༢༠༡༥ ཟླ་ ༩ ཚེས་ ༢༣ རེས་གཟའ་ལྷག་པ།
༄༅། །མཚུངས་མེད་ཀང་ར་རྫོང་ཁོངས་སུ་གཏོགས་པའི་ས་གནས་འགོ་འཛིན་ལྷན་རྒྱས་དང་། བཞུགས་སྒར་ཁུལ་བོད་མིའི་སྒྲིག་འཛུགས་ཀྱི་ལས་ཁུངས་ཁག་ཡོངས་ལ།
ཆེད་ཞུ། དགོངས་མངའ་བཞིན་། འདི་ནས་ ༢༠༡༤ ཟླ་ ༥ ཚེས་ ༣༠ ཉིན་གསལ་བསྒྲགས་ཇི་ཞུས། ཀང་ར་སྐོར་སྲུང་སྤྱི་ཁྱབ་ལས་ཁུངས་ནས་བོད་མི་རྣམས་ཀྱིས་སྐྱབས་བཅོལ་ལག་དེབ་དུས་ཐོག་དུས་འགྱངས་མ་ཞུས་པའི་གནས་ཚུལ་མང་པོ་འདུག་ན། སྐྱབས་བཅོལ་ལག་དེབ་དུས་ཐོག་དུས་འགྱངས་ཞུ་དགོས་པའི་ལམ་སྟོན་ཞུ་དགོས་ཕེབས་དོན་བཞིན། ས་གནས་འགོ་འཛིན་སོ་སོའི་ཁྱབ་ཁོངས་མི་མང་ལ་མ་གོ་མ་ཐོས་མེད་པའི་གསལ་བསྒྲགས་ཞུས་ཡོད།
ཉེ་དུས་སྐོར་སྲུང་སྤྱི་ཁྱབ་ལས་ཁུངས་ནས་བོད་མི་མང་པོ་ཞིག་གིས་ད་དུང་ཡང་དོ་སྣང་མེད་པར་མུ་མཐུད་དུས་ཐོག་དུས་འགྱངས་མ་བྱས་པའི་གནས་ཚུལ་ཡོང་བཞིན་འདུག་པ་འདི་ནི་ཁྲིམས་སྒྲིག་དང་མཐུན་མིན་ཙམ་མ་ཟད། ད་ནས་བཟུང་ཁྲིམས་ཐོག་ལག་བསྟར་བྱ་རྒྱུ་ཡིན་སྐོར་མང་ཚོགས་རྣམས་ལ་ནན་ཏན་གསལ་བསྒྲགས་བྱེད་དགོས་ཞེས་ནན་མངགས་གནང་ཞིང་། ཉིན་ཤས་གོང་སྐྱབས་བཅོལ་ལག་འཁྱེར་དུས་ཐོག་དུས་འགྱངས་མ་ཞུས་པའི་རྐྱེན་གྱིས་བོད་མི་གཉིས་ཁྲིམས་ཐོག་སྦྱར་བའི་གནས་ཚུལ་བྱུང་འདུག དེ་སྐོར་སྐོར་སྲུང་སྤྱི་ཁྱབ་པས་འདི་གའི་འབྲེལ་ཡོད་ལས་བྱེད་ཆེད་བསྐོང་དང་འབྲེལ་ཐུགས་ཕམ་ཆེན་པོའི་སྒོ་ནས་བཀའ་ནན་གནང་སྟངས་ལ་གཞིགས་ན།
ད་བར་བོད་མི་སྐྱབས་བཅོལ་བས་སྐྱབས་བཅོལ་ལག་དེབ་དུས་ཐོག་དུས་འགྱངས་མ་ཞུས་པ་རྣམས་ལ་སྐོར་སྲུང་སྤྱི་ཁྱབ་ལས་ཁུངས་ནས་བདེ་སྲུང་གི་རྒྱབ་གཉེར་ལ་བསམ་ཤེས་གནང་སྟེ་དུས་འགྱངས་གནང་ཡོད་པ་དེས་རྐྱེན་ཁྲིམས་སྒྲིག་ལ་ཐུགས་སྣང་ཆུང་སྐྱོན་མུ་མཐུད་དགོངས་བཞེས་གནང་ཐབས་མེད་ཅེས་ཚིག་ཐག་ཆོད་པོའི་བཀའ་ནན་ཕེབས་འདུག་ན། དེ་གའི་ཁྱབ་ཁོངས་མི་མང་ཡོངས་དང་། སློབ་གྲྭ་དང་། དགོན་སྡེ་གྲྭ་ཚང་། སྒྲིག་འཛུགས་སོགས་ལ་གོང་གསལ་གནད་དོན་སྐོར་མ་གོ་མ་ཐོས་མེད་པར་གསལ་བསྒྲགས་དང་། འགྲེལ་བརྗོད་ཀྱིས་སྒྲིག་གསལ་ཉིན་གྲངས་ ༡༥ གོང་སྐྱབས་བཅོལ་ལག་དེབ་ངེས་པར་དུ་དུས་འགྱངས་ཞུ་དགོས་པ་དང་། གལ་ཏེ་དུས་འགྱངས་མ་བྱས་པའི་དབང་གིས་ཁྲིམས་ཐོག་ཕྱག་བསྟར་གནང་ཚེ་དོ་བདག་ལའང་སྐུ་ངལ་ཆེད་འཕྲད་ཡོང་རྒྱུར་འདི་ནས་རོགས་ཕན་ཐུབ་མིན་ལ་གསལ་བསྒྲགས་ནན་འདྲོངས་ཡོང་བ་ཞུ། བདེ་སྲུང་ལས་ཁུངས་ནས་ཕྱི་ལོ་ ༢༠༡༥ ཟླ་བ་ ༩ ཚེས་ ༢༣ ལ།།
གོང་གསལ་གསལ་བསྒྲགས་ཀྱི་འབྲུ་དོན་ལ་དྲི་བ་ཡོད་ཚེ། བདེ་སྲུང་ཡན་ལག་གི་ཞལ་པར་ཨང་གྲངས་ (༠༡༨༩༢) ༢༢༡༥༦༠ ཐོག་འབྲེལ་བ་གནང་རོགས་གནང་།
