ཕྱི་ལོ་ ༢༠༡༥ ཟླ་ ༩ ཚེས་ ༡ རེས་གཟའ་མིག་དམར།
༄༅། །དུས་གསུམ་སངས་རྒྱས་ཡོངས་ཀྱི་མཛད་འཕྲིན་ངོ་བོ་གཅིག་ཏུ་འདུས་པ། འགྲོ་བ་ལྷ་དང་བཅས་པའི་བྱམས་བརྩེའི་མགོན་སྐྱབས། འཛམ་གླིང་ཞི་བདེའི་དེད་དཔོན། ས་སྟེང་༸རྒྱལ་བསྟན་ཡོངས་རྫོགས་ཀྱི་མངའ་བདག བོད་མིའི་འདི་ཕྱི་གཉིས་ཀྱི་བླ་ན་མེད་པའི་ལྷ་བསྐལ། སྤྱི་ནོར་༸གོང་ས་༸སྐྱབས་མགོན་སྐུ་ཕྲེང་བཅུ་བཞི་པ་ཆེན་པོ་མཆོག་ཕྱི་ལུགས་ལྟར་དགུང་གྲངས་ ༨༠ ཐམ་པར་ཕེབས་པའི་སྐུའི་གྱ་སྟོན་དང་བཀའ་དྲིན་རྗེས་དྲན་གྱི་ལོ་རུ་རང་རེའི་བཙན་བྱོལ་གཞུང་མང་སྤྱི་ཚོགས་ཙམ་མ་ཟད། འཛམ་གླིང་ཡོངས་ནས་མི་རིགས་དང་ཚོགས་སྡེ་འདྲ་མིན་གྱིས་དུས་ཚིགས་སྲུང་བརྩི་ཞུ་བཞིན་པ་ལྟར། རྒྱལ་མཆོག་སྐུ་ཕྲེང་རིམ་བྱོན་གྱི་ལྷ་འབངས་སུ་གཏོགས་ཤིང་དད་དམ་གསེར་གྱི་མདུད་བརྒྱ་གྲོལ་མྱོང་མེད་པའི་བར་ཁམས་རོང་པོ་ཤོག་ཀ་ཕྱེད་བརྒྱད་ཀྱི་བྱེས་འབྱོར་སེར་སྐྱ་མི་མང་ཡོངས་ནས་མགོན་པོ་མཆོག་གི་བཀའ་དྲིན་སྙིང་དུ་བཅངས་ནས་སྐུ་ཚེ་རྒྱལ་བ་ཚེ་དཔག་མེད་ཀྱི་ངོ་བོར་རྟག་ཏུ་གནས་ཕྱིར་དམ་གཙང་བརྟེན་འབྲེལ་གྱི་བརྟན་བཞུགས་བསྟར་འབུལ་ཞུ་འཐུས་གསེར་སྙན་སྒྲོན་འབུལ་ཞུས་དོན་ལྟར། བོད་རྒྱལ་ལོ་ ༢༡༤༢ བོད་ཟླ་ ༩ ཚེས་པ་ ༢༢ ཕྱི་ལོ་ ༢༠༡༥ ཟླ་བ་ ༡༡ ཚེས་ ༣ རེས་གཟའ་མིག་དམར་སྟེ་སྟོན་པ་ཐུབ་པའི་དབང་པོ་རྩ་གསུམ་ལྷ་ཡི་ཡུལ་ནས་མི་ཡུལ་དུ་སླར་ཡང་ཕེབས་བྱོན་མཛད་པའི་སྐལ་བཟང་གི་དུས་ཆེན་ཁྱད་པར་ཅན་གྱི་ཉིན་མོར་བཞུགས་སྒར་རྡ་ས་ཐེག་ཆེན་ཆོས་གླིང་གཙུག་ལག་ཁང་དུ་བཀྲ་ཤིས་པའི་རྟེན་འབྲེལ་གྱི་རེ་ཁ་ཡོངས་སུ་ཁེངས་པའི་བརྟན་བཞུགས་བསྟར་འབུལ་ཞུ་རྒྱུའི་བསོད་ནམས་ཀྱི་གོ་བསྐལ་སྲིད་ན་བརྙེད་དཀའ་བའི་བཀའ་བཞེས་བཟང་པོ་སྨིན་སྩལ་བྱུང་བ་ལྟར། རྒྱ་ཆེ་བའི་ཕྱི་ནང་སྤུན་ཟླ་མི་རིགས་རྣམས་དང་ལྷག་པར་དུ་འཛམ་གླིང་ཡུལ་གྲུ་གང་སར་བཞུགས་པའི་རང་ཅག་རོང་པོ་ཤོག་ཀ་ཕྱེད་བརྒྱད་ཀྱི་ཁོངས་གཏོགས་མི་མང་ངམ་བརྟན་བཞུགས་ཀྱི་དད་ལྡན་སྦྱིན་བདག་རྣམ་པ་ལྷན་རྒྱས་གོང་གསལ་དུས་བཟང་ཉིན་དགའ་དད་སྤྲོ་གསུམ་གྱིས་ཚང་འཛོམས་ངེས་གནང་ཡོང་བ་དགོས་པའི་ཡོངས་ཁྱབ་གསལ་བསྒྲགས་སུ། བར་ཁམས་རོང་པོ་ཤོག་ཀ་ཕྱེད་བརྒྱད་ཀྱི་བརྟན་བཞུགས་གོ་སྒྲིག་ཚོགས་ཆུང་ནས། ཕྱི་ལོ་ ༢༠༡༥ ཟླ་ ༨ ཚེས་ ༢༣ ལ། །
