ཕྱི་ལོ་ ༢༠༡༥ ཟླ་ ༡༡ ཚེས་ ༡༢ རེས་གཟའ་ཕུར་བུ།
༄༅། །བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་གནས་ཚུལ་སྤེལ་བ་ལྟར་ན། འབྲི་རུ་རྫོང་གིས་བོད་མིའི་ཆོས་ལུགས་དད་མོས་རང་དབང་བཀག་སྡོམ་ཐད། ཆེད་དམིགས་ཁྲིམས་སྒྲིག་སྣ་ཚོགས་བཟོས་ཏེ་དགོན་པར་ཕྱོགས་ཡོངས་ནས་སྟངས་འཛིན་དོ་དམ་དང་གྲྭ་བཙུན་རྣམས་ཕྱིར་ཕུད། མང་ཚོགས་ཀྱི་ཆོས་དད་རང་དབང་ལ་བཀག་སྡོམ་བཅས་བྱས་ཏེ། དགོན་པ་ནི་སྲིད་གཞུང་གི་ལས་ཁུངས་དང་གྲྭ་བཙུན་རྣམས་དམར་ཤོག་ཚོགས་མི་ལྟ་བུར་སྒྱུར་གྱིན་ཡོདའདུག
ཕྱི་ལོ་ ༢༠༡༥ ཟླ་ ༩ ཚེས་ ༡༩ ཉིན་འབྲི་རུ་རྫོང་གིས་སྲིད་གཞུང་ཡིག་ཆ་ཨང་ ༢༢༤ སྟེ། ༼ཆོས་ལུགས་ཁྱབ་ཁྱོངས་བཅོས་བསྒྲིག་གཙར་བཤེར་དང་ཚད་ལྡན་བཟོ་རྒྱུའི་ལས་དོན་སྔར་བས་གཏིང་ཟབ་སྤེལ་རྒྱུ་དང་། དགོན་སྡེའི་དབང་ཆ་བཞིར་ཁྲིམས་ལྟར་ཤུགས་སྣོན་རྒྱག་རྒྱུའི་ལས་ཀའི་འགན་འཁྲི་རྩད་གཅོད་མཐར་ཕྱིན་བྱ་རྒྱུའི་སྐོར་གྱི་འབྲི་རུ་རྫོང་མི་དམངས་སྲིད་གཞུང་གི་ཆད་གཅོད་གཏན་འབེབས། གནས་སྐབས་ལག་བསྟར་བྱ་རྒྱུ།༽ ཞེས་པའི་ལེའུ་གསུམ་དང་ནང་གསེས་ས་བཅད་ ༢༤ དང་དོན་ཚན་ ༧༤ ཅན་གྱི་སྒྲིག་གཞི་ཡིག་ཆ་ཞིག རྫོང་གི་ཐད་གཏོགས་ཚན་པ་ཁག་དང་། ཤང་༼གྲོང་རྡལ།༽མི་དམངས་སྲིད་གཞུང་ཁག དགོན་སྡེ་དོ་དམ་ཨུ་ཡོན་ལྷན་ཁང་ཁག མངའ་ཁོངས་སྡེ་ཁུལ་དོ་དམ་ཨུ་ཡོན་ལྷན་ཁང་། དགོན་པ་དང་སྡེ་བར་ཆེད་མངགས་བཅའ་སྡོད་ལས་བྱེད་སོགས་སུ་འགྲེམས་སྤེལ་བྱས་ཏེ། འབྲི་རུ་རྫོང་ཁོངས་ཀྱི་དགོན་སྡེ་ཁག་གི་ཆོས་ལུགས་བྱེད་སྒོ་ཁག་ལ་དོ་དམ་ནན་མོ་དང་། གྲྭ་བཙུན་གྲངས་འབོར་ཚད་འཛིན་
དང་ཕྱིར་ཕུད་སོགས་བཀག་སྡོམ་བྱེད་ཤུགས་ཆེ་རུ་བཏང་ཡོད།
