ཕྱི་ལོ་ ༢༠༡༥ ཟླ་ ༡༡ ཚེས་ ༡༡ རེས་གཟའ་ལྷག་པ།
༄༅། །ཕྱི་ལོ་ ༢༠༡༥ ཟླ་ ༡༡ ཚེས་ ༩ ནས་ ༡༡ བར་ཉིན་གྲངས་གསུམ་རིང་རྡ་ས་མེག་ལོ་གྷན་ཇིར་ཡོད་པའི་ནོར་བུ་གསོལ་མགྲོན་ཁང་གི་ཚོགས་ཁང་ནང་ཚོགས་པའི་ཨེ་ཤི་ཡ་ས་ཁུལ་གྱི་ཚོགས་ཆེན་ཐེངས་ལྔ་པའི་ཐོག་བོད་མིའི་སྒྲིག་འཛུགས་ཀྱི་ཕྱི་དྲིལ་བཀའ་བློན་བདེ་སྐྱིད་ཆོས་དབྱངས་མཆོག་གིས་གསུང་བཤད་གནང་ཡོད།
དེ་ཡང་གོང་ཚེས་ཉིན་གྱི་ཉིན་གུང་ཆུ་ཚོད་ ༡༢ ཐོག་རྒྱ་གར་དང་ཨ་རི། ཨིན་ཇི། ཐེ་ཝན། བྷང་ལ་དེ་ཤི། ལེ་ཊིན་ཨ་མི་རི་ཁ། ཀེན་ཡ། མ་ལེ་ཤི་ཡ། ཧྥི་ལི་པིན། ཨི་ཊ་ལི་བཅས་རྒྱལ་ཁབ་ཁག་བཅུ་ནས་བོད་དོན་རྒྱབ་སྐྱོར་ཚོགས་པ་ཁག་བཅུ་བཞིའི་ཚོགས་བཅར་བ་གྲངས་ ༥༠ ཙམ་མཉམ་ཞུགས་ཐོག་ཕྱི་དྲིལ་བཀའ་བློན་བདེ་སྐྱིད་ཆོས་དབྱངས་མཆོག་གིས་གསུང་བཤད་དོན། དེ་རིང་འདིར་ཐེངས་མ་གཉིས་པ་ངོས་རང་བཅར་རྒྱུ་བྱུང་བར་ཧ་ཅང་དགའ་པོ་བྱུང་། བཀའ་ཤག་སྐབས་བཅུ་བཞི་པ་འགོ་ཚུགས་པ་ནས་བཟུང་བོད་དོན་རྒྱབ་སྐྱོར་གྱི་ཚོགས་འདུ་ཐེངས་གཉིས་ཐོག་མཉམ་ཞུགས་བྱ་རྒྱུ་བྱུང་སོང་། དེ་ཡང་ཐེངས་དང་པོ་ཕྱི་ལོ་ ༢༠༡༢ ལོར་ཚོགས་པའི་དམིགས་བསལ་ཚོགས་ཆེན་དང་། ཐེངས་གཉིས་པ་ཡུ་རོབ་ནང་ཚོགས་སྐབས་ང་རང་ཚོགས་འདུའི་ཐོག་བཅར་རྒྱུའི་གོ་སྐབས་བྱུང་བ་རེད། དེ་རྗེས་ལོ་འགའ་ཤས་རིང་ངས་བོད་དོན་རྒྱབ་སྐྱོར་བའི་སྐོར་ཞིབ་འཇུག་བྱ་རྒྱུ་བྱུང་སོང་ལ། དེ་བཞིན་བོད་དོན་རྒྱབ་སྐྱོར་བའི་ལས་བྱེད་ཁག་དང་མཉམ་དུ་བགྲོ་གླེང་དང་གྲོས་བསྡུར་བྱ་རྒྱུ་དེ་འདྲའང་བྱུང་སོང་། ང་རང་དངོས་སུ་འཛམ་གླིང་ཡུལ་གྲུ་ཁག་མང་པོ་ཞིག་གི་ནང་ཕྱོགས་བསྐྱོད་འགྲོ་བ་སོགས་ཀྱི་ལས་གཞི་རྒྱ་མི་ཆུང་བ་ཞིག་ནང་མཉམ་ཞུགས་བྱ་རྒྱུ་བྱུང་སོང་།
