༢༠༡༥ ཟླ་ ༡༡ ཚེས་ ༡༨ རེས་གཟའ་ལྷག་པ།
༄༅། །ཕྱི་ལོ་ ༢༠༡༥ ཟླ་ ༡༡ ཚེས་ ༡༡ ཉིན་ནང་སྲིད་དྲུང་ཆེ་འཁོར་ལྷ་ཚང་བསོད་ནམས་སྟོབས་རྒྱལ་ལགས་ཀྱིས་རྒྱ་གར་ལྷོ་ཕྱོགས་བོད་མིའི་གཞིས་ཆགས་ཁག་གཅིག་གི་ནང་གཞུང་འབྲེལ་ཕྱོགས་ཕེབས་ལེགས་གྲུབ་ཀྱིས་རྡ་སར་ཕེབས་འབྱོར་གནང་ཡོད།
དེ་ཡང་ཕྱི་ཟླ་ ༡༠ ཚེས་ ༢༩ ཉིན་གྱི་ཕྱེད་ཡོལ་ཙམ་ལ་ནང་སྲིད་དྲུང་ཆེས་ཀོ་ལི་གལ་དོན་ལྡན་གླིང་བོད་མིའི་གཞིས་ཆགས་ཀྱི་སྨོན་ལམ་ཚོགས་སའི་སྡིངས་ཆ་གསར་རྒྱག་ལས་གཞི་འགྲོ་བཞིན་པ་དེར་གཟིགས་སྐོར་གྲུབ་མཚམས། མི་མང་ལྷན་འཛོམས་ཐོག་རྒྱ་གར་དབུས་གཞུང་གིས་གཏན་འབེབས་གནང་བའི་བོད་མིར་མཐུན་རྐྱེན་སྦྱོར་སྤྲོད་བྱེད་ཕྱོགས་ཀྱི་སྲིད་བྱུས། ཕྱི་ལོ་ ༢༠༡༤ ཞེས་པའི་དགེ་མཚན་སྐོར་འགྲེལ་བརྗོད་གནང་བ་མ་ཟད། ས་ཞིང་འདེབས་ལས་བྱེད་མཁན་གཞོན་སྐྱེས་ཁག་གཅིག་དང་རྒས་གསོ་ཁང་། དེ་བཞིན་གྲོང་སྡེ་འགའ་རེར་གཟིགས་ཞིབ་གནང་སྟེ་གཞིས་མི་ཁག་གཅིག་དང་ལྷན་གླེང་མོལ་གནང་བ་དང་སྦྲགས་དྲུང་ཆེ་མཆོག་ཧུན་སུར་རབ་རྒྱས་གླིང་གཞིས་ཆགས་སུ་ཕེབས་ཐོན་གནང་འདུག
དྲུང་ཆེ་མཆོག་ཧུན་སུར་རབ་རྒྱས་གླིང་གཞིས་ཆགས་ཀྱི་གཞུང་ལམ་རྒྱ་སྐྱེད་དང་སྤྱི་ཁང་གསར་རྒྱག དེ་བཞིན་གླང་པོ་ཆེས་བསུན་གཙེར་བཟོ་བཞིན་པའི་དཀའ་ངལ་ལ་གདོང་ལེན་ཆེད་ས་དོང་བྲུས་ཡོད་པ་རྣམས་ལ་གཟིགས་སྐོར་གནང་བ་མ་ཟད། སྐྱེད་ཆུང་བུན་གཡར་ཐོབ་མཁན་ཚོས་བུན་གཡར་མུ་མཐུད་གནང་རྒྱུའི་འབོད་སྐུལ་ཞུས་པ་བསམ་ཞིབ་གནང་རྒྱུའི་ཁས་ལེན་གནང་འདུག དེ་ཉིན་གྱི་ཕྱེད་ཡོལ་ཆུ་ཚོད་ ༡།༣༠ ཙམ་ལ་ཅོ་ཀུར་བོད་མིའི་གཞིས་ཆགས་སུ་ཕེབས་འབྱོར་གྱིས་མངའ་སྡེ་གཞུང་གིས་རོགས་སྐྱོར་གནང་བའི་གཞུང་ལམ་ཉམས་གསོའི་ལས་གཞིར་གཟིགས་སྐོར་གནང་། དེ་རྗེས་འཆར་འགོད་ལྷན་ཁང་གི་འགན་འཛིན་དཀོན་མཆོག་བརྩོན་འགྲུས་ལགས་དང་ལྷན་སྦེལ་ཀོབ་བོད་མིའི་གཞིས་ཆགས་སུ་སྲི་ཞུ་བའི་བགྲེས་ཤག་གསར་རྒྱག་གི་ལས་གཞིར་གཟིགས་སྐོར་དང་འབྲེལ་དགོངས་འཆར་ཡང་གནང་འདུག དེ་བཞིན་མངའ་སྡེའི་གཞུང་གིས་རོགས་སྐྱོར་གནང་ཐོག་གཞིས་གྲོང་གསུམ་པ་དང་བཀྲ་ཤིས་ལྷུན་པོའི་དགོན་པ་གསར་པའི་དབར་མགྱོགས་ལམ་བཟོ་སྐྲུན་གྱི་ལས་གཞིར་གཟིགས་སྐོར་ཡང་གནང་ཡོད།
ཕྱི་ཟླ་ ༡༡ ཚེས་ ༤ ཉིན་ནང་སྲིད་དྲུང་ཆེ་དང་ལུགས་བདེ་གཉིས་ཀྱི་ས་གནས་འགོ་འཛིན་རྣམ་པ། མཉམ་འབྲེལ་ཚོགས་གཙོ་རྣམ་པ་བཅས་ལྷན་བཅར་གྱིས་སྦེལ་ཀོབ་གཞིས་ཆགས་སུ་ཡོད་པའི་༸གོང་ས་མཆོག་གི་ཕོ་བྲང་ཉམས་གསོ་དང་རྒྱ་སྐྱེད་གནང་བཞིན་པའི་ལས་གཞིར་གཟིགས་སྐོར་གྲུབ་རྗེས་ཀ་ཝེ་རི་འཐུང་ཆུའི་ལས་གཞིར་ Cauvery River drinking water project གཟིགས་སྐོར་གནང་། སྦེལ་ཀོབ་ནས་ཕེབས་ཐོན་མ་གནང་གོང་སླར་ཡང་བོད་ནས་གསར་དུ་འབྱོར་བའི་བོད་མི་རྣམས་ཀྱི་ཆེད་སྡོད་ཁང་གསར་རྒྱག་གི་ལས་གཞིར་གཟིགས་སྐོར་གནང་། ཕྱི་ཚེས་ ༥ ཉིན་ལུགས་བསམ་དང་བདེ་སླར་གཉིས་ཀྱི་ས་གནས་འགོ་འཛིན་རྣམ་པ་ལྷན་བཅར་ཞུས་ཐོག་མེ་སོར་གྱི་རྫོང་དཔོན་དང་ལྷན་མཇལ་འཕྲད་ཀྱིས་ཕྱི་ལོ་ ༢༠༡༤ བོད་མིར་མཐུན་རྐྱེན་སྦྱོར་སྤྲོད་བྱེད་ཕྱོགས་ཀྱི་སྲིད་བྱུས་ཕྱི་ལོ་ ༢༠༡༤ དགོངས་དོན་ས་ཞིང་བོགས་གཏོང་དང་། ས་ཐོབ་ལག་འཛིན་དང་འབྲེལ་བའི་སྐོར་ཚོགས་འདུ་འཚོགས་སྐབས་དྲུང་ཆེ་མཆོག་གིས་རྫོང་དཔོན་བརྒྱུད་མངའ་སྡེའི་གཞུང་མང་གཉིས་ཀྱིས་ད་བར་ས་གནས་བོད་མི་སྐྱབས་བཅོལ་བ་རྣམས་ལ་མཐུན་འགྱུར་རོགས་རམ་རྒྱ་ཆེ་གནང་དང་གནང་བཞིན་པར་ཐུགས་ཆེ་ཞུས་འདུག
ཕྱི་ཚེས་ ༧ ཉིན་ནང་སྲིད་དྲུང་ཆེས་མོན་གྷོ་འདོད་རྒུ་གླིང་བོད་མིའི་གཞིས་ཆགས་སུ་མི་མང་ལ་གཞིས་ཆགས་སྲ་བརྟན་དང་བོདམིའི་ཐུན་མོང་མ་ཡིན་པའི་ངོ་བོ་བདག་གཅེས་བྱེད་དགོས་སྐོར་སོགས་ཀྱི་གསུང་བཤད་གནང་ཡོད། དེ་བཞིན་ཁོང་གིས་མང་ཚོགས་རྣམས་ལ་གསུང་བཤད་ནམ་ཡིན་སྐབས་ཀར་ན་ཊ་ཀའི་མངའ་སྡེ་གཞུང་ལ་ཐུགས་རྗེ་ཆེ་ཞུས་པ་དང་ཆབས་ཅིག བོད་མི་ཞིང་པ་དང་འབྲེལ་ཡོད་རྣམས་ལ་མངའ་སྡེ་གཞུང་གིས་གནང་བའི་ས་ཞིང་དེ་དག་ཐོག་འབྱུང་འགྱུར་རྙོག་གྲའི་རིགས་མི་ཡོང་ཆེད་ཆེད། ས་གནས་བོད་མི་ཚོས་ས་ཞིང་བག་མེད་དུ་མ་བཏང་བར་གང་ཐུབ་བཀོལ་སྤྱོད་གནང་དགོས་པའི་སྐུལ་མ་ཡང་གནང་འདུག ཕྱེད་ཡོལ་ནང་སྲིད་དྲུང་ཆེས་ས་གནས་ས་ཁང་ཚོགས་ཆུང་རྣམས་ལ་ས་ཁང་གི་སྒྲིག་གཞི་ཁ་གསལ་ངོ་སྤྲོད་གནང་ཡོད། དེ་རྗེས་གཞིས་མི་རྣམས་ཀྱི་བདེ་དོན་ཆེད་ཚོང་ཁང་གསར་རྒྱག་གི་ལས་གཞིར་གཟིགས་སྐོར་གནང་ཡོད།
ཕྱི་ཚེས་ ༩ ཉིན་གྱི་སྔ་དྲོ་སྐྱེ་ལྡན་སྲོལ་རྒྱུན་གྱི་ལམ་ནས་འདེབས་ལས་བྱས་པའི་ཞིང་འབྲས་ཐོན་ཁུངས་ངང་ལག་སོགས་ཀྱི་ལྡུམ་རར་གཟིགས་སྐོར་ཕེབས་ཏེ་ཞིང་པ་རྣམས་ཀྱིས་དཀའ་ལས་བརྒྱབ་པའི་གྲུབ་འབྲས་ལ་བསྔགས་བརྗོད་གནང་ཡོད། ཕྱི་ཚེས་ ༡༠ ཉིན་སྦེང་ལོར་དུ་རྟེན་གཞི་བྱས་པའི་ནི་ལ་མངྒ་ལ་ལས་རིགས་སྦྱོང་བརྡར་བསྟི་གནས་ཁང་དུ་འཚམས་གཟིགས་གནང་སྟེ་སྦྱོང་བརྡར་གནང་བཞིན་པའི་སློབ་མ་ཚོར་གོ་སྐབས་དམ་འཛིན་གནང་གལ་དང་། སྦྱོར་བརྡར་རིང་དུས་ཚོད་ཆུད་ཟོས་སུ་མ་བཏང་བར་ཧུར་ཐག་གནང་རྒྱུ་གལ་ཆེ་ཡིན་སྐོར་གསུངས་ཡོད།
