༢༠༡༥ ཟླ་ ༡༡ ཚེས ༢ རེས་གཟའ་ཟླ་བ།
༄༅། །འདི་གར་ཕྱི་དྲིལ་བོད་ཡིག་ཚན་པའི་གསར་འགོད་པ་བསྟན་འཛིན་རབ་རྒྱས་ལགས་ཀྱིས་ས་གནས་ནས་བཏང་གནས་ནང་འཁོད་དོན།
ཕྱི་ལོ་ ༢༠༡༥ ཟླ་ ༡༠ ཚེས་ ༣༡ ཉིན་རྒྱ་གར་བྱང་ཤར་ཨ་སམ་མངའ་སྡེའི་རྒྱལ་ས་གོ་ཧ་ཌིའི་གསར་འགོད་ལྷན་ཚོགས་ཀྱི་ཚོགས་ཁང་དུ་རྒྱ་གར་རྒྱལ་ཡོངས་བོད་དོན་རྒྱབ་སྐྱོར་ཚོགས་པའི་ཚོགས་ཆེན་ཐེངས་ལྔ་པའི་གོ་སྒྲིག་ཚོགས་ཆུང་གིས་ཚོགས་ཆེན་ཐེངས་ལྔ་པའི་གལ་གནད་སྐོར་གོ་རྟོགས་བསྐྲུན་སླད་མངའ་སྡེའི་གསར་འགོད་པ་རྣམས་ལ་གསལ་བསྒྲགས་ཤིག་སྤེལ་གནང་སོང་།
དེ་ཡང་གོང་ཚེས་ཉིན་གྱི་སྔ་དྲོའི་ཆུ་ཚོད་ ༡༡ ཐོག་རྒྱ་གར་རྒྱལ་ཡོངས་བོད་དོན་རྒྱབ་སྐྱོར་ཚོགས་པའི་ཚོགས་ཆེན་ཐེངས་ལྔ་པའི་གོ་སྒྲིག་ཚོགས་ཆུང་གི་ཚོགས་གཙོ་སྐུ་ཞབས་ཨར་ཀེ་ཁི་རི་མེ་ RK Khrimey ལགས་དང་། འཕགས་བོད་འབྲེལ་མཐུད་ལས་ཁུངས་ཀྱི་འགན་འཛིན་འཇིགས་མེད་ཚུལ་ཁྲིམས་ལགས། ས་གནས་གོ་སྒྲིག་ཚོགས་ཆུང་གི་འགན་འཛིན་བསོད་ནམས་ལྷུན་གྲུབ་ལགས། དེ་བཞིན་ས་གནས་དེ་གའི་གསར་འགོད་པ་གྲངས་ ༣༠ ཙམ་དང་ཁྱོན་མི་གྲངས་ ༥༠ ལྷག་མཉམ་ཞུགས་གནང་འདུག
ཐོག་མར་དབྱིན་ཡིག་ནང་འཁོད་པའི་གསར་འགོད་གསལ་བསྒྲགས་ཀྱི་བསྒྲགས་ཡིག་དང་ཚོགས་ཆེན་སྐོར་གྱི་ལས་རིམ་ཇི་ཡོད་ཀྱི་མགྲོན་ཤོག་གི་ཤོག་བྱང་བཅས་གསར་འགོད་པ་རྣམས་ལ་འགྲེམས་སྤེལ་གནང་ཐོག སྐུ་ཞབས་ཨར་ཀེ་ཁི་རི་མེ་ལགས་ཀྱིས་ཐེངས་འདིའི་གསར་འགོད་ལྷན་ཚོགས་བསྐོང་དོན་དང་ཚོགས་ཆེན་ཐེངས་ལྔ་པའི་ལས་རིམ་ཇི་ཡོད་སོགས་ཀྱི་སྐོར་ཨ་སམ་ཡུལ་སྐད་དང་དབྱིན་སྐད་ཀྱི་ལམ་ནས་ངོ་སྤྲོད་རྒྱས་པར་གནང་དོན། བོད་དོན་གྱི་གནད་དོན་དེ་བཞིན་རྒྱ་གར་བའི་བདེ་འཇགས་ཀྱི་གནད་དོན་ཞིག་ཀྱང་ཆགས་ཡོད། དེ་ཡང་བོད་དོན་གྱི་གནད་དོན་ཐོག་འགྱུར་བ་གང་འདྲ་འགྲོ་གི་ཡོད་མེད་སོགས་ཀྱི་ཐོག་བྱང་ཤར་ཁུལ་དུ་གནས་སྡོད་རྒྱ་གར་བ་ཚོས་མཁྱེན་རྟོགས་ཐུབ་པ་ཞིག་དང་སེམས་ཁུར་ཡོད་པ་ཞིག་གནང་དགོས་གལ་ཆེ་བ་ཡིན། རྒྱ་གར་བས་ཆབ་སྲིད་དང་དཔལ་འབྱོར། དེ་བཞིན་རིག་གཞུང་བཅས་ལ་བོད་ཀྱི་གནད་དོན་དེ་འབྲེལ་བ་གང་འདྲ་ཞིག་ཆགས་ཡོད།
དང་པོ། ཆབ་སྲིད་ཐོག་ནས་བཤད་ན་ད་ལྟ་རྒྱ་གར་བྱང་ཤར་ཁུལ་གྱི་ས་མཚམས་ཁག་མང་པོར་རྒྱ་གར་གཞུང་གི་བདེ་འཇགས་སྲུང་སྐྱོབ་ཆེད་འགྲོ་གྲོན་ཧིན་སྒོར་དུང་ཕྱུར་མང་པོ་བཏང་དང་གཏོང་བཞིན་ཡོད། ཅི་སྟེ་བོད་དོན་བདེན་མཐའ་གསལ་བའི་ཉིན་དེ་ནས་བཟུང་འགྲོ་གྲོན་དེ་དག་གཏོང་དགོས་དོན་མེད།
