༢༠༡༥ ཟླ་ ༡༢ ཚེས་ ༩ རེས་གཟའ་ལྷག་པ།
༄༅། །བཙན་བྱོལ་བོད་མིའི་རིས་མེད་ཆོས་སྡེ་རྣམས་ཀྱི་མ་དགོན་དང་བཤད་གྲྭ་ཁག་ཐུན་མོང་ལ།
ཆེད་དོན། ཉེ་སྔོན་བོད་མིའི་སྒྲིག་འཛུགས་བཀའ་ཤག་ནས་རྩ་འཛིན་ཡིག་ཆ་ཟུར་གསལ་གཏན་འབེབས་དང་འབྲེལ་ཕྱི་རྒྱལ་ཡུལ་གྲུ་ཁག་ཏུ་ནང་པའི་ལྟ་གྲུབ་ངོ་སྤྲོད་དང་རྒྱུན་ལྡན་ཆོས་ཕྱོགས་ཀྱི་འབྲེལ་སྐྱོང་བྱ་སྒོའི་ཆེད་དུ། ད་ཡོད་ཕྱི་རྒྱལ་སྐུ་ཚབ་དོན་གཅོད་ལས་ཁུངས་ཁག་ཏུ་སོ་སོའི་ས་གནས་ཀྱི་གནས་བབ་ལ་གཞིགས་ཏེ་ལྟ་གྲུབ་ཀྱི་དགེ་རྒན་རེ་བསྐོ་གཏོང་གནང་རྒྱུར་ཐུགས་གཏན་འཁེལ་ཡོད་པ་ལྟར། ཐོག་མར་ཉི་ཧོང་སྐུ་ཚབ་དོན་གཅོད་ལས་ཁུངས་སུ་དྲུང་གཞོན་ལས་རོགས་ཀྱི་གནས་རིམ་ཅན་གྱི་ལྟ་གྲུབ་དགེ་རྒན་གཅིག་དང་། ལྷོ་ཨ་ཕི་རི་ཀ་དང་ལྷོ་ཨ་མི་རི་ཀའི་སྐུ་ཚབ་དོན་གཅོད་ལས་ཁུངས་གཉིས་སུ་སྡེ་ཚན་འགན་འཛིན་གྱི་གནས་རིམ་ཅན་གྱི་ལྟ་གྲུབ་དགེ་རྒན་རེ་བཅས་བསྐོ་གཏོང་གནང་རྒྱུ་སོང་ན། དེ་གའི་ཁོངས་ནས་ཟུར་སྦྱར་རྩ་འཛིན་བཀོད་ཁྱབ་ནང་གསལ་ཆ་རྐྱེན་ཁག་ཚང་ལ་འོས་གཞིའི་ནང་འཚང་ཞུགས་བྱ་རྒྱུར་དོན་གཉེར་ཡོད་རིགས་ཡོད་ཚེ། ཕྱི་ལོ་ ༢༠༡༦ ཟླ་ ༡ ཚེས་ ༣༡ འགྱངས་མེད་འདི་ག་ཆོས་རིག་ལས་ཁུངས་བརྒྱུད་སྙན་ཞུ་འབུལ་དགོས་པ་དང་། དགོས་ངེས་ཆ་རྐྱེན་ཚང་རིགས་ལ་འདེམས་རྒྱུགས་གཏོང་རྒྱུའི་བརྡ་ཐོ་ཟུར་དུ་གནང་རྒྱུ་ཡིན་སྐོར་བཅས་ཕེབས་འདུག་པ་དགོངས་འཇགས་ཞུ། ཆོས་རིག་ལས་ཁུངས་ནས། ཕྱི་ལོ་ ༢༠༡༥ ཟླ་ ༡༢ ཚེས་ ༧ ལ་ཕུལ།
ཕྱི་རྒྱལ་སྐུ་ཚབ་དོན་གཅོད་ལས་ཁུངས་ཁག་ལྟ་གྲུབ་དགེ་རྒན་བསྐོ་གཞག་བྱེད་ཕྱོགས་ཀྱི་རྩ་འཛིན་བཀོད་ཁྱབ།
སྔོན་གླེང་།
༄༅། ། ཕྱི་རྒྱལ་སྐུ་ཚབ་དོན་གཅོད་ལས་ཁུངས་རྣམས་ཀྱི་ཁྱབ་ཁོངས་ས་གནས་ཁག་ལ་བོད་ཀྱི་ཆོས་རིག་ངོ་སྤྲོད་བྱ་སྒོ་སྤྱི་དང་། ཁྱད་པར་ས་གནས་དེ་དག་ལ་གནས་པའི་ཕྱི་ནང་དོན་གཉེར་ཅན་རྣམས་ལ་ནང་པའི་ལྟ་གྲུབ་སློབ་འཁྲིད། ཆོས་ཕྱོགས་ཀྱི་མཛད་སྒོ་དང་འདུ་འཛོམས་ཁག་ལ་གཙོ་སྐྱོང་དང་མཉམ་ཞུགས། གཞན་ཡང་ས་གནས་ཀྱི་ནང་པ་ནང་ཁུལ་དང་ཆོས་ལུགས་གཞན་གྱི་ཆོས་བྱེད་མི་སྣ་ཁག་ལ་མཐུན་ལམ་འབྲེལ་འཛུགས་བྱ་རྒྱུ་བཅས་ཀྱི་ཆེད་དུ། ད་ཡོད་ཕྱི་རྒྱལ་སྐུ་ཚབ་དོན་གཅོད་ལས་ཁུངས་ཁག་ཏུ་གནས་ཚད་ལྡན་པའི་ནང་པའི་ལྟ་གྲུབ་དགེ་རྒན་ཇི་དགོས་རིམ་པས་བསྐོ་གཏོང་བྱ་རྒྱུའི་ཆ་རྐྱེན་གཤམ་གསལ།
