༢༠༡༥ ཟླ་ ༡༡ ཚེས་ ༡༡ རེས་གཟའ་ལྷག་པ།
༄༅། །ཕྱི་ལོ་ ༢༠༡༥ ཟླ་ ༡༡ ཚེས་ ༡༠ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱ་གར་ལྷོ་ཕྱོགས་ཏ་མིལ་ན་དུའི་ Tamil Nadu རྒྱལ་ས་ཅེན་ནའི་ Chennai ནང་རྟེན་གཞི་བྱས་པའི་འཕྲུལ་རིག་བསྟི་གནས་ཁང་(IIT)གི་སློབ་མ་རྣམས་ལ་བཀའ་སློབ་སྩལ་འདུག དེ་ཡང་མགོན་པོ་གང་ཉིད་མཆོག་འཕྲུལ་རིག་བསྟི་གནས་ཁང་དུ་༸ཞབས་སོར་འཁོད་སྐབས་འགན་འཛིན་སྐུ་ཞབས་བྷ་སི་ཀར་ར་མཱ་མུར་ཐི་ Bhaskar Ramamurthi མཆོག་སོགས་ཀྱིས་ཕེབས་བསུའི་སྣེ་ལེན་གཟབ་རྒྱས་ཞུས་འདུག སྐབས་དེར་༸གོང་ས་མཆོག་གིས་སློབ་ཕྲུག་གྲངས་ཇི་ཡོད་བཀའ་རྩད་མཛད་པར་ཁྱོན་སློབ་མ་གྲངས་ ༨༠༠༠ ཡོད་ཁོངས་ནས་ཚོགས་ཁང་ནང་དུ་སློབ་མ་གྲངས་ ༣༠༠༠ ལྷག་གིས་༸གོང་ས་མཆོག་གི་༸ཞལ་མཇལ་གསུང་ཐོས་ཆེད་ངང་སྒུག་ཞུ་བཞིན་ཡོད་སྐོར་སྙན་སེང་ཞུས། དེ་རྗེས་ཚོགས་ཁང་ནང་༸ཞབས་སོར་མ་འཁོད་སྔོན་བསྟི་གནས་ཁང་དེའི་ར་བའི་ནང་དུ་བྱང་ཆུབ་ལྗོན་ཤིང་ཞིག་འདེབས་འཛུགས་མཛད།
དེ་རྗེས་ཚོགས་ཁང་ནང་༸ཞབས་སོར་འཁོད་བསྟུན་འགན་འཛིན་མཆོག་གིས་སློབ་ཕྲུག་སོགས་ལ་༸གོང་ས་མཆོག་ངོ་སྤྲོད་གནང་སྐབས་འགན་འཛིན་རང་ཉིད་ཕྱི་ལོ་ ༡༩༨༠ ལོར་སློབ་ཕྲུག་ཡིན་སྐབས་༸གོང་ས་མཆོག་ཨ་རིའི་གྲོང་ཁྱེར་སན་ཏ་བྷར་བྷ་རའི་ Santa Barbara ནང་ཆིབས་སྒྱུར་བསྐྱངས་སྐབས་ཤིག་འཁེལ་ཏེ་༸ཞལ་མཇལ་གསུང་ཐོས་ཀྱི་གོ་སྐབས་བྱུང་སྐོར་དང་། སྐབས་དེར་མགོན་པོ་གང་ཉིད་མཆོག་གིས་བཀའ་སློབ་སྩལ་བ་དེ་དག་འགན་འཛིན་མཆོག་གི་མི་ཚེ་ཧྲིལ་པོའི་རིང་ཧ་ཅང་ཕན་ཐོགས་བྱུང་སྐོར་སོགས་གསུངས། དེ་རྗེས་༸གོང་