༢༠༡༥ ཟླ་ ༡༡ ཚེས་ ༡༢ རེས་གཟའ་ཕུར་བུ།

༄༅། །ཉེ་ལམ་འབར་མའི་འོས་བསྡུ་ཆེན་མོའི་སྐབས་འབར་མའི་མང་གཙོ་ཚོགས་པར་National League for Democracy རྒྱལ་ཁ་ཆེན་པོ་ཐོབ་པར་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེངྒེ་མཆོག་གིས་འཚམས་འཕྲིན་ཞིག་ཕུལ་བའི་ནང་འཁོད་དོན། ངོས་ཀྱིས་བོད་མིའི་སྒྲིག་འཛུགས་དང་བོད་མི་ཡོངས་ཀྱི་ཚབ་ཞུས་ཏེ་སྐུ་ཉིད་མཆོག་གི་ཆབ་སྲིད་ཚོགས་པར་ཐེངས་འདིའི་རྒྱལ་ཡོངས་འོས་བསྡུ་ཆེན་མོའི་ནང་རྒྱལ་ཁ་ཆེན་པོ་ཐོབ་པར་དགའ་བསུའི་འཚམས་འདྲི་ཞུ་རྒྱུ་ཡིན། སྐུ་ཉིད་མཆོག་ཕྱི་ལོ་ ༢༠༡༠ ལོར་བཟང་བཙོན་ནས་གློད་བཀྲོལ་ཐོབ་སྐབས་འཛམ་གླིང་མི་མང་ཚོས་འབར་མའི་ནང་རིམ་བཞིན་མང་གཙོའི་བཅོས་སྒྱུར་ཡོང་རྒྱུ་རེད་བསམས་པའི་རེ་བ་ཆེན་པོ་བྱས་པ་ལྟར། ད་ཆ་ཕྱི་ལོ་ ༢༠༡༥ ཟླ་ ༡༡ ནང་སྐུ་ཉིད་མཆོག་བཙོན་གྲོལ་ཐོབ་ནས་མི་ལོ་ ༥ ཏག་ཏག་འཁོར་རྗེས་མང་ཚོགས་རྣམས་ཀྱིས་མང་གཙོའི་འོས་ཤོག་གི་ལམ་ནས་སྐུ་ཉིད་མཆོག་གི་ཆབ་སྲིད་ཚོགས་པར་རྒྱལ་ཁ་ཆེན་པོ་ཐོབ་ཡོད། འདི་ནི་དོན་དངོས་སྐུ་ཉིད་མཆོག་གི་ཐུགས་དགོངས་སུ་གཙིགས་ཆེར་འཛིན་བཞིན་པའི་མང་གཙོའི་རིང་ལུགས་ལ་རྒྱལ་ཁ་ཐོབ་པ་ཞིག་ཆགས་ཡོད། སྐུ་ཉིད་མཆོག་གིས་བཟོད་བསྲན་དང་འཚེ་མེད་ཞི་བའི་ལམ་སྟོན་གནང་བ་དེ་ནི་བོད་མི་གཙོས་འཛམ་གླིང་ཡོངས་ལ་སྙིང་སྟོབས་སྐྱེ་གཞི་ཞིག་ཡིན། སྤྱིར་བོད་དང་འབར་མ་ཡུལ་གཉིས་ཀྱི་ནང་དུ་ནང་ཆོས་དར་ཁྱབ་ཡོད་པ་གཅིག་མཚུངས་ཡིན་པ་མ་ཟད། མང་གཙོ་དང་གཞི་རྩའི་འགྲོ་བ་མིའི་ཐོབ་ཐང་། དེ་བཞིན་འཆམ་མཐུན་སོགས་ཀྱི་རིན་ཐང་དེ་དག་ལ་ཆོད་སེམས་བརྟན་པོས་རྒྱུན་འཁྱོངས་ཡོང་ཐབས་བྱེད་བཞིན་ཡོད། ངོས་ཀྱིས་སྐུ་ཉིད་མཆོག་གི་ལས་དོན་གང་ཅིའི་ཐོག་བྱ་བ་ལམ་ལྷོངས་ཡོང་བའི་སྨོན་འདུན་ཞུ་རྒྱུ་དང་། བོད་ཀྱི་གནད་དོན་མགྱོགས་མྱུར་གསལ་རྒྱུའི་ཐད་རྒྱབ་སྐྱོར་གནང་རྒྱུའི་རེ་བ་ཞུ་རྒྱུ་ཡིན། ཞེས་འཁོད་ཡོད།།