༢༠༡༦ ཟླ་ ༡ ཚེས་ ༥ རེས་གཟའ་མིག་དམར།

༄༅། །ཕྱི་ལོ་ ༢༠༡༦ ཟླ་ ༡ ཚེས་ ༤ རེས་གཟའ་ཟླ་བའི་ཉིན་གུང་ཆུ་ཚོད་ ༡ ཡོལ་ཙམ་ལ་རྒྱ་གར་རྒྱལ་ས་ལྡི་ལིར་རྟེན་གཞི་བྱས་པའི་ཨོ་བྷེ་རོ་ཡི་གསོལ་མགྲོན་ཁང་ Oberoi hotel དུ་༸གོང་ས་༸སྐྱབས་མགོན་ཆེན་པོ་མཆོག་དབུ་བཞུགས་ཐོག རྒྱ་གར་གྱི་སྲིད་བློན་ཟུར་པ་སྐུ་ཞབས་མན་མོ་ཧན་སིངྒ་ Manmohan Singh མཆོག་དང་། སྲིད་བློན་གཞོན་པ་ཟུར་པ་ཨེལ་ཀེ་ཨ་ཌི་ཝ་ནི་ Lal Krishna Advani མཆོག རྒྱ་གར་གྱི་དཔལ་འབྱོར་བློན་ཆེན་ཟུར་པ་སྐུ་ཞབས་པི་ཅི་ཏམ་བྷ་རམ་ P. Chidambaramམཆོག དེ་བཞིན་ཆོས་ལུགས་འདྲ་མིན་གྱི་དབུ་ཁྲིད་ཁག་གཅིག ནོ་བེལ་ཞི་བདེའི་གཟེངས་རྟགས་བཞེས་མྱོང་མཁན་སྐུ་ཞབས་ཀེ་ལ་ཤི་སཏྱར་ཐི་ kailash Satyarthi མཆོག སྐུ་ཞབས་ཀ་རན་སིངྒ་མཆོག ལྡི་ལིའི་གཙོ་འཛིན་སྐུ་ཞབས་ན་ཇིབ་ཇངྒ་ Najeeb Jung མཆོག

རྒྱ་གར་གྱི་གནའ་བོའི་སྒྱུ་རྩལ་ཐོག་མཁས་ལས་པ་ལྕམ་སྐུ་ཀ་པི་ལ་ཝཏ་སཱ་ཡན་ Dr.Kapila Vatsyayan མཆོག ཁྲིམས་རྩོད་པ་གྲགས་ཅན་དང་རྒྱ་གར་ཁྲིམས་ཀྱི་བློན་ཆེན་ཟུར་པ་སྐུ་ཞབས་རཱམ་ཇེ་ཐི་མ་ལ་ནི་ Ram Jethamalani མཆོག གློག་བརྙན་འཁྲབ་སྟོན་པ་གྲགས་ཆེན་ཤར་མི་ལ་ཊ་གོར་ Sharmila Tagore མཆོག་སོགས་ལྷན་འཛོམས་ཐོག རྒྱ་གར་གྱི་སྒྱུ་རྩལ་བ་གྲགས་ཅན་སྐུ་ཞབས་ཨམ་ཇེ་ཏི་ཨ་ལི་ཁཱང་དང་ཁོང་གི་སྲས་གཉིས་བཅས་ཀྱིས་རོལ་མོའི་ལམ་ནས་༸གོང་ས་མཆོག་གུང་གྲངས་ ༨༠ ཕེབས་པའི་གྱ་སྟོན་གྱི་སྲུང་བརྩི་ཞུས་ཡོད།  དེ་ཡང་མཛད་སྒོའི་ཐོག་མར་འབྲས་སྤུངས་བློ་གསལ་གླིང་གྲྭ་ཚང་གི་དགེ་འདུན་པ་རྣམས་ཀྱིས་ཤིས་བརྗོད་གསུང་འདོན་གནང་།