དེ་རིང་འདིར་སྤྱིར་ངས་གཏམ་བཤད་བྱེད་རྒྱུ་གང་ཡང་མེད། གང་ལྟར་ངའི་བསམ་ཚུལ་ཁག་གཅིག་རྣམ་པ་ཚོ་དང་ལྷན་བརྗེ་ལེན་གོ་བསྡུར་ཐོག་ནས་ཞུ་གི་ཡིན། རྣམ་པ་ཚོས་བརྩམས་པའི་བོད་ཀྱི་རྩ་དོན་འཐབ་རྩོད་ཀྱི་ཐབས་བྱུས་སྙན་ཐོ་དེ་ངས་ལྟ་ཞིབ་བྱེད་སྐབས་ཧ་ཅང་གི་སྤུས་དག་དང་ཡག་པོ་བྱུང་འདུག་ཅེས་ཞུ་རྒྱུ་དང་། ངའི་རེ་བར་ཚོགས་འདུའི་ནང་མཉམ་ཞུགས་གནང་མཁན་ཚང་མས་མཁྱེན་རྟོགས་ཐུབ་ཡོད་པ་ཞིག་ལ་ངོས་འཛིན་གྱི་ཡོད། དེ་བཞིན་དེ་ནི་དངོས་ཡོད་ཀྱི་རྒྱུ་ཆ་གལ་ཆེན་པོ་ཞིག་དང་བེད་སྤྱོད་ཆེན་པོ་ཡོད་པ་ཞིག་ཆགས་ཡོད། སྙན་ཐོ་དེའི་ནང་ང་རང་ངོས་ནས་དོ་སྣང་དམིགས་བསལ་བྱུང་བ་ཁག་གཅིག་ནི་སྤྱིར་སྙན་ཐོ་དེ་བཞིན་བོད་ནང་གི་གནས་སྟངས་གཙོ་བོ་བྱས་ནས་བོད་དོན་ཐོག་ལས་འགུལ་སྤེལ་རྒྱུ་དེ་ཆགས་ཡོད། དུས་རྒྱུན་ང་རང་རྒྱལ་ཁབ་ཁག་ལ་ཕྱོགས་བསྐྱོད་འགྲོ་སྐབས་ངས་དེ་འདྲ་བརྗོད་ཀྱི་ཡོད། བོད་དོན་རྒྱབ་སྐྱོར་བ་ཚོས་བོད་ནང་གི་གནད་དོན་ཐོག་ལས་འགུལ་སྤེལ་བ་བཞིན་བཙན་བྱོལ་ནང་གི་བོད་མིའི་སྒྲིག་འཛུགས་ལའང་དོ་སྣང་དགོས་པའི་ཞུ་སྐུལ་བྱས་ཀྱི་ཡོད།
གང་ཡིན་ཞུས་ན་སྤྱིར་བོད་དོན་ཐོག་ལས་འགུལ་སྤེལ་མཁན་ནི་གཞི་ལུས་རྒྱ་ཆེ་མི་མང་རྣམས་ཡིན་པ་དངོས་ཡོད་གནས་སྟངས་ཆགས་ཡོད། ཡིན་ནའང་བོད་མིའི་སྒྲིག་འཛུགས་ཀྱི་ལས་འགན་ནི་གཞིས་ལུས་རྒྱ་ཆེ་མི་མང་གི་ལས་འགུལ་བརྩམས་པ་དེར་རྒྱབ་སྐྱོར་དང་གདུང་སེམས་མཉམ་སྐྱེའི་ཐོག་ནས་རོགས་རམ་ལས་འགུལ་སྤེལ་རྒྱུ་དེ་ཆགས་ཡོད། དེར་བརྟེན་བོད་མིའི་སྒྲིག་འཛུགས་འདི་བཞིན་གཞིས