༢༠༡༥ ཟླ་ ༡༢ ཚེས་ ༢༥ རེས་གཟའ་པ་སངས།
༄༅། །ཕྱི་ལོ་ ༢༠༡༥ ཟླ་ ༡༢ ཚེས་ ༡༩ ཉིན་རྒྱ་གར་ལྷོ་ཕྱོགས་སྦེལ་ཀོབ་བོད་མིའི་གཞིས་སྒར་དུ་རྟེན་གཞི་བྱས་པའི་བྱེས་ཀྱི་ཆོས་གྲྭ་ཆེན་པོ་བཀྲ་ཤིས་ལྷུན་པོའི་གཙུག་ལག་ཁང་གསར་པ་རྟེན་དང་བརྟེན་པ་བཅས་པ་ལེགས་གྲུབ་ཟིན་པའི་དབུ་འབྱེད་རྟེན་འབྲེལ་གྱི་མཛད་སྒོར་༸གོང་ས་མཆོག་དབུ་བཞུགས་ཐོག བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས་སྤྱི་འཐུས་ལྷན་ཚོགས་ཀྱི་ཚབ་ཞུས་ཏེ་འཚམས་འདྲི་ཞུས་པ་དང་ཆབས་ཅིག་གསུང་དོན། དེ་རིང་ཆོས་གྲྭ་ཆེན་པོ་བཀྲ་ཤིས་ལྷུན་པོའི་གཙུག་ལག་ཁང་གསར་བཞེངས་ལེགས་གྲུབ་ཀྱི་མཛད་སྒོ་དང་བསྟུན་འདུ་ཁང་གསར་རྒྱག་གི་ལས་དོན་ཐོག་ཐུགས་བཞེས་གནང་མཁན་གྱིས་གཙོས། མཐུན་འགྱུར་རོགས་རམ་གནང་མཁན་ཚང་མར་ཐུགས་རྗེ་ཆེ་ཞུ་རྒྱུ་དང་། གོ་སྐབས་འདི་དང་བསྟུན་ང་ཚོས་ཀུན་གཟིགས་པཎ་ཆེན་སྐུ་ཕྲེང་ན་རིམ་གྱི་མཛད་རྗེས་ལ་བཀའ་དྲིན་རྗེས་དྲན་ཞུ་རྒྱུའི་གོ་སྐབས་ཆགས་ཡོད། ལྷག་པར་ཀུན་གཟིགས་པཎ་ཆེན་སྐུ་ཕྲེང་བཅུ་པ་མཆོག བོད་ཀྱི་ལོ་རྒྱུས་ཐོག་ཉག་ཕྲ་བའི་དུས་སྐབས་སུ་༸རྒྱལ་བ་ཡབ་སྲས་གཉིས་ཀྱི་ནང་ནས་༸རྒྱལ་བ་རིན་པོ་ཆེ་བཙན་བྱོལ་དུ་༸ཞབས་སོར་འཁོད་ཐུབ་ཡོད་ཀྱང་། ཀུན་གཟིགས་པཎ་ཆེན་རིན་པོ་ཆེ་མཆོག་བོད་ནང་བཞུགས་ནས་༸རྒྱལ་བ་ཡབ་སྲས་རྣམ་གཉིས་ཀྱིས་གཞིས་བྱེས་གཉིས་སུ་སྐུ་ངལ་འཛེམས་མེད་ཐོག་མཛད་འཕྲིན་རླབས་ཆེན་བསྐྱངས་གནང་མཛད་ཡོད།
ལྷག་པར་ཀུན་གཟིགས་པཎ་ཆེན་སྐུ་ཕྲེང་བཅུ་པ་མཆོག་ལྟ་བུར་མཚོན་ན། དུས་ཚོད་ཧ་ཅང་གཉན་འཕྲང་ཆེ་བའི་སྐབས་དཀའ་སྡུག་ཚད་མེད་མྱངས་དགོས་ཐུག་ཀྱང་ངལ་བ་ཁྱད་བསད་ཐོག་སྐུ་ལས་སྐྱོན་ཡོད། ལྷག་པར་ཁོང་གི་དགོངས་པ་བཞེས་ཕྱོགས་སོགས་གང་ཅིའི་ཐད་ཁ་རི་ཁ་ཐུག་གིས་ཞལ་གསང་པོ་དང་། དངོས་ཡོད་གནས་སྟངས་གང་ཡིན་པ་གསལ་བཏོན་གནང་དགོས་བྱུང་བའི་གནས་སྟངས་ཤིག་གི་འོག་ནས་ཕྱི་ལོ་ ༡༩༥༠།༦༠ ལོའི་ནང་བོད་ཀྱི་ས་ཁུལ་མང་དག་ཅིག་གི་ནང་གཟིགས་སྐོར་ཕེབས་ཏེ་དངོས་ཡོད་གནས་སྟངས་དེ་དག་མཁྱེན་པའི་ཐོག་ནས་ཕྱིས་སུ་ཡིག་འབྲུ་ཁྲི་བདུན་ཞེས་པའི་སྙན་ཞུ་དེ་ཕུལ་བའི་རྗེས། བཙོན་ཁང་ནང་ལོ་མང་བཞུགས་དགོས་བྱུང་ཡོད། བཙོན་ཁང་ནས་གློད་བཀྲོལ་ཐོབ་རྗེས་དེང་སྐབས་བོད་ནང་དུ་ད་ལྟ་བོད་ཀྱི་སྐད་ཡིག་དང་རིག་གཞུང་གང་ཅིའི་ཐོག་གཟེངས་སུ་ཐོན་པའི་གྲུབ་འབྲས་ཡོང་བཞིན་པ་དེ་ཀུན་གཟིགས་པཎ་ཆེན་རིན་པོ་ཆེ་སྐུ་ཕྲེང་བཅུ་པས་སྐུ་ལས་སྐྱོན་ནས་བྱུང་བ་ཞིག་ཡིན་པ་གསལ་པོ་རེད། ང་དང་ང་ལྟ་བུའི་བཙན་བྱོལ་ནང་སྐྱེས་ཚར་བྱུང་བའི་བོད་མིའི་ཁྲོད་བོད་ཀྱི་སྐད་ཡིག་དང་རིག་གཞུང་ལ་དེ་ཙམ་གྱི་དོ་སྣང་དང་ཡར་རྒྱས་གཏོང་རྒྱུའི་འགན་འཁྱེར་ཐུབ་མེད་ཀྱང་། ཀུན་གཟིགས་པཎ་ཆེན་རིན་པོ་ཆེ་མཆོག་གི་བཀའ་དྲིན་ལ་བརྟེན་ནས་བོད་ནང་བོད་པའི་སྐད་ཡིག་བཀོལ་སྤྱོད་བྱེད་རྒྱུས་མཚོན་བོད་ཀྱི་ཆོས་དང་རིག་གཞུང་སྲུང་སྐྱོབ་བྱེད་ཆེད་ཧང་སང་དགོས་པའི་སྐུ་ལས་སྐྱོན་ཡོད། དེའི་གྲུབ་འབྲས་དུས་ད་ལྟའང་ང་ཚོས་བཙན་བྱོལ་སྤྱི་ཚོགས་ནང་དངོས་སུ་མཐོང་རྒྱུ་ཡོད་པའི་གནས་སྟངས་ཤིག་ཆགས་ཡོད། དེར་བརྟེན་དེ་རིང་གི་གོ་སྐབས་འདི་བརྒྱུད་ཀུན་གཟིགས་པཎ་ཆེན་རིན་པོ་ཆེ་སྐུ་ཕྲེང་ན་རིམ་དང་ལྷག་པར་པཎ་ཆེན་སྐུ་ཕྲེང་བཅུ་པ་ཆེན་པོ་མཆོག་གི་མཛད་རྗེས་ལ་བཀའ་དྲིན་རྗེས་དྲན་དང་ཡི་རང་བསྔགས་བརྗོད་ཞུ་རྒྱུའི་གོ་སྐབས་ཞིག་ཆགས་ཡོད། དོན་ཚན་གཉིས་པ། ༸གོང་ས་༸སྐྱབས་མགོན་ཆེན་པོ་མཆོག་གིས་ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་ཆེན་པོ་མཆོག་ངོས་འཛིན་མཛད་པ་ནས་བཟུང་རྒྱ་ནག་གིས་བཙན་ཁྲིད་འོག་ད་ཆ་ཁོང་གར་སོང་ཆ་མེད་ཀྱི་གནས་སུ་གྱུར་ཡོད། རྒྱ་ནག་གི་ངོས་ནས་རྒྱལ་སྤྱིའི་སྤྱི་ཚོགས་ཁྱོན་ཡོངས་ལ་དེའི་སྐོར་གནས་ཚུལ་གསལ་པོ་ཞིག་རྩ་བ་ནས་བཤད་ཀྱི་མེད། ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་སྐུ་འཚོ་བཞུགས་ཡོད་མེད་ཀྱི་གནས་སྟངས་ཀྱང་ང་ཚོས་ཤེས་ཀྱི་མེད།