སྐབས་དེར་༸གོང་ས་མཆོག་གིས་བཀའ་སློབ་སྩལ་དོན། དེང་སྐབས་འཛམ་གླིང་ནང་བྱམས་བརྩེ་དགོས་པ་དེ་སྔར་དང་མི་འདྲ་བར་ཧ་ཅང་གལ་ཆེན་པོ་ཆགས་ཡོད། ང་ཚོས་སྟག་དང་གླང་པོ་ཆེས་མི་བསད་འདུག ཅེས་པ་ཐོས་སྐབས་ཧང་སང་ཧོན་འཐོར་བཞིན་ཡོད།

འོན་ཀྱང་དེང་སྐབས་ཆོས་ལུགས་དང་རྒྱལ་ཞེན་ལ་ཁ་གཡར་ནས་མིས་མི་གསོད་རྒྱུ་དེ་ཧ་ལམ་འཆར་ཅན་ལྟར་ཆགས་འགྲོ་བཞིན་ཡོད་པའི་གནས་སྟངས་འདི་བློ་ཡུལ་དུ་ཧ་ཅང་ཤོང་དཀའ་བའི་ཐབས་སྡུག་གི་གནས་སྟངས་ཤིག་ཡིན། རྒྱ་གར་བ་ཚོས་རང་ཉིད་ལ་གནའ་རབས་ནས་ཡོད་པའི་ཆོས་ལུགས་མཐུན་སྒྲིལ་གྱི་གོམས་གཤིས་བཟང་པོ་དེ་དག་གོང་སྤེལ་གཏོང་ཐབས་ཆེད་འབད་བརྩོན་ཤུགས་ཆེ་ཙམ་གནང་ནས་གཞན་ལ་དཔེ་སྟོན་ཐུབ་པ་ཞིག་གནང་དགོས། རྒྱ་གར་ནང་ལ་མཚོན་ན་སྐབས་རེ་མི་རེ་ཟུང་གིས་རྙོག་གྲ་བཟོས་པ་ལས་གཞན་ཁྱོན་ཡོངས་ཀྱི་ཆ་ནས་ཆོས་ལུགས་མི་འདྲ་བ་ཡོད་པ་དེ་དག་ཕན་ཚུན་འཆམ་མཐུན་དང་ཞི་བདེ་བག་ཕེབས་ངང་འཚོ་གནས་བྱེད་བཞིན་ཡོད།

དེང་དུས་འཁྲུལ་ཆས་རིགས་ཀྱིས་སྒོ་ལྔའི་དབང་ཤེས་ལ་བརྟེན་པའི་བདེ་བ་བསྐྲུན་ཐུབ། འོན་ཀྱང་རྒྱ་གར་གནའ་རབས་ཀྱི་དཔལ་ན་ལེནྡྲའི་སྲོལ་རྒྱུན་ནས་དར་བའི་བསླབ་བྱ་དེ་དག་གིས་ནང་གི་བདེ་སྐྱིད་བསྐྲུན་ཐུབ། སྤྱིར་རྒྱལ་ཁབ་མང་པོའི་ནང་དུ་ནང་ཆོས་དར་འཕེལ་བྱུང་ཡོད། འོན་ཀྱང་བོད་མི་ཚོས་བཀའ་འགྱུར་བསྟན་འགྱུར་པོ་ཏི་གསུམ་བརྒྱ་ཙམ་ཡོད་པ་རྣམས་གཅེས་ཉར་བྱས་ནས་མི་རབས་ནས་མི་རབས་བརྒྱུད་སྤྲོད་དང་འཛིན་སྐྱོང་སྤེལ་གསུམ་བྱས་ཡོད། དེ་འདྲ་བྱེད་མཁན་བོད་པ་ཁོ་ན་ཡིན། ད་ཆ་བོད་མི་ཚོས་རྒྱ་གར་བ་ཁྱེད་རྣམ་པར་རིག་གཞུང་དེ་དག་ཕར་བརྩི་སྤྲོད་བྱེད་དགོས་པ་ང་ཚོའི་ལས་འགན་ཆགས་ཡོད། རིག་གཞུང་དེ་དག་དེང་སྐབས་འཛམ་གླིང་ནང་དུ་འབྲེལ་བ་ཧ་ཅང་ཆེན་པོ་ཆགས་ཡོད། དུས་རྒྱུན་ང་ཚོས་ལུས་པོའི་འཕྲོད་བསྟེན་གལ་ཆེ་ཡིན་སྐོར་བཤད་སྲོལ་ཡོད།

