༢༠༡༥ ཟླ་ ༡༢ ཚེས་ ༡༩ རེས་གཟའ་སྤེན་པ།

༄༅། །ཕྱི་ལོ་ ༢༠༡༥ ཟླ་ ༡༢ ཚེས་ ༡༧ ཉིན་རྒྱ་གར་ལྷོ་ཕྱོགས་སྦེལ་ཀོབ་གཞིས་ཆགས་སུ་རྟེན་གཞི་བྱས་པའི་སེ་ར་བླ་སྤྱིའི་ཚོགས་ཆེན་ཁང་དུ་སེམས་དང་སྲོག་གི་བསྟི་གནས་ཁང་གིས་གོ་སྒྲིག་གནང་བའི་ཕྱི་ཚེས་ ༡༤ ནས་ ༡༧ བར་བཅས་ཉིན་གྲངས་བཞིའི་རིང་སེམས་དང་སྲོག་གི་ལྷན་ཚོགས་ཐེངས་ ༣༠ པའི་མཇུག་བསྡོམས་མཛད་སྒོའི་ཐོག་༸གོང་ས་༸སྐྱབས་མགོན་ཆེན་པོ་མཆོག་གིས་ང་ཚོ་ཐུན་མོང་གི་ཐོག་ནས་བགྲོ་གླེང་བྱས་ནས་གསར་དུ་གཏོད་པའི་མིའི་བསམ་བློ་གཏོང་ཕྱོགས་གསར་པ་ཞིག་བསྟན་ཡོད་པ་འདི་འགྲོ་བ་མི་སྤྱིའི་བདེ་རྩར་ཞབས་འདེགས་བསྒྲུབ་དགོས་གལ་ཆེ་བ་ཡིན་སྐོར་སོགས་ཀྱི་བཀའ་སློབ་སྩལ་ཏེ་ཐེངས་འདིའི་མཇུག་བསྡོམས་མཛད་སྒོ་རྒྱལ་ཁའི་ངང་མཇུག་སྒྲིལ་སོང་།

དེ་ཡང་གོང་ཚེས་ཉིན་གྱི་ཕྱེད་ཡོལ་ཆུ་ཚོད་ ༢།༣༠ ཐོག་སེམས་ཁམས་རིག་པའི་ཚན་རིག་པ་སྐུ་ཞབས་རི་ཆཌ་ཇེ་ཌེ་ཝིཌ་སོན་ Richard.J.Davidson ལགས་དང་བསམ་གཏན་(Zen)ཆོས་དཔོན་རོ་ཤི་ཇོན་ཧེ་ལི་ཕེག་སི Roshi Joan Halifax ལགས་རྣམ་གཉིས་ཀྱིས་མཇུག་སྒྲིལ་མཛད་སྒོ་གཙོ་སྐྱོང་གནང་ཐོག ༸གོང་ས་༸སྐྱབས་མགོན་ཆེན་པོ་མཆོག་གིས་དབུས་བགྲོ་གླེང་ནང་གསུང་བཤད་གནང་མཁན་ཚན་རིག་པ་དང་ལྟ་གྲུབ་སྨྲ་བ་རྣམས་ལྷན་འཛོམས་ཀྱིས་ཉིན་བཞིའི་རིང་གི་བགྲོ་གླེང་ནང་གླེང་མོལ་མཛད་ཟིན་པའི་གནད་དོན་ཁག་ལ་གསལ་བཤད་རགས་བསྡུས་རེ་གནང་གྲུབ་མཚམས་སེམས་དང་སྲོག་གི་ཚོགས་གཙོ་ལྕམ་སྐུ་སུ་སེན་བེ་ཡོར་ཝུ་ Susan Bauer-Wu ལགས་ཀྱིས་ཐེངས་འདིའི་ཚོགས་འདུ་དེ་ཉིད་ཚགས་ཚུད་ངང་གྲུབ་པར་འབྲེལ་ཡོད་ཚང་མར་ཐུགས་རྗེ་ཆེ་ཞུའི་གསུང་བཤད་གནང་བ་དང་། དེ་རྗེས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་སྩལ་དོན། ཐོག་མར་ཚན་རིག་པ་དང་མཉམ་དུ་འབྲེལ་བ་བྱེད་རྒྱུ་དེ་ངོས་སྒེར་གྱིས་དོ་སྣང་བྱས་ནས་འགོ་ཚུགས་པ་ཞིག་རེད། རིམ་པས་ཚན་རིག་པ་དང་ལྷན་གོ་བསྡུར་བྱ་རྒྱུ་དེ་ཕན་