འདི་ལོའི་ཕྱི་ཟླ་ ༩ ནང་རྒྱ་ནག་གཞུང་གིས་དྲ་ལམ་ཞིག་གི་ནང་དུ་ཁོང་སྐུ་གཟུགས་བདེ་པོ་ཡིན་པ་དང་ཕྱི་ཕྱོགས་ནས་ཁོང་ལ་བསུན་པོ་མི་བཟོ་རྒྱུའི་གནས་སྟངས་ཤིག་འགྲེལ་བརྗོད་བྱས་ཡོད། དོན་དམ་གྱི་གནས་ཚུལ་གང་ཡིན་མིན་ང་ཚོས་ཤེས་ཀྱི་མེད། དེ་རིང་གོ་སྐབས་འདི་བརྒྱུད༸གོང་ས་༸སྐྱབས་མགོན་ཆེན་པོ་མཆོག་གིས་ངོས་འཛིན་མཛད་པའི་ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་གློད་བཀྲོལ་ཡོང་ཆེད་ང་ཚོས་ད་བར་འབད་བརྩོན་གནང་བ་བཞིན་མ་འོངས་པར་ཡང་མུ་མཐུད་ནས་གནང་དགོས་རྒྱུ་དེ་ཧ་ཅང་གལ་ཆེན་པོ་རེད་བསམ་བཞིན་ཡོད། ཉེ་བའི་ཆར་ཡང་རྒྱ་ནག་གཞུང་གིས་བསྐོ་གཞག་བྱས་པའི་པཎ་ཆེན་རིན་པོ་ཆེས་སྐུ་མདུན་ལ་མཚན་སྨད་ཞུ་རྒྱུའི་གནས་ཚུལ་དེ་འདྲ་འཐོན་བཞིན་ཡོད། གང་ལྟར་དོན་དམ་པའི་ཐོག་ནས་བླ་སྤྲུལ་ངོས་འཛིན་བྱེད་རྒྱུ་དེ་དམར་པོའི་གཞུང་། ཆོས་ལ་ཡིད་ཆེས་མི་བྱེད་མཁན། རྒྱ་ནག་གུང་ཁྲན་ཏང་གིས་ཆོས་དེ་ཆབ་སྲིད་ཀྱི་ལག་ཆར་བཀོལ་ནས་འགྲོ་བཞིན་ཡོད་པ་ཧ་ཅང་གསལ་པོ་རེད།
སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་བརྒྱད་ཅུ་གྱ་གཅིག་ལ་ཕེབས་པའི་གནས་སྟངས་འོག་ནས་ད་ལྟའི་རྒྱ་ནག་གི་འགོ་ཁྲིད་ཁྲོད་༸རྒྱལ་བ་རིན་པོ་ཆེ་མཆོག་གི་༸སྐུའི་ཡང་སྲིད་སྐོར་ཐད་བྱུས་བྱེད་རྒྱུའི་གནས་སྟངས་ཤུགས་ཆེན་པོ་ཞིག་ཡོང་བཞིན་འདུག དེར་བརྟེན་ང་ཚོའི་ངོས་ནས་དེའི་ཐོག་བསམ་བློ་ནན་ཏན་དང་དོ་སྣང་ཤུགས་ཆེན་པོ་བྱེད་དགོས་པའི་གནས་སྟངས་ཆགས་ཡོད། དེ་མིན་རྒྱ་ནག་གི་མི་རིགས་མཉམ་བསྲེས་ཀྱི་སྲིད་བྱུས་འོག་མི་འབོར་སྤོ་ཤུགས་བྱེད་རྒྱུ་དང་། འཛུགས་སྐྲུན་གྱི་ལས་གཞི་རྒྱ་ཆེ་སྤེལ་བའི་ཐོག་ནས་བོད་མི་རིགས་རྩ་བརླག་གཏོང་རྒྱུའི་སྲིད་བྱུས་འགྲོ་མུས་རེད། དེ་ལྟ་བུའི་དངོས་ཡོད་གནས་སྟངས་ཤིག་གི་འོག་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