ཡིག་ཆ་དེའི་ནང་འབྲི་རྫོང་གིས་ལས་དོན་རྣམ་གྲངས་ ༢༤ བགར་བའི་ཐོག་ནས། ས་གནས་བོད་མིའི་ཆོས་ལུགས་དད་མོས་རང་དབང་བཀག་སྡོམ་བྱ་དགོས་པ་གསལ་བོར་བསྒྲགས་ཡོད། ནང་དོན་དེ་དག་ཕྱོགས་བསྡོམས་བྱས་པ་ཡིན་ན། རྒྱ་གཞུང་གིས་དགོན་པའི་སྲོལ་རྒྱུན་ལམ་ལུགས་ལ་བཅོས་བསྒྱུར་གྱིས་དོ་དམ་བཀག་སྡོམ་བྱེད་བཞིན་པའི་ཐད་ནས།
༡། དགོན་སྡེ་ཁག་གི་རྟེན་བཞེངས་རིགས་དངོས་མཐའ་དག་རེ་རེ་བཞིན་ཐོ་འགོད་བྱས་ཐོག དེ་དག་ཉར་འཇོག་དང་ཞིག་གསོའི་ཁེ་དབང་མཐའ་དག་རྒྱ་གཞུང་གིས་བཙན་འཕྲོག་སྟངས་འཛིན་བྱེད་བཞིན་ཡོད།
༢། དགོན་པའི་ཆོས་ལུགས་བྱེད་སྒོ་མཐའ་དག་ལ་སྟངས་འཛིན་བྱས་ཏེ། མང་ཚོགས་ཀྱིས་དབང་ལུང་དང་གསུང་ཆོས་ཞུ་རྒྱུ་ཚད་བཀག་ནན་མོ་བཟོས་ཡོད།
༣། དད་ལྡན་མང་ཚོགས་ནས་དགོན་སྡེ་དང་བླ་སྤྲུལ་ལ་འབུལ་དངོས་ཕུལ་བ་མཐའ་དག་ལ་རྒྱ་གཞུང་གིས་སྟངས་འཛིན་དོ་དམ་བྱས་ཏེ། དགོན་པའི་དཔལ་འབྱོར་འདུ་འགོད་དང་རྟེན་བཞེངས་འཛུགས་བསྐྲུན་གྱི་ལམ་ཁ་ཡོད་ཚད་བཀག་འགོག་སྡོམ་བྱས་ཡོད།
༤། དགོན་སྡེ་དང་བླ་སྤྲུལ། གྲྭ་བཙུན་བཅས་ཀྱི་ངོས་ནས་གོད་ཆག་བྱུང་ཡུལ་ལ་བྱམས་བརྩེ་རོགས་སྐྱོར་དང་། འཚོ་བར་དཀའ་ངལ་ཅན་གྱི་མང་ཚོགས་ལ་རོགས་དངུལ་བསྐྱི་གཡར་སོགས་སྤྱི་ཚོགས་ཞབས་ཞུའི་ལས་སྒོ་མཐའ་དག་བཀག་སྡོམ་བྱས་ཡོད།
༥། དགོན་སྡེ་གྲྭ་བཙུན་གྱི་འདུལ་ཁྲིམས་རྣམས་དམར་གཞུང་གི་ཁྲིམས་སྒྲིག་གི་ངོ་བོར་བསྒྱུར་ཐབས་བྱས་ཏེ། གྲྭ་བཙུན་རྣམས་ཀྱི་ཐོས་བསམ་སྒོམ་གསུམ་གྱི་རང་དབང་ལ་གཅུན་སྡོམ་བྱེད་བཞིན་ཡོད།
༦། དགོན་པར་དུས་རྒྱུན་གཟའ་ཕུར་བའི་ཉིན་གྲྭ་བཙུན་བསྡུ་སྐོང་གིས་ཆབ་སྲིད་སློབ་གསོ་སྤེལ་དགོས་པའི་སྒྲིག་གཞི་བཟོས་ཏེ། ཆབ་སྲིད་སློབ་གསོ་སྤེལ་ཡུལ་གྱི་དམར་ཤོག་སློབ་གྲྭ་ཞིག་ཏུ་བསྒྱུར་བཞིན་ཡོད།