ཀ༽ ཤེས་ཚད།
བོད་མིའི་སྒྲིག་འཛུགས་ཆོས་རིག་ལས་ཁུངས་ནས་ངོས་འཛིན་ཡོད་པའི་བོད་ཀྱི་རིས་མེད་ཆོས་སྡེ་ཁག་གི་བཤད་གྲྭ་གང་རུང་དུ་བོད་ཀྱི་སྐད་ཡིག་དང་རྨང་གཞིའི་སློབ་གཉེར་རིམ་པ་སྔོན་སོང་ཐོག བོད་ཀྱི་ནང་དོན་རིག་པའི་གཞུང་ཆེན་ཁག་ལ་ཉུང་མཐར་ལོ་ ༩ རིང་སློབ་གཉེར་མཐར་ཕྱིན་བྱས་པའི་སློབ་ཐོན་ལག་འཁྱེར་རམ། གཞི་རིམ་འཛིན་གྲྭ་བརྒྱད་པའམ་དེ་ཡན་ཐོན་པའི་རྗེས་སུ་ངོས་འཛིན་ཡོད་པའི་བོད་ཀྱི་སྲོལ་རྒྱུན་མཐོ་རིམ་སློབ་ཁང་གང་རུང་དུ་ཉུང་མཐར་ལོ་ ༩ རིང་བོད་ཀྱི་ནང་དོན་རིག་པའི་གཞུང་ཆེན་ཁག་ལ་སློབ་གཉེར་མཐར་ཕྱིན་བྱས་པའི་སློབ་ཐོན་ལག་འཁྱེར་ཡོད་པ།
ཁ༽ ཉམས་མྱོང།
དགོན་སྡེ་གྲྭ་ཚང་དང་བཤད་གྲྭ་གང་རུང་ནང་གཞུང་ཆེན་སློབ་འཁྲིད་ལོ་གསུམ་མམ། བོད་མིའི་སློབ་གྲྭ་ཁག་ཏུ་ཆོས་དགེ་ལོ་ལྔ་གནང་མྱོང་ཡོད་པ།
ག༽ ཆ་རྐྱེན་གཞན།
༡། རབ་བྱུང་གི་རྟེན་ཅན་ཡིན་པ།
༢། ནང་པའི་ལྟ་གྲུབ་འཆད་ཉན་སྐབས་སྐད་སྒྱུར་མི་དགོས་པར་གནས་ཡུལ་རྒྱལ་ཁབ་དེའི་སྐད་དམ་ཨིན་སྐད་གང་རུང་ཚད་འཕེར་ཡོད་པ།
༣། དཔྱ་ཁྲལ་འབུལ་འབབ་མ་ཆད་པ།
༤། སྙན་ཞུ་འབུལ་སྐབས་རང་ལོ་ ༣༠ ནས་ ༤༥ བར་ཡིན་པ།
༥། རྒྱ་གར་རམ་གནས་ཡུལ་རྒྱལ་ཁབ་ཏུ་གནས་སྡོད་ཆོག་པའི་ཁྲིམས་མཐུན་ཡིག་ཆ་ཡོད་པ།
༦། ངོས་འཛིན་ཡོད་པའི་སྨན་ཁང་ཞིག་ནས་ལུས་ཐང་ལས་འཕེར་ཡིན་པའི་ངོས་སྦྱོར་ངོ་མ།
༧། རང་ཁུངས་ཆོས་སྡེའམ་སློབ་ཁང་ནས་ཀུན་སྤྱོད་དག་གཙང་ཡོད་པའི་ངོས་སྦྱོར་ངོ་མ།
ང༽ འདེམས་སྒྲུག་གནང་ཕྱོགས།
༡། གོང་གསལ་ཆ་རྐྱེན་ཚང་ཁག་ལ་ནང་པའི་ལྟ་གྲུབ་སྐོར་འཆད་པ་དང་རྩོམ་པ། ཕྱི་རྒྱལ་སྐད་ཡིག་བཅས་ཀྱི་གནས་ཚད་འདེམས་རྒྱུགས་གཏོང་རྒྱུ་དང།
༢། རྒྱུགས་ཐོན་ཨང་ཐོབ་འདྲ་མཉམ་བྱུང་ན་ཉམས་མྱོང་མང་བ་དེ་འདེམས་སྒྲུག་གནང་རྒྱུ།
རྩ་འཛིན་བཀོད་ཁྱབ་འདིར་དགོས་གལ་ནམ་བྱུང་སྐབས་བཀའ་ཤག་གིས་བསྐྱར་བཅོས་ཆོག་རྒྱུ་བཅས།
བཀའ་ཤག་གིས་ཕྱི་ལོ་ ༢༠༡༥ ཟླ་ ༡༡ ཚེས་ ༡༣ ལ།།
