༢༠༡༥ ཟླ་ ༡༢ ཚེས་ ༣༡ རེས་གཟའ་ཕུར་བུ།

༄༅། །ཕྱི་ལོ་ ༢༠༡༥ ཟླ་ ༡༢ ཚེས་ ༣༡ ཉིན་གྱི་སྔ་དྲོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཆོས་གྲྭ་བཀྲ་ཤིས་ལྷུན་པོར་སྩོལ་བཞིན་པའི་ཆོས་འབྲེལ་ཉིན་བཅུ་གཉིས་པའི་ཐོག་ཕྱི་ནང་གི་དད་ལྡན་ཆོས་ཞུ་བ་སེར་སྐྱ་མང་ཚོགས་ཁྲི་གསུམ་བརྒལ་བར་བཀའ་གདམས་ཐིག་ལེ་བཅུ་དྲུག་གི་དབང་སྩལ་གྲུབ་བསྟུན་ཕྱི་ལོ་ ༢༠༡༧ ཕྱི་ཟླ་ ༡ ནང་རྒྱ་གར་བྱང་ཕྱོགས་གནས་མཆོག་རྡོ་རྗེ་གདན་དུ་དཔལ་དུས་ཀྱི་འཁོར་ལོའི་དབང་ཆེན་གྱི་ཆོས་འབྲེལ་སྩལ་རྒྱུ་ཡིན་པའི་གསལ་བསྒྲགས་བསྐྱངས་དོན། དེ་རིང་ནས་ཆོས་འབྲེལ་ཚར་བ་རེད། ཕྱོགས་མཚམས་སོ་སོར་ལོག་འགྲོ་རྒྱུ་རེད། འོན་ཀྱང་ང་ཚོ་བོད་ལོ་བྱས་ན་ལོ་རྗེས་མའི་ལོ་མཇུག ཕལ་ཆེར་བོད་ཟླ་ ༡༡ དང་ཕྱི་ལོ་ ༢༠༡༧ ཕྱི་ཟླ་ ༡ འཁེལ་རྒྱུ་རེད། ཁ་སེང་བྱས་ན་གནས་མཆོག་རྡོ་རྗེ་གདན་དུ་དུས་འཁོར་དབང་ཆེན་བྱེད་རྒྱུ་བྱས་པ་རེད། དང་པོའི་འཆར་གཞི་དེ་ལྟར་རེད། འོན་ཀྱང་ངོས་རང་སྨན་བཅོས་བྱ་རྒྱུ་བྱས་ནས་ཕར་འགྱངས་པ་རེད། ན་ནིང་འགྱངས་པ་དེས་ལོ་རྗེས་མའི་བོད་ཟླ་ ༡༡ ནང་དུས་འཁོར་དབང་ཆེན་གནས་མཆོག་རྡོར་གདན་དུ་བྱེད་རྒྱུ་དེ་འདྲ་ཡིན། ཡང་ཁྱེད་རང་ཚོ་རྡོ་རྗེ་གདན་དུ་ཐུག་ཆོག་རྒྱུ་རེད། ཅེས་སོགས་ཀྱི་བཀའ་སློབ་སྩལ།།