་ལུས་བོད་མིའི་མངོན་འདོད་སྒྲུབ་པར་བྱེད་མཁན་དང་། གཞི་ལུས་བོད་མིའི་མགྲིན་ཚབ་ངོ་མ་དེ་ཆགས་ཡོད། རྒྱ་གཞུང་གིས་བོད་ནང་གི་བོད་མི་ཚོ་བདེ་འཇགས་ངང་གནས་མ་ཐུབ་པའི་རྐྱེན་གཙོ་བོ་བཙན་བྱོལ་ནང་གི་བོད་མི་ཚོས་དཀྲུག་རྐྱེན་ལས་བྱུང་བ་རེད་ཅེས་ཤོད་ཀྱི་ཡོད། དེ་འདྲ་རྩ་ནས་ཆགས་མེད། བོད་མིའི་སྒྲིག་འཛུགས་འདི་བཞིན་རང་དབང་ལུང་པའི་ནང་གཞིས་ལུས་བོད་མིའི་ཚོའི་མངོན་འདོད་བསྒྲུབ་རྒྱུའི་ལས་འགན་གཙོ་བོ་བཟུང་བཞིན་ཡོད། བོད་དོན་ལས་འགུལ་སྤེལ་ཕྱོགས་ཀྱི་ཐོག་ལ་འགྲོ་གྲོན་དང་རྒྱུ་ཆ་གང་ཡིན་པ་བེད་སྤྱོད་ཡོད་པ་ཞིག་གནང་གལ་ཆེ་བ་ཡིན། བོད་དོན་ཐོག་ལས་འགུལ་སྤེལ་མཁན་རྒྱལ་ཁབ་ཁག་གི་ཆབ་སྲིད་གནས་འབབ་དམ་ལྷོད་མི་འདྲ་བ་དང་ཁོར་ཡུག་མི་འདྲ་བ་མང་པོ་ཡོད། ཡིན་ནའང་བོད་དོན་ཐོག་ལས་འགུལ་སྤེལ་རྒྱུའི་སྡིངས་ཆ་གལ་ཆེ་བ་ཞིག་ནི་རིག་གཞུང་འཁྲབ་སྟོན་གྱི་ལས་རིམ་ཐོག་ནས་གནང་རྒྱུ་དེ་རྒྱ་ཁྱབ་ཆེ་བ་དང་ཐབས་ཤེས་བཟང་བ་ཡོང་གི་ཡོད།
དེ་ཡང་སོ་སོའི་ཁྱད་པར་དུ་འཕགས་པའི་རིག་གཞུང་སྲུང་སྐྱོབ་བྱ་ཆོག་པར་བརྟེན་རིག་གཞུང་འཁྲབ་སྟོན་གྱི་ལམ་ནས་བོད་དོན་ལས་འགུལ་སྤེལ་རྒྱུ་དེ་ནི་རིན་ཐང་ཆེ་བའི་ཐབས་ཤེས་སམ་ལག་ཆ་ཞིག་ཆགས་ཡོད། དེ་བཞིན་ཉེ་ཆར་བཙན་བྱོལ་ནང་གཞོན་ནུའི་ལས་བྱེད་གསུམ་གྱིས་བོད་དོན་ཐོག་རྒྱལ་ཞེན་ཆེན་པོས་ཟས་བཅད་ངོ་རྒོལ་གནང་བ་འདི་ཧ་ཅང་གི་བློ་སྤོབས་ཆེན་པོ་དང་ཁོང་རྣམས་ཀྱི་སེམས་ཤུགས་དང་རྒྱལ་ཞེན་ལ་བསྔགས་བརྗོད་བྱ་འོས་པའི་ལས་འགུལ་ཞིག་རེད་བསམས་པ་བྱུང་། དེ་བཞིན་གཞོན་སྐྱེས་དེ་ཚོ་རྒྱ་གར་ནང་འཚར་ལོངས་བྱུང་བ་དང་རྒྱ་གར་གྱི་གནས་འབབ་སོགས་མང་པོར་གོ་རྟོགས་ཡོད་པར་བརྟེན་ཟས་བཅད་ངོ་རྒོལ་གྱི་ལམ་ནས་བོད་དོན་སྐོར་རྒྱ་གར་ཁྱོན་ཡོངས་ལ་གོ་རྟོགས་དང་དོ་སྣང་དམིགས་བསལ་ཞིག་ཡོང་ཐུབ་པ་བྱ་རྒྱུའི་ལས་འགུལ་གལ་ཆེ་བ་ཞིག་ཆགས་ཡོད། ཅེས་དང་དེ་རྗེས་བཀའ་བློན་མཆོག་གིས་བོད་མིའི་སྒྲིག་འཛུགས་ཀྱི་སྐོར་གསལ་བཤད་གནང་བའི་ནང་། བོད་མིའི་སྒྲིག་འཛུགས་འདི་བཞིན་༸གོང་ས་༸སྐྱབས་མགོན་ཆེན་པོ་མཆོག་གིས་གཙོས་མི་རབས་རྒན་པ་ཚོས་སྐུ་ལས་སྐྱོན་གནང་མཛད་པའི་སྒྲིག་འཛུགས་ཤིག་ཡིན་པ་ལས་མི་སྒེར་དང་ཚོགས་པ་སྒེར་ཞིག་གི་སྒྲིག་འཛུགས་ཤིག་མིན་སྟབས་ཕུགས་རྒྱང་རིང་པོའི་ཐོག་ནས་བོད་དོན་བདེན་མཐའ་མ་གསལ་བའི་བར་དུ་སྒྲིག་འཛུགས་འདི་བརྟན་པོ་ཞིག་གནས་ཐུབ་རྒྱུ་ཧ་ཅང་གལ་ཆེ་ཡིན་སྐོར་དང་། བོད་མིའི་སྒྲིག་འཛུགས་ཀྱི་སྲིད་བྱུས་སམ་བོད་མིའི་འཐབ་རྩོད་ཀྱི་སྲིད་བྱུས་དབུ་མའི་ལམ་གྱི་བཞེངས་ཕྱོགས་སྐོར་བཀའ་བློན་མཆོག་གིས་གསལ་བཤད་གནང་དོན། སྤྱིར་བོད་དོན་རྒྱབ་སྐྱོར་བ་ཚོས་དབུ་མའི་ལམ་གྱི་བཞེངས་ཕྱོགས་འདིའི་ཐོག་རྒྱབ་སྐྱོར་གནང་མིན་སོ་སོའི་རང་དབང་ཆགས་ཡོད། ང་ཚོའི་རེ་བར་རྣམ་པ་ཚོས་རྒྱབ་སྐྱོར་གནང་གིན་ཡོད་ཤག་རེད་བསམས་ཀྱི་འདུག བོད་དོན་རྒྱབ་སྐྱོར་བ་ཞིག་ཡིན་པའི་ལས་འགན་གཙོ་བོ་ནི་རྣམ་པ་ཚོས་དབུ་མའི་ལམ་གྱི་སྲིད་བྱུས་གང་ཡིན་པ་ལྗགས་ཀློག་གནང་རྒྱུ་དང་། དབུ་མའི་ལམ་གྱི་སྲིད་བྱུས་ཞེས་པ་གང་འདྲ་ཞིག་ཡིན་པ་ཤེས་པ་གནང་རྒྱུ་དེ་ལས་འགན་གལ་ཆེ་ཞིག་ཡིན། ཞེས་སོགས་ཀྱི་གསུང་བཤད་རྒྱས་པར་གནང་གྲུབ་མཚམས་ཚོགས་བཅར་བའི་དོགས་འདྲི་ཁག་ལ་ལན་འདེབས་ཞིབ་ཕྲ་གནང་ཡོད་པ་བཅས། །
