༢༠༡༥ ཟླ་ ༡༢ ཚེས་ ༡༤ རེས་གཟའ་ཟླ་བ།
༄༅། །འདི་གའི་ཕྱི་དྲིལ་བོད་ཡིག་ཚན་པའི་གསར་འགོད་པ་བསྟན་འཛིན་རབ་རྒྱས་ལགས་ཀྱིས་ས་གནས་ནས་བཏང་གནས་ནང་འཁོད་དོན། ཕྱི་ལོ་ ༢༠༡༥ ཟླ་ ༡༢ ཚེས་ ༡༡ ཉིན་ཧོན་སུར་རབ་གླིང་བོད་མིའི་གཞིས་ཁོངས་སུ་རྟེན་གཞི་བྱས་པའི་དཔལ་ལྡན་སྨད་རྒྱུད་གྲྭ་ཚང་གི་འདུ་ཁང་ཆེན་མོའི་དབུས་སུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དབུ་བཞུགས་ཀྱིས་དད་ལྡན་མང་ཚོགས་རྣམས་ལ་དུས་རབས་ཉེར་གཅིག་པའི་ནང་པ་སངས་རྒྱས་པ་ཞིག་བྱ་དགོས་པའི་ཆོས་འབྲེལ་བཀའ་སློབ་དང་སྡོམ་པ་འབོགས་ཆོག དེ་བཞིན་དངོས་གཞི་དཔལ་གསང་བ་འདུས་པའི་བཀའ་དབང་བཀའ་དྲིན་ཆེ་བ་སྩལ་སོང་། དེ་ཡང་གོང་ཚེས་ཉིན་གྱི་སྔ་དྲོའི་ཆུ་ཚོད་ ༡༠ པར་༸གོང་ས་༸སྐྱབས་མགོན་ཆེན་པོ་མཆོག་ཚོགས་མགོན་དུ་ཆིབས་བསྒྱུར་གྱིས་བོད་གངས་ཅན་ལྗོངས་སུ་ནང་པ་སངས་རྒྱས་པའི་བསྟན་པ་ཧ་ཅང་སྤུས་དག་པོ་ཡོད་པ་དེ་བོད་རིགས་སྐྱ་སེར་དབྱེར་མེད་ཚང་མས་སློབ་གཉེར་བྱས་ཏེ་མི་རབས་ནས་མི་རབས་རྒྱུན་འཛིན་ཐུབ་པ་ཞིག་བྱ་དགོས་སྐོར་བཀའ་སློབ་སྩལ་དོན།
དབང་གི་སྟ་གོན་ཚར་ནས་དེ་རིང་དབང་དངོས་གཞི་ཆགས་ཡོད། དེར་བརྟེན་ཁ་སང་ངོས་ཀྱི་ཞུས་པ་བཞིན་སྔགས་ཀྱི་ཉམས་ལེན་ཡོང་བར་སྟོང་ཉིད་ཀྱི་ལྟ་བ་མེད་ཐབས་མེད་པ་ཞིག་ཆགས་ཡོད། གང་ལྟར་སྟོང་ཉིད་ཀྱི་ལྟ་བ་འདེང་འཁེལ་བ་ཞིག་མེད་ནའང་སྟོང་པ་ཉིད་ཀྱི་སྐོར་རེད། ཅེས་གཡུག་མ་བཞག་པར་དོ་སྣང་བྱས་ནས་ཟབ་མོ་སྟོང་པ་ཉིད་ཅེས་པ་འདི་ཧ་ཅང་གལ་ཆེན་པོ་ཡིན་པ་དབང་གནང་བའི་སྐབས་དེ་འདྲ་ཞིག་གོ་སོང་། ད་ངས་འབད་བརྩོན་བྱེད་ཀྱི་ཡིན་བསམ་པའི་བསམ་བློ་ཞིག་བཅང་དགོས་པ་ཡིན། དེ་འདྲའི་སྟོང་ཉིད་ཀྱི་བསམ་བློ་དེ་སྒྲིབ་པ་གཉིས་ཀྱི་གཉེན་པོར་འགྲོ་ཐུབ་པའི་ནུས་པ་ཆ་ཚང་ཞིག་ཐོན་པར་བྱང་ཆུབ་སེམས་ཀྱི་རྒྱབ་རྟེན་དགོས་ཀྱི་ཡོད་སྟབས་བློ་གོམས་འདྲིས་བསྟེན་ནས་བྱང་ཆུབ་སེམས་བསྒོམ་ཐབས་བྱ་དགོས་པ་ཡིན། སྟོང་ཉིད་ལྟ་བའི་སྐོར་གྱི་སྙིང་པོའམ་རྩ་བ་དེ་དབུ་མ་རྩ་བ་ཤེས་རབ་ཆགས་ཡོད། རྩ་བ་ཤེས་རབ་ཀྱི་དོན་འགྲེལ་དབུ་མ་འཇུག་པ་རང་འགྲེལ་དང་བཅས་པ་དང་། ཚིག་འགྲེལ་དེ་དབུ་མ་ཚིག་གསལ་བཅས་ཡིན། གང་ལྟར་དཔེ་ཆ་ཡིན་ན་དགེ་འདུན་པའི་བལྟ་དགོས་པ་གཅིག་པུ་མིན་པར་ཁྱིམ་པ་མི་ནག་ཡིན་ནའང་དཔེ་ཆ་དེ་དག་སྐོར་རྒྱུས་མངའ་ཡོད་པ་ཞིག་དང་། མཚམས་རེ་དཔེ་ཆ་དེ་ཚོར་བལྟ་དགོས་རྒྱུ་ཧ་ཅང་གལ་ཆེན་པོ་རེད། ང་རང་ཚོ་བོད་ཡིག་ནང་བཀའ་འགྱུར་པོ་ཏི་བརྒྱ་ཙམ་ཞིག་དང་བསྟན་འགྱུར་པོ་ཏི་ཉིས་བརྒྱ་ཉི་ཤུ་རྩ་གྲངས་ཤིག་འདུག བཀའ་འགྱུར་བསྟན་འགྱུར་བཀླག་པར་སྐད་ཡིག་གསར་པ་ནི་བསླབ་དགོས་མེད་པར་ང་རང་ཚོའི་སྐད་ཡིག་ནང་ཆ་ཚང་ཀློག་ཐུབ་པ་ཞིག་ཆགས་ཡོད། རྗོད་བྱེད་ཚིག་དེའི་གོ་དོན་གང་འདྲ་ཡིན་པ་དེ་སློབ་སྦྱོང་སྦྱང་ནས་ཤེས་དགོས་པ་ཞིག་ལས་གཞན་སོ་སོ་རང་གི་སྐད་ནང་ཆ་ཚང་བསྟན་ཡོད།
བར་སྐབས་ང་ཚོའི་རབ་བྱུང་མ་ཚོས་དཔེ་ཆ་བལྟས་ནས་དགེ་བཤེས་མ་ཞེས་པ་ཞིག་བཞག་དགོས་ཀྱི་འདུག་ཅེས་འབོད་བསྐུལ་བྱས་པ་ལ་བརྟེན་ནས་བར་སྐབས་བཙུན་མའི་དགོན་པ་ཁག་གཅིག་གིས་དངོས་གནས་དྲང་གནས་ལོ་ཉི་ཤུ་ཙམ་རིང་གཞུང་ཆེན་བལྟས་ནས་ད་ཆ་དགེ་བཤེས་མ་ཐོན་ཐུབ་པ་བྱུང་ཡོད། ལོ་རྗེས་མར་དགེ་བཤེས་མཚན་གནས་སོན་པའི་བཙུན་མ་རྣམ་པ་ཚོར་གཞུང་འབྲེལ་གྱི་ཐོག་ནས་ཆོས་རིག་ལས་ཁུངས་ཀྱིས་དགེ་བཤེས་མའི་ཕྱག་འཁྱེར་འབུལ་རྒྱུ་ཡིན་པ་རེད། ཁྱིམ་པ་ཕོ་མོ་ཚོའི་ནང་ལའང་དཔེ་ཆ་བལྟས་ནས་སློབ་དཔོན་དེ་འདྲ་ཐོན་དགོས་པ་རེད། དེ་འདྲ་ཡོང་ཆོག་པ་ཞིག་རེད། གང་ལྟར་དངོས་གནས་དྲང་གནས་བོད་གངས་ཅན་ལྗོངས་ཀྱི་སངས་རྒྱས་པའི་བསྟན་པ་སྤུས་དག་པོ་འདི་དུས་རབས་གསར་པ་འདིའི་ནང་མི་རབས་ནས་མི་རབས་འཛིན་སྐྱོང་ཡག་པོ་ཞིག་བྱེད་ཐུབ་པ་ཞིག་དང་། ང་ཚོ་སྐྱ་སེར་དབྱེར་མེད་ཀྱིས་གཞུང་དེ་ཚོར་སློབ་སྦྱོང་བྱས་ནས་གོ་བ་ཆགས་པ་དང་ཤེས་པ་ཞིག་བྱུང་བ་ཡིན་ན་མི་རབས་ནས་མི་རབས་བསྟན་པ་སྤུས་དག་པོ་དེ་འཛིན་ཐུབ་ཀྱི་རེད། གཞན་དེ་སྔོན་བོད་ནང་སངས་རྒྱས་བསྟན་པ་ས་དར་རྡོ་དར་དུ་ཁྱབ་གདལ་ཕྱིན་ནས་བསམ་གྱིས་མི་ཁྱབ་པ་རེད། འོན་ཀྱང་མང་ཚོགས་ཁྲོད་ནང་ཆོས་སློབ་སྦྱོང་མེད་སྟབས་དཔེ་ཆ་ཤེས་མཁན་དེ་ཚོ་རྫོགས་པ་ཡིན་ན་ཕལ་ཆེར་ནག་ཁུང་ཆགས་འགྲོ་གི་འདུག