དབུ་མའི་ལམ་གྱི་སྲིད་བྱུས་འདོན་གནང་མཛད་པ་དང་། མང་ཚོགས་ཀྱི་ངོས་ནས་དེར་རྒྱབ་སྐྱོར་ཞུས་པ། བདོ་མི་མང་སྤྱི་འཐུས་ལྷན་ཚོགས་ཀྱི་ངོས་ནས་སྤྱི་མོས་ཀྱིས་གཏན་ལ་ཕབ་པའི་སྲིད་བྱུས་དེར་ང་རང་ཚོའི་སྤྱི་ཚོགས་ནང་སྐབས་རེ་འགྲིག་མ་འགྲིག་གི་གནས་སྟངས་ཤོད་མཁན་དེ་འདྲ་ཡོང་བཞིན་ཡོད། འདི་ལྟར་ཤོད་མཁན་ཚོ་ཤེས་བྱ་ཡོན་ཏན་ཡོད། ཟེར་མཁན་ཚོས་བཤད་ཀྱི་ཡོད།
དེར་བརྟེན་དེ་ཚོའི་གྲས་སོ་སོས་བསམ་བློ་ཡག་པོ་གཏོང་དགོས་ཀྱི་འདུག་མ་གཏོགས། སོ་སོས་བསམ་བློ་གང་དྲན་དང་ཁ་ནས་གང་ཐོན་བཤད་ན་དངོས་ཡོད་གནས་སྟངས་དང་མ་འཚམས་པ་ཆགས་བཞིན་ཡོད། དེར་བརྟེན་ང་རང་ཚོ་བོད་མི་སྤྱི་བོ་གནམ་བསྟན་ཚང་མས་དགོངས་པའི་དཔྱད་གཞིར་འཇོག་དགོས་པ་ཞིག་དང་དགོངས་པ་བཞེས་ཕྱོགས་ཀྱི་ཐོག་བསམ་བློ་ནན་པོ་གཏོང་དགོས་པའི་གནས་སྟངས་ཆགས་ཡོད། ངས་རིང་པོ་བཤད་མི་དགོས་པར་ད་ལྟ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་༸ཞལ་བཞུགས་པའི་སྐབས་ང་རང་ཚོའི་སྤྱི་ཚོགས་ཀྱི་གནས་སྟངས་གང་འདྲ་ཆགས་ཀྱི་འདུག སྐབས་རེ་བསམ་བློ་གཏོང་དུས་འཇིགས་སྣང་ཡོང་གི་འདུག ༸རྒྱལ་བ་རིན་པོ་ཆེ་མཆོག་༸ཞལ་བཞུགས་པའི་སྐབས་ང་ཚོའི་སྤྱི་ཚོགས་འདི་ཧ་ཅང་འཁྲུག་པོ་ཆགས་སྡོད་ཀྱི་ཡོད་ན། གལ་ཏེ་༸གོང་ས་མཆོག་༸སྐུ་འཚོ་བཞུགས་མ་མཛད་པ་ཡིན་ན་སྐབས་དེར་ང་ཚོའི་སྤྱི་ཚོགས་འདི་གང་འདྲ་ཞིག་ཆགས་རྒྱུ་རེད་དམ། ད་ལྟ་ཡིན་ནའང་༸རྒྱལ་བ་རིན་པོ་ཆེ་ཐུགས་ཕམ་ཡོང་དགོས་པའི་གནས་ཚུལ་མང་པོ་ཞིག་ང་ཚོས་བཟོ་བཞིན་ཡོད། དེ་ལྟར་མི་ཡོང་བ་ང་ཚོས་དམ་བཅའ་བརྟན་པོ་ཞིག་འཛིན་དགོས་པ་འདུག་བསམ་པ་དྲན་གྱི་འདུག ཁ་ནས་བཤད་སྐབས་ང་ཚོས་ཆིག་སྒྲིལ་དང་༸རྒྱལ་བ་རིན་པོ་ཆེའི་དགོངས་པ་སྒྲུབ་དགོས་སྐོར་བཤད་བཞིན་ཡོད་ཀྱང་། དངོས་སུ་ལས་ཀ་བྱེད་སྐབས་དེ་ལས་ལྡོག་སྟེ་བྱེད་མཁན་མང་པོ་ཞིག་ཡོང་གི་འདུག ད་ལྟ་དཔལ་ལྡན་སྲིད་སྐྱོང་མཆོག་གིས་གསུང་པ་ལྟར། སྤྱི་ཚོགས་ཀྱི་དྲ་ལམ་ཐོག་རང་དབང་དང་ཐོབ་ཐང་སྐོར་མང་པོ་ཞིག་བཤད་ནས་སྤྱི་ཚོགས་ནང་དཀྲུག་ཤིང་རྒྱག་རྒྱུ་དང་། སྤྱི་ཚོགས་ནང་མི་མཐུན་པ་བཟོ་རྒྱུའི་ལས་གཞི་མང་པོ་ཞིག་སྤེལ་བཞིན་ཡོད། སྐབས་ཤིག་ལ་༸རྒྱལ་བ་རིན་པོ་ཆེ་མཆོག་གི་འགྲིག་མ་འགྲིག་གི་གནས་སྟངས་དེ་ཁ་ནས་བཤད་རྒྱུ་ཕར་བཞག་བསམ་བློའི་ནང་དུའང་འཆར་མཁན་མེད་ཀྱང་། དེང་སྐབས་དངོས་སུ་མར་ཐོན་ནས་༸རྒྱལ་བ་རིན་པོ་ཆེ་མཆོག་གིས་འགྲིག་མེད་སྐོར་འཛེམས་ཟོན་མེད་པར་བཤད་ཀྱི་འདུག ཧང་སང་དགོས་པའི་གནས་ཚུལ་འདི་འདྲ་ཡོང་བཞིན་འདུག
དེར་བརྟེན་ང་ཚོ་ཚང་མས་གོ་སྐབས་འདི་བཟུང་ནས་དམ་བཅའ་བརྟན་པོ་འཇོག་རྒྱུ་ཧ་ཅང་གལ་ཆེན་པོ་རེད་བསམ་གྱི་འདུག ༸སྐུ་མདུན་གྱི་དགོངས་པ་གང་ཡིན་པ་དེ་སྒྲུབ་མ་ཐུབ་ནའང་དེར་འགོག་རྐྱེན་བཟོ་རྒྱུ་མེད། བྱུང་ན་༸སྐུ་མདུན་གྱི་དགོངས་པ་སྒྲུབ་རྒྱུར་འབད་བརྩོན་བྱེད་དགོས། དེ་ལྟར་མིན་པར་ང་ཚོའི་སྤྱི་ཚོགས་ནང་དཀྲུག་ཤིང་རྒྱག་རྒྱུ་དང་མི་མཐུན་པའི་རྒྱུ་མང་པོ་ཞིག་བཟོ་བཞིན་ཡོད་པ་དེར་བསམ་བློ་ཞིག་གཏོང་སྐབས། ང་ཚོ་ཚང་མའི་སྤྱི་མཐུན་གྱི་བསོད་ནམས་དེ་ད་ཆ་ཟད་འགྲོ་གྱི་མེད་དམ། སྙམ་པའི་གནས་སྟངས་དེ་འདྲ་ཡོང་གི་འདུག དེ་རིང་གི་གོ་སྐབས་འདི་བརྒྱུད་དེ་རིང་ནན་ཏན་བརྗོད་རྒྱུ་ཡིན། མཐའ་མ་དེར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་སྐུ་ཚེ་བསྐལ་བརྒྱར་བསྟན་པ་དང་། ༸རྒྱལ་བ་ཡབ་སྲས་རྣམ་གཉིས་མྱོགས་ནས་མྱུར་དུ་༸ཞལ་འཛོམས་ཡོང་བའི་སྨོན་ལམ་ཤུགས་དྲགས་ཞུ་རྒྱུ་ཡིན། ༸རྒྱལ་བ་ཡབ་སྲས་རྣམ་གཉིས་༸ཞལ་འཛོམས་བྱུང་བའི་ཉིན་མོ་དེར་གཞིས་བྱེས་གཉིས་ཕྱོགས་གཅིག་ཏུ་སྒྲིལ་རྒྱུའི་གོ་སྐབས་ཤིག་ཡོང་རྒྱུ་རེད། དེ་ལྟར་ཡོང་ཆེད་ང་ཚོ་ཚང་མས་ཁ་ནས་བཤད་པ་ཙམ་མ་ཟད་འབད་བརྩོན་བྱེད་རྒྱུ་ཧ་ཅང་གལ་ཆེན་པོ་ཡིན། དེ་ལྟར་གནང་རོགས་གནང་ཞུ་རྒྱུ་ཡིན། ཐུགས་རྗེ་ཆེ། ཞེས་གསུང་བཤད་གནང་ཡོད།།
