༢༠༡༥ ཟླ་ ༡༡ ཚེས་ ༢༥ རེས་གཟའ་ལྷག་པ།
༄༅། །བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱི་ན་གཞོན་ནུས་སྟོབས་གོང་འཕེལ་རོགས་སྐྱོབ་ཀྱི་ལས་གཞིའི་ཁོངས་ཀྱི་བོད་མིའི་མདུན་ལམ་སློབ་སྟོན་བསྟི་གནས་ཁང་གི་རྣམ་ཤེས་ལགས་དང་འཇིགས་མེད་དམ་སྒྲོལ་ལགས་གཉིས་ཀྱིས། ཕྱི་ལོ་ ༢༠༡༥ ཟླ་ ༡༠ ཚེས་ ༢༢ ནས་ཕྱི་ཟླ་ ༡༡ ཚེས་ ༢༢ བར་བོད་མི་སྐྱབས་བཅོལ་བའི་གནས་སྡོད་རྒྱ་གར་བྱང་ཤར་གྱི་ས་ཁུལ་ཀ་རྡོར་སྒང་གསུམ་དང་། ར་བང་ལ། སོ་ན་ད། ཤེ་ལོང་། བསྟན་སྒང་། མེའོ། ཏི་ཛུ། ཀྲུ་ཀྲིང་བཅས་ཀྱི་ནང་བོད་མི་གཞོན་སྐྱེས་དང་འབྲེལ་ཡོད་ཕ་མ་སོགས་ཁྱོན་མི་གྲངས་ ༤༦༤ ཙམ་ལ་མདུན་ལམ་སློབ་སྟོན་གྱི་གོ་རྟོགས་ལས་གཞི་སྤེལ་ཡོད་པ་དང་། ཟབ་སྦྱོང་གི་དམིགས་ཡུལ་གཙོ་བོ་གསུམ་ཡོད་པ་རྣམས་ནི། ༡༽བོད་མིའི་སྤྱི་ཚོགས་ཁྲོད་ལག་ཤེས་སོགས་ལས་རིགས་འདྲ་མིན་སྦྱོང་བརྡར་གྱི་གོ་སྐབས་ཡོད་པའི་སྐོར་གོ་རྟོགས་སྤེལ་རྒྱུ། ༢༽སྒེར་གྱི་ལས་རིགས་སྤེལ་རྒྱུར་དཔལ་འབྱོར་གྱི་མཐུན་རྐྱེན་འཚོལ་ཐབས། ༣༽ཕ་མས་ཕྲུ་གུའི་མདུན་ལམ་བཀོད་སྒྲིག་བྱེད་ཕྱོགས་དང་ཕྲུ་གུའི་མདུན་ལམ་ཐད་ཕ་མའི་ལམ་སྟོན་གལ་གནད་ཇི་ཙམ་ཆེ་ཚུལ་སྐོར་ཡིན་འདུག
དེ་ཡང་ཟབ་སྦྱོང་ནང་མཉམ་ཞུགས་གནང་མཁན་མི་གྲངས་ ༤༦༤ ཡོད་ཁོངས་ནས་བུད་མེད་གྲངས་ ༣༡༢ དང་གཞན་རྣམས་སྐྱེས་པ་ཡིན་འདུག སྐབས་དེར་སོ་ན་ད་གཞི་ལས་ཁང་གིས་འབོད་སྐུལ་ལྟར་ཟབ་ཁྲིད་པ་གཉིས་ཀྱིས་ཁུལ་དེའི་སློབ་གྲྭར་ཕེབས་ནས་འཛིན་གྲྭ་བདུན་པ་ནས་བཅུ་པའི་བར་གྱི་སློབ་ཕྲུག་རྣམས་ལ། སློབ་ཕྲུག་ཚོས་རང་གི་མདུན་ལམ་ཐག་གཅོད་ཇི་ལྟར་དགོས་མིན་ཐད་ཚོད་ལྟའི་རྒྱུགས་སྤྲོད་བཏང་འདུག ཚོད་ལྟ་དེར་ཕྲུ་གུ་ཚོས་ཧ་ཅང་དགའ་མོས་བྱས་པ་ཙམ་དུ་མ་ཟད། ཕན་རླབས་ཆེན་པོ་ཡོད་པའི་རྣམ་འགྱུར་མངོན་གསལ་བྱུང་འདུག ལྷག་པར་འཛིན་རིམ་བཅུ་པའི་སློབ་ཕྲུག་རྣམས་ཀྱིས་འཛིན་རིམ་བཅུ་གཅིག་དང་བཅུ་གཉིས་སོགས་ནང་སློབ་ཚན་འདེམས་སྒྲུག་བྱ་རྒྱུའི་ཐད་སྔ་ས་ནས་གྲ་སྒྲིག་ཐུབ་རྒྱུར་ཕན་ཐོགས་ཡོད་སྐོར་གྱི་བསམ་ཚུལ་འདོན་མཁན་སློབ་ཕྲུག་མང་པོ་ཞིག་བྱུང་འདུག
