ཕྱི་ལོ་ ༢༠༡༦ ཟླ་ ༡ ཚེས་ ༡༩ རེས་གཟའ་མིག་དམར།
༄༅། །ཕྱི་ལོ་ ༢༠༡༦ ཟླ་ ༡ ཚེས་ ༡༨ ཉིན་རྒྱ་གར་ལྷོ་ཕྱོགས་ཀར་ནཱ་ཊ་ཀ་མངའ་སྡེའི་རྒྱལ་ས་སྦེང་ལོར་དུ་བོད་མིའི་སྒྲིག་འཛུགས་ཀྱི་ནང་སྲིད་བཀའ་བློན་རྒྱ་རི་སྒྲོལ་མ་མཆོག་གིས་ཀར་ནཱ་ཊ་ཀ་མངའ་སྡེའི་སྤྱི་ཁྱབ་དྲུང་ཆེ་གསར་པ་སྐུ་ཞབས་ཨར་ཝིན་ཇ་ཌོབ་ Mr.Arvind Jadhav མཆོག་དང་མཇལ་འཕྲད་ཀྱིས་དགའ་བསུའི་འཚམས་འདྲི་ཞུས་པ་དང་སྦྲགས་བོད་མི་སྐྱབས་བཅོལ་བའི་གནས་བབས་ཐོག་གོ་བསྡུར་གནང་འདུག
དེ་ཡང་སྐུ་ཞབས་ཨར་ཝིན་ཇ་ཌོབ་མཆོག་ནི་དེ་སྔ་ཀར་ནཱ་ཊ་ཀ་མངའ་སྡེའི་དྲུང་འཕར་ཡིན་པ་དང་། སྔ་ལོའི་ཕྱི་ཟླ་ ༡༢ ནང་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་སི་དཱ་རམ་ཡ་མཆོག་གིས་དྲུང་ཆེའི་གནས་རིམ་ཐོག་གནས་སྤར་གནང་འདུག
དེ་ཡང་དབུ་ཁྲིད་རྣམ་གཉིས་མཇལ་འཕྲད་སྐབས་ནང་སྲིད་བཀའ་བློན་མཆོག་གིས་རྒྱ་གར་དབུས་ནང་སྲིད་ལས་ཁུངས་ནས་གཏན་འབེབས་གནང་བའི་བཙན་བྱོལ་བོད་མིར་མཐུན་རྐྱེན་སྦྱོར་སྤྲོད་བྱེད་ཕྱོགས་ཀྱི་སྲིད་བྱུས་ ༢༠༡༤ ཞེས་པའི་སྐོར་གོ་བསྡུར་གནང་བ་ཙམ་དུ་མ་ཟད། ཀར་ནཱ་ཊ་ཀ་མངའ་སྡེའི་གཞུང་གིས་ཁུལ་དེར་གནས་སྡོད་བྱེད་བཞིན་པའི་བོད་མི་སྐྱབས་བཅོལ་བ་རྣམས་སྲིད་བྱུས་འདི་ལམ་ལྷོང་ལྡན་པའི་ཐོག་ནས་ལག་བསྟར་ཇི་ལྟར་གནང་དགོས་པའི་གནད་དོན་ཐོག་གོ་བསྡུར་སྦྱངས་བཤད་གནང་འདུག
དེ་བཞིན་ནང་སྲིད་བཀའ་བློན་མཆོག་གིས་སྤྱི་ཁྱབ་དྲུང་ཆེ་མཆོག་ནས་མངའ་སྡེའི་གཞུང་གི་དྲུང་ཆེ་རྣམས་ཚང་འཛོམས་ཐོག་བོད་མིའི་སྒྲིག་འཛུགས་ཀྱི་ལས་སྣེ་དང་ལྷན་ཚོགས་འདུ་ཞིག་གོ་སྒྲིག་གནང་ནས་ཚོགས་འདུའི་གཙོ་སྐྱོང་གནང་རོགས། ཞེས་འབོད་སྐུལ་ཞུས་པར་ལྷན་ཚོགས་དེ་ཕྱི་ལོ་ ༢༠༡༦ ཟླ་ ༢ ཚེས་ ༧ ཉིན་འཚོགས་རྒྱུའི་འཕྲལ་སེལ་གཏན་འབེབས་གནང་འདུག
ཐེངས་འདིར་བཀའ་བློན་མཆོག་དང་ལྷན་ལྷོ་སྤྱི་ཀརྨ་དགྲ་འདུལ་ལགས་དང་། ལྷོ་སྤྱི་ལས་ཁུངས་ཀྱི་འབྲེལ་མཐུད་པ་ཆོས་འཕེལ་ཐུབ་བསྟན་ལགས་རྣམ་གཉིས་ལྷན་བཅར་ཞུས་འདུག ཉིན་དེའི་དགོང་མོར་བཀའ་བློན་མཆོག་སྦེང་ལོར་གནམ་ཐང་ནས་ལྡི་ལིར་ཕེབས་ཐོན་གནང་འདུག་པ་བཅས། །
