༢༠༡༥ ཟླ་ ༩ ཚེས་ ༢༣ རེས་གཟའ་པ་སངས།

༄༅། །མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་འདུ་འཚོགས་བཞིན་པ་དང་བསྟུན། ཨ་རི་དང་ཡུ་རོབ་སྐུ་ཚབ་གཉིས་ཀྱི་ངོས་ནས་བོད་ནང་གི་ཛ་དྲག་གནས་སྟངས་སྐོར་གླེང་སློང་གནང་ཡོད་པ་མ་ཟད། རྒྱ་ནག་གི་འགྲོ་བ་མིའི་ཐོབ་ཐང་གི་གནས་སྟངས་ལ་ནུབ་ཕྱོགས་རྒྱལ་ཁབ་ཀྱི་སྲིད་གཞུང་མང་པོས་སྐྱོན་བརྗོད་ཤུགས་ཆེ་བྱས་འདུག དེ་ཡང་ཡུ་རོབ་མཐུན་ཚོགས་དང་ཨ་རིའི་མགྲིན་ཚབ་པས་བོད་དང་ཤིན་ཅང་གཉིས་ཀྱི་ནང་བརྟན་ལྷིང་མེད་པའི་རྒྱུ་རྐྱེན་གང་ཡིན་རྩད་གཅོད་ཀྱིས་གྲངས་ཉུང་མི་རིགས་དེ་དག་དང་ལྷན་དུ་གྲོས་མོལ་བྱེད་དགོས་པ་དང་། རྒྱ་ནག་གི་ས་ཁུལ་ཁག་གི་ནང་འགྲོ་བ་མིའི་ཐོབ་ཐང་རྩོད་ལེན་པ་མང་པོ་ཞིག་འཛིན་བཟུང་བྱེད་བཞིན་པར་སྐྱོན་བརྗོད་དང་། སྨྲ་བརྗོད་དང་མཐུན་ཚོགས་རང་དབང་སྲུང་སྐྱོབ་བྱས་པའི་རྐྱེན་གྱིས་འཛིན་བཟུང་བྱས་པ་དེ་དག་གང་མགྱོགས་གློད་བཀྲོལ་དགོས་པའི་གསུང་བཤད་གནང་བའི་ནང་།

ཨ་རིའི་སྐུ་ཚབ་སྐུ་ཞབས་ཀེ་ད་ཧར་པར་ Keith Harper ལགས་ཀྱིས་གཏམ་བཤད་གནང་དོན། འགྲོ་བ་མིའི་ཐོབ་ཐང་ཐོག་རྒྱ་ནག་གཞུང་གིས་དོ་སྣང་བྱ་དགོས་པ་དང་། འདི་ལོ་ཕྱི་ཟླ་བདུན་པ་ནས་བཟུང་སྟེ་རྒྱ་ནག་གཞུང་གིས་འགྲོ་བ་མིའི་ཐོབ་ཐང་རྩོད་ལེན་པ་ཁྲིམས་དཔོན་ ༣༠༠ ཙམ་བཀག་ཉར་བྱས་པ་དང་། རྒྱ་ནག་གཞུང་གིས་དོ་དམ་བཀག་ཉར་འོག་ད་དུང་གནས་བཞིན་པའི་འགྲོ་བ་མིའི་ཐོབ་ཐང་རྩོད་ལེན་པ་ ཨལ་ཧམ ཏོ་ཌི་ལགས་དང་། ཞོགས་ལྗང་། ཀྲང་ཀ་ཧེ་བཅས་མི་ ༢༧ འཕྲལ་དུ་གློད་བཀྲོལ་དགོས་པ་དང་། རྒྱ་ནག་གཞུང་གིས་བོད་དང་ཤིན་ཅང་གི་ཆོས་ཕྱོགས་ཐོག་དམ་བསྒྲགས་བྱས་པ་དང་། རྒྱ་ནག་གི་ཌེ་ཇང་ས་གནས་སུ་ཡེ་ཤུ་ལྷ་ཁང་རྩ་གཏོར་བཏང་བ་དེ་དག་མཚམས་འཇོག་དགོས་པའི་རེ་འདུན་བཏོན་ཡོད། གནད་དོན་དེ་དག་ནི་རྒྱལ་སྤྱིའི་ཁྲིམས་ལུགས་ཀྱི་གནས་འབབ་དང་འགལ་ཡོད། ཅེས་གཏམ་བཤད་གནང་འདུག

དེ་བཞིན་ཡུ་རོབ་ཁུལ་གྱི་ཇར་མན་དང་། དབྱིན་ཡུལ། སུད་སི། ནེ་ཐར་ལེན་ཌི་སོགས་རྒྱལ་ཁབ་ཁག་གི་སྐུ་ཚབ་རྣམས་ནས་ཀྱང་རྒྱ་ནག་གཞུང་ལ་སྐྱོན་བརྗོད་བྱས་འདུག ཕྱོགས་མཚུངས་ཐེངས་འདིའི་ཚོགས་འདུའི་སྐབས་འཇིག་ཉེན་མི་རིགས་སྲུང་སྐྱོབ་ཚོགས་པས་ Society for Threatened Peoples ཚབ་ཞུས་ཏེ་སུད་སིའི་སྐུ་ཚབ་དོན་ཁང་གི་ཟླ་བ་དོན་གྲུབ་ལགས་ཀྱིས་ཀྱང་བོད་དོན་སྐོར་ཡིག་ངག་གཉིས་ཀྱི་ཐོག་ནས་གཏམ་བཤད་ཀྱང་གནང་རྒྱུའི་གོ་སྐབས་བྱུང་འདུག་པ་བཅས། །