༢༠༡༦ ཟླ་ ༡ ཚེས་ ༡༡ རེས་གཟའ་ཟླ་བ།

༄༅། །ཕྱི་ལོ་ ༢༠༡༦ ཟླ་ ༡ ཚེས་ ༧ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཇམ་མུ་ཀ་ཤི་མིར་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་མུབ་ཏི་མོ་ཧཱ་མད་ས་ཡི་དི་ Mufti Mohammad Sayeed མཆོག་ཉེ་ལམ་སྙུན་གཞི་རྐྱེན་པས་ལྡི་ལིའི་སྨན་ཁང་ཞིག་ཏུ་འདས་གྲོངས་སུ་གྱུར་བར་དམ་པ་དེ་ཉིད་ཀྱི་སྲས་མོ་ལྕམ་སྐུ་མེ་བྷུ་བྷ་མུབ་ཏི་ Ms Mehbooba Mufti མཆོག་ལ་ཐུགས་གསོའི་གསུང་འཕྲིན་ཞིག་སྩལ་བའི་ནང་འཁོད་དོན། སྐུ་ཞབས་མུབ་ཏི་མོ་ཧཱ་མད་ས་ཡི་དི་མཆོག་འདས་གྲོངས་སུ་གྱུར་བ་དེ་ཇམ་མུ་ཀ་ཤི་མིར་མངའ་སྡེའི་སྤྱི་ཁྱབ་བློན་ཆེན་ལས་ཐོག་པ་ཞིག་མེད་པར་གྱུར་པ་ཙམ་མ་ཟད། ལོ་ངོ་ལྔ་བཅུ་ལྷག་གི་ཉམས་མྱོང་ཡོད་པའི་ཆབ་སྲིད་ཀྱི་ལས་དོན་ཐོག་ལྷག་བསམ་རྣམ་དག་ཞུ་མཁན་ཞིག་མེད་པར་གྱུར་ཡོད། དེར་བརྟེན་ངོས་ཀྱིས་དམ་པ་དེ་ཉིད་ཀྱི་ཆེད་སྨོན་ལམ་རྒྱག་རྒྱུ་དང་། སྐུ་ཉིད་མཆོག་དང་། སྐུ་ཉིད་མཆོག་གི་མ་ཡུམ་མཆོག དེ་བཞིན་སྐུ་འཁོར་ལྷན་རྒྱས་ལ་གདུང་སེམས་མཉམ་སྐྱེ་དང་སྦྲགས་སྙིང་ཐག་པ་ནས་སེམས་གསོ་ཞུ་རྒྱུ་ཡིན།།