༢༠༡༥ ཟླ་ ༡༢ ཚེས་ ༢༥ རེས་གཟའ་པ་སངས།
༄༅། །ཕྱི་ལོ་ ༢༠༡༥ ཟླ་ ༡༢ ཚེས་ ༡༩ ཉིན་རྒྱ་གར་ལྷོ་ཕྱོགས་སྦེལ་ཀོབ་བོད་མིའི་གཞིས་སྒར་དུ་རྟེན་གཞི་བྱས་པའི་བྱེས་ཀྱི་ཆོས་སྡེ་ཆེན་པོ་བཀྲ་ཤིས་ལྷུན་པོའི་འདུ་ཁང་གསར་པ་དབུ་འབྱེད་མཛད་སྒོར་༸གོང་ས་མཆོག་དབུ་བཞུགས་ཐོག བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེངྒེ་མཆོག་གིས་གསུང་བཤད་གནང་དོན། ངོས་རང་བོད་མིའི་སྒྲིག་འཛུགས་ཀྱི་སྲིད་སྐྱོང་ཡིན་སྟབས། ཆབ་སྲིད་ཀྱི་ཐོག་ནས་ཞུས་ན། བོད་མི་རྣམས་དུས་རབས་ཉེར་གཅིག་པའི་བོད་མི་བྱེད་རྒྱུ་ཧ་ཅང་གལ་ཆེན་པོ་རེད་འདུག གཙོ་ཆེ་ཤོས་༸གོང་ས་མཆོག་གིས་བཀའ་སློབ་ལམ་སྟོན་གཞིར་བཟུང་སྲོལ་རྒྱུན་གྱི་ཡ་རབས་བཟང་སྤྱོད་མ་བརྗེད་པའི་ཐོག་ནས་ལག་བསྟར་བྱེད་རྒྱུ་ཤིན་ཏུ་གལ་ཆེན་པོ་རེད། གང་ཡིན་ཞེ་ན། ༸གོང་ས་མཆོག་གིས་གསོལ་རས་སྩལ་བའི་མང་གཙོ་རེད། མང་གཙོའི་ལམ་ལུགས་ནང་གཏམ་བརྗོད་རང་དབང་དེ་ཐོབ་ཐང་ཞིག་རེད། དེ་བཞིན་མང་གཙོ་འཕེལ་རྒྱས་དང་གཏམ་བརྗོད་རང་དབང་ལག་བསྟར་ཆེད་སྤྱི་ཚོགས་དྲ་རྒྱ་འདི་ལག་ཆ་ཞིག་ཆགས་ཡོད། འོན་ཀྱང་བོད་མི་རེ་གཉིས་ཀྱིས་༸གོང་ས་མཆོག་ལ་མཚན་སྨད་ཞུས་པའི་གནས་ཚུལ་ཡོང་བཞིན་ཡོད་པ་འདི་ཧ་ཅང་བློ་ཕམ་པ་དང་ཐབས་སྡུག་གི་གནས་ཚུལ་རེད། བཀའ་ཤག་གིས་མི་དེ་དག་ནོར་བ་རེད་ཅེས་ནན་ཏན་ཞུ་རྒྱུ་ཡིན།
དེ་བཞིན་དོལ་རྒྱལ་རྗེས་འབྲང་པ་ཉུང་ཤས་ཀྱིས་༸གོང་ས་མཆོག་ཕྱི་རྒྱལ་ཡུལ་གྲུ་ཁག་ཏུ་ཆིབས་སྒྱུར་སྐབས་སུ་གཞི་མེད་ཁུངས་མེད་ཀྱི་བསྙོན་འཛུགས་བྱེད་བཞིན་ཡོད། ཁོ་པ་ཚོར་ཆོས་དད་དང་གཏམ་བརྗོད་རང་དབང་མི་འདུག ཐོབ་ཐང་མི་འདུག་ཅེས་བཤད་ཀྱི་ཡོད་ཀྱང་བོད་ནང་དུ་ཆོས་དད་དང་གཏམ་བརྗོད་རང་དབང་། འགྲོ་བ་མིའི་ཐོབ་ཐང་མེད་སྐོར་ཁོ་པ་ཚོས་ཚིག་གཅིག་ཀྱང་བཤད་མྱོང་མེད་སྟབས། དོལ་རྒྱལ་རྗེས་འབྲང་པས་ཆབ་སྲིད་ཀྱི་ར་བ་བཏབ་པ་རེད་མ་གཏོགས་བོད་མིའི་སྒྲིག་འཛུགས་ནས་ཁོ་པ་ཚོར་དབྱེ་འབྱེད་གང་ཡང་བྱེད་མྱོང་མེད། ཁོ་པ་ཚོའི་དགོན་པ་བོད་མིའི་གཞིས་ཆགས་ནང་ཡོད་པ་