རྒྱ་གཞུང་གིས་བླ་སྤྲུལ་དང་སྐྱེས་ཆེན་རྣམས་ལ་བཙན་གནོན་སྟངས་འཛིན་བྱེད་བཞིན་པའི་སྐོར་ནས།
༡། བླ་སྤྲུལ་ངོས་འཛིན་གྱི་ཆོས་ཕྱོགས་ཀྱི་བདག་དབང་ཡོད་ཚད་རྒྱ་གཞུང་གིས་བཙན་འཕྲོག་གིས། བླ་སློབ་ཀྱི་དམ་ཚིག་དང་དབང་ལུང་མན་ངག་གི་བརྒྱུད་པ་སོགས། ཆོས་ཕྱོགས་ཀྱི་ལུགས་སྲོལ་མཐའ་དག་རྩ་གཏོར་བྱེད་བཞིན་ཡོད།
༢། བླ་སྤྲུལ་དང་སྐྱེས་ཆེན་དམ་པ་དག་ལ་བཙན་དྲགས་གནོན་ཤུགས་སྤྲད་ནས། གྲྭ་བཙུན་རྣམས་ལ་དམར་ཤོག་གི་ཆབ་སྲིད་སློབ་གསོ་དྲིལ་བསྒྲགས་བྱེད་བཅུག་སྟེ། བླ་སྤྲུལ་རྣམས་དམར་ཤོག་ཁྲིམས་སྒྲིག་སྤེལ་མཁན་གྱི་མགྲིན་ཚབ་པ་བཟོ་བཞིན་ཡོད།
རྒྱ་གཞུང་གིས་གྲྭ་བཙུན་རྣམས་ལ་བཀག་སྡོམ་སྟངས་འཛིན་བྱེད་བཞིན་པའི་སྐོར་ནས།
༡། རྒྱ་གཞུང་གི་གཏན་འབེབས་ཚད་བཀག་ལྟར། དགོན་སྡེ་དང་ལྷ་ཁང་། རི་ཁྲོད་བཅས་ཀྱི་གྲྭ་བཙུན་རྣམས་བཙན་ཤུགས་ཀྱིས་ཕྱིར་ཕུད་གཏོང་གི་ཡོད།
༢། གྲྭ་བཙུན་རྣམས་ཀྱི་ཆོས་སློབ་གཉེར་ཐད་བཀག་སྡོམ་གྱིས་གྲྭ་པ་ཆོས་སྐོར་དུ་བསྐྱོད་རྒྱུ་གཏན་འགོག་བྱེད་བཞིན་ཡོད།
༣། གྲྭ་བཙུན་རྣམས་རྒྱུན་ལྡན་ཡར་མར་ཕྱོགས་བསྐྱོད་སྐབས་སུའང་རྒྱ་གཞུང་ལ་སྙན་སེང་དགོངས་ཁྲོལ་ལེན་དགོས་པའི་བཟང་བཙོན་གྱི་རྣམ་པར་བསྒྱུར་ནས་གྲྭ་བཙུན་ཚོའི་འགྲོ་བསྐྱོད་རང་དབང་ལ་བཀག་སྡོམ་ནན་མོ་བྱེད་བཞིན་ཡོད།
༤། དགོན་པར་གྲྭ་བཙུན་ས་མིག་སྟོང་བའི་ཐོག་གྲྭ་བཙུན་གསར་པ་བསྡུ་ལེན་སྐབས། བཙན་གྱིས་དམར་ཤོག་དང་རྒྱ་གཞུང་ལ་དགའ་ཞེན་དང་ཁོ་ཚོའི་བཀའ་བཀོལ་ལ་ཉན་མཁན་འདེམས་སྒྲུག་བྱས་ཏེ་གྲྭ་བཙུན་རྣམས་དམར་ཤོག་ཏང་མིའི་ངོ་བོར་བསྒྱུར་བཞིན་ཡོད།