ས་མཆོག་གིས་བཀའ་སློབ་སྩལ་དོན། བཀུར་འོས་སྤུན་ཟླ་རྒན་གཞོན་ཕོ་མོ་ལྷན་རྒྱས་ལ་ཐོག་མར་འཚམས་འདྲི་ཞུ་རྒྱུ་ཡིན། ངོས་རང་དེ་རིང་འཕྲུལ་རིག་བསྟི་གནས་ཁང་གྲགས་ཅན་འདི་ལྟ་བུར་བཅར་ནས་དགེ་ལས་སློབ་མ་རྣམས་དང་མཇལ་བར་ཆེ་མཐོང་ཐོབ་པ་ཞིག་བྱུང་། མི་གཞན་སུ་དང་ཐུག་སྐབས་ངོས་རང་འགྲོ་བ་མི་ཞིག་ཡིན་བསམས་པ་དྲན་བཞིན་འདུག འོན་ཀྱང་ནང་པའི་གཞུང་ནས་སེམས་ཅན་ཐམས་ཅད་རྒྱུད་ལ་སངས་རྒྱས་ཀྱི་རིགས་ཡོད་པར་གསུངས་ཡོད། དེར་བརྟེན་ང་ཚོའི་རྒྱུད་ལའང་སངས་རྒྱས་རུང་གི་དེ་བཞིན་གཤེགས་པའི་རིགས་ཡོད། གཞི་རྩའི་འགྲོ་བ་མིའི་གཤིས་རྒྱུད་དེ་བྱམས་བརྩེའི་རང་བཞིན་ཡིན་པ་ཚན་རིག་པས་ཚོད་ལྟའི་ལམ་ནས་ར་སྤྲོད་བྱུང་ཡོད། བྱིས་པ་ཆུང་ཆུང་སྐབས་ནས་ཀྱང་གཞན་ལ་བྱམས་བརྩེ་བསྟེན་པའི་པར་རིགས་མཐོང་སྐབས་དགའ་སྣང་དང་གནོད་འཚེ་བྱས་པའི་པར་རིགས་མཐོང་སྐབས་མི་དགའ་བའི་རྣམ་འགྱུར་བཅོས་མིན་ཐོན་བཞིན་ཡོད་པ་ཚོད་ལྟའི་ལམ་ནས་ཤེས་ཡོད། ལྷག་པར་སྨན་གྱི་ཉམས་ཞིབ་བྱེད་སྐབས་རྒྱུན་དུ་འཇིགས་སྣང་དང་དངངས་སྐྲག་སོགས་བྱས་ནས་སྡོད་མཁན་མི་དེའི་ལུས་ལ་ནད་གཞིར་གདོང་ལེན་བྱེད་མཁན་གྱི་ནུས་པ་ཨིམ་མུན་སི་སི་ཊམ་ (Immune System) ཟེར་བ་དེ་ཤུགས་སྐྱོ་བ་དང་། དེ་ལས་ལྡོག་སྟེ་བྱམས་བརྩེའི་ཉམས་ལེན་བྱེད་མཁན་སེམས་ནང་ཞི་བདེ་བག་ཕེབས་ཡོད་མཁན་དེ་ཚོ་ལུས་ཀྱི་ནད་གཞི་འགོག་བྱེད་ཀྱི་རྫས་དེ་ཤུགས་ཆེ་བ་ཡོད་པ་ར་སྤྲོད་བྱུང་འདུག དེར་བརྟེན་སེམས་ནང་གཞན་ལ་བྱམས་པ་དང་བརྩེ་བ་སོགས་ཡོད་ན་ལུས་ཀྱི་འཕྲོད་བསྟེན་ལའང་ཕན་ཐོགས་ཡོད་པ་བརྟག་དཔྱད་ཀྱི་ལམ་ནས་གསལ་རྟོགས་བྱུང་ཡོད། ནང་པ་སངས་རྒྱས་པ་ཚོས་ཤེས་པ་ཕྲ་རག་མི་འདྲ་བའི་སྐོར་གསུང་བཞིན་ཡོད།
སད་དུས་ཀྱི་གནས་སྐབས་ཀྱི་སྒོ་ལྔའི་ཤེས་པ་དེ་རག་པ་རེད། རྨི་ལམ་གྱི་གནས་སྐབས་ཤེས་པ་ཕྲ་བ་ཡོད། གཉིད་ཐུག་པོ་ཁུག་སྐབས་དེ་ལས་ཕྲ་རུ་ཕྱིན་པ་རེད། རྒྱལ་བས་གནས་སྐབས་ཡིད་བློའི་ཤེས་པ་དེ་ལས་ཕྲ་རུ་ཕྱིན་པ་རེད། ཕྲ་ཤོས་དེ་འཆི་བའི་གནས་སྐབས་རེད། ཤེས་པ་ཕྲ་ཤོས་དེའི་སྟེང་མཉམ་པར་བཞག་མཁན་ཚོ། སྤྱིར་བཏང་སྨན་བཅོས་ཀྱི་ལམ་ནས་སྙིང་གི་བྱེད་ལས་དགག་འགྲོ་སྐབས་ཁྲག་གི་རྒྱུ་བ་དགག་གི་ཡོད། དེར་བརྟེན་ཀླད་པའི་བྱེད་ལས་དགག་ནས་འཆི་བར་བརྩི་བཞིན་ཡོད་ཀྱང་། ཕུང་པོ་རྙིང་པ་མ་ཆགས་པར་སོས་པ་བྱས་ནས་བསྡས་པ་དེ་འདྲ་ཡོང་བཞིན་ཡོད། གནད་དོན་དེ་དག་ལ་དེང་སྐབས་ཚན་རིག་པ་ཚོས་ཉམས་ཞིབ་བྱེད་འགོ་ཚུགས་ཤིང་ཡོད། དེ་ལྟ་བུའི་ཤིན་ཏུ་ཕྲ་བའི་ཤེས་པ་ཉོན་མོངས་སོགས་གྲིབ་མ་དང་བྲལ་ཞིང་འོད་གསལ་བའི་རང་བཞིན་དེར་སངས་རྒྱས་ཀྱི་རིགས། ཁམས་བདེ་གཤེགས་སྙིང་པོ་ཞེས་གསུང་བཞིན་ཡོད། གཞི་རྩའི་འགྲོ་བ་མིའི་རང་བཞིན་བྱམས་བརྩེའི་རང་བཞིན་ཡིན་ནའང་མི་གསོད་རྒྱུ་སོགས་འཚེ་བའི་བྱ་སྤྱོད་དེ་དག་ཚང་མ་ཉོན་མོངས་ཀྱི་གཞན་དབང་དུ་སོང་ནས་མི་ཕན་ཚུན་དབར་མི་འདྲ་བའི་ཁྱད་པར་ཕྲན་བུ་ཡོད་པའི་རིམ་པ་གཉིས་པ་དེའི་ཐོག་ནས་ཡོང་བཞིན་ཡོད། གཞི་རྩའི་མིའི་རང་བཞིན་དེ་བྱམས་བརྩེ་ལྡན་པ་ཞིག་ཡིན་སྟབས་ང་ཚོས་གདེང་ཚོད་དང་འཆར་སྣང་ལྡན་པའི་ཐོག་ནས་དུས་རབས་ ༢༡ དེ་དོན་དམ་གྱི་ཞི་བདེ་ལྡན་པའི་དུས་རབས་ཤིག་སྐྲུན་རྒྱུར་བཟང་ཕྱོགས་ཀྱི་རེ་བ་བཅོལ་ས་ཞིག་ཡོད། སྤྱིར་དུས་རབས་ ༢༠ ནང་ཡར་རྒྱས་ཧ་ཅང་ཕྱིན་ཡོད་ཀྱང་དུས་རབས་དེའི་ནང་མི་གསོད་ཁྲག་སྦྱོར་ཤུགས་ཆེན་པོ་བྱུང་ཡོད། སྟབས་མི་ལེགས་པ་ཞིག་ལ་དུས་རབས་ ༢༠ ནང་བཟོས་པའི་རྙོག་གྲ་ཁག་གཅིག་དུས་ད་ལྟའང་དཀའ་ངལ་བཟོ་བཞིན་ཡོད། དེ་ལས་ལྡོག་སྟེ་རྒྱ་གར་ནང་སྲོལ་རྒྱུན་ཐོག་འཚེ་མེད་ཞི་བ་དང་ཆོས་ལུགས་རིས་མེད་ཀྱི་ལྟ་གྲུབ་ལག་བསྟར་བྱེད་བཞིན་ཡོད། རིས་མེད་ཀྱི་བསམ་ཚུལ་དེ་ཆོས་ཁས་ལེན་མཁན་ཙམ་མིན་པར་ཆོས་ཁས་མི་ལེན་མཁན་ཚོ་ལའང་གུས་བརྩི་ཞུ་སྲོལ་ཡོད། ཅེས་བཀའ་སློབ་སྩལ་བ་མ་ཟད།
མགོན་པོ་གང་ཉིད་མཆོག་གི་སྐུ་ཚེའི་མཛད་ཁུར་གཙོ་བོ་གསུམ་གྱི་སྐོར་བཀའ་སློབ་སྩལ་དོན། དང་ཐོག་དེར་ངོས་རང་མི་ཞིག་ཡིན་པའི་ཆ་ནས་ང་ཚོ་ཚང་མ་ལུས་སེམས་དང་སེམས་ཚོར་གང་གི་ཆ་ནས་འགྲོ་བ་མིའི་འདུ་ཤེས་འཛིན་མཁན་གཅིག་པ་རེད། ང་ཚོ་ཚང་མས་བདེ་བ་འདོད་པ་ལྟར་བདེ་བ་སྒྲུབ་རྒྱུའི་ཐོབ་ཐང་ཡང་ཚང་མར་ཡོད། འོན་ཀྱང་ང་ཚོ་ཉོན་མོངས་པའི་གཞན་དབང་དུ་ཚུད་ཡོད། ངོས་ཀྱི་ལས་འགན་དང་པོ་དེ་ང་ཚོ་ཚང་མ་འགྲོ་བ་མི་རིགས་གཅིག་གྱུར་གྱི་འདུ་ཤེས་གོང་ཐོར་གཏོང་ཐབས་བྱ་རྒྱུ་དེ་ཡིན། འདུ་ཤེས་དེར་གཞི་རྩར་འཛིན་ཐུབ་པ་ཡིན་ན་ཕན་ཚུན་གསོད་རེས་དང་མགོ་སྐོར་བསླུ་བྲིད་མི་བྱས། གོ་ལའི་གནམ་གཤིས་འགྱུར་ལྡོག་དང་གོ་ལའི་དཔལ་འབྱོར་གྱི་དཀའ་ངལ་དེ་དག་རྒྱལ་མཚམས་བཅད་ནས་སྡོད་ཐབས་བྲལ། དཀའ་ངལ་དེ་དག་འཛམ་གླིང་ཀུན་ལ་ཁྱབ་ཡོད། དེར་བརྟེན་གནས་སྟངས་འདི་ནས་ང་ཚོས་བློ་སྐྱེད་ལེན་དགོས་པ་གང་ཡོད་བརྗོད་ན། ང་ཚོ་ཚང་མ་འགྲོ་བ་མིའི་ཁྱིམ་ཚང་གཅིག་གི་ནང་མི་ཡིན་བསམས་དགོས་པ་དང་། ལྷག་པར་གཞོན་སྐྱེས་ཁྱེད་རྣམས་དུས་རབས་ ༢༡ མི་རབས་ཡིན་སྟབས་འཛམ་གླིང་གི་གནས་སྟངས་ཇེ་བཟང་དུ་གཏོང་རྒྱུར་ཆོད་སེམས་དང་ལས་འགན། འཆར་སྣང་བཅས་ངེས་པར་དུ་དགོས། སངས་རྒྱས་བཅོམ་ལྡན་འདས་ཀྱིས་དུས་དང་གནས་སྐབས་མི་འདྲ་བར་གཟིགས་ནས་ཆོས་གསུངས་པ་དེ་ཁོང་རང་ཉིད་ཅི་བྱ་གཏོལ་མེད་ཆགས་པའམ་ཆེད་མངགས་གཞན་མགོ་བོ་རྨོངས་སུ་འཇུག་རྒྱུའི་དོན་དུ་གནང་མེད། བཅོམ་ལྡན་འདས་ཀྱིས་འདུལ་བྱའི་དབང་པོ་དང་། ཁམས། བསམ་པ་སོགས་ལ་གཟིགས་ནས་ཆོས་གསུངས་ཡོད། ཕྱོགས་མཚུངས་ཆོས་ལུགས་གཞན་ཚོ་ལའང་ལྟ་གྲུབ་མི་འདྲ་བ་ཡོད། འོན་ཀྱང་ཆོས་ལུགས་ཚང་མས་བྱམས་བརྩེ་དང་བཟོད་སྲན། འདོད་ཆུང་ཆོག་ཤེས་སོགས་བཟང་པོའི་བསླབ་བྱ་སྤེལ་བཞིན་ཡོད་པ་གཅིག་མཚུངས་ཡིན་སྟབས་དམིགས་ཡུལ་གཅིག་ལ་ཐབས་ལམ་མི་འདྲ་བ་ཡིན། རྒྱ་གར་རང་དུ་དར་བའི་གནའ་རབས་ཀྱི་ཆོས་ལུགས་ཁག་གཅིག་ཡོད།
དེ་ལས་གཞན་ཕྱི་ནས་དར་བའི་ཆོས་ལུགས་དཔེར་ན། ཛོ་ར་ཛོ་དིན་དང་ཡེ་ཤུ། ཁ་ཆེ་ལ་སོགས་ཡོད། དེས་ཆོས་ལུགས་ཕན་ཚུན་འཆམ་མཐུན་ངང་འཚོ་ཐུབ་རྒྱུ་ཡིན་པ་འཛམ་གླིང་ལ་མིག་དཔེ་བཏོན་མཁན་ཞིག་ཆགས་ཡོད། ངོས་རང་དུས་རྒྱུན་རྒྱ་གར་གྱི་འཚེ་མེད་ཞི་བ་དང་ཆོས་ལུགས་མཐུན་སྒྲིལ་སྐོར་བརྡ་ལན་སྤྲོད་མཁན་གྱི་ཕོ་ཉ་ཡིན། ཞེས་བརྗོད་ཀྱི་ཡོད་པ་མ་ཟད། ངོས་རང་རྒྱ་གར་གྱི་བུ་ཞིག་ཡིན། ཞེས་བརྗོད་བཞིན་ཡོད། གང་ཡིན་བརྗོད་ན། ངོས་ཀྱི་ཀླད་པའི་ནང་ཡོན་ཏན་གང་ཡོད་པ་དེ་དག་ནཱ་ལེནྡྲ་ནས་བྱུང་བ་མ་ཟད། ལྷག་པར་ངོས་ཀྱི་ལུས་ཕུང་འདིར་མཚོན་ན་འདས་པའི་མི་ལོ་ ༥༥ རིང་རྒྱ་གར་གྱི་འབྲས་དང་ད་ལི། བག་ལེབ་སོགས་ལ་བརྟེན་ནས་འཚོ་བ་རེད། ངོས་ཀྱི་ལས་འགན་གསུམ་པ་དེ་ངོས་རང་བོད་མི་ཞིག་ཡིན་པའི་ཆ་ནས་རེད། བོད་ནང་གི་བོད་མི་བརྒྱ་ཆ་ ༩༥ ངོས་ལ་རེ་བ་དང་ཡིད་ཆེས་བྱེད་བཞིན་ཡོད། དེར་བརྟེན་ངོས་ཀྱིས་ཁོང་ཚོར་ཕན་ཐོགས་གང་ཐུབ་བྱེད་དགོས་པ་ཡིན། དེང་སྐབས་ངོས་ཀྱིས་བོད་མིའི་ཆབ་སྲིད་འགོ་ཁྲིད་ཀྱི་རྒན་ཡོལ་ཆ་ཚང་ཞུས་ཟིན། འོན་ཀྱང་བོད་ཀྱི་རང་བྱུང་ཁོར་ཡུག་གི་གནས་སྟངས་ཐོག་ངོས་ལ་སེམས་ཚབས་འདུག རྒྱ་རིགས་ཁོར་ཡུག་ཉམས་ཞིབ་པ་གཅིག་གིས་འཛམ་གླིང་ལྷོ་བྱང་གི་སྣེ་གཉིས་དང་མཚུངས་པར་བོད་འདི་གོ་ལའི་གནམ་གཤིས་འགྱུར་ལྡོག་ལ་ཧ་ཅང་གལ་ཆེན་པོ་ཡིན་སྟབས་བོད་ལ་འཛམ་གླང་གི་སྣེ་གསུམ་པ་ཞེས་བརྗོད་ཡོད། ཆབ་སྲིད་ཀྱི་གནས་སྟངས་འགྱུར་བ་གཏོང་ཟེར་རྒྱུ་དེ་ཙམ་འགོར་རྒྱུ་མ་རེད། འོན་ཀྱང་ཁོར་ཡུག་ལ་ཐེངས་གཅིག་ཉམས་ཆག་བཏང་བ་ཡིན་ན་སླར་གསོ་བྱ་རྒྱུར་དུས་ཚོད་ཧ་ཅང་འགོར་རྒྱུ་རེད། གཞན་ཡང་བོད་ནས་རྒྱུག་བཞིན་པའི་རྒྱུག་ཆུ་དེ་དག་ལ་མཚོན་ན། རྒྱ་གར་བྱང་ཕྱོགས་དང་དབུས་དང་ལྷོ་ཤར་ཨེ་ཤི་ཡའི་ཡུལ་གྲུ་མང་པོའི་ནང་མི་འབོར་དུང་ཕྱུར་མང་པོའི་འཚོ་གནས་དང་ཐད་ཀར་འབྲེལ་བ་ཡོད། ང་ཚོ་བོད་ཀྱི་རྒྱུག་ཆུ་དེ་དག་གཞན་ལ་གལ་གནད་ཆེན་པོ་ཡིན་པ་ལྟར་ང་ཚོའི་བྱམས་བརྩེ་དང་འཚེ་མེད་ཞི་བའི་ལྟ་གྲུབ་ལ་གཞི་བཅོལ་བའི་རིག་གཞུང་དང་གོམས་གཤིས་དེ་དག་ཀྱང་སྲུང་སྐྱོབ་བྱ་རྒྱུ་ཧ་ཅང་གལ་ཆེན་པོ་རེད། ཅེས་བཀའ་སློབ་སྩལ། དེ་རྗེས་༸གོང་ས་མཆོག་གིས་དྲི་བ་ཁག་གཅིག་ལ་བཀའ་ལན་མཛད། ཉིན་གུང་ལྗགས་སྨིན་སྔོན་དུ་གྲོང་ཁྱེར་དེའི་ནང་སློབ་སྦྱོང་དང་ལས་ཀ་འདྲ་མིན་གཉེར་བཞིན་པའི་བོད་མི་གྲངས་ ༡༥༠ ཙམ་མཇལ་ཁ་དང་བཀའ་སློབ་སྩལ་འདུག་པ་བཅས།།
