ཕྱི་ལོ་ ༢༠༡༥ ཟླ་ ༡༡ ཚེས་ ༢༤ རེས་གཟའ་མིག་དམར།
༄༅། །མཉམ་འབྲེལ་རྒྱལ་ཚོགས་ཀྱི་མནར་གཅོད་བཀག་འགོག་ཚོགས་ཆུང་ནས་རྒྱ་ནག་གཞུང་གིས་ཆབ་སྲིད་བཙོན་པ་གཙོ་བོར་གྱུར་བའི་བཙོན་པ་ཚོར་ཚད་ལས་བརྒལ་བའི་སྡུག་སྦྱོང་མནར་གཅོད་གཏོང་བའི་ལམ་ལུགས་དེར་སྐྱོན་བརྗོད་ཤུགས་ཆེ་བྱས་འདུག
དེ་ཡང་བདུན་ཕྲག་སྔོན་མའི་ནང་མཉམ་འབྲེལ་རྒྱལ་ཚོགས་ཀྱི་མནར་གཅོད་བཀག་འགོག་ཚོགས་ཆུང་གིས་སུ་སིའི་གྲོང་ཁྱེར་ཇི་ནི་ཝར་རྒྱ་ནག་གི་འགྲོ་བ་མིའི་ཐོབ་ཐང་གི་གནས་སྟངས་དང་འབྲེལ་བའི་སྙན་ཐོ་ཞིབ་འཇུག་གནང་སྐབས། རྒྱལ་ཚོགས་ཀྱི་མནར་གཅོད་བཀག་འགོག་ཚོགས་ཆུང་གིས་རྒྱ་ནག་གཞུང་གིས་བཙོན་པ་ཚོར་བཙན་ཤེད་ཀྱིས་དྲི་བརྩད་ཡང་ཡང་བྱས་པ་དང་། བཙོན་པ་རྣམ་རྐང་ལྕག་དང་ལག་ལྕགས་བརྒྱབ་ཏེ་ཁེར་རྐྱང་བཙོན་འཇུག་བྱས་པ། མནར་གཅོད་འོག་མྱངས་དང་མྱོང་བཞིན་པའི་བཙོན་པ་ཚོར་འཕྲོད་བསྟེན་སྨན་བཅོས་ཀྱི་མཐུན་འགྱུར་མ་སྤྲད་པ་སོགས་ཐབས་ལམ་འདྲ་མིན་གྱི་ལམ་ནས་སྡུག་སྦྱོང་མནར་གཅོད་བཏང་བར་སྐྱོན་བརྗོད་ཤུགས་ཆེ་བྱས་འདུག
ལྷག་པར་ཚོགས་ཆུང་དེས་བོད་རིགས་དང་ཡུ་གུར་བས་གཙོས་གྲངས་ཉུང་མི་རིགས་ཀྱི་ཆབ་སྲིད་བཙོན་པ་རྣམས་ཀྱི་གནས་སྟངས་ཇི་ཡིན་གསལ་བཤད་དགོས་པའི་འབོད་སྐུལ་གནང་འདུག སྐབས་དེར་ཚོགས་འདུའི་ནང་དངོས་སུ་བཅར་བའི་རྒྱ་གཞུང་གི་སྐུ་ཚབ་ཚོས་རྒྱ་གཞུང་གི་འོག་ཆབ་སྲིད་བཙོན་པ་གཅིག་ཀྱང་མེད་པ་དང་། བཙོན་པར་མནར་གཅོད་ཡང་བཏང་གི་མེད་ལུགས་བཤད་འདུག དེ་བཞིན་རྒྱ་གཞུང་གི་སྐུ་ཚབ་ཚོས་བཙོན་པར་མནར་གཅོད་བཏང་བའི་རྐྱེན་གྱིས་འཁྲིམས་གཏུགས་བྱས་པའི་བཙོན་སྲུང་བ་དང་། ཉེན་རྟོག་པ་ག་ཚོད་ཡོད་མེད་དང་། བཙོན་ཁང་ནང་མནར་གཅོད་རྐྱེན་པས་རྐྱེན་ལམ་དུ་སོང་བའི་བཙོན་པའི་གྲངས་འབོར་སོགས་ཀྱི་སྐོར་འདྲི་བར་ལན་འདེབས་མ་བྱས་པར་གཡོལ་ཐབས་ཁོ་ན་བྱས་ཡོད་འདུག
ཐེངས་དེའི་ཚོགས་འདུའི་ཐོག་བོད་རིགས་ཆབ་སྲིད་བཙོན་པ་ཞིང་གཤེགས་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་རྒྱ་ནག་གཞུང་གི་བཙོན་ཁང་ནང་དགོངས་པ་རྫོགས་པའི་གནད་དོན་གཅིག་པུའི་ཐོག་ལན་འདེབས་བྱས་ཡོད། དེ་ཡང་ཁོ་པས་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་ལ་དགོས་ངེས་ཀྱི་སྨན་བཅོས་ཐོབ་ཡོད་པ་དང་། ཁོང་དགོངས་པ་རྫོགས་པའི་རྗེས་སུ་བོད་ལུགས་ལྟར་སྐུ་ཕུང་བཞུགས་འབུལ་བྱས་ཡོད། ཟེར་བ་སོགས་ཧམ་བཤད་རྐྱང་རྐྱང་བྱས་ཡོད།
ཉིན་གཉིས་རིང་གི་ཚོགས་འདུ་དེར་བཅར་བའི་བོད་མི་ཆབ་སྲིད་བཙོན་ཟུར་མགོ་ལོག་འཇིགས་མེད་ལགས་དང་། དེ་བཞིན་འགྲོ་བ་མིའི་ཐོབ་ཐང་འཐབ་རྩོད་པ། ཕྱིར་སྡོད་རྒྱ་རིགས་སོགས་མང་པོས་ཐེངས་འདིར་རྒྱ་ནག་གཞུང་གི་སྐུ་ཚབ་ནས་རྫུན་གཏམ་ཁོ་ན་བཤད་པར་ཚོར་ཤུགས་དྲག་པོས་སྐྱོན་བརྗོད་གནང་འདུག་པ་བཅས། །
