ཕྱི་ལོ་ ༢༠༡༥ ཟླ་ ༩ ཚེས་ ༡༤ རེས་གཟའ་ཟླ་བ།
༄༅། །ཕྱི་ལོ་ ༢༠༡༥ ཟླ་ ༩ ཚེས་ ༡༣ ཉིན་༸གོང་ས་༸སྐྱབས་མགོན་ཆེན་པོ་མཆོག་དབྱིན་ཡུལ་དུ་༸ཞབས་སོར་འཁོད་བསྟུན། དབྱིན་ཡུལ་ནང་པའི་ཚོགས་པ་ཁག་ ༣༧ དང་དབྱིན་ཡུལ་བོད་རིགས་ཚོགས་པ་གཉིས་ཀྱིས་དབྱིན་ཡུལ་ནང་རྒྱལ་སྤྱི་ཤུགས་ལྡན་ཚོགས་པའམ་བཀའ་གདམས་གསར་མ་ཞེས་པའི་ཤུགས་ལྡན་ཚོགས་པ་དེས་༸གོང་ས་༸སྐྱབས་མགོན་ཆེན་པོ་མཆོག་ལ་མཚན་སྨད་དང་། ངོ་རྒོལ་གྱི་ལས་འགུལ་སྤེལ་བའི་གནད་དོན་དེ་དག་དང་འབྲེལ་བའི་ཐོག་གསར་འགོད་བསྒྲགས་གཏམ་སྤེལ་ཡོད་པ་དང་། དེ་ཡང་དབྱིན་ཡུལ་ནང་པའི་ཚོགས་པས་གསར་འགོད་བསྒྲགས་གཏམ་སྤེལ་བའི་ནང་འཁོད་དོན།
ང་ཚོ་དབྱིན་ཡུལ་ནང་པའི་ཚོགས་པ་ཁག ༣༧ ནས་༸གོང་ས་༸སྐྱབས་མགོན་ཆེན་པོ་མཆོག་ལ་ངོ་རྒོལ་བྱེད་མཁན་གྱི་ཤུགས་ལྡན་ཚོགས་པའམ་བཀའ་གདམས་གསར་མའི་ཤུགས་ལྡན་ཚོགས་པའི་ལས་འགུལ་བ་དེ་དག་དང་། ལས་དོན་གང་ལའང་འབྲེལ་བ་མེད་ལ། དུས་ནམ་ཡང་ང་ཚོ་ཤུགས་ལྡན་དང་ཐ་དད་དུ་གནས་པ་ལས་འབྲེལ་བ་གཏན་ནས་བྱ་རྒྱུ་མིན།
ནང་པའི་ཚོགས་པ་ནང་ཁུལ་བསམ་ཚུལ་གང་ཡོད་པ་རྣམས་ཞི་བ་དང། གུས་བརྩི། རྒྱུ་མཚན་གནད་ལུགས་ལྡན་པའི་ངང་གསལ་སྟོན་བྱ་རྒྱུའི་དམ་བཅའ་འཇོག་བཞིན་ཡོད། དོལ་རྒྱལ་རྗེས་འབྲང་པས་བཟང་སྤྱོད་ལས་བརྒལ་ཏེ་མང་ཚོགས་ལ་མགོ་བོ་རྨོང་ཐབས་བྱས་པ་དང་། བཟང་སྤྱོད་དང་མི་མཐུན་པའི་སྤྱོད་ཚུལ་སྣ་ཚོགས་བྱས་པར་བརྟེན་དབྱིན་ཡུལ་མང་ཚོགས་ཀྱི་ཁྲོད་དུ་ནང་ཆོས་ཐོག་བལྟ་སྟངས་མི་འདྲ་བ་ཞིག་ཀྱང་འགྱུར་བཞིན་ཡོད། ང་ཚོས་མཐའ་གཅིག་ཏུ་༸གོང་ས་༸སྐྱབས་མགོན་ཆེན་པོ་མཆོག་གི་ལམ་སྟོན་མཛད་པ་དེར་ཤར་བསྐྱོད་བྱ་རྒྱུ་དང་། མགོན་པོ་གང་ཉིད་ཀྱི་སྐུ་ཚེའི་མཛད་འཁུར་དམ་བཅའ་གསུམ་མཛད་དང་མཛད་བཞིན་པ་དེར་རྒྱབ་སྐྱོར་དང་གུས་བརྩི་ཞུ་བཞིན་ཡོད། ཅེས་སོགས་འཁོད་པའི་གསར་འགོད་བསྒྲགས་གཏམ་ཞིག་སྤེལ་འདུག །