ཡོན་ཀྱང་ད་ཆ་བསམ་བློའི་འཕྲོད་བསྟེན་དེའང་ཧ་ཅང་གལ་ཆེན་པོ་ཡིན་པ་ཚན་རིག་པ་དང་ལྷག་པར་སྨན་གྱི་ཚན་རིག་པ་ཚོས་བརྗོད་བཞིན་ཡོད། དེར་བརྟེན་ངོས་ཀྱིས་བསམ་བློའི་ས་ཁྲ་ལྟ་བུ་ཞིག་དགོས་གལ་ཆེན་པོ་ཡིན་པ་བརྗོད་ཀྱི་ཡོད། བྱམས་པ་དང་བརྩེ་བ། བཟོད་སྲན་སོགས་བཟང་པོའི་རིན་ཐང་དེ་དག་གོང་མཐོར་གཏོང་བར་ཆོས་ལུགས་བྱེ་བྲག་པ་ཞིག་ལ་ངེས་པར་བརྟེན་དགོས་པ་གང་ཡང་མེད།

དེང་སྐབས་ཤེས་ཡོན་ལམ་ལུགས་ནང་རིན་ཐང་དེ་དག་འགྲོ་བ་མིར་གཞི་རྩའི་དགོས་མཁོའི་ཆ་ཤས་ཤིག་ཡིན་པ་ར་སྤྲོད་བྱས་ནས་འགྲོ་བ་མི་རིགས་སྤྱིའི་བདེ་དོན་གོང་ཐོར་གཏོང་དགོས་པ་ཧ་ཅང་གལ་གནད་ཆགས་ཡོད།

ང་ཚོས་ནང་པའི་ཚན་རིག་དང་ལྟ་གྲུབ་ཀུན་བཏུས། ཞེས་པའི་དེབ་སྟོད་ཆ་སྨད་ཆ་བཅས་གཉིས་འགྲེམས་སྤེལ་བྱས་ཡོད། དེབ་དེ་དག་ནང་དུ་ཆོས་ཀྱི་སྐད་ཆ་གང་ཡང་མིན་པར་གཞི་དངོས་པོའི་རྣམ་སྐོར་ནང་ཆོས་ནས་གང་གསུངས་པ་དེ་དག་བཏུས་ཡོད། ཅེས་བཀའ་སློབ་སྩལ་བ་དང་སྦྲགས་གྱ་སྟོན་གོ་སྒྲིག་ཞུ་མཁན་རྣམས་ལ་ཐུགས་རྗེ་ཆེ་གསུང་གནང་མཛད།

སྐབས་དེར་རྒྱ་གར་གྱི་སྲིད་བློན་ཟུར་པ་སྐུ་ཞབས་མན་མོ་ཧན་སིངྒ་མཆོག་གིས་ཚོགས་བཅར་བ་ཡོངས་ཀྱི་ཚབས་ཞུས་ནས་༸གོང་ས་མཆོག་ལ་ཙན་དན་ལས་གྲུབ་པའི་ཆོས་རྒྱལ་མྱ་ངན་མེད་ཀྱི་རྡོ་རིང་རྩེ་མོར་ཆོས་ཀྱི་འཁོར་ལོ་ཡོད་པ་བཟོ་བསྐོས་ཧ་ཅང་ལེགས་པ་ཞིག་ཕྱག་རྟགས་སུ་འབུལ་ལམ་ཞུས་པར་མགོན་པོ་གང་ཉིད་མཆོག་གིས་དགྱེས་བཞེས་མཛད།།