༢༠༡༥ ཟླ་ ༡༢ ཚེས་ ༩ རེས་གཟའ་ལྷག་པ།
༄༅། །ཕ་རན་སིའི་རྒྱལ་ས་པེ་རི་སིར་གོ་ལའི་ཁོར་ཡུག་ལྷན་ཚོགས་ COP21 སྐབས་དང་བསྟུན། བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱིས་བོད་ཀྱི་ཁོར་ཡུག་སྲུང་སྐྱོབ་ཆེད་ཞུ་སྐུལ་གྱི་ལས་འགུལ་སྤེལ་རྒྱུའི་ཆ་ཤས་སུ། ཕྱི་ལོ་ ༢༠༡༥ ཟླ་ ༡༢ ཚེས་ ༨ ཉིན་ཁུལ་དེའི་པེ་ལ་ཡི་སི་གསོལ་མགྲོན་ཁང་དུ་ Grand Palais ཕྱི་དྲིལ་བཀའ་བློན་བདེ་སྐྱིད་ཆོས་དབྱངས་མཆོག་དབུ་བཞུགས་ཐོག ཕ་རན་སིའི་མི་རིགས་ཡིན་པ་ཁོར་ཡུག་སྲུང་སྐྱོབ་པ་སྐུ་ཞབས་མེ་ཐིའུ་རི་ཁ་ཌི་ Reverence Matthieu Ricard ལགས། ཅེཀ་སྤྱི་མཐུན་རྒྱལ་ཁབ་ཀྱི་དེ་སྔའི་སྲིད་བློན་གཞོན་པ་དང་ཁོར་ཡུག་བློན་ཆེན་སྐུ་ཞབས་མར་ཊིན་བྷུར་སིཀ་མཆོག དེ་བཞིན་ཕྱི་དྲིལ་ཁོར་ཡུག་ཚན་པའི་ཁོར་ཡུག་ཚན་པའི་འགན་འཛིན་ཟུར་པ་བསྟན་འཛིན་ནོར་བུ་ལགས་དང་ལས་ཐོག་འཛམ་ལྷ་བསྟན་པ་རྒྱལ་མཚན་ལགས་བཅས་ཀྱིས། བོད་མཐོ་སྒང་གི་ཁོར་ཡུག་གནས་སྟངས་དེ་གོ་ལ་སྤྱིའི་ཁོར་ཡུག་གི་གནས་སྟངས་ཐོག་གལ་གནད་ཆེན་པོ་ཇི་ཙམ་ཆགས་ཡོད་མེད་དང་། ད་ལྟའི་བོད་ཀྱི་ཁོར་ཡུག་གི་གནས་སྟངས་སོགས་ཀྱི་སྐོར་ལ་བགྲོ་གླེང་གནང་འདུག
སྐབས་དེར་ཐོག་མར་ཕྱི་དྲིལ་བཀའ་བློན་མཆོག་གིས་ཕ་རན་སིའི་རྒྱལ་ས་པེ་རི་སིར་རྒྱལ་སྤྱིའི་གོ་ལའི་ཁོར་ཡུག་ལྷན་ཚོགས་ COP21 སྐབས། བོད་མིའི་སྒྲིག་འཛུགས་ཀྱིས་བོད་ཀྱི་ཁོར་ཡུག་དེ་རྒྱལ་སྤྱིའི་ཁྱོན་ཡོངས་ལ་གལ་གནད་ཆེན་པོ་ཇི་ཙམ་ཡིན་སྐོར་གོ་བསྡུར་གནང་དགོས་པ་མ་ཟད། ལྷན་ཚོགས་ཀྱི་བརྗོད་གཞི་གཙོ་བོར་ངོས་འཛིན་གནང་དགོས་པའི་ལས་འགུལ་སྤེལ་རྒྱུའི་རྒྱབ་ལྗོངས་ཀྱི་དམིགས་ཡུལ་རྣམས་ངོ་སྤྲོད་གནང་ཡོད། དེ་རྗེས་༸གོང་ས་མཆོག་གིས་གོ་ལའི་གནམ་གཤིས་འགྱུར་ལྡོག་ལ་ང་ཚོས་ཛ་དྲག་ཐོག་ནས་གདོང་ལེན་བྱེད་དགོས་པའི་ལམ་སྟོན་བཀའ་སློབ་སྩལ་བ་བརྙན་འཕྲིན་ལམ་ནས་བསྟན། བརྙན་འཕྲིན་དེའི་ནང་༸གོང་ས་མཆོག་གིས་བཀའ་སློབ་སྩལ་དོན། ང་ཚོར་སྡོད་གནས་སའི་གོ་ལ་འདི་ཁོ་ན་ལས་མེད། འདིའི་ཡང་སྟེང་དུ་བོད་ཆགས་ཡོད། འཛམ་གླིང་ལྷོ་བྱང་གི་སྣེ་གཉིས་གོ་ལའི་གནམ་གཤིས་ལ་ཧ་ཅང་གནད་ཆེ་བ་ལྟར་བོད་དེ་ཡང་གོ་ལའི་གནམ་གཤིས་ཐོག་ཧ་ཅང་གལ་གནད་ཆེན་པོ་ཡིན་སྟབས། བོད་མཐོ་སྒང་ལ་འཛམ་གླིང་གི་སྣེ་གསུམ་པ། ཞེས་འབོད་སྲོལ་ཡོད། དེར་བརྟེན་བོད་མི་ས་ཡ་དྲུག་ཁོ་ནའི་ཆེད་དུ་མིན་པར་གོ་ལ་སྤྱིའི་བདེ་དོན་དང་། ཁོར་ཡུག་འཕྲོད་བསྟེན་རྒྱུན་སྲིང་ཡོང་སླད་བོད་ཀྱི་ཁོར་ཡུག་སྲུང་སྐྱོབ་བྱ་རྒྱུ་ཧ་ཅང་གལ་ཆེན་པོ་ཡིན། ཞེས་ལམ་སྟོན་མཛད་ཡོད།
གཞན་ཡང་སྐུ་ཞབས་མེ་ཐིའུ་རི་ཁ་ཌི་ལགས་ཀྱིས་བོད་ཀྱི་སྲོལ་རྒྱུན་རིག་གནས་ལ་བརྟེན་པའི་མིའི་འཚོ་བའི་གོམས་གཤིས་དེས་ལོ་ངོ་སྟོང་ཕྲག་རིང་ནས་བོད་ཀྱི་ཁོར་ཡུག་སྲུང་སྐྱོབ་ཆེད་ཕན་རླབས་ཆེན་པོ་བྱུང་ཡོད་སྐོར་གསལ་བཤད་གནང་འདུག ཕྱོགས་མཚུངས་མར་ཊིན་བྷུར་སིཀ་མཆོག་གིས་ཕྱི་ལོ་ ༡༩༨༨ ལོར་རི་བོ་ཇོ་མོ་གླང་མར་ Mount Everest འཛེགས་པའི་ཉམས་མྱོང་ལ་གཞི་བཅོལ་ནས་བོད་ཀྱི་ཁོར་ཡུག་སྲུང་སྐྱོབ་སླད་རྒྱལ་སྤྱིའི་དབུ་ཁྲིད་རྣམ་པས་འགན་ཁུར་མང་ཙམ་བཞེས་དགོས་པའི་རེ་འདུན་བཏོན་ཡོད། སྐབས་དེར་བསྟན་འཛིན་ནོར་བུ་ལགས་ཀྱིས་དེང་སྐབས་བོད་ཀྱི་ཁོར་ཡུག་གི་གནས་སྟངས་འགྲེལ་བརྗོད་སྐབས་རྒྱ་ནག་གཞུང་གིས་བོད་ཀྱི་རི་བོ་དང་རྩ་ཐང་ཐོག་གཏེར་ཁ་ཚོད་མེད་སྔོག་འདོན་བྱེད་བཞིན་ཡོད་པ་དང་། བོད་ཀྱི་རྒྱུག་ཆུ་སོགས་ལ་ཆུ་མཛོད་ཧ་ཅང་མང་པོ་བརྒྱབ་པ་མ་ཟད། བོད་མི་འབྲོག་པ་རྣམས་བཙན་དབང་གིས་གྲོང་ཚོར་གནས་སྤོ་བྱས་བཅུག་པ་སོགས་གསལ་བཤད་གནང་བསྟུན། འཛམ་ལྷ་བསྟན་པ་རྒྱལ་མཚན་ལགས་ཀྱིས་བོད་མཐོ་སྒང་གི་ཁོར་ཡུག་གི་གནས་སྟངས་དེ་གོ་ལའི་གནམ་གཤིས་ལ་ཤུགས་རྐྱེན་ཇི་ཙམ་ཐེབས་བཞིན་ཡོད་པ་ནི་ཉེ་ལམ་ཡུ་རོབ་ནང་དེ་སྔ་ལས་ཚ་དྲོད་ཆེ་རུ་ཆགས་པ་དེ་བོད་ཀྱི་འཁྱགས་རོམ་རྒྱ་ཆེ་བཞུ་བའི་ཉེར་ལན་ལས་ཡིན་སྐོར་ཁོར་ཡུག་ཉམས་ཞིབ་པ་ཁག་གཅིག་གིས་ཉམས་ཞིབ་ཀྱི་གྲུབ་དོན་ལས་ཁུངས་བསྐྱེལ་ཐུབ་པ་བྱུང་ཡོད། དེར་བརྟེན་ཆབ་སྲིད་དང་མ་འབྲེལ་བའི་ཐོག་ནས་རྒྱ་ནག་གཞུང་དང་རྒྱལ་སྤྱིའི་སྤྱི་ཚོགས། དེ་བཞིན་བོད་མི་བཅས་མཉམ་རུབ་ཐོག་ནས་བོད་མཐོ་སྒང་གི་ཁོར་ཡུག་སྲུང་སྐྱོབ་ཐུབ་ངེས་ཡིན་སྐོར་གསུངས།
ཕ་རན་སིའི་རྒྱལ་ས་པེ་རི་སིར་གོ་ལའི་ཁོར་ཡུག་ལྷན་ཚོགས་ COP21 ཚོགས་ནས་ད་ཆ་བདུན་ཕྲག་གཉིས་འགྲོ་བཞིན་ཡོད།