རྒྱ་གཞུང་གིས་དད་ལྡན་མང་ཚོགས་ཀྱི་ཆོས་དང་རིག་གནས་རྒྱུན་འཛིན་བཀག་སྡོམ་དང་དགོན་གྲོང་བར་གྱི་དད་མོས་འབྲེལ་བ་རྩ་གཏོར་གཏོང་བཞིན་པའི་ཐད་ནས།
༡། གཞི་རིམ་མང་ཚོགས་ཀྱིས་དབང་ལུང་དང་གསུང་ཆོས་ཞུ་བར་ཚད་བཀག་ནན་མོ་བཟོས་སྟེ། དད་ལྡན་མང་ཚོགས་ཀྱི་ཆོས་དད་རང་དབང་ལ་བཀག་སྡོམ་བྱེད་བཞིན་ཡོད། ༢། དགོན་སྡེ་དང་གཞི་རིམ་གྲོང་སྡེ་བཅས་སུ་རྟེན་བཞེངས་དང་མ་ཎི་རྡོ་བརྐོས་སོགས་ཆོས་ལུགས་དད་མོས་དང་འབྲེལ་བའི་འཛུགས་བསྐྲུན་མཐའ་དག་ལ་བཀག་སྡོམ་ནན་མོ་བྱས་ཡོད།
༣། དགོན་སྡེ་དང་བླ་སྤྲུལ། གྲྭ་བཙུན་བཅས་ནས་གཞི་རིམ་མང་ཚོགས་ཁྲོད་ཀྱི་རྩོད་རྙོག་འདུམ་སྒྲིག་བྱེད་བཞིན་པའི་སྔར་སྲོལ་བཟང་པོ་བཀག་སྡོམ་བྱས་ཏེ། དད་ལྡན་མང་ཚོགས་དང་བླ་སྤྲུལ་གྲྭ་བཙུན་བཅས་བར་གྱི་དམ་ཚིག་དང་དད་མོས་འབྲེལ་བ་གཅོད་ཐབས་བྱེད་ཀྱིན་ཡོད།
༤། དགོན་སྡེ་དང་བླ་སྤྲུལ། གྲྭ་བཙུན་བཅས་ཀྱིས་བོད་ཀྱི་རིག་གནས་སློབ་གཉེར་ཆེད་བཙུགས་པའི་སློབ་གྲྭ་དང་འཛིན་གྲྭ་སོགས་གཏན་འགོག་བྱས་ཏེ། མང་ཚོགས་ཁྲོད་བོད་ཀྱི་ཆོས་དང་རིག་གནས་རྒྱུན་འཛིན་ཡོང་བར་བཀག་སྡོམ་བྱེད་ཀྱིན་ཡོད། དེ་བཞིན། ཆོས་ལུགས་མི་སྣའི་ཁྲོད་གྲོང་ཚོའི་ཨུ་ཡོན་ལྷན་ཁང་གཉིས་ཀྱི་ཚོགས་མི་དང་། མི་དམངས་འཐུས་མི་ཚོགས་ཆེན་ཀྱི་འཐུས་མི། སྲིད་གྲོས་ཨུ་ཡོན་ ༼གྲྭ་བཙུན་ཕུད།༽ མི་སྣ་གཙོ་གྲས། ནགས་སྲུང་པ་སོགས་ཆོས་སྲིད་གོ་གནས་གཉིས་ལྡན་ཅན་མེད་པ་བཟོ་དགོས་པ། དགོན་པའི་དོ་དམ་བྱེད་མཁན་གཞུང་གི་འབྲེལ་ཡོད་ལས་བྱེད་དང་ཨུ་ཡོན་ལྷན་ཁང་གི་ལས་བྱེད། དགོན་པའི་བླ་སྤྲུལ་དང་གྲྭ་བཙུན་སོགས་ནས། འབྲེལ་ཡོད་ཀྱི་ཡིག་ཆ་རྣམས་གསང་རྒྱ་དམ་པོ་མ་བྱས་པར་ཕྱི་ལོགས་སུ་གྱར་འཇུག་མཁན་ལ་ཁྲིམས་གཅོད། དེར་མ་ཟད་དགོན་སྡེ་དང་མང་ཚོགས་ཁྲོད་དོལ་རྒྱལ་བསྟེན་གསོལ་བཀག་སྡོམ་གྱིས་རྩོད་རྙོག་བཟོ་མཁན་ལ་ཆད་གཅོད་སོགས། ཆོས་ལུགས་དད་མོས་རང་དབང་བཀག་སྡོམ་བྱ་ཐབས་སྐོར་གྱི་ལས་དོན་སྣ་ཚོགས་ཤིག་ཚུད་ཡོད་པ་རེད།
