༢༠༡༥ ཟླ་ ༡༡ ཚེས་ ༡༣ རེས་གཟའ་པ་སངས།
༄༅། །ཕྱི་ལོ་ ༢༠༡༥ ཟླ་ ༡༡ ཚེས་ ༡༠ ཉིན་ཨོ་སི་ཊོ་ལི་ཡའི་རྒྱལ་ས་ཁེན་བྷེ་རེའི་ནང་ཡོད་པའི་ཌེན་ཌི་གློག་བརྙན་ཁང་ Dendy Cinema ནང་གནམ་གཤིས་འགྱུར་ལྡོག་འདིས་འགྲོ་བ་མི་རིགས་ཡོངས་ལ་ཤུགས་རྐྱེན་ཇི་ལྟར་ཐེབས་ཀྱི་ཡོད་མེད་དང་འབྲེལ་བའི་སྐོར་ལ་དངོས་བྱུང་གློག་བརྙན་ This Changes Everything ཞེས་པ་དེ་མང་ཚོགས་ལ་བསྟན་འདུག། སྐབས་དེར་ལྟད་མོ་ལྟ་མཁན་ཁྱོན་མི་གྲངས་ ༢༠༠ ཙམ་ཕེབས་ཡོད་པ་དང། གློག་བརྙན་བསྟན་གྲུབ་རྗེས་གནམ་གཤིས་འགྱུར་ལྡོག་གིས་རྐྱེན་པས་གོ་ལ་ཡོངས་ལ་ཤུགས་རྐྱེན་ཇི་ལྟར་ཐེབས་མིན་སྐོར་གྱི་བརྗོད་གཞིའི་ཐོག་བགྲོ་གླེང་ལྷན་ཚོགས་ཤིག་ཚོགས་འདུག བགྲོ་གླེང་ཐོག་ཨོ་སི་ཊོ་ལི་ཡའི་སྐུ་ཚབ་དོན་གཅོད་མཚོ་སྒོ་ལྷག་པ་ལགས་དང་། ཨོ་སི་ཊོ་ལི་ཡའི་ནང་ཁོར་ཡུག་ཐོག་ཕྱག་ལས་གནང་མཁན་ལྕམ་སྐུ་ཕོ་བེ་ཧོ་ཝེ་ལགས་རྣམ་གཉིས་ཆེད་ཕེབས་གནང་འདུག བགྲོ་གླེང་སྐབས་འཇིགས་སླ་བའི་མཐོ་སྒང་བོད་ཀྱི་ཁོར་ཡུག་གི་གནད་དོན་དེ་གཙོར་འདོན་ཐོག་བོད་ཀྱི་ཁོར་ཡུག་འདིས་རྒྱལ་ཁབ་གཞན་ཁག་ལ་ཤུགས་རྐྱེན་ཇི་ལྟར་ཐེབས་ཀྱི་ཡོད་མེད་སྐོར་གསལ་སྟོན་བྱས་ཡོད།
བོད་མིའི་སྒྲིག་འཛུགས་ཀྱིས་མཐོ་སྒང་བོད་ཀྱི་ཁོར་ཡུ
ག་སྲུང་སྐྱོབ་ཆེད་ལས་འགུལ་སྤེལ་དགོས་པའི་ཞུ་འབོད་ཀྱི་ལས་འགུལ་སྤེལ་སྒོ་བརྩམས་པ་ནས་བཟུང་གྲོང་ཁྱེར་ཀེན་བྷེ་རེའི་ནང་རྟེན་གཞི་བྱས་པའི་ཨོ་སི་ཊོ་ལི་ཡའི་བོད་དོན་རྒྱབ་སྐྱོར་ཚོགས་པ་ ACT ཞེས་པ་དང་། དེ་བཞིན་ས་གནས་བོད་རིགས་སོགས་ཀྱིས་སྤྱི་ཚོགས་དྲ་རྒྱས་གཙོས་བརྒྱུད་ལམ་ཁག་འདྲ་མིན་བརྒྱུད་བོད་ཀྱི་ཁོར་ཡུག་སྲུང་སྐྱོབ་དགོས་པའི་ལས་འགུལ་སྣ་མང་སྤེལ་བཞིན་ཡོད་འདུག།
ཟླ་བ་འདིའི་ནང་འཛམ་གླིང་གི་ས་ཕྱོགས་གང་སར་མི་མང་རྣམས་ཀྱིས་གོམ་བགྲོད་གྱི་ལམ་ནས་གནམ་གཤིས་འགྱུར་ལྡོག་གི་དཀའ་ངལ་ལ་གདོང་ལེན་ཆེད་སྲིད་བྱུས་ལག་བསྟར་བྱེད་དགོས་པའི་ལས་འགུལ་སྤེལ་རྒྱུ་ཡིན་པ་བཞིན། ཕྱི་ཟླ་ ༡༡ ཚེས་ ༢༩ ཉིན་གྲོང་ཁྱེར་ཁེན་བྷེ་རར་ཨོ་སི་ཊོ་ལི་ཡའི་བོད་དོན་རྒྱབ་སྐྱོར་ཚོགས་པའི་ཁོར་ཡུག་སྲུང་སྐྱོབ་ཚན་པས་ ACT Conservation Council གོ་སྒྲིག་འོག གོམ་བགྲོད་ཀྱི་ལས་འགུལ་སྤེལ་རྒྱུ་དང་། སྐབས་དེར་ཁེན་བྷེ་ར་བོད་རིགས་ཚོགས་པས་ཀྱང་ལས་འགུལ་ནང་མཉམ་ཞུགས་གནང་རྒྱུ་ཡིན་འདུག
དེར་བརྟེན་ལྕམ་སྐུ་ཧོ་བྷེ་ལགས་ཀྱིས་གསུང་དོན། ཁེན་བྷེ་ར་བོད་རིགས་ཚོགས་པས་ལས་འགུལ་འདིར་རྒྱབ་སྐྱོར་ཤུགས་ཆེ་གནང་བར་ང་ཚོ་ཧ་ཅང་དགའ་པོ་བྱུང་། གོ་ལའི་གནམ་གཤིས་འགྱུར་ལྡོག་གི་དཀའ་ངལ་སེལ་ཆེད་ཚོགས་སྐྱིད་འདྲ་མིན་གྱིས་རྒྱབ་སྐྱོར་གྱིས་ལས་འགུལ་ཐོག་མཉམ་ཞུགས་གནང་བ་དངོས་གནས་བློ་སྤོབས་སྐྱེ་འོས་པ་ཞིག་རེད། ཅེས་གསུངས་འདུག གཞན་ཡང་ཁེན་བྷེ་ར་བོད་རིགས་ཚོགས་པས་ཁུལ་དེར་ཕྱི་ཚེས་ ༢༩ ཉིན་གནམ་གཤིས་འགྱུར་ལྡོག་གི་དཀའ་ངལ་སེལ་དགོས་པའི་གོམ་བགྲོད་ཀྱི་ལས་འགུལ་འགོ་མ་ཚུགས་པའི་སྔོན་ནས་བརྒྱུད་ལམ་ཁག་གི་ནང་དྲལ་བསྒྲགས་ཀྱི་ལས་འགུལ་སྤེལ་འགོ་བརྩམས་འདུག
