༢༠༡༥ ཟླ་ ༡༡ ཚེས་ ༢ རེས་གཟའ་ཟླ་བ།

༄༅། །འདི་གར་ཕྱི་དྲིལ་བོད་ཡིག་ཚན་པའི་གསར་འགོད་པ་བསྟན་འཛིན་རབ་རྒྱས་ལགས་ཀྱིས་ས་གནས་ནས་བཏང་གནས་ནང་འཁོད་དོན། ཕྱི་ལོ་ ༢༠༡༥ ཟླ་ ༡༡ ཚེས་ ༡ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་བོད་དོན་རྒྱབ་སྐྱོར་ཚོགས་པའི་ཚོགས་ཆེན་ཐེངས་ལྔ་པའི་སྐུ་མགྲོན་གཙོ་བོར་མགྲོན་འབོད་གནང་བ་བཞིན། གོ་ཧ་ཌི་རྒྱལ་སྤྱིའི་གནམ་ཐང་ International Airport,Guwahati དུ་ཕེབས་འབྱོར་གནང་སོང་།

དེ་ཡང་གོང་ཚེས་ཉིན་གྱི་ཕྱི་དྲོ་ཆུ་ཚོད་ ༤།༣༠ ཐོག་སྲིད་སྐྱོང་མཆོག་གནམ་ཐང་དུ་ཕེབས་འབྱོར་གྱིས་རྒྱ་གར་གཞུང་གི་གནད་ཡོད་མི་སྣ་བཞུགས་སའི་ Circuit House ཞེས་པ་དེར་ཕེབས་སྐབས་བྱང་ཤར་ཁུལ་གྱི་བོད་མིའི་གཞིས་སྒར་ཁག་གི་ས་གནས་འགོ་འཛིན་རྣམས་ཀྱིས་སྲིད་སྐྱོང་མཆོག་ལ་ཕེབས་བསུའི་སྣེ་ལེན་གཟབ་རྒྱས་ཞུས་ཐོག་སྲིད་སྐྱོང་མཆོག་དང་ས་གནས་འགོ་འཛིན་རྣམས་ཡུད་ཙམ་རིང་མཇལ་མོལ་གནང་སོང་། ཐེངས་འདིའི་སྲིད་སྐྱོང་མཆོག་ལ་ཕེབས་བསུའི་སྣེ་ལེན་ཆེད་རྒྱ་གར་བྱང་ཤར་ཨ་རུ་ན་ཅལ་མངའ་སྡེའི་ཁུལ་གྱི་ཏི་ཛུ་དར་རྒྱས་གླིང་།
མེའོ་ཆོས་འཕེལ་གླིང་། བསྟན་འཛིན་སྒང་། མེ་ག་ལ་ཡའི་མངའ་སྡེའི་ནང་གི་ཤི་ལོང་བཅས་ཀྱི་ས་གནས་འགོ་འཛིན་དང་།

དེ་བཞིན་ཤི་ལོང་ས་འཐུས། རང་བདེན་ཚོགས་ཆུང་། སྤྱི་མི། འོས་བསྡུའི་ལས་བྱེད། གསར་འགོད་པ་བཅས་ཕེབས་བསུར་བཅར་ཡོད་འདུག མཇལ་འཕྲད་གླེང་མོལ་གྲུབ་རྗེས་སྲིད་སྐྱོང་མཆོག་གོ་ཧ་ཌེའི་བཞུགས་གནས་མགྲོན་ཁང་དུ་ཕེབས་ཐོན་གནང་ཡོད། ཕྱི་ཚེས་ ༢ ཉིན་སྲིད་སྐྱོང་མཆོག་བོད་དོན་རྒྱབ་སྐྱོར་ཚོགས་ཆེན་ཐེངས་ལྔ་པའི་ཆེ་བསྟོད་སྐུ་མགྲོན་དུ་ཆེད་ཕེབས་གནང་རྒྱུ་ཡིན་འདུག་པ་བཅས། །