བསྟན་པ་འཛིན་སྐྱོང་སྤེལ་གསུམ་བྱེད་རྒྱུ་དེ་མང་ཚོགས་ཀྱིས་བྱེད་དགོས་པ་ཞིག་རེད་མ་གཏོགས་ཉུང་ཤས་ཤིག་གིས་བྱེད་དགོས་པ་ཞིག་མ་རེད། ཁྱིམ་ནས་ཁྱིམ་མེད་པ་རབ་ཏུ་བྱུང་བ་ཚོ་ནི་དམིགས་བསལ་གྱི་ལས་འགན་ཡོད་པ་དང་གོ་སྐབས་ཡོད་པས་ཁྱད་པར་ཞིག་ཡོད་པ་ལས་གཞན་བཅོམ་ལྡན་འདས་ཀྱི་རྗེས་འབྲང་ཆོས་དད་ཡོད་མཁན་ཞིག་དང་། དཔལ་ནཱ་ལནྡྲའི་བསྟན་པ་འཛིན་མཁན་ཞིག་ཡིན་ཕྱིན་ཆོས་ལ་བསླབ་པ་སློབ་གཉེར་གནང་དགོས་པ་ཧ་ཅང་གལ་ཆེན་པོ་ཡིན།
དེ་རིང་ཁ་སང་སྔ་མོ་དང་མི་འདྲ་བར་བོད་ནང་ཁྱིམ་པ་ཚོས་དཔེ་ཆར་སློབ་སྦྱོང་བྱེད་ཀྱི་ཡོད་པའི་དོ་སྣང་ཤུགས་ཆེར་འགྲོ་བཞིན་ཡོད་པ་ཐོས་སྐབས་སེམས་ནང་འགྲིག་འདུག་བསམ་པའི་དགའ་ཚོར་སྐྱེས་བྱུང་། རྗེས་སུ་ཡི་རང་སྐྱེས་དགོས་པ་ཞིག་རེད། རྒྱ་གར་ནང་སློབ་གཉེར་བྱེད་མཁན་མི་གཉིས་བོད་ནང་ཕྱིར་ལོག་ནས་གྲྭ་ཚང་ནང་དཔེ་ཁྲིད་བྱེད་རྒྱུའི་ཐབས་ཤེས་བྱས་ཀྱང་དགོན་པ་དེའི་ནང་ཚན་ཉིད་སོགས་ལ་དོ་སྣང་མེད་པ་དང་ནམ་རྒྱུན་གྲོང་ཆོག་རྒྱུགས་མཁན་ཞིག་གིས་ང་ཚོ་མཚན་ཉིད་བལྟ་བས་མི་ཕན། གྲོང་པའི་སྦྱིན་བདག་ཚོས་གྲོང་ཆོག་ཞབས་བརྟན་གཏོང་བར་སྐད་གཏོང་བ་ལས་མཚན་ཉིད་བརྩོད་པར་ཤོག་ཅེས་ལབ་མཁན་མེད་སྐོར་བརྗོད་འདུག དེ་འདྲ་བའི་གོམས་གཤིས་ཡོད་པ་དེ་རྗེས་ལུས་རེད་མ་གཏོགས། དངོས་ཡོད་གནས་ཚུལ་རྩ་བ་ནས་མ་རེད། ང་ཚོ་ཚང་མས་སངས་རྒྱས་པའི་ཆོས་ཀྱི་འགྲོ་སྟངས་ཤེས་པའི་ཐོག་ནས་དད་པ་ཐོབ་པའི་དུས་རབས་ཉི་ཤུ་རྩ་གཅིག་པའི་ནང་པ་སངས་རྒྱས་པའི་ཆོས་པ་ཞིག་བྱ་དགོས་པ་རེད་ཅེས་ངོས་ཀྱི་ནམ་རྒྱུན་དེ་ལྟར་བརྗོད་ཀྱི་ཡོད། སོ་སོ་རང་ཉིད་ཡིན་ནའང་སངས་རྒྱས་པའི་ཆོས་དེར་ཐོས་བསམ་རྒྱུད་ལ་སྦྱར་བའི་ཐོག་ནས་ངེས་པ་བརྙེད་པ་ཞིག་ཡོང་ཐུབ་ན་བླུན་པོ་ཆུ་སྣ་གར་ཁྲིད་ལྟ་བུ་མིན་པར་རྒྱུ་མཚན་དཔྱད་པའི་ཐོག་ནས་འདེང་འཁེལ་བ་ཞིག་ཡོང་ཐུབ་ཀྱི་རེད། དེར་བརྟེན་སངས་རྒྱས་པའི་ཆོས་ལ་དད་པ་དང་དོ་སྣང་ཡོད་མཁན་ཚང་མས་ཨུ་ཚུགས་བརྒྱབ་ནས་སློབ་གཉེར་བྱེད་རྒྱུར་འབད་བརྩོན་བྱེད་ཤོག