ཐོགས་ཆེན་པོ་ཡོད་པ་ཞིག་མཐོང་ནས་ད་ཆ་གདན་ས་ཁག་གི་དགེ་འདུན་བརྒྱ་ཕྲག་ཁ་ཤས་ཀྱིས་ཚན་རིག་ཐོག་སློབ་སྦྱོང་དང་དོ་སྣང་བྱེད་བཞིན་པའི་དུས་ཚོད་ཅིག་ཆགས་ཡོད། ད་བཞིན་རི་ཆ་ཌི་ལགས་ཀྱིས་གསུངས་པ་བཞིན་ཚན་རིག་པའི་ནང་ལའང་ཞིབ་འཇུག་བྱེད་ཡུལ་གསར་པ་ལྟ་བུ་ཞིག་དང་། མིའི་རྣམ་དཔྱོད་ཀྱིས་བལྟ་ཡུལ་དེ་ཡང་རྒྱ་ཆེ་རུ་ཕྱིན་ཡོད་པ་སོགས་ཀྱི་ཕན་ཐོགས་ཞིག་ཀྱང་བྱུང་ཡོད། ང་ཚོས་བགྲོ་གླེང་གོ་བསྡུར་བྱས་ནས་མི་སྒེར་རང་ཉིད་ལ་བློ་སྐྱེད་ཐོབ་པ་གཅིག་པུ་མིན་པར་ང་ཚོ་ཧམ་པ་ཆེ་ཙམ་བྱས་ནས་བཤད་པ་ཡིན་ན། མིའི་ལོ་རྒྱུས་ནང་བསམ་བློ་གཏོང་ཕྱོགས་དེ་བཞིན་རྒྱ་ཆེ་རུ་གཏོང་རྒྱུའི་གསར་གཏོད་ལྟ་བུ་ཞིག་ཆགས་ཡོད། གསར་གཏོད་དེ་བཞིན་ཤེས་ཡོན་གཅིག་པུའི་སྐད་ཆ་མ་རེད། འཛམ་གླིང་འདིའི་སྟེང་དངོས་ཡོད་གནས་ཚུལ་གཅིག་ཡོད་པ་ནི་དཀའ་ངལ་མང་པོ་ཞིག་ཡོད་པ་དེ་མིས་བཟོས་པ་ཞིག་ཡིན་སྟབས། དཀའ་ངལ་དེ་ཇི་ལྟར་སེལ་དགོས་པ་དེ་ང་རང་ཚོ་མིའི་ལས་འགན་རེད། མི་དུང་ཕྱུར་བདུན་ཅུ་ཡོད་པ་ཚང་མར་འགན་ཡོད་པ་ཞིག་རེད། ཅེས་ནམ་རྒྱུན་ནས་ངོས་ཀྱིས་དེ་ལྟར་ཤོད་ཀྱི་ཡོད།

གང་ལྟར་ང་ཚོའི་ལས་ཀ་འདི་མིའི་རྣམ་དཔྱོད་ཀྱི་ཐོག་ནས་མིག་རྒྱང་ཡངས་པོ་ཞིག་འབྱེད་རྒྱུ་དང་། ཆབས་གཅིག་ང་ཚོ་འཛམ་གླིང་ནང་དཀའ་རྙོག་མང་པོ་ཡོད་པ་དེ་སེལ་བའི་ཆ་རྐྱེན་ཕྲན་བུ་ཞིག་ལས་མེད་ནའང་དེ་བསྒྲུབ་རྒྱུའི་ལས་གཞི་ཞིག་ཆགས་ཡོད། དེར་བརྟེན་ང་རང་ཚོ་མི་སྒེར་པ་སོ་སོས་དོ་སྣང་བྱེད་རྒྱུ་དང་ཁེ་ཕན་བསྒྲུབ་རྒྱུ་གཅིག་པུའི་སྐད་ཆ་མ་རེད། མི་སྒེར་སོ་སོའི་མི་ཚེ་ཡིན་ན་ཚད་ངེས་ཅན་ཞིག་ཡོད། ངོས་ལ་མཚོན་ནའང་ད་ཆ་ལོ་གྱ་གཅིག་ལ་བསླེབས་ཡོད་པར་བརྟེན་མུ་མཐུད་ནས་སྡོད་རྒྱུའི་དུས་ཚོད་མང་པོ་མེད། དེར་བརྟེན་མི་སོ་སོའི་སྒེར་གྱི་མི་ཚེ་གཅིག་གི་སྐད་ཆ་བཤད་ན་ཚད་ངེས་ཅན་ཞིག་ཡིན། འོན་ཀྱང་ང་ཚོས་འདིར་རྣམ་དཔྱོད་ཀྱིས་སྒོ་ནས་བསམ་བློ་གཏོང་ཕྱོགས་གསར་པ་ཞིག་བསྟན་ཡོང་བའི་སྐབས་དེར་དེ་འདྲའི་བསམ་བློ་དེ་དུས་རབས་ཉི་ཤུ་རྩ་གཅིག་ཙམ་མིན་པར་མུ་མཐུད་ནས་དུས་རབས་ཉི་ཤུ་རྩ་གསུམ་བར་གནས་ཐུབ་རྒྱུའི་ལས་གཞི་དེ་འདྲ་ཞིག་གི་ཐོག་ནས་འགྲོ་བ་མི་ལ་ཞབས་འདེགས་བསྒྲུབ་ཐུབ་རྒྱུ་ཡིན་པ་ཞིག་རེད། ཆོས་ཀྱི་སྐད་ཆ་གང་ཡང་མིན། གང་ལྟར་འཛམ་གླིང་འགྲོ་བ་མི་དུང་ཕྱུར་བདུན་ཅུ་ཡོད་པ་ཚང་མ་བདེ་བ་འདོད་པ་དང་། སྡུག་བསྔལ་མི་འདོད་པ་གཅིག་མཚུངས་ཆགས་ཡོད། སྡུག་བསྔལ་མང་པོ་ཞིག་མིག་རྒྱང་ཡངས་པོ་ཞིག་བལྟ་མ་ཐུབ་པར་བསམ་བློ་གཏོང་སྟངས་རྒྱ་ཆུང་དྲགས་པར་བརྟེན་དཀའ་ངལ་མང་པོ་ཞིག་འཕྲད་ཀྱི་ཡོད། བསམ་བཞིན་དུ་དཀའ་ངལ་བཟོ་མཁན་སུ་ཞིག་ཀྱང་མེད། རྩ་བའི་བསམ་བློ་གཏོང་སྟངས་རྒྱ་ཆུང་ངུ་ཞིག་ལས་མེད་སྟབས་སོ་སོ་རང་ཉིད་ལ་ཕན་པ་ཞིག་བྱུང་ན་བསམས་པའི་བྱེད་ཐབས་ཤིག་གིས་རྐྱེན་པས་ཕན་པའི་ཚབ་ཏུ་གནོད་པའི་རང་བཞིན་དུ་འགྱུར་འགྲོ་བ་དེ་འདྲ་ཡོང་གི་འདུག

ཁྱེད་རང་ཚོས་ངོས་ལ་ཐུགས་རྗེ་ཆེ། ཞེས་དེ་འདྲ་གསུང་དགོས་པ་མ་རེད། གང་ལྟར་ང་ཚོ་ཐུན་མོང་གིས་བསམ་བློ་གཏོང་སྟངས་གསར་པ་ཞིག་བསྟན་ཡོད་པ་འདི་ང་ཚོ་ཚང་མས་སྙིང་ལ་བཅང་ནས་ཕྱོགས་དང་མཚམས་སོ་སོའི་སྡེ་ཚན་དང་འབྲེལ་ཡོད་གང་དུ་ཡོད་ནའང་དེའི་ཐོག་ལ་ཐུགས་ཁུར་བཞེས་རོགས་གནང་ཞེས་ཞུ་རྒྱུ་ཡིན། ང་ཚོ་ལོ་རྒན་པ་ཚང་མ་དུས་རབས་ཉི་ཤུ་པའི་མི་ཞིག་ཆགས་ཡོད། རེ་བ་དངོས་ནས་དེ་དུས་རབས་ཉེར་གཅིག་པའི་མི་རབས་དེ་དག་ལ་བརྟེན་ཡོད། དེར་བརྟེན་དུས་རབས་ཉེར་གཅིག་པའི་མི་ཚོ་ཕྱོགས་ཡོངས་ནས་བལྟ་ཐུབ་མཁན་ཞིག་ཆགས་ན་དུས་རབས་འདི་ཉིད་ཞི་བདེ་ལྡན་པ་ཞིག་ཡོང་ངེས་ཡིན།
ཐེངས་འདིའི་མཇུག་བསྡོམས་མཛད་སྒོའི་ཐོག བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེངྒེ་མཆོག་དང་དཔལ་ལྡན་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག ཆོས་རིག་བཀའ་བློན་པདྨ་ཆོས་འབྱོར་མཆོག་དང་། དེ་བཞིན་བཀའ་བློན་ཁྲི་ཟུར་མཁས་དབང་ཟམ་གདོང་རིན་པོ་ཆེ་མཆོག་བཅས་ཀྱང་ཆེད་བཅར་ཞུས་འདུག །