ཕྱི་ལོ་ ༢༠༡༦ ཟླ་ ༡ ཚེས་ ༢༥ རེས་གཟའ་ཟླ་བ།
༄༅། །བོད་མིའི་སྒྲིག་འཛུགས་ཀྱི་རྩིས་ལོ་ ༢༠༡༦།༡༧ ལོའི་ལོ་འཁོར་སྔོན་རྩིས་འཆར་འབུལ་ལ་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་ཐུགས་ཞིབ་དང་བཀའ་ཤག་གིས་མཐའ་མའི་བཀའ་འཁྲོལ་རྒྱབ་གཉེར་གནང་རྒྱུའི་ལས་རིམ་དེ་བཞིན་ཕྱི་ལོ་ ༢༠༡༦ ཟླ་ ༡ ཚེས་ ༢༢ ཉིན་མཇུག་བསྒྲིལ་གནང་སོང་།
དེ་ཡང་དཔལ་ལྡན་སྲིད་སྐྱོང་མཆོག་དབུ་བཞུགས་ཐོག་བཀའ་ཤག་ཚོགས་ཁང་དུ་ཕྱི་ལོ་ ༢༠༡༦ ཟླ་ ༡ ཚེས་ ༡༨ ནས་ཕྱི་ཚེས་ ༢༢ བར་བདུན་ཕྲག་གཅིག་རིང་བོད་མིའི་སྒྲིག་འཛུགས་ཀྱི་ལས་ཁུངས་རེ་རེ་བཞིན་ལོ་འཁོར་སྔོན་རྩིས་འཆར་འབུལ་ལ་བཀའ་ཤག་ནས་བཀའ་འཁྲོལ་གནང་ཡོད།
ལས་རིམ་འདི་བཞིན་བདུན་ཕྲག་སྔ་མའི་ཕྱི་ཚེས་ ༡༨ ནས་འགོ་འཛུགས་ཀྱིས་ལས་ཁུངས་རིམ་པའི་ལོ་འཁོར་སྔོན་རྩིས་འཆར་འབུལ་ལ་དཔལ་ལྡན་སྲིད་སྐྱོང་མཆོག་གིས་ཐུགས་ཞིབ་དང་བཀའ་ཤག་གིས་མཐའ་མའི་བཀའ་འཁྲོལ་རྒྱབ་གཉེར་གནང་ཡོད།
དེ་ནས་ཕྱོགས་བསྡོམས་ལོ་འཁོར་སྔོན་རྩིས་དེ་ཚོགས་གཙོ་སྦྲེལ་པོས་བསྐོ་གཞག་གནང་བའི་བོད་མི་མང་སྤྱི་འཐུས་ལྷན་ཚོགས་ཀྱི་སྔོན་རྩིས་ཚོད་དཔག་ཚོགས་ཆུང་ལ་འབུལ་རྒྱུ་དང་། དེ་རྗེས་མཐའ་མར་ཕྱི་ཟླ་ ༣ པའི་གྲོས་ཚོགས་ནང་ལོ་འཁོར་སྔོན་རྩིས་ཐོག་བགྲོ་གླེང་དང་བཅས་བཀའ་འཁྲོལ་གནང་གི་ཡོད།
སྤྱིར་བཏང་བོད་མིའི་སྒྲིག་འཛུགས་ཀྱི་སྔོན་རྩིས་འབུལ་ཕྱོགས་ཀྱི་ལམ་སྟོན་ དགོངས་དོན་བོད་མིའི་སྒྲིག་འཛུགས་ཀྱི་ལས་ཁུངས་ཁག་དང་། ཁྱབ་ཁོངས་གཤམ་འོག་ལས་ཁུངས། སློབ་གྲྭ་དང་སྨན་ཁང་སོགས་ཀྱི་ལོ་ལྟར་རྩིས་ལོ་སོ་སོའི་རྒྱུན་གྲོན་དང་། དམིགས་བསལ། ཟུར་བཀོལ། ཡོང་འབབ་བཅས་ཀྱི་ཚོད་དཔག་འཆར་རྩིས་ལོ་འཁོར་སྔོན་རྩིས་དང་། བར་བརྒལ་བཀའ་འཁྲོལ། ཁ་བསྒྱུར་བཅས་ཀྱི་བརྒྱུད་ནས་བཀའ་འཁྲོལ་ཞུ་དགོས་ཀྱི་ཡོད་་པ་བཅས། །
