༢༠༡༥ ཟླ་ ༡༠ ཚེས་ ༢༢ རེས་གཟའ་ཕུར་བུ།
༄༅། །ཕྱི་ལོ་ ༢༠༡༥ ཟླ་ ༡༠ ཚེས་ ༢༢ ཉིན་ཡུ་རོབ་གྲོས་ཚོགས་ European Parliament ཀྱི་འགྲོ་བ་མིའི་ཐོབ་ཐང་སྲུང་སྐྱོབ་ཚན་པས་གོ་སྒྲིག་འོག་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཐོག་ཉན་ཞིབ་གནང་སྐབས། སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་གི་ཚ་བོ་བློ་བཟང་ཚེ་རིང་ལགས་ཀྱིས་རིན་པོ་ཆེ་མཆོག་རྒྱའི་བཙོན་ཁང་ནང་གློ་བུར་དོགས་གཞིའི་འོག་འདས་གྲོངས་སུ་གྱུར་བའི་གནད་དོན་དེར་འཕྲལ་མར་དྲང་བདེན་རྟོག་ཞིབ་དགོས་པའི་འབོད་སྐུལ་ཞུས་འདུག རིན་པོ་ཆེ་མཆོག་ཕྱི་ལོ་ ༢༠༡༥ ཟླ་ ༧ ཚེས་ ༡༢ ཉིན་གནས་སྟངས་དོགས་གཞི་ཧ་ཅང་ཆེན་པོའི་འོག་ནས་རྒྱའི་གྲོང་ཁྱེར་ཁྲེན་ཏུའི་ཉེ་འགྲམ་གྱི་བཙོན་ཁང་ནང་གློ་བུར་དུ་འདས་གྲོངས་སུ་གྱུར་བར་བརྟེན། རྒྱ་ནག་གཞུང་གིས་རིན་པོ་ཆེ་མཆོག་ཆེད་མངགས་བཀྲོང་པའམ་ཡང་ན་སྣང་མེད་དུ་བཞག་ནས་སྐུ་གྲོངས་བཅུག་པ་ཞིག་རེད། ཅེས་རིན་པོ་ཆེ་མཆོག་གི་ནང་མི་སྤུན་མཆེད་རྣམས་ཀྱིས་རྒྱ་ནག་གཞུང་ལ་ཉེས་འཛུགས་བྱས་ཡོད། དེ་ཡང་བློ་བཟང་ཚེ་རིང་ལགས་ནི་ཆུང་དུས་རིན་པོ་ཆེ་མཆོག་གིས་བསྐྱངས་ཤིང་ཁོང་གིས་ཡུ་རོབ་གྲོས་ཚོགས་ནང་གསུངས་པ་ལྟར་ན། རིན་པོ་ཆེ་མཆོག་ལ་རྒྱ་ནག་གཞུང་གིས་མ་ཉེས་ཁག་གཡོག་བྱས་པ་ཞིག་རེད། ངའི་ཨ་ཁུ་དམ་པ་ཁོང་གིས་༸གོང་ས་ཏཱ་ལའི་བླ་མ་མཆོག་ལ་དད་གུས་དང་བཀའ་གསུང་ཅི་སྒྲུབ་ཞུ་མཁན་ཞིག་ཡིན་སྟབས་རྒྱ་ནག་གཞུང་གིས་གཞི་མེད་ཁག་དཀྲི་བྱས་ནས་བཙོན་དུ་བཅུག་པ་རེད། ཨ་ཁུ་ཞིང་གཤེགས་ཁོང་གིས་ས་གནས་བོད་མི་ཚོའི་སྤྱི་ཚོགས་དང་དཔལ་འབྱོར། ཁོར་ཡུག དེ་བཞིན་ཆོས་དད་རང་དབང་གི་ཐོབ་ཐང་སྲུང་སྐྱོབ་ཆེད་ཕྱག་ལས་རྒྱ་ཆེ་གནང་ཡོད།