གང་ལྟར་གསང་སྔགས་ཉམས་ལེན་བྱ་བར་བྱང་ཆུབ་སེམས་དང་སྟོང་ཉིད་ལྟ་བ་གཉིས་ནི་མེད་ཐབས་མེད་པ་ཞིག་ཡིན། བྱང་ཆུབ་སེམས་མཆོག་སྐོར་ལ་སྤྱོད་འཇུག་ལས་ལྷག་པ་མེད། ཁུ་ནུ་བླ་མ་རིན་པོ་ཆེ་མཆོག་གིས་ད་བར་སྤྱོད་འཇུག་ཉམས་ལེན་བྱས་པའི་ནང་བདག་གཞན་མཉམ་བརྗེའི་ཉམས་ལེན་བྱ་བར་སྤྱོད་འཇུག་ལས་ལྷག་པ་བྱུང་མྱོང་མེད། ཅེས་བཀའ་གནང་མྱོང་བ་དེ་དངོས་གནས་བདེན་པ་རེད།
དེར་བརྟེན་ཁྱེད་རང་ཚོ་སྤྱོད་འཇུག་བལྟ་དགོས། རྩ་བ་ཤེས་རབ་ལྟ་བུར་མཚོན་ན་རྩ་བ་ཤེས་རབ་རབ་འབྱེད་ཉི་ཤུ་རྩ་དྲུག་ནང་འཁོར་བ་ལ་འཁོར་སྟངས་གང་གིས་བྱེད་ཀྱི་འདུག་པ་སོགས་ལ་བལྟ་དགོས་པ་ཡིན། དེ་རྒྱུད་ནས་མ་རིག་པའི་ང་རང་ཚོ་གང་འདྲ་བྱས་ནས་འཕུང་ལ་སྦྱར་གྱི་ཡོད་པ་དེ་མཐོང་ཐུབ་ཀྱི་རེད། མ་རིག་པའི་འཕུང་ལ་སྦྱར་གྱི་ཡོད་པ་དེ་ཤེས་ན་དེ་ལས་ལྡོག་ཐབས་གང་འདྲ་བྱ་དགོས་པ་རབ་འབྱེད་བཅོ་བརྒྱད་ནང་བལྟ་དགོས་པ་ཡིན། སྟོང་པ་ཉིད་ཀྱི་རྣམ་གཞག་གཙོ་བོ་བརྗོད་མཁན་ནི་རབ་འབྱེད་ཉི་ཤུ་པ་དེ་ཆགས་ཡོད། དེ་ཚོ་བལྟས་པ་ཡིན་ན་ཕན་ཐོགས་ཆེན་པོ་ཡོད། སྤྱོད་འཇུག་ནང་རང་གཅེས་འཛིན་གྱི་སྐྱོན་དང་གཞན་གཅེས་འཛིན་གྱི་ཡོན་ཏན་དེ་དག་གསལ་བར་བསྟན་པའི་ལེའུ་དྲུག་པ་བཟོད་པའི་ལེའུ་དང་ལེའུ་བརྒྱད་པ་བསམ་གཏན་ལེའུ་གཉིས་ཡག་པོ་བྱས་ནས་བལྟ་དགོས། མིང་དོན་མཚུངས་པའི་གསང་སྔགས་ཀྱི་ལམ་ཞིག་ཡོང་བར་བྱང་ཆུབ་སེམས་དང་སྟོང་ཉིད་ལྟ་བ་དེ་གཉིས་ལ་དང་འདོད་དང་ཨུ་ཚུགས་ངེས་པར་དུ་བརྒྱབ་དགོས་པ་རེད། ཅེས་སོགས་ཀྱི་བཀའ་སློབ་སྩལ་གྲུབ་རྗེས་སོ་ཐར་བྱང་སེམས། གསང་སྔགས་བཅས་ཀྱི་སྡོམ་པ་འབོགས་ཆོག་མཛད། ཉིན་གུང་ལྗག་སྨིན་གྲུབ་རྗེས་ཆོས་ཞུ་བ་ཡོངས་ལ་རྡུལ་ཚོན་དཀྱིལ་འཁོར་དང་འབྲེལ་བའི་དཔལ་གསང་བ་འདུས་པའི་བཀའ་དབང་བཀའ་དྲིན་ཆེ་བ་སྩལ་བ་བཅས། །
