་གཞི་གཏན་འབེབས་ཡོད་པ་ཁག་སྨྲོས་ཅི་དགོས། སྒྲིག་གཞིར་གསལ་ཡང་དངོས་སུ་ལག་བསྟར་བྱེད་སྐབས་གསལ་ཁ་མེད་རིགས་འོས་བསྡུའི་སྒྲིག་གཞི་དོན་ཚན་ ༢༦ (༢ ག) དགོངས་དོན་ཐག་གཅོད་གཏན་འབེབས་བྱེད་རྒྱུའི་འགན་དབང་བསྐུར་ཡོད་པ་ལྟར་ལག་བསྟར་ཞུས་པ་ཞིག་ཡིན།
དོན་ཚན་གཉིས་པའི་ཐད། རྒྱ་གཞུང་གི་རྒྱུགས་ཁྱི་དོལ་རྒྱལ་བ་རེ་འགའ་མ་གཏོགས་༸རྒྱལ་བ་རིན་པོ་ཆེ་བཀའ་དྲིན་ཆེན་པོ་མ་རེད་ཅེས་བཤད་མཁན་སུ་འདུག། ལྷག་པར་སྲིད་སྤྱི་གཉིས་ཀྱི་འོས་མིར་ལངས་པ་སུས་བཤད་འདུག ཅེས་པའི་དོགས་འདྲི་འདིའི་ཐད་ཉེ་ལམ་ཕྱི་ལོ ༢༠༡༥ ཟླ ༡༡ ཚེས ༢༣ ལྷ་བབ་དུས་ཆེན་བརྟན་བཞུགས་སྐབས་༸གོང་ས་སྐྱབས་མགོན་ཆེན་པོ་མཆོག་གི་བཀའ་སློབ་དང་། ཕྱི་ལོ ༢༠༡༥ ཟླ་ ༡༢ ཚེས ༡༠ ཉིན་ནོ་སྦེལ་ཞི་བདེའི་གཟེངས་རྟགས་འབུལ་བཞེས་ཀྱི་དུས་དྲན་མཛད་སྒོའི་ཉིན་དང་། ཡང་ཕྱི་ཟླ་ ༡༢ ཚེས ༡༩ ཉིན་གདན་ས་ཆེན་པོ་བཀྲ་ཤིས་ལྷུན་པོའི་གཙུག་ལག་ཁང་ལེགས་གྲུབ་དབུ་འབྱེད་མཛད་སྒོའི་སྐབས་བཅས་སུ་བཀའ་སྤྱི་གཉིས་ཀྱི་གསུང་བཤད་ཁག་ལ་དེ་ནས་དོ་སྣང་བྱུང་ཡོད་ཤག་ཡིན་ལ། དེ་མིན་གསར་ལམ་ཁག་ཏུ་རྒྱ་གཞུང་གི་རྒྱུགས་ཁྱི་དོལ་རྒྱལ་རྗེས་འབྲངས་མ་ཡིན་པའི་བོད་མི་རེ་ཟུང་གིས་༸གོང་ས་མཆོག་ལ་མཚན་སྨད་སྐྱོན་བརྗོད་ཇི་སྤེལ་ལོ་ཟླ་ཚེས་གྲངས་དང་བཅས་པ་ཡོད་པས་དེ་དག་ལ་བལྟ་ཞིབ་གནང་ན་བཀའ་དྲིན་བསམ་ཤེས་མེད་པར་གཞི་མེད་སྙོན་འཛུགས་འདྲ་མིན་གང་ཟག་སུ་དང་སུས་བཤད་པ་ཤེས་ཐུབ། གཞན་ཡང་དེ་ནས། བོད་སྤྱི་པའི་རྩ་དོན་གྱི་ཆེད་དུ་གནད་དོན་གང་ཞིག་ལ། རང་གིས་སྐྱོན་དུ་མཐོང་བ་དེ་བརྗོད་མི