གཉིས་པ། དཔལ་འབྱོར་གྱི་ཐོག་ནས་བཤད་ན་ད་ལྟ་ཨ་རུ་ནཱ་ཅལ་དང་ཨ་སམ་སོགས་བྱང་ཤར་ཁུལ་གྱི་ས་ཆ་ཕལ་ཆེ་བ་དེ་དག་བརྒྱུད་བོད་ནས་རྒྱ་གར་དུ་མི་མང་ཕར་འགྲོ་ཚུར་འོང་གི་བརྒྱུད་ལམ་དེ་དག་བཀག་འགོག་ངང་གནས་ཡོད་སྟབས་དཔལ་འབྱོར་ཐོག་ནས་འགོག་རྐྱེན་ཞིག་ཆགས་ཡོད། ཅི་སྟེ་བོད་ཀྱི་གནད་དོན་གསལ་བ་ཡིན་ན། སྐབས་དེར་བྱང་ཤར་ཁུལ་གྱི་ས་མཚམས་དེ་དག་ཕར་འགྲོ་ཚུར་འོང་གི་རང་དབང་ཡོད་པ་དང་། དེར་བརྟེན་བྱང་ཤར་ཁུལ་གྱི་ས་གནས་དེ་དག་ཚོང་འབྲེལ་གྱི་བསྟི་གནས་ཤིག་ཏུ་འགྱུར་ངེས་པར་བརྟེན་ས་ཁུལ་དེ་དག་གི་ནང་དཔལ་འབྱོར་གྱི་གནས་བབ་བཟང་དུ་འགྲོ་ངེས་ཡིན།
གསུམ་པ། རིག་གཞུང་གི་ཐོག་ནས་ཞུས་ན་དུས་རྒྱུན་༸གོང་ས་ཏཱ་ལའི་བླ་མ་མཆོག་གིས་འཕགས་བོད་གཉིས་ཀྱི་འབྲེལ་ལམ་ནི་བླ་མ་དང་སློབ་མའི་དབར་གྱི་འབྲེལ་བ་ཡིན། ཞེས་བཀའ་སློབ་སྩལ་བ་བཞིན་གལ་སྲིད་བོད་ཀྱི་གནད་དོན་དེ་གསལ་བའི་ཉིན་དེ་ནས་བཟུང་བླ་མ་དང་སློབ་མའི་འབྲེལ་བ་བརྟན་པོ་ཡོད་པ་གང་ཞིག་ད་དུང་བརྟན་དུ་དང་འབྲེལ་བ་གཏིང་ཟབ་ཏུ་འགྲོ་ངེས་ཡིན། དེར་བརྟེན་བོད་ཀྱི་གནད་དོན་ནི་རྒྱ་གར་བའི་བདེ་འཇགས་ཀྱི་གནད་དོན་ཞིག་ཀྱང་ཆགས་ཡོད། ཅེས་སོགས་ཀྱི་གསུང་བཤད་གནང་། དེ་བཞིན་ཐེངས་འདིའི་ཚོགས་འདུའི་ལས་རིམ་ཁག་གསལ་བཤད་དང་། འདི་ལོ་འཛམ་གླིང་ཁྱོན་ཡོངས་སུ་༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་བརྒྱད་ཅུར་ཕེབས་པའི་སྐུའི་འཁྲུངས་སྐར་སྲུང་བརྩི་ཞུས་དང་ཞུ་བཞིན་པ་ལྟར། ད་ལམ་རྒྱ་གར་རྒྱལ་ཡོངས་བོད་དོན་རྒྱབ་སྐྱོར་ཚོགས་པས་གོ་སྐབས་འདི་ཉིད་དམ་འཛིན་གནང་ཐོག་༸གོང་ས་༸སྐྱབས་མགོན་ཆེན་པོ་མཆོག་སྐུ་ཚེ་ཡུན་དུ་བརྟན་ཕྱིར་ས་གནས་འདི་གར་མར་མེའི་ཁྲོམ་སྐོར་གྱི་ལས་རིམ་ཞིག་ཀྱང་ཚོགས་ཆེན་ཉིན་དང་པོར་གོ་སྒྲིག་གནང་འཆར་ཡོད་ལུགས་དང་། དེ་བཞིན་མགོན་པོ་གང་ཉིད་སྐུ་ཚེ་ཡུན་བརྟན་གྱི་སྨོན་ལམ་དང་། ཆུ་ཚོད་གཉིས་རིང་རྡོ་རྗེ་གླིང་གངས་ལྗོངས་རུ་ཁག་ནས་གཞས་སྣ་འཁྲབ་སྟོན་སོགས་ཀྱི་ལས་རིམ་མང་པོ་ཡོད་པར་བརྟེན་གསར་འགོད་པ་རྣམས་དུས་ཁོམ་ཡོད་ཚེ་ངེས་ཕེབས་ཡོང་བའི་འབོད་སྐུལ་ཡང་གནང་སོང་། དེ་རྗེས་འཕགས་བོད་འབྲེལ་མཐུད་ལས་ཁུངས་ཀྱི་ཚོགས་གཙོ་དང་ས་གནས་གོ་སྒྲིག་ཚོགས་ཆུང་གི་ཚོགས་གཙོ་བཅས་ནས་གསར་འགོད་པའི་དྲི་བ་ཁག་ལ་ལན་འདེབས་གནང་སྟེ་ཐེངས་འདིའི་གསར་འགོད་པའི་ལས་རིམ་ཁག་ལེགས་པར་མཇུག་སྒྲིལ། །