གཞན་ཡང་། ཡིག་ཆ་དེ་ལས་གསལ་བོར་མཐོང་ཐུབ་པ་ནི། རྒྱ་གཞུང་གིས་ཆོས་ལུགས་དད་མོས་རང་དབང་བཀག་སྡོམ་དང་གྲྭ་བཙུན་ཕྱིར་ཕུད་ཀྱི་ཁྲིམས་དང་སྒྲིག་གཞི་ཆེད་དུ་བཟོས་ཐོག རིག་གསར་ལྟར་སྤྱི་ཚོགས་ལས་འགུལ་གྱི་ངོ་བོའི་སྒོ་ནས། ཐབས་ལམ་རིམ་པ་ལྔ་རུ་བགར་བའི་ཐོག་ནས་བཀག་སྡོམ་ལས་འགུལ་དེ་ལག་བསྟར་ནན་མོ་བྱེད་བཅུག་ཡོད།
༡། རྫོང་གི་ཐད་གཏོགས་ལས་ཁུངས་འཐབ་ཕྱོགས་གཅིག་གྱུར་ཁང་དང་དམར་ཤོག་རྩ་འཛུགས་སྡེ་ཁག ཆོས་དོན་ལས་ཁུངས། ནོར་སྲིད་ལས་ཁུངས། ཞང་དང་གྲོང་རྡལ་རིམ་པའི་སྲིད་གཞུང་། དགོན་པར་བཅའ་སྡོད་ལས་དོན་རུ་ཁག་སོགས། སྲིད་གཞུང་གི་འབྲེལ་ཡོད་སྡེ་ཁག་དང་ལས་བྱེད་རྣམས་ཀྱིས་ཆོས་ལུགས་བཀག་སྡོམ་ལས་འགུལ་ལྷོད་ཡངས་བཏང་ཚེ། ཁོང་ཚོར་སྲིད་གཞུང་གི་ངོས་ནས་ཉེན་བརྡ་གཏོང་བ་དང་མིང་ཐོ་ནག་པོར་ཐོ་འགོད་བྱེད་པ། ཕོགས་དངུལ་མེད་པ་བཟོ་བ། ལས་གནས་ནས་ཕྱིར་ཕུད་གཏོང་བ་སོགས་འཇིགས་སྐུལ་དང་གནོན་ཤུགས་སྤྲོད་ནས་ལས་འགུལ་དེ་སྤེལ་འཇུག་གི་ཡོད།
༢། དགོན་སྡེ་དང་ལྷ་ཁང་། རི་ཁྲོད་བཅས་ནས་ལས་འགུལ་དེ་ལག་བསྟར་དང་ལེན་མཐའ་འཁྱོལ་མ་བྱས་ཚེ། དགོན་པ་སྒོ་བརྒྱབ་སྟེ་གྲྭ་བཙུན་ཡོངས་ལ་ཆོས་ལུགས་སློབ་གསོ་སྤེལ་བ་དང་། འབྲེལ་ཡོད་བླ་སྤྲུལ་རྣམས་ཀྱི་བླ་ཐོབ་མེད་པ་བཟོ་བ་དང་ཕྱིར་ཕུད་གཏོང་བ། དགོན་པའི་ཨུ་ཡོན་ལྷན་ཁང་གི་ལས་བྱེད་ལ་ཟླ་ ༦ རིང་ཕོགས་དངུལ་མེད་པ་བཟོ་བ་དང་ཟླ་ ༢ རིང་ཁྲིམས་ལུགས་སློབ་གསོ་མྱོང་འཇུག་རྒྱུ། དགོན་པའི་སྔར་ཡོད་གྲྭ་བཙུན་གྲངས་ཚད་ཉུང་འཕྲི་བྱེད་པ། ལོ་ ༤ རིང་ཆ་རྐྱེན་ཚང་པའི་གྲྭ་བཙུན་ཚོགས་ཞུགས་མེད་པ་བཟོ་རྒྱུ། དགོན་པའི་དཔལ་འབྱོར་གྱི་ཡོང་སྒོ་དང་གྲྭ་བཙུན་སྤྱིའི་འཚོ་སྣོན་རོགས་དངུལ་གཅོད་པ་སོགས་ཀྱི་གནོན་ཤུགས་ཐབས་ལམ་སྤྱོད་བཞིན་ཡོད།
༣། གྲྭ་བཙུན་མི་སྒེར་གྱི་ངོས་ནས་རྒྱ་གཞུང་གི་ཅི་བཤད་དང་ལེན་མ་བྱས་ཚེ། གྲྭ་པའི་འཚོ་སྣོན་རོགས་དངུལ་མེད་པ་བཟོ་བ་དང་། བཙན་ཤུགས་ཀྱིས་ཟླ་ ༦ ལྷག་རིང་ཆབ་སྲིད་སློབ་གསོ་མྱོངས་འཇུག་པ། ཡང་ན་དགོན་པ་ནས་ཕྱིར་ཕུད་གཏོང་བ། ཐ་ན། འཇུ་བཟུང་བཀག་སྡོམ་དང་བཙོན་འཇུག་ཁྲིམས་ཆད་གཅོད་པ་སོགས་ཀྱི་གནོན་ཤུགས་སྤྲོད་བཞིན་ཡོད།
༤། སྡེ་བ་སོ་སོའི་ངོས་ནས་རྒྱ་གཞུང་གི་སྒྲིག་བཀོད་ལྟར་ཆོས་ལུགས་བཀག་སྡོམ་གྱི་ལས་སྒོ་དག་ལག་བསྟར་མ་བྱས་པར་ལྷོད་ཡངས་བཏང་ཚེ། སྡེ་དམངས་ལྷན་ཁང་གི་སྡེ་དཔོན་དང་སྡེ་བའི་དམར་ཤོག་རྩ་འཛུགས་ཀྱི་མགོ་གཙོས་ལས་བྱེད་རྣམས་ལ། ཉེན་བརྡ་གཏོང་བ་དང་མིང་ཐོ་ནག་པོར་ཐོ་འགོད་བྱེད་པ། ཕོགས་དངུལ་གཅོད་པ། ལས་གནས་ནས་ཕྱིར་ཕུད་གཏོང་བ། ལོ་ ༢ རིང་དབྱར་རྩ་བརྐོ་འཐུ་བྱེད་མི་འཇུག་པ་སོགས་ཀྱི་གནོན་ཤུགས་སྤྲོད་ཀྱིན་ཡོད།
༥། འབྲེལ་ཡོད་ཁྱིམ་ཚང་སོ་སོའི་ངོས་ནས་རྒྱ་གཞུང་གི་ཆོས་ལུགས་བཀག་སྡོམ་གྱི་སྒྲིག་གཞི་ཁག་དང་ལེན་མ་བྱས་ཚེ། ཁྱིམ་བདག་ལ་ཟླ་ ༦ རིང་བཙན་ཤུགས་ཀྱིས་ཆབ་སྲིད་སློབ་གསོ་མྱོང་འཇུག་རྒྱུ། ལོ་ ༢ ནས་ ༣ བར་ཁྱིམ་ཚང་དེར་དབྱར་རྩྭ་དགུན་འབུ་བརྐོ་འཐུ་བྱེད་མི་འཇུག་པ་དང་། སྲིད་གཞུང་གི་སྤྲོད་བཞིན་པའི་འཚོ་སྣོན་རྣམས་མེད་པ་བཟོ་བ། ཐ་ན། ཁྱིམ་བདག་འཇུ་བཟུང་བཀག་ཉར་དང་བཙོན་འཇུག་ཁྲིམས་ཐག་གཅོད་པ་སོགས་ཀྱི་གནོན་ཤུགས་སྤྲོད་བཞིན་ཡོད།།