ལྷག་པར་རྒྱ་ནག་གཞུང་གིས་བོད་ནང་ཤིང་ནགས་བག་མེད་ཐོག་གཅོད་བྲེག་བྱས་པ་དེར་རིན་པོ་ཆེ་མཆོག་གིས་སྐྱོན་བརྗོད་ཤུགས་ཆེ་གནང་མྱོང་ཡོད། ཐེངས་འདིར་ངས་ནང་མི་ཡོངས་ཀྱི་ཚབ་ཞུས་ནས་ཡུ་རོབ་གྲོས་ཚོགས་ཀྱིས་རྒྱབ་སྐྱོར་གནང་བ་དེར་སྡྷིང་ཐག་པ་ནས་བཀའ་དྲིན་ཆེ་ཞུ་རྒྱུ་ཡིན། ངའི་ཨ་ཁུ་རིན་པོ་ཆེ་མཆོག་རྒྱའི་བཙོན་ཁང་ནང་དོགས་གཞི་ཧ་ཅང་ཆེ་བའི་གནས་སྟངས་འོག་འདས་གྲོངས་སུ་གྱུར་བ་དེས། བོད་མི་ཆབ་སྲིད་བཙོན་པ་རྣམས་བཙོན་ཁང་ནང་སྡུག་སྦྱོང་དང་འཇིགས་སྣང་ཧ་ཅང་ཆེ་བའི་གནས་སྟངས་འོག་དཀའ་སྡུག་ཇི་འདྲ་མྱོང་བཞིན་ཡོད་པ་ར་སྤྲོད་གསལ་པོ་ཐུབ་ཡོད། བོད་མི་རྣམས་ཀྱིས་༸གོང་ས་མཆོག་བོད་དུ་གདན་འདྲེན་ཞུ་དགོས། ཞེས་འབོད་ནས་ཞི་བའི་ལམ་ནས་སྐད་འབོད་བྱེད་སྐབས་རྒྱ་མིས་འཛིན་བཟུང་བྱེད་བཞིན་ཡོད། བོད་མི་ཚོར་འགྲོ་བསྐྱོད་ཀྱི་རང་དབང་མེད། གལ་ཏེ་བོད་མི་སུ་ཞིག་གིས་གཞུང་ལམ་ཐོག་ཞི་བའི་ཐོག་ནས་ངོ་རྒོལ་སྐད་འབོད་བྱས་ཚེ་ཞི་རྒོལ་བ་རང་ཉིད་ཙམ་མ་ཟད། ཁོང་གི་ནང་མི་སྤུན་མཆེད་རྣམས་དང་། སྐབས་རེ་གྲོང་པ་ཡོངས་རྫོགས་ལ་ངན་ཁག་དཀྲི་ནས་སུན་གཙེར་བཟོ་བཞིན་ཡོད། དེར་བརྟེན་ངས་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་གི་ནང་མིའི་ཚབ་ཞུས་ནས། ཡུ་རོབ་གྲོས་ཚོགས་ལ་རིན་པོ་ཆེ་མཆོག་གིས་གཙོས་བོད་མི་ཆབ་སྲིད་བཙོན་པ་བཙོན་ཁང་ནང་དུ་རྒྱ་མིས་ཆེད་མངགས་བཀྲོངས་པའམ་ཡང་ན་སྣང་མེད་འོག་ལྷོད་གཡེང་བཏང་ནས་འདས་གྲོངས་སུ་གྱུར་བའི་གནས་ཚུལ་ལ་འཕྲལ་མར་རྟོག་ཞིབ་གནང་རོགས། ཞེས་ཛ་དྲག་འབོད་སྐུལ་ཞུ་རྒྱུ་དང་། བོད་ནང་དུ་ཆོས་དད་རང་དབང་དགོས་པ་དང་། བོད་སྐད་དེ་རྒྱ་སྐད་ཚབ་ཏུ་སློབ་གྲྭའི་ནང་སློབ་ཁྲིད་བརྒྱུད་ལམ་དུ་འཇོག་དགོས་པ། བོད་མི་འབྲོག་པ་རྣམས་བཙན་དབང་འོག་ནས་འབྲོག་ས་ནས་སྤོ་འཇུག་རྒྱུའི་ལས་གཞི་འཕྲལ་མར་མཚམས་འཇོག་ཡོང་བའི་འབོད་སྐུལ་ཞུས་པ་དང་། བོད་ཀྱི་གནད་དོན་གསལ་ཆེད་རྒྱ་ནག་གཞུང་ལ་༸གོང་ས་མཆོག་དང་ལྷན་གྲོས་མོལ་བསྐྱར་མཐུད་དགོས་པའི་རེ་འདུན་འདོན་རོགས། ཞེས་གསལ་བཤད་ཞིབ་རྒྱས་གནང་ཐུབ་པ་བྱུང་འདུག།།