མ་ཟད། གཞིས་ཆགས་ནང་རྒས་གསོ་ཁང་དང་། སློབ་གྲྭ། དཔྱ་ཁྲལ་ལག་དེབ། སྐྱབས་བཅོལ་ལག་དེབ་སོགས་བོད་མི་སྤྱི་མཚུངས་ལྟར་དབྱེ་བ་མེད་པར་ཐོབ་ཐང་དང་མཐུན་འགྱུར་སྦྱོར་བཞིན་ཡོད། ཕྱི་རྒྱལ་ཡུལ་གྲུ་ཁག་ཏུ་སྐད་འབོད་རྒྱག་མཁན་དོལ་རྒྱལ་རྗེས་འབྲང་པ་ཁོ་པ་ཚོའི་ཨམ་ཕྲག་ནང་བོད་མི་སྐྱབས་བཅོལ་བ་སྤྱི་བྱིངས་ལྟར་ཕྱིར་བསྐྱོད་ལག་དེབ་སེར་པོ་ཡོད་ངེས་རེད། ལག་དེབ་སེར་པོ་དེ་ཡང་བོད་མིའི་སྒྲིག་འཛུགས་ཀྱི་རྒྱབ་སྐྱོར་ལ་བརྟེན་ནས་ཐོབ་པ་ཞིག་རེད་མ་གཏོགས་གཞན་ཐོབ་ཐབས་མེད། ཁོ་པ་ཚོས་༸གོང་ས་མཆོག་ལ་སྐྱོན་བརྗོད་ཞུས་པ་དེར་ཁུངས་ལུང་དང་གཞི་རྩ་གང་ཡང་མེད། སྤོབས་པ་ཆེན་པོས་ཞུ་རྒྱུ་ཡིན། སྤྱིར་བོད་མིའི་སྤྱི་ཚོགས་ནང་དོལ་རྒྱལ་རྗེས་འབྲང་པ་རེ་གཉིས་ཀྱིས་༸གོང་ས་མཆོག་ལ་མཚན་སྨད་ཞུས་ནའང་༸གོང་ས་མཆོག་གིས་རླབས་ཆེན་གྱི་མཛད་འཕྲིན་ལ་ཁྱད་པར་གང་ཡང་བཟོ་ཐུབ་རྒྱུ་མ་རེད།
དཔེར་ན། སྔར་གྱི་སྐྱེས་ཆེན་དམ་པ་གོང་མ་རིམ་བྱོན་ཚོ་རྒྱ་གར་འཕགས་པའི་ཡུལ་དུ་ཕེབས་ནས་ནང་པ་སངས་རྒྱས་པའི་ཆོས་འདི་བོད་གངས་ཅན་གྱི་ལྗོངས་སུ་ངོ་སྤྲོད་གནང་ནས་བོད་ཡོངས་སུ་སངས་རྒྱས་ཀྱི་བསྟན་པ་ཧ་ཅང་དར་སྤེལ་གནང་ཡོད། ཉེ་བའི་ཆར་ལོ་རྒྱུས་ཀྱི་ཐོག་ནས་བོད་ནང་དུས་ཚོད་ཧ་ཅང་གཉན་འཕྲང་ཆེ་བའི་སྐབས་འདིར་ང་ཚོ་བཙན་བྱོལ་དུ་ཡོང་དགོས་བྱུང་ཡོད་ཀྱང་། གོང་དུ་བཀྲ་ཤིས་ལྷུན་པོའི་མཁན་རིན་པོ་མཆོག་གིས་གསུངས་པ་བཞིན། འདུ་ཁང་གསར་བཞེངས་འདི་ཡང་༸གོང་ས་མཆོག་གིས་བཀའ་སློབ་དང་མཐུན་འགྱུར་ལ་བརྟེན་ནས་གསར་སྐྲུན་ཐུབ་པ་ལྟར། བཙན་བྱོལ་བོད་མིའི་གདན་ས་ཁག་དང་། གཞིས་ཆགས། སློབ་གྲྭ། སྨན་ཁང་སོགས་གང་ཅིའི་ཐད་ཚགས་ཚུད་ཡོང་ཐུབ་པ་འདི་གཙོ་ཆེ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་རླབས་ཆེན་གྱི་མཛད་འཕྲིན་ལ་བརྟེན་ནས་བྱུང་བ་ཞིག་རེད། འཛམ་གླིང་ཡོངས་ཀྱི་བཙན་བྱོལ་བ་ནང་ནས་ང་ཚོ་བོད་མི་བཙན་བྱོལ་བ་རྣམས་འདྲ་འདྲའི་ནང་ནས་མི་འདྲ་བ་བྱས་ནས་སྤོབས་པ་དང་བཅས་འགྲོ་ཐུབ་པ་འདི་༸གོང་ས་མཆོག་