༢༠༡༥ ཟླ་ ༡༢ ཚེས་ ༢༥ རེས་གཟའ་པ་སངས།
༄༅། །ཕྱི་ལོ་ ༢༠༡༥ ཟླ་ ༡༢ ཚེས་ ༢༥ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱ་གར་ལྷོ་ཕྱོགས་སྦེལ་ཀོབ་ཏུ་རྟེན་གཞི་བྱས་པའི་བྱེས་ཀྱི་གདན་ས་བཀྲ་ཤིས་ལྷུན་པོར་ལམ་རིམ་ཁྲིད་ཆེན་བཅོ་བརྒྱད་ཀྱི་བཀའ་ཆོས་འཕྲོ་སྐྱོང་མཛད་པའི་ཉིན་དྲུག་པའི་སྐབས། ཐོག་མར་བདེ་སྲུང་དྲུང་ཆེ་ཟུར་པ་བྱམས་པ་སྐལ་ལྡན་ལགས་ཀྱི་ངག་རྒྱུན་ལོ་རྒྱུས། མི་ཚེའི་རིང་བོད་སྤྱི་དོན་ཆེད་ཞི་དྲག་གི་ལས་འགན་བླངས་རིམ། ཞེས་པའི་དཔེ་དེབ་དེ་བཞིན་བོད་མི་མང་སྤྱི་འཐུས་དབུ་དཀར་ཚང་གཡུ་སྒྲོན་ལགས་དང་ཁོ་མོའི་ཨ་མ་ལགས་རྣམ་གཉིས་ཀྱིས་༸གོང་ས་མཆོག་ལ་དཔེ་དེབ་དབུ་འབྱེད་མཛད་རྒྱུའི་གསོལ་འདེབས་ཞུས་དོན་ལྟར། མགོན་པོ་གང་ཉིད་མཆོག་གིས་དཔེ་དེབ་དབུ་འབྱེད་མཛད་པ་དང་སྦྲགས་བཀའ་སློབ་སྩལ་དོན། དེབ་འདི་བྱམས་པ་སྐལ་ལྡན་གྱི་ལོ་རྒྱུས་ཆགས་ཡོད། བྱམས་པ་སྐལ་ལྡན་དེ་སྔ་བོད་དུ་ཆུ་བཞི་སྒང་དྲུག་གིས་གསེར་ཁྲི་འབུལ་རྒྱུ་གཅིག་ཡོད་པ། དེ་དུས་ནས་འགན་ཁུར་རྐང་ལེན་བྱེད་མཁན་ཞིག་རེད། དེ་རྗེས་ཟིང་འཁྲུག་སྐབས་རྐང་བྱེད་མཁན་ཞིག་རེད། མཐའ་མ་དེར་བཙོན་ལ་ཚུད། ཡིན་ནའང་སེམས་ཤུགས་གཡོ་བ་མེད་པར་བསྡད་ནས་མཐར་རྒྱ་གར་དུ་བསླེབས་ཐུབ་པ་རེད། རྒྱ་གར་དུ་བསླེབས་ནས་ལས་རིགས་འདྲ་མིན་ནང་དུ་ལྷག་བསམ་རྣམ་དག་ཐོག་ནས་ཧུར་ཐག་འབད་ཐག་བྱས་པ་རེད། དེ་རིང་ཁོང་གྲོངས་ནས་ལོ་གསུམ་པ་འགྲོ་བཞིན་ཡོད། དེབ་འདི་དབུ་འབྱེད་བྱེད་རོགས་ཞེས་བརྗོད་བྱུང་། ཞེས་བཀའ་སློབ་སྩལ་རྗེས། ཁྲི་རིན་པོ་ཆེ་མཆོག་ནས་བསྙེན་བཀུར་དང་བཅས་ལོ་བདུན་ཚང་ལ་ཉེ་བ་དང་། ལྷག་པར་མགོན་པོ་གང་ཉིད་མཆོག་ནས་བྷུདྷ་པ་ལི་ཏ་དང་ཚིག་གསལ་སོགས་མང་དུ་གསན་བཞེས་མཛད་ཚུལ། མ་འོངས་པར་ཁྲི་རིན་པོ་ཆེ་མཆོག་བསྟན་འགྲོའི་དོན་དུ་ཐུགས་བཞེད་ལྷུན་འགྲུབ་ཡོང་བར་ཐུགས་སྨོན་མཚམས་སྦྱོར་གནང་གལ་ཆེ་སྐོར། ཡང་སྒོས་དེ་ཉིན་ཡོངས་འཛིན་གླིང་སྤྲུལ་རྡོ་རྗེ་འཆང་གི་དགོངས་རྫོགས་དུས་དྲན་ཡིན་པས་གསོལ་ཚོགས་སྨིན་འབུལ་གནང་རྒྱུ་ཡིན་སྐོར་བཀའ་སློབ་སྩལ།
དེ་རྗེས་ཉེ་ལམ་སྔ་འགྱུར་རྙིང་མའི་དབུ་འཛིན་སྐྱབས་རྗེ་སྟག་ལུང་རྩེ་སྤྲུལ་རིན་པོ་ཆེ་མཆོག་གནས་མཆོག་རྡོ་རྗེ་གདན་དུ་དགོངས་པ་ཆོས་དབྱིངས་སུ་ཐིམ་པའི་གནས་ཚུལ་ཐོན་པར་ཐུགས་གསོ་དང་སྦྲགས་བཀའ་སློབ་སྩལ་དོན། རྡོ་རྗེ་བྲག་གི་སྟག་ལུང་རྩེ་སྤྲུལ་རིན་པོ་ཆེ་གཤེགས་ནས་ཉིན་གསུམ་ཙམ་ཕྱིན་པ་རེད། ཁོང་ཕྱོགས་གཅིག་ནས་༸རྒྱལ་དབང་ལྔ་པའི་སྐབས་ནས་རྡོ་རྗེ་བྲག་གི་རིག་འཛིན་པདྨ་འཕྲིན་ལས་དང་སྨིན་གྲོལ་གླིང་གི་གཏེར་བདག་གླིང་པ་༸གོང་ས་ལྔ་པ་ཆེན་པོས་ཐུན་མོང་མིན་པའི་ལུང་ཟིན་གྱིས་གསང་བ་རྒྱ་ཅན་གྱི་ཆོས་བདག་ཆགས་ཡོད་པ་མ་ཟད། གཏེར་བདག་གླིང་པ་དང་ཕན་ཚུན་བླ་སློབ་གནང་ཞིང་ཐུན་མོང་མིན་པ་དེ་འདྲ་རེད། རྡོ་རྗེ་བྲག་གི་རྩེ་སྤྲུལ་རིན་པོ་ཆེ་ཧ་ཅང་ཡག་པོ་ཡིན། བར་སྐབས་སྔ་འགྱུར་རྙིང་མའི་དབུ་ཁྲིད་གནང་བ་རེད། བླ་མ་ཞེ་དྲགས་ཡག་པོ་ཡིན། ད་ཆ་ཁོང་མྱ་ངན་ལས་འདས་པ་རེད། དེ་ནས་ཁ་སང་མྱུར་བྱོན་གསོལ་འདེབས་འབྲི་རོགས་བྱོས། ཞེས་ལམ་སེང་སྐུལ་མ་བྱས་བྱུང་། ངོས་ཀྱིས་དགའ་བཞིན་སྤྲོ་བཞིན་དུ་མྱུར་བྱོན་གསོལ་འདེབས་བྲིས་པ་ཡིན། ཚང་མས་ཡང་སྲིད་ཡག་པོ་ཞིག་ཕེབས་རྒྱུར་ཐུགས་སྨོན་གནང་རོགས་གནང་ཞུ་རྒྱུ་ཡིན།
དེ་ནས་དེ་རིང་བདག་གི་མཁན་ཆེན་རྡོ་རྗེ་འཆང་གི་དགོངས་རྫོགས་ཀྱི་ཉིན་མོ་འཁེལ་ཡོད། འདི་ག་མཆོག་སྤྲུལ་རིན་པོ་ཆེ་ཐུགས་ཆུང་ཆུང་། ལྷག་བསམ་གཡོ་བ་མེད་པ་དེ་འདྲ་རེད། རིམ་པོ་ཆེར་བར་སྐབས་རྐྱེན་ངན་འཕྲད་ནས་མོ་ཊ་བརྡབས་ནས་གནས་ཚུལ་སྡུག་པའི་ཆ་ནས་ཡག་ཐག་ཆོད་ཟེར་དགོས་པ་ལྟ་བུ་རེད། སྐུ་ཚེ་བརྟན་པ་དང་མཛད་འཕྲིན་རྒྱས་པའི་ཆེད་ཚང་མས་ཐུགས་སྨོན་གནང་དགོས་རྒྱུ་གལ་ཆེན་པོ་རེད། ངོས་ཀྱི་རྩ་བའི་བླ་མ་སྟག་བྲག་རིན་པོ་ཆེའི་ཡང་སྲིད་བོད་ལ་བཞུགས་ཡོད། རེ་བ་རྒྱག་ཡག་དེ་ཙམ་མེད། གླིང་རིན་པོ་ཆེའི་ཡང་སྲིད་མཆོག་སྤྲུལ་ལ་རེ་བ་རྒྱག་ས་ཡོད་པ་ཞིག་ཆགས་ཡོད། ཁྲི་བྱང་རྡོ་རྗེ་འཆང་གི་ཡང་སྲིད་ལ་རེ་བ་ཧ་ཅང་བརྒྱབ་པ་ཡིན། རྐྱེན་ངན་དེ་འདྲ་ཞིག་འོག་ལ་གནས་ཡོད། བྱེད་རྒྱུ་གང་ཡང་མིན་འདུག དེ་རིང་འདིར་ནུབ་ཕྱོགས་ནས་མི་འགའ་ཤས་ཡོད། ཁྱེད་རྣམ་པར་དེ་རིང་ཡེ་ཤུ་མ་ཤི་ཀའི་འཁྲུངས་སྐར་ཉིན་འཚམས་འདྲི་ཡོད། མེ་རི་ཁི་རི་སི་མ་ས། Merry Christmas བརྗོད་རྒྱུ་ཡིན། དེ་རིང་ཁྱེད་རང་ཚོས་ལུས་པོ་འདིར་སྦེལ་ཀོབ་གཞིས་ཆགས་ནང་གི་བཀྲ་ཤིས་ལྷུན་པོའི་གདན་སར་བསྡད་ཡོད་ཀྱང་ཕལ་ཆེར་བསམ་བློ་དེ་སོ་སོའི་ནང་དུ་ཁི་རི་སི་མ་སི་གཏོང་རྒྱུ་དྲན་བཞིན་ཡོད་རྒྱུ་རེད་བསམ་གྱི་འདུག ཁྱེད་ཚོར་དམིགས་བསལ་གྱི་འཚམས་འདྲི་ཡོད། ཆོས་འབྲེལ་ཕལ་ཆེར་ ༢༨ ཉིན་ཚར་ཡོང་། ཕྱི་ཚེས་ ༢༩ ཉིན་ཁྱེད་ཚོ་དང་གཅིག་ཐུག་རྒྱུའི་འཆར་གཞི་ཡོད། ཅེས་བཀའ་སློབ་སྩལ།།