་ཆོག་པ་བཅའ་སྒྲིག་གི་དོན་ཚན་གང་གི་དགོངས་དོན་ཡིན་ནམ། ཞེས་པར་ལས་དོན་གང་ཡིན་ལ་སྐྱོན་དུ་མཐོང་ཙམ་དང་སྐྱོན་བརྗོད་ཙམ་མི་ཆོག་པ་ག་ལ་ཡིན། དེ་ཙམ་བཅའ་སྒྲིག་གིས་ཀྱང་བཀག་པ་མེད། འོན་ཀྱང་དེ་ནས་སྐྱོན་དུ་མཐོང་བ་དང་བརྗོད་པ་རྣམས་གཞི་མེད་སྙོན་འཛུགས་ཤིག་རྒྱབ་ལྗོངས་ལ་བཞག་པའི་སྐྱོན་བརྗོད་ཡིན་པར་བརྟེན་བཅའ་ཁྲིམས་ཀྱི་དགོངས་དོན་དང་འོས་སྒྲིག དེ་འབྲེལ་འདི་གའི་ལམ་སྟོན་ཁག་གཞིར་བཟུང་ནས་གསལ་བཤད་སྔར་ཞུས་དེ་ལྟར་ཡིན།
དོན་ཚན་གསུམ་པའི་ཐད། འདི་ནས་དེ་སྔ་གནས་ཚུལ་དྲུག་པ་དང་བདུན་པའི་འོག་དོགས་འདྲི་གཉིས་ཞུས་པའི་ལན་འདེབས་གཉིས་པར་སྒྲིག་འགལ་གང་ཡང་ཆགས་མེད་པའི་གསལ་བཤད་དང་དེ་འབྲེལ་ཁྲིམས་སྒྲིག་ཁག་ལུང་འདྲེན་ཞུས་ཡོད་པ་དེ་ལས་ལྷག་པའི་ལན་འདེབས་ཐད་ཀར་གནང་རྒྱུ་གང་ཡང་མེད། མདོ་དོན་སྙིང་པོ་བོད་ཀྱི་རྒྱལ་དར་ཆུང་ངུ་དེ་རྒྱུན་ལྡན་ཚོགས་འདུའི་ངོ་བོ་ལྟར་རྒྱ་ལྕོགས་སྟེང་ཡོད་པ་ཙམ་ལས་འོས་གཞིའི་འོས་བསྡུའི་རྒྱལ་ཁ་ཐོབ་ཆེད་དྲིལ་བསྒྲགས་ཀྱི་མཚོན་རྟགས་ཚུལ་དུ་བེད་སྤྱོད་གནང་མེད་པར་བརྟེན་དེ་ནས་ཟུར་འདོན་བྱས་དོན་ལྟར་ཉེས་པ་ཕོག་པའི་གཞི་རུ་གྱུར་མེད།
མཐའ་དོན་དེ་གའི་ཞུ་བབས་རྣམས་ལ་འདི་གར་འགན་དབང་ཡོད་པའི་ཐོག་ནས་ཁྲིམས་སྒྲིག་དགོངས་དོན་ལྟར་གསལ་བཤད་ཞུས་ཡོད་པས་དེ་ནས་རང་གི་གོ་བ་ལེན་སྟངས་ཙམ་དང་འདོད་པ་མཐུན་མིན་ཙམ་རྒྱུ་མཚན་དུ་མ་བཟུང་བར་སྤྱི་སྨིན་ལ་བསམ་ཞིབ་ཀྱིས་མཚན་འགོད་པ་ཡོངས་ལ་དེ་འབྲེལ་ལམ་སྟོན་ཡོང་བའི་རེ་བ་དང་བཅས།
དབུས་འོས་བསྡུ་ལས་ཁང་ནས་ ༢༠༡༦ ཟླ་ ༡ ཚེས་ ༦ ལ།།