གི་བཀའ་དྲིན་ལ་བརྟེན་ནས་བྱུང་། དེ་བཞིན་༸གོང་ས་མཆོག་འཛམ་གླིང་ཡུལ་གྲུ་གང་སར་༸ཞབས་སོར་འཁོད་དེ་ནང་པ་སངས་རྒྱས་པའི་བསྟན་པ་སྤྱི་དང་། ལྷག་པར་ཆོས་ལུགས་མཐུན་འབྲེལ་དང་། ཁོར་ཡུག་སྲུང་སྐྱོབ། འགྲོ་བ་མིའི་རྒྱུད་ཀྱི་བཟང་སྤྱོད་གོང་སྤེལ་ཆེད་ལམ་སྟོན་བཀའ་སློབ་རིམ་སྩལ་དང་། དེ་བཞིན་འཛམ་གླིང་མི་མང་ཚོས་མགོན་པོ་གང་ཉིད་མཆོག་ལ་ཆེད་སྙན་གྲགས་ཆེ་ཞིང་ཡིད་སྨོན་ཞུ་ཡུལ་གྱི་དབུ་ཁྲིད་གཅིག་ལ་ངོས་འཛིན་ཞུ་བཞིན་ཡོད་པ་མ་ཟད། འཛམ་གླིང་ནང་གྲགས་ཆེ་བའི་སློབ་གྲྭ་དང་། ཚོགས་པ་སྒྲིག་འཛུགས་སོགས་ནང་༸གོང་ས་མཆོག་ལ་ད་བར་ཆེ་བསྟོད་ཀྱི་གཟེངས་རྟགས་གྲགས་ཆེ་བ་ ༡༥༠ ལྷག་ཕུལ་ཡོད།
ལྷག་པར་༸གོང་ས་མཆོག་གིས་བཀའ་སློབ་དང་གསུང་རྩོམ་ཕྱག་དེབ་གྲངས་ ༡༡༡ ལྷག་ལྗགས་རྩོམ་མཛད་པ་རྣམས་པར་སྐྲུན་ཞུས་ཏེ་འཛམ་གླིང་ཁྱོན་དུ་མི་གྲངས་ས་ཡ་མང་པོས་དགའ་མོས་ཧ་ཅང་ཞུ་བཞིན་ཡོད། དེར་བརྟེན་འཛམ་གླིང་ཁྱོན་དུ་ཕོ་མོ་དང་སྐྱ་སེར། དྲག་ཞན་དབྱེ་བ་མེད་པར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་བླ་ན་མེད་པའི་ཞི་བདེའི་ལམ་སྟོན་མཛད་པོ་རླབས་ཆེན་གྱི་དབུ་ཁྲི་གོང་ན་མེད་པ་གཅིག་ལ་ངོས་འཛིན་ཞུ་བཞིན་ཡོད་སྟབས། མི་ཆེས་ཉུང་ཤས་ཤིག་གིས་༸གོང་ས་མཆོག་ལ་མཚན་སྨད་ཞུས་པ་འདིས་མགོན་པོ་གང་ཉིད་མཆོག་གི་༸སྐུའི་མཛད་འཕྲིན་ལ་ཁྱད་པར་རྩ་བ་ཉིད་ནས་འགྲོ་རྒྱུ་མ་རེད། ཅེས་ཚིགས་ཐག་ཆོད་པོས་ཞུ་རྒྱུ་ཡིན། ང་ཚོས་མགོན་པོ་གང་ཉིད་མཆོག་གི་༸སྐུའི་གྱ་སྟོན་སྲུང་བརྩི་ཞུས་པ་དང་། བརྟན་བཞུགས་འདེགས་འབུལ་ཞུས་པ་དེ་དག་ནི་ཧ་ཅང་ཡག་པོ་རེད། འོན་ཀྱང་བརྟན་བཞུགས་ངོ་མ་དེ་༸གོང་ས་མཆོག་གི་བཀའ་གསུང་ཅི་སྒྲུབ་ཞུ་རྒྱུ་དེ་ལས་ལྷག་པ་ཞིག་མེད། ཅེས་འབོད་སྐུལ་ཞུ་རྒྱུ་ཡིན། མཐའ་དོན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་སྐུ་ཚེ་ཡུན་རིང་བརྟན་ཅིང་། གཞིས་བྱེས་བོད་མིའི་མངོན་འདོད་འགྲུབ་པའི་སྨོན་འདུན་ཤུགས་དྲགས་ཞུ་རྒྱུ་ཡིན། ཐུགས་རྗེ་ཆེ། ཞེས་གསུང་བཤད